Yä jädo Jerusalen

¡HYANDI hanja xa di mpe̱fi nuyu̱ yä ñꞌo̱ho̱! Yä israelita hokuäbi yä jädo Jerusalen. Ya xki thogi 152 yä je̱ya dende nuꞌmu̱ Näbukodonosor bi huati Jerusalen, bi yo̱tpäbi yä jädo ꞌne bi tsätꞌi yä goxthi näꞌä hnini. Mi bo̱ni yä israelita de Babilonia pa bi mengi ha Jerusalen, hingä nguntꞌä bi za bi gu̱tsꞌi nuꞌu̱ yä jädo xki ño̱tꞌe.

Gatꞌho nuꞌu̱ yä je̱ya bi thogi, yä israelita bi mꞌu̱i ko rä ntsu ngeꞌä hinte ma jädo mi kotꞌi Jerusalen. Mi tsu ge nuꞌu̱ yä nkontra xä yu̱tꞌi pa xä hyo. Pe nubye̱ di handihu̱ hanja nuni ñꞌo̱ho̱ rä thuhu Nemias fatsꞌi yä israelita pa ju̱tsꞌi mänꞌaki nuyu̱ yä jädo mi kotꞌi Jerusalen. ¿Gi pädi toꞌo Nemias?

Nemias mi nꞌa israelita bä ehe de ha rä hnini Susa, habu̱ mi ꞌmu̱i Märdokeo ꞌne Ester. Nemias mi mpe̱fi ha rä palasio näꞌä ndä de Persia, hindi pädihu̱ pe zäi ge mi ntsitsꞌi ko Märdokeo ꞌne Ester. Rä Mäkä Tꞌofo hingi mää ge Nemias bi mpe̱fi ko Asuero, näꞌä rä däme Ester. Pe hää mää ge bi mpe̱fi ko Artajerjes, näꞌä ndä bi zo̱ho̱ bi mända mꞌe̱fa de Asuero.

Beni, Artajerjes geꞌä hogä ndä bi umbi yä oro ꞌne yä plata Esdras pa bi ma ha Jerusalen ꞌne bi hyokuäbi xä ñho rä templo Jeoba. Pe Esdras himbi gu̱tsꞌi nuꞌu̱ yä jädo mi kotꞌi Jerusalen. Ma gä handihu̱ hanja Nemias go bi gu̱tsꞌi nuꞌu̱ yä jädo.

Ya xki thogi 13 yä je̱ya dende nuꞌmu̱ Artajerjes bi umbi yä bojä Esdras pa xä hyoki xä ñho rä templo Äjuä. Nubye̱, Nemias mi pe̱ꞌtsi nꞌa däta ꞌme̱fi, mi häꞌspäbi rä binu rä ndä, pe mꞌe̱tꞌo mi handi mu̱ hingä mi tu benenu.

Nꞌa rä pa, näꞌä rä ku Nemias mi rä thuhu Anäni ꞌne märꞌa yä israelita, bi ma bä nuu Nemias ꞌne bi xipäbi gatꞌho nuꞌu̱ yä xuñha mi thogi yä israelita. ꞌNehe bi xipäbi ge nuꞌu̱ yä jädo mi kotꞌi Jerusalen hinto xki gu̱tsꞌitho. Nemias xi bi durämu̱i ꞌne bi xatuäbi rä Zi Dada Jeoba.

Nꞌa rä pa, näꞌä ndä bi da ngue̱nda ge Nemias mi turämu̱i hänge bi yꞌambi: “¿Por hanja gi turimu̱i?”. Nemias bi xipi ge mi turämu̱i ngeꞌä yä israelita mi pe̱ꞌtsi yä xuñha ꞌne ngeꞌä xki yo̱tꞌe yä jädo Jerusalen. Hänge Artajerjes bi ꞌñembi: “Xibye̱, ¿te gi ne gi xikägi?”.

Nemias bi dädi: “Rꞌaki nse̱ki gä ma ha Jerusalen pa gä ju̱tsꞌi nuꞌu̱ yä jädo xä yo̱tꞌe”. Artajerjes xa mi rä hojäꞌi hänge bi umbi nse̱ki dä ma, ꞌne bi matsꞌi bi hyoni yä zaa pa nuꞌu̱ yä ꞌme̱fiꞌu̱. Hingä xki thogi ndunthi yä pa de xki zo̱ni ha Jerusalen, Nemias bi xipi yä israelita näꞌä mi mbeni dä me̱fi. Nuꞌu̱ yä israelita bi johya ꞌne bi ꞌñenä: “Hää, ma gä fu̱di gä mpe̱fihu̱”.

Mi hyandi nuꞌu̱ yä nkontra ge yä israelita mi yꞌo mi hoki nuꞌu̱ yä jädo, bi ꞌñenä: “Maha pa gä hohu̱ nuꞌu̱ yä israelita ꞌne ma gä ꞌmaꞌmihu̱ nuꞌu̱ yä ꞌme̱fi”. Mi bädi njabu̱ Nemias, bi umbi yä majuai ꞌne yä lansa nuꞌu̱ yä me̱fi ꞌne bi ꞌñembi: “Ogi tsuhu̱, ntuhnihu̱ pa gi ñänihu̱ ri kuhu̱, ri bätsihu̱, ri ꞌme̱hñähu̱, ꞌne ri nguhu̱”.

Yä israelita himi tsu. Mientra mi mpe̱fi, mi hñä yä lansa ꞌne yä majuai. Hänge ho̱nse̱ 52 yä pa bi zitsꞌi pa bi uadi bi hyoki nuꞌu̱ yä jädo. Nubye̱ yä israelita ya himi tsu ngeꞌä Jerusalen ya mi jotꞌi. Nemias ꞌne Esdras bi mu̱di bi ꞌñudi yä mhända Äjuä ꞌne yä israelita xa mi johya.

Pe yä israelita tobe himi ꞌmu̱i ja ngu mi ꞌmu̱i änte de dä tsꞌitsꞌi pa Babilonia. Yä israelita mi pe̱ꞌtsi te dä me̱päbi näꞌä ndä de Persia ngeꞌä go geꞌä mi mända. Pe Jeoba xki mää ge ma xpä pe̱hni nꞌa rꞌayꞌo ndä pa dä hä nꞌa rä hogä mꞌu̱i. ¿Toꞌo näꞌä ndä ꞌne hanja ma dä hä nꞌa hogä mꞌu̱i ha rä Xiꞌmhai? Bi thogi 450 yä je̱ya pa ja bi fädi toꞌo näꞌä ndä. Nubye̱, bi zo̱ho̱ näꞌä pa pa xä mꞌu̱i nꞌa zi ꞌue̱ne. Pe ma gä handihu̱ hanja bi thogi.