Nuyu̱ himbi ndandiñähmu

¿GI BENI toꞌo nuyu̱ hñuu yä metsi? Hää, gehyu̱ yä ntsitsꞌi Daniel nuꞌu̱ himbi ne bi zi nuꞌu̱ yä ñhuni xki ꞌñembi Äjuä ge hindä zi. Yä me Babilonia mi embi Sadrak, Mesak ꞌne Abednego nuyu̱ yä metsi. Pe nubye̱ hyandi, ¿por hanja hindi ndandiñähmu pa dä ndäne nuni däta kꞌoi de gä oro ngu nuyu̱ märꞌa yä jäꞌi? Ma gä handihu̱ por hanja.

¿Gi beni nuꞌu̱ yä mhända bi yꞌofo Jeoba tꞌembi yä Dies Mandamiento? Näꞌä rä mu̱di mhända mi enä: “Oxki xo̱kämbeni märꞌa yä zidada nuꞌu̱ hingä geki”. Ja ngu gi handi, nuyu̱ yä metsi bi yꞌo̱de nunä mhända mäske bi japi xä ñhei.

Näbukodonosor näꞌä ndä de Babilonia, bi nzohni ndunthi yä jäꞌi nuꞌu̱ mi ja yä däta nsu pa xä ndäne näꞌä däta kꞌoi de gä oro xki hyoki. Bi ꞌñembäbi yä jäꞌi: “Ngu gi yꞌo̱dehu̱ nuyu̱ yä me̱ꞌmda dä pixti yä ndäni, dä me̱i yä arpa ꞌne märꞌa yä ꞌmida, pe̱ꞌtsi te gi ndandiñähmuhu̱ ꞌne gi ndänehu̱ nunä däta kꞌoi de gä oro. Toꞌo hindä ja njabu̱ ma dä tꞌe̱ntꞌi ha nꞌa däta hu xa zo̱o̱”.

Mi yꞌo̱de Näbukodonosor ge Sadrak, Mesak ꞌne Abednego hixki ndäne näꞌä däta kꞌoi, xa bi nkue̱ ꞌne bi mända bä tsꞌii nuꞌu̱ yä metsi pa bi ꞌñembi mänꞌaki ge dä ndäne näꞌä däta kꞌoi. Pe nuꞌu̱ yä metsi xa mi kamfribi Jeoba ꞌne bi ꞌñembäbi: “Näꞌä mä Zi Dada di pe̱päbihe dä za dä ñängägihe. Pe mu̱ dä ñängägihe o hinä, nuje hingä ma gä ndänehe nuni ri däta kꞌoi de gä oro”.

Mi yꞌo̱de Näbukodonosor näꞌä bi mää nuꞌu̱ yä metsi, mänꞌa xa bi nkue̱. Mi ja getbu̱ nꞌa hu ꞌne bi mända: “¡Paꞌtihu̱ mä yoto mꞌiki näꞌä hu!”. ꞌNepu̱ bi nzofo rꞌa de nuꞌu̱ yä soldado xa mi tse̱di pa bi dätꞌi Sadrak, Mesak ꞌne Abednego ꞌne bi yꞌe̱ntꞌi ha näꞌä däta hu. Pe näꞌä däta hu xa mi faspi ꞌne go bi tsätꞌi ꞌne bi hyo nuꞌu̱ yä soldado. Xibye̱, ¿te bi thogi ko nuꞌu̱ hñuu yä metsi bi tꞌe̱ntꞌi ha näꞌä däta hu?

Näbukodonosor bi ma bä handi te mi thogi mboo de näꞌä hu ꞌne xi bi ntsu. Bi ꞌñenä: “¿Hänge mi hñuu nuꞌu̱ yä ñꞌo̱ho̱ dä thätꞌihu̱ ꞌne dä e̱ntꞌihu̱ ha nunä hu?”.

Nuꞌu̱ yä ꞌme̱go bi dädi: “Hää, geꞌä dä pe̱fihu̱”.

Näbukodonosor bi ꞌñenä: “Pe di handi goho yä ñꞌo̱ho̱ nuyu̱ yꞌo ha yä tsibi. Hingi thätꞌi ha nixi xä zätꞌi. Ha nuni mänꞌa ñꞌo̱ho̱ ꞌñenä ngu nꞌa e̱nxe̱”. Näbukodonosor bi uatꞌi ha rä goxthi näꞌä hu ꞌne bi maꞌti nuꞌu̱ yä metsi: “¡Sadrak! ¡Mesak! ¡Abednego! ¡Yä ꞌme̱goꞌihu̱ Äjuä, guä po̱ñhu̱!”.

Mi bo̱ni, gatꞌho yä jäꞌi bi hyandi ge nuyu̱ yä metsi hinte xki ja. Nubye̱, Näbukodonosor bi ꞌñenä: “¡Dä tꞌespäbi rä nsu näꞌä Zi Dada di xo̱kämbeni Sadrak, Mesak ꞌne Abednego! Bä pe̱hni rä e̱nxe̱ pa bi ñäni nuyu̱ yä metsi ngeꞌä himbi ne bi ndandiñähmu ha nixi bi ndäne mänꞌa zidada. Nuyu̱ yä metsi o̱te ho̱nse̱ näꞌä rä Zi Dada di xo̱kämbeni”.

¿Hänge nunä rä hogä kꞌoi faxkägihu̱ pa gä o̱tehu̱ nzäntho Jeoba?