Rä ntheke 2

¿Toꞌo Äjuä?

¿Toꞌo rä Zi Dada mäjuäni, ꞌne te rä thuhu? (1, 2)

¿Te nguꞌä rä Zi Dada? (3)

¿Te mä mꞌu̱i pe̱ꞌtsi rä Zi Dada? (4)

¿Xä ñho gä xo̱kämbenihu̱ Äjuä ko yä kꞌoi? (5)

¿Hanja dä za gä pädihu̱ de rä Zi Dada? (6)

1. Yä jäꞌi di xo̱kämbeni ndunthi yä tꞌo̱tꞌe. Pe rä Mäkä Tꞌofo xikägihu̱ ge ꞌmu̱i se̱he̱ nꞌatho rä Zi Dada näꞌä xa MÄJUÄNI. Näꞌä bi hyoki gatꞌho näꞌä ja ha mähetsꞌi ꞌne ha rä Xiꞌmhai. Se̱he̱ꞌä ri ꞌñepi gä xo̱kämbenihu̱ ngeꞌä go geꞌä bi rꞌakägihu̱ mä tehu̱ (1 Corintios 8:5, 6; Apocalipsis [Revelación] 4:11).

2. Mäske Äjuä xä thuꞌmpi ndunthi yä thuhu, näꞌä pe̱ꞌtsi se̱he̱ nꞌatho rä thuhu: JEOBA. Ha ndunthi yä Mäkä Tꞌofo xä thäkuäbi rä thuhu ꞌne se̱he̱ xä thutsꞌi Äjuä o Zi Dada. Ha näꞌä rä mu̱di rä Mäkä Tꞌofo bi thoki, rä thuhu Jeoba mi hutsꞌi 7,000 yä mꞌiki (Éxodo 3:15; Salmo 83:18).

3. Äjuä hingi pe̱ꞌtsi rä ndoyꞌo ngu nuju̱. «Äjuä näꞌä nꞌa rä Espiritu», njabu̱ mängä rä Mäkä Tꞌofo (Juan 4:24, Nuevo Mundo [NM]). Nꞌa rä espiritu pe̱ꞌtsi nꞌa rä te mänꞌa rä dängi ke näꞌä mä tehu̱. Ninꞌa rä jäꞌi hinxä za xä hyandi Äjuä. Mäske rä Zi Dada Jeoba bi ꞌmu̱i ha mähetsꞌi, näꞌä handi gatꞌho (Salmo 11:4, 5; Juan 1:18; Hebreos 4:13). ¿Te rä me̱ꞌä rä espiritu santo? Näꞌä hingä ngu Äjuä. Rä espiritu santo geꞌä rä tsꞌe̱di pe̱ꞌtsi Äjuä pa dä hyoki yä tꞌo̱tꞌe (Salmo 104:30).

4. Rä Mäkä Tꞌofo xikägihu̱ te ngu rä mꞌu̱i rä Zi Dada Jeoba. Xikägihu̱ ge pe̱ꞌtsi rä mhäte, rä tsꞌu̱tꞌhui, ge xi rä bämhñä ꞌne ja ndunthi rä tsꞌe̱di (Deuteronomio 32:4; Job 12:13; Isaías 40:26; 1 Juan 4:8). ꞌNehe xikägihu̱ ge Jeoba ja rä nhuekäte, ge rä hojäꞌi, ge uni rä pumbäte, rꞌakägihu̱ gatꞌho näꞌä di honihu̱ ꞌne hindi dämä nkue̱. Ngu nuꞌu̱ yä bätsi yä yꞌo̱de, nuju̱ mähyoni gä te̱mbäbihu̱ rä mꞌu̱i (Efesios 5:1, 2).

5. ¿Xä ñho gä ndandiñähmuhu̱ ꞌne gä xatuäbihu̱ yä kꞌoi? Hinä (Éxodo 20:4, 5). Jeoba di mändagihu̱ ge se̱he̱ꞌä ri ꞌñepi gä xo̱kämbenihu̱. Hinto umbäbi rä nsunda, nixi nꞌa rä jäꞌi ha nixi nꞌa rä tꞌo̱tꞌe. Gatꞌho nuꞌu̱ yä kꞌoi hinte mä tsꞌe̱di pe̱ꞌtsi pa dä maxkägihu̱ (Salmo 115:4-8; Isaías 42:8).

6. Nuju̱ dä za gä pädihu̱ xä ñho Äjuä mu̱ gä handihu̱ ꞌne gä ntso̱ꞌmihu̱ te utkägihu̱ de geꞌä gatꞌho näꞌä xä hyoki. Gatꞌho näꞌä xä hyoki Äjuä utkägihu̱ ge pe̱ꞌtsi gatꞌho rä tsꞌe̱di ꞌne rä mfädi, ꞌnehe di neki rä mhäte (Salmo 19:1-6; Romanos 1:20). ꞌNehe ma gä pädihu̱ Äjuä mu̱ gä nxadihu̱ rä Mäkä Tꞌofo. Ja gekua xikägihu̱ te nguꞌä rä Zi Dada. ꞌNehe xikägihu̱ näꞌä ma dä me̱fi ꞌne näꞌä di mändagihu̱ (Amós 3:7; 2 Timoteo 3:16, 17).

[Yä kꞌoi ha rä nxii 5]

Di pädihu̱ de Äjuä ko gatꞌho näꞌä xä hyoki ꞌne ko rä Mäkä Tꞌofo