Rä ntheke 1

Hanja dä za gi pädi te adi Äjuä

¿Te mä noya hutsꞌi ha rä Mäkä Tꞌofo? (1)

¿Toꞌo bi uni rä mfeni pa bi tꞌofo rä Mäkä Tꞌofo? (2)

¿Por hanja mähyoni gi pädi näꞌä hutsꞌi ha rä Mäkä Tꞌofo? (3)

1. Rä Mäkä Tꞌofo näꞌä nꞌa rä hogä ntꞌuni xä rꞌakägihu̱ Äjuä. ꞌÑenä ngu nꞌa rä karta näꞌä xä yꞌofo nꞌa rä hogä dada pa yä bätsi. Xikägihu̱ näꞌä mäjuäni de Äjuä, toꞌoꞌä ꞌne ndaꞌä nuꞌu̱ yä mhända. Xikägihu̱ hanja dä za gä ñhanthu̱ yä xuñha ꞌne hanja dä za gä tinihu̱ näꞌä xa mäjuäni rä johya. Se̱he̱ rä Mäkä Tꞌofo xikägihu̱ näꞌä mähyoni gä pe̱fihu̱ pa gä johyabihu̱ rä mfeni Äjuä (Salmo 1:1-3; Isaías 48:17, 18).

2. Bi mꞌu̱ 40 yä jäꞌi nuꞌu̱ bi yꞌofo rä Mäkä Tꞌofo. Pa bi tꞌofo bi zitsꞌi 1,600 yä je̱ya, bi mu̱di dende rä je̱ya 1513 n.J.M. Rä Mäkä Tꞌofo pe̱ꞌtsi 66 yä mfistꞌofo. Nuꞌu̱ yä jäꞌi mi hämpäbi rä mäkä tsꞌe̱di Äjuä pa bi yꞌofo nuꞌä mi xipäbi. Hänge nuꞌu̱ yä jäꞌi himbi yꞌofo yä mfenise̱, Äjuä näꞌä bi ꞌmu̱i mähetsꞌi go geꞌä bi uni rä mfeni pa bi tꞌofo rä Mäkä Tꞌofo (2 Timoteo 3:16, 17; 2 Pedro 1:20, 21).

3. Nuꞌmu̱ mi thokuäbi yä kꞌoi rä Mäkä Tꞌofo, Äjuä bi mända ge dä thoki ja ngu näꞌä xki tꞌofo ri mu̱di ꞌne bi su pa njabu̱ himbi mꞌe̱di. Xä tꞌofo ndunthi yä mfistꞌofo, pe rä Mäkä Tꞌofo geꞌä mänꞌa xä thokuäbi xi ndunthi yä kꞌoi. Hingä gatꞌho yä jäꞌi ma dä johya ngeꞌä ma gi pädi de rä Mäkä Tꞌofo, pe ogi hopi dä hñäkꞌäꞌi. Pa gi pe̱ꞌtsi nꞌa rä te pa nzäntho, mähyoni gi pädi toꞌo rä Zi Dada ꞌne gi pe̱päbi yä mhända mädi dä tꞌu̱tsaꞌi (Mateo 5:10-12; Juan 17:3).