Jeosafat mi kamfri Jeoba

¿GI PÄDI toꞌo nuyu̱ yä ñꞌo̱ho̱ ꞌne te pe̱fi? Ma dä ma ha nꞌa rä tuhni, ꞌne nuyu̱ yä ñꞌo̱ho̱ di ꞌme̱tꞌo mi tuhu. Zäi nuꞌi gi ñꞌani: “¿Por hanja hindi hñä yä majuai ꞌne yä lansa pa dä ntuhni nuyu̱ yä ñꞌo̱ho̱ tuhu?”. Ma gä handihu̱.

Jeosafat mi mända ha nuꞌu̱ yoho yä tꞌu̱kä hnini de rä sur ha Israel. Bi mꞌu̱i ha nuꞌu̱ yä pa Akab ꞌne Jesabel, nuꞌmu̱ Akab mi mända ha nuꞌu̱ rꞌe̱tꞌa yä tꞌu̱kä hnini de rä norte ha Israel. Pe Jeosafat mi nꞌa hogä ndä ja ngu xki nja näꞌä rä dada mi rä thuhu Asa. Hänge po ndunthi yä je̱ya nuꞌu̱ yä jäꞌi mi ꞌmu̱i ha nuꞌu̱ yoho yä tꞌu̱kä hnini de rä sur, bi me̱ꞌtsi nꞌa rä hogä mꞌu̱i.

Pe nubye̱ bi neki nꞌa thogi näꞌä xa bi pidi yä jäꞌi. Rꞌa yä jäꞌi bi ma bä umbäbi nunä raso Jeosafat: “Xä ꞌñepu̱ xa ndunthi yä soldado de nuꞌu̱ yä hnini Moab, Amon ꞌne de rä tꞌo̱ho̱ Seir pa dä ntuhni kongeꞌähu̱”. Ndunthi yä israelita bi muntsꞌi ha Jerusalen pa bi hyoni rä mfatsꞌi Jeoba, bi ma ha templo ꞌne Jeosafat bi xadi njaua: “Jeoba mä Zi Dadaꞌihe, hindi pädi te gä pe̱fihe. Hindä za gä ntuhnihe ko nuni däta taxo de gä soldado. ¡Faxkägihe!”.

Jeoba bi yꞌo̱de ꞌne bi ꞌñembi nꞌa rä mꞌe̱hni dä ma dä xipi näꞌä rä hnini: “Nunä tuhni hingä ri me̱tihu̱, go rä me̱ti Äjuä. Hingä go ma gi ntuhnihu̱. Hyandäthohu̱ hanja Jeoba ma dä ñäñꞌähu̱”.

Rä hyaxꞌä Jeosafat bi ꞌñembi rä hnini: “¡Kamfrihu̱ Jeoba!”. ꞌNepu̱ bi hñutsꞌi yä duhu pa dä mꞌe̱tꞌo de nuꞌu̱ yä soldado, ꞌne mientra mi yꞌo, mi tuhu̱ yä jähñä pa rä Zi Dada Jeoba. ¿Gi pädi te bi thogi nuꞌmu̱ ya ma xä zo̱ni pa dä ntuhni? Jeoba bi japi nuꞌu̱ yä nkontra bi ntuhnise̱ nꞌa ngu mänꞌa. ꞌNe mi zo̱ni yä israelita, ¡gatꞌho nuꞌu̱ yä soldado mi yä nkontra ya xki du!

Jeosafat bi ꞌñudi ge mi ja rä mfädi ngeꞌä mi kamfribi Äjuä, ¿hänge hää? Mu̱ gä pe̱fihu̱ njabu̱, ma gä udihu̱ ge ja mä mfädihu̱ ꞌnehe.