Äjuä bi jäpi rä Abran ꞌne rä mꞌu̱i

JEOBA mi pädi ge nꞌa rä pa, näꞌä rä zi Tꞌu̱ xa mi mädi ma xä sufri ꞌne ma xä ungä rä te. Geꞌä mi ne dä mängä nuꞌu̱ yä noya hutsꞌi ha rä Génesis 3:15. Pa rä mexiꞌmhai dä bädi hängu rä muui pe̱ꞌtsi näꞌä rä te bi uni rä tꞌu̱ Äjuä, Jeoba bi mända dä tꞌofo ha rä Mäkä Tꞌofo näꞌä bi me̱fi rä Abran nuꞌmu̱ Äjuä bi yꞌapäbi dä umbi rä du näꞌä rä tꞌu̱ mrä thuhu rä Isaak.

Rä Abran mi pe̱ꞌtsuäbi ndunthi rä jamfri Jeoba. Beni ge Äjuä xki ñäꞌti rä Abran ge näꞌä rä Ñänte ma dä ehe de ha rä mꞌu̱i rä Isaak. Rä Abran mi pädi ge mu̱ xä du rä Isaak, Äjuä xä za xä gu̱tsꞌi de ha rä du. Hänge rä Abran bi yꞌo̱de ꞌne bi zitsꞌi rä Isaak pa dä umbi rä du, pe Jeoba bä pe̱hni nꞌa rä e̱nxe̱ pa himbi hyopäbi. Jeoba bi xipi rä Abran ge mi johya ngeꞌä nuni mrä yꞌo̱de, ꞌne bi xipi ge hixki pumfri näꞌä rä kohi xki ja kongeꞌä.

Mꞌe̱fa rä Isaak bi me̱ꞌtsi yoho yä tꞌu̱: rä Esau ꞌne rä Jakob. De nuyu̱ yoho, se̱he̱ rä Jakob mi xo̱kämbeni Äjuä ngu ri ꞌñehe hänge Jeoba bi jäpi. Jeoba bi patuäbi rä thuhu ꞌne bi hñuꞌtsuäbi Israel. Nuni bi me̱ꞌtsi 12 yä tꞌu̱. Gehyu̱ bi hyokä näꞌä rä dängä hnini tꞌembi Israel. Pe ¿hanja se̱he̱ de näꞌä rä mꞌu̱i rä Jakob bi zo̱ho̱ bi nja nꞌa rä dängä hnini?

Njaua bi mu̱di: nuꞌu̱ mädä yä tꞌu̱ rä Jakob mi pe̱ꞌtsuä rä embidia rä Jose. Ko yä kue̱, nuyu̱ bi pa ꞌne bi ungä mꞌe̱go rä Jose. Nuꞌu̱ yä dai bi zitsꞌi pa ha rä hnini Ejipto habu̱ bi thogi ndunthi yä xuñha. Pe nuni zi bäsjäꞌi mi o̱te Äjuä ꞌne himi tsu, hänge Jeoba bi matsꞌi. Nꞌa rä pa rä faraon, näꞌä rä ndä de ha Ejipto bi zofo rä Jose pa dä umbäbi nꞌa rä dängä nsu. Hänge mꞌe̱fa bi za bi matsꞌi rä dada ꞌne yä ku nuꞌmu̱ bi thogi nꞌa rä dängä thuhu habu̱ bi japi rä Jakob dä me̱hni yä tꞌu̱ pa dä dai rä ñhuni ha Ejipto. ¿Toꞌo mi o rä yꞌe̱ gatꞌho näꞌä rä ñhuni mi ja ha Ejipto? ¡Rä Jose! Mꞌe̱fa bi me̱ꞌtsi nꞌa rä hogä ntini ko yä ku —nubye̱ nuyu̱ yä ku, mi yobri o mi mpe̱tsꞌi ko näꞌä xki yꞌo̱tꞌe— pe rä Jose bi punduäbi ꞌne bi mända dä tsꞌintuäbi nuꞌu̱ märꞌa yä ku ꞌne rä dada. Rä faraon bi umbäbi rꞌa yä hai xa xmä ñho, ja gehni bi sigi bi ndunthi nunä rä mꞌu̱i ꞌne bi me̱ꞌtsi ndunthi yä ñho. Rä Jose mi pädi ge Äjuä go geꞌä xki matsꞌi pa njabu̱ dä thogi näꞌä xki mängä Jeoba.

Rä Jakob bä mꞌu̱hui yä jäꞌi ha Ejipto. Änte dä du bi mää ge de näꞌä nꞌa rä tꞌu̱ mrä thuhu rä Juda, ja ma dä eheni näꞌä rä Ñänte ꞌne ma dä zo̱ho̱ dä nja nꞌa rä Ndä näꞌä dri pe̱ꞌtsi ndunthi rä tsꞌe̱di. Mꞌe̱fa, rä Jose bi mää ge nꞌa rä pa Äjuä ma dä gu̱ki rä Jakob ꞌne gatꞌho rä mꞌu̱i de ha Ejipto.

(Ehe ha rä Génesis ha yä ntheke 20 asta 50 ꞌne ha rä Hebreos 11:17-22.)