Äjuä bi huahni Dabid

¿DÄ ZA gi hyandi te thogi? Nuni metsi bi ñäni nuni rä zi tꞌu̱tudi. Nuni oso xki zitsꞌi nuni zi tꞌu̱tudi pa xä zi. Pe nuni metsi bi nte̱hui ꞌne bi zimbäbi de rä ne nuni oso. Mi mꞌai nuni oso pa xä ntsate, ¡nuni metsi bi hyo! Mä nꞌa rä pa, nuni metsi bi ñäni nꞌa rä de̱ti de nꞌa zate. ¿Gi handi hanja nuni metsi himi tsu? ¿Gi pädi te rä thuhu?

Nuni bäsjäꞌi rä thuhu Dabid. Mi ꞌmu̱i ha Belen. Rä xita mi rä thuhu Obed, geꞌä mi rä tꞌu̱ Rut ꞌne Boas. ¿Gi beni toꞌoꞌu̱? Rä dada Dabid mi rä thuhu Jese. Dabid mi fadi yä de̱ti rä dada. Dabid bi mꞌu̱i 10 yä je̱ya mꞌe̱fa de nuꞌmu̱ Jeoba xki huahni Saul pa dä ndä.

Bi zo̱ho̱ rä pa nuꞌmu̱ Jeoba bi ꞌñembäbi Samuel: “Ju̱ nꞌa rä hogä aseite ꞌne gi ma ha Belen ha rä ngu Jese. Nuga xtä huahni nꞌa rä tꞌu̱ pa dä zo̱ho̱ dä ndä”. Nuꞌmu̱ Samuel bi hyandi Eliab, näꞌä rä tsꞌu̱ntꞌu̱ mädä Jese, bi ꞌñenä: “Zäi ge go gehni xä huahni Jeoba”. Pe Jeoba bi ꞌñembi: “Ogi handi rä ñho, nixi rä ñhetsꞌi. Nuga hixtä huahni pa dä zo̱ho̱ dä ndä”.

Hänge Jese bi nzofo mänꞌa rä tꞌu̱ mi rä thuhu Abinadab ꞌne bä tsimpäbi Samuel. Pe Samuel bi ꞌñenä: “Hinä, hingo gehni xä huahni Jeoba”. Nubye̱, Jese bi nzofo näꞌä rä tꞌu̱ mi rä thuhu Sama. Pe Samuel bi ꞌñenä: “Hinä, hingo gehni xä huahni Jeoba”. Jese bä tsimpäbi Samuel yoto yä tꞌu̱, pe Jeoba nixi nꞌa de geꞌu̱ himbi huahni. Nubye̱ Samuel bi ñꞌani: “¿Gehyu̱ gatꞌho ri tꞌu̱?”.

Jese bi dädi: “Di ꞌme̱di näꞌä zi tꞌu̱lo pe bi fadi yä de̱ti”. Mbä tsꞌimpäbi Dabid, Samuel bi hyandi ge xa mähotho näꞌä metsi. Nubye̱ Jeoba bi ꞌñembi Samuel: “Go gehni. Xiꞌspäbi rä aseite ha rä ñäxu”. Samuel bi jabu̱ ꞌne mꞌe̱fa, Dabid geꞌä bi zo̱ho̱ bi ndä ha Israel.