Rä ntheke 16

Mu̱ nuꞌi ya gi beni gi pe̱päbi rä bolunta Äjuä

¿Te mähyoni gi pe̱fi pa gi ntsitsꞌiui Äjuä? (1, 2)

¿Hanja dä za gi xipäbi Äjuä ge gi umbäbi ri te pa gi pe̱päbi? (1)

¿Hämꞌu̱ dä za gi nku̱ꞌmdehe? (2)

¿Hanja dä za gi tini rä tsꞌe̱di pa njabu̱ hingi ꞌuege de ha rä ꞌñuu Äjuä? (3)

1. Pa gi ntsitsꞌiui Äjuä mähyoni gi pe̱ꞌtsi mꞌe̱tꞌo nꞌa rä mfädi de näꞌä mäjuäni de rä Mäkä Tꞌofo (1 Timoteo 2:3, 4), ꞌne gi kamfri o gi ñꞌeme näꞌä xä tꞌutꞌäꞌi de rä Mäkä Tꞌofo (Hebreos 11:6), gi mpe̱tsꞌi o gi yobri de nuꞌu̱ ri tsꞌoki xkä o̱tꞌe (Hechos 17:30, 31) gi tsopu̱ nuꞌu̱ yä tsꞌoki ꞌne gi pe̱fi se̱he̱ näꞌä xä ñho (Hechos 3:19). Näꞌä rä mhäte gi pe̱ꞌtsuäbi Äjuä ma dä jaꞌi gi umbäbi ri te, ¿hanja gi ja? Gi jase̱ nꞌa ri sadi habu̱ nuꞌi ma gi xipäbi Äjuä ge gi umbäbi ri te pa gi pe̱päbi rä bolunta (Mateo 16:24; 22:37).

2. Mu̱ ya gä häni nꞌa rä mfädi de rä Mäkä Tꞌofo ꞌne ya gä ja ri sadi habu̱ gä xipi Äjuä ge gi umbäbi ri te pa gi pe̱päbi, nubye̱ mähyoni gi nku̱ꞌmdehe (Mateo 28:19, 20, NM). Ko rä nku̱ꞌmdehe gatꞌho ma dä bädi ge nuꞌi ya gä umbäbi ri te Jeoba pa gi pe̱päbi. Di nku̱ꞌmdehe se̱he̱ nuꞌu̱ yä jäꞌi ya ja yä je̱ya ꞌne ya pädi hanja ri ꞌñehe dä me̱päbi Äjuä. Nꞌa rä jäꞌi näꞌä di nku̱ꞌmdehe mähyoni ge gatꞌho rä ndoyꞌo dä yu̱i ha rä dehea (Marcos 1:9, 10, NM; Hechos 8:36, NM).

3. Mu̱ ya gä umbäbi ri te Äjuä, näꞌä to̱ꞌmi gi pe̱fi näꞌä ri kohi gä ja kongeꞌä (Salmo 50:14; Eclesiastés 5:4, 5). Rä Diablo ma dä tsapi dä ꞌuekꞌäꞌi de ha rä ꞌñuu Äjuä (1 Pedro 5:8). Pe rä sadi ma dä maxꞌäꞌi gi joni ko rä Zi Dada (Filipenses 4:6, 7). Nxadi nzäntho rä Noya Äjuä (Salmo 1:1-3). Ogi ꞌuege de ha rä mhuntsꞌi (Hebreos 13:17). Mu̱ gi pe̱fi njabu̱ ma gi tini rä tsꞌe̱di pa hingi ꞌuege de ha rä ꞌñuu Äjuä. ꞌNe pa nzäntho, ma dä za gi pe̱fi gatꞌho näꞌä adi Äjuä de geꞌi.

[Nota de hai ha rä nxii]