Bi ꞌuege yä hnini

¿GI PÄDI por hanja nuni ñꞌo̱ho̱ bi tu̱ni nuni dutu di hñä? Geꞌä bi mändabi Jeoba bi me̱fi. Nuni ñꞌo̱ho̱ rä thuhu Aias, nꞌa rä mꞌe̱hni Äjuä. ¿Gi pädi te mi pe̱fi nuꞌu̱ yä mꞌe̱hni Äjuä? Äjuä mi xipi nuꞌu̱ yä mꞌe̱hni te ma xä thogi mꞌe̱fa.

Ja ngu gi handi, Aias ñäui Jeroboan. Jeroboan mi nꞌa rä ñꞌo̱ho̱ xki mpe̱fi ko Salomon. Nuꞌmu̱ Aias bi nthe̱ui Jeroboan ha rä ꞌñuu, ¿gi pädi te bi me̱fi? Bi hñäki näꞌä rä rꞌayꞌo dutu mi hee ꞌne bi tu̱ni 12 yä xe̱ni. ꞌNe bi ꞌñembäbi Jeroboan: “Ju̱ 10 yä xe̱ni pa nuꞌi”. ¿Gi pädi por hanja bi tꞌumbi 10 xe̱ni Jeroboan?

Aias bi mää ge Jeoba ma xä hñämbäbi rꞌa yä hnini nuꞌu̱ mi mända Salomon. Bi mää ge Äjuä xki mää ge 10 yä tꞌu̱kä hnini ma xä umbi pa dä mända Jeroboan. Se̱he̱ yoho yä tꞌu̱kä hnini ma xä tꞌumbi rä tsꞌu̱ntꞌu̱ Salomon pa xä mända.

Mi yꞌo̱de Salomon näꞌä bi mää Aias, xi bi nkue̱ ndunthi. Mi ne dä hyo Jeroboan, hänge nuni bi ma pa Ejipto. Mꞌe̱fa, Salomon bi du. Bi mända po 40 yä je̱ya, pe nubye̱, näꞌä rä tsꞌu̱ntꞌu̱ mi rä thuhu Reoboam geꞌä bi zo̱ho̱ bi mända. Ha Ejipto, Jeroboan bi yꞌo̱de ge Salomon ya xki du, hänge bi mengi pa Israel.

Reoboam, hingä mi mända xä ñho. Nuni mänꞌa xa mi rä tsꞌomꞌu̱i ke Salomon. Jeroboan ꞌne märꞌa yä ñꞌo̱ho̱ bi ma bä nuu Reoboam ꞌne bä xipi ge dä ñhojäꞌi ko yä jäꞌi. Pe Reoboam himbi yꞌo̱de. Mänꞌa xa bi ntsꞌo jäꞌi. Hänge yä jäꞌi bi hñutsꞌi de gä ndä Jeroboan ha nuꞌu̱ 10 yä tꞌu̱kä hnini. Reoboam bi sigi bi mända nuꞌu̱ mä yoho yä tꞌu̱kä hnini: Benjamin ꞌne Juda.

Jeroboan hingä mi ne ge yä jäꞌi de nuꞌu̱ 10 yä tꞌu̱kä hnini habu̱ mi mända, xä ma ha näꞌä templo mi ja ha Jerusalen pa xä xo̱kämbeni Jeoba. Hänge bi hyoki yoho yä tꞌu̱kä doro de gä oro ꞌne bi japi nuꞌu̱ yä jäꞌi bi ndäne. Nguntꞌä, ha nuꞌu̱ yä hnini bi neki xa ndunthi yä tuhni ꞌne yä nduxte jäꞌi.

ꞌNehe bi nja yä xuñha ha nuꞌu̱ yoho yä tꞌu̱kä hnini de rä sur. Hingä xki uaditho ku̱tꞌa nje̱ya de nuꞌmu̱ bi mu̱di bi mända Reoboam, nubye̱ näꞌä ndä de Ejipto bi ma bä ntuhni kontra Jerusalen. Bi hñätsꞌi ndunthi yä tesoro nuꞌu̱ mi ja ha rä templo Jeoba. Hänge näꞌä templo, po ndunthi yä je̱ya himbi neki xä ñho ja ngu ri mu̱di.