Yä tsꞌo tꞌo̱tꞌe ma dä uadi

¿TE GI handi ha rä kꞌoi? Hää, xa ndunthi yä to̱ge ko yä tꞌaxä fani. Pe hyandi de habu̱ bä gäi. Nuyu̱ yä fani xa di nextꞌi, ¡bä gäi de mähetsꞌi ha yä gui! Pe, ¿bi ja yä fani ha mähetsꞌi?

Hinä, nuyu̱ hingä xa mäjuäni yä fani. Yä fani hindä za dä nextꞌi ha yä gui, ¿hänge hinä? Pe rä Mäkä Tꞌofo mää de yä fani ha mähetsꞌi. ¿Gi pädi por hanja?

Ngeꞌä mäyaꞌmu̱ yä jäꞌi mi to̱ge yä fani pa mi pa ha yä tuhni. Hänge nuꞌmu̱ rä Mäkä Tꞌofo mää ge de mähetsꞌi bä gäi yä to̱ge ko yä fani, udi ge Äjuä ma dä hä nꞌa tuhni kontra yä tsꞌomꞌu̱i jäꞌi. ¿Gi pädi te rä thuhu näꞌä tuhniꞌä? Rä thuhu Armäjedon. Ha näꞌä tuhniꞌä, Äjuä ma dä hñäki gatꞌho nuꞌu̱ yä tsꞌo tꞌo̱tꞌe ja ha rä Xiꞌmhai.

Rä Hesu go Geꞌä ma dä gu̱tꞌi rä ꞌñuu ha näꞌä tuhni rä thuhu Armäjedon. Beni, Jeoba bi huahni rä Hesu pa go geꞌä dä mända ha Rä tsꞌu̱tꞌhui. Hänge rä Hesu di hñä nꞌa koronä. Nuni rä majuai di hñä, udi ge ma dä hyo gatꞌho nuꞌu̱ yä nkontra Äjuä. ¿Ma gä ntsuhu̱ ngeꞌä Äjuä ma dä huati gatꞌho yä tsꞌomꞌu̱i jäꞌi?

Hyoni Rä ꞌmede 10. ¿Te gi handi? Hää, nꞌa Däta däyꞌe bi hyo gatꞌho yä tsꞌomꞌu̱i jäꞌi. ¿Toꞌo bi japi bi dagi näꞌä Däta däyꞌe? Zi Dada Jeoba. Nubye̱ hyandi Rä ꞌmede 15. ¿Gi handi te thogi? Jeoba bi huati ko rä tsibi rä hnini Sodomä ꞌne Gomorra.

Thogi ha Rä ꞌmede 33. Hyandi te thogi ko nuyu̱ yä fani ꞌne nuyu̱ yä ejipsio ko nuyu̱ yä tsanza de gä tuhni. ¿Toꞌo bi japi bi jätꞌi yä ejipsio ha yä dehe? Jeoba go bi jabu̱ pa bi ñäni rä hnini. Nubye̱ hyoni nuꞌu̱ yä ꞌmede 36 ꞌne 76. Nubu̱ dä pädihu̱ hanja Jeoba bi hye̱gi bi uadi rä hnini ngeꞌä xa mi yä tsꞌomꞌu̱i.

Hänge nuju̱ hindi tsuhu̱ nuꞌmu̱ di pädihu̱ ge Jeoba ma dä pe̱hni yä e̱nxe̱ pa dä huati gatꞌho nuꞌu̱ yä ntsꞌomꞌu̱i di neki ha rä Xiꞌmhai. ¿Te ma dä thogi mꞌe̱fa? Ma gä handihu̱.