Äjuä bi gu̱ki yä israelita de Ejipto

NDUNTHI nuꞌu̱ yä je̱ya bi mꞌu̱i yä israelita ha Ejipto, nuyu̱ bi ndunthi ꞌne bi me̱ꞌtsi ndunthi yä ñho. ꞌNehe nꞌa rä rꞌayꞌo faraon xi mrä tsꞌomꞌu̱i bi mu̱di bi mända ha Ejipto. Nuni rä ndä himi pädi toꞌo rä Jose. Mi hyandi hanja yä israelita bi ndunthi, bi mända drä ja ꞌme̱go ꞌne bi mända dä tꞌe̱ntꞌä ha rä däthe tꞌembi Nilo nuꞌu̱ yä zi ꞌue̱ne mñä metsi. Nꞌa rä israelita himi tsu, bi yꞌe̱ntꞌä rä zi ꞌue̱ne ha nꞌa rä ꞌmo̱tsꞌe ꞌne bi ꞌñägi ha yä xithi. Rä tꞌixu rä faraon bi zu̱di nunä rä ꞌue̱ne ꞌne bi zitsꞌi ha rä nguu pa dä tede. Näꞌä rä ꞌue̱ne bi tꞌembäbi rä Moises ꞌne bi te ngu nꞌa rä tꞌu̱ rä faraon.

Mi me̱ꞌtsi 40 yä je̱ya, rä Moises bi me̱ꞌtsi rꞌa yä xuñha ngeꞌä bi ñäni nꞌa rä israelita de nꞌa rä ejipsio xa mrä tsꞌomꞌu̱i. Hänge rä Moises bi bo̱ni bi ma yabu̱. Mꞌe̱fa rä Moises bi me̱ꞌtsi 80 yä je̱ya, nubye̱ Äjuä bi xipäbi ge dä mengi ha Ejipto pa dä xipi rä faraon ge dä hyopi dä bo̱ni yä israelita.

Rä faraon himbi ne, hänge Äjuä bä pe̱hni 10 yä plaga ha Ejipto. Äjuä bä pe̱hni rꞌa mänꞌa nuꞌu̱ yä plaga. Pe mꞌe̱tꞌo bi me̱hni rä Moises pa dä xipäbi rä faraon ge dä yꞌo̱de pa Jeoba hindä me̱hni nuꞌu̱ yä plaga. Pe rä faraon mrä ꞌñexmänsu ꞌne himbi ne bi yꞌo̱te rä Moises ha nixi Jeoba. Ha näꞌä rä gäxä plaga, Äjuä bä pe̱hni nꞌa rä e̱nxe̱ pa bi hyopä nuꞌu̱ yä mu̱di tꞌu̱ yä ejipsio. Pe rä e̱nxe̱ Äjuä himbi thogi ha yä nguu habu̱ bi hyandi xki jotsꞌi rä ji de gä tꞌu̱kä de̱ti ha rä nthetsꞌi de yä gosthi. Hänge yä israelita bi mu̱di bi beni tatꞌä je̱ya nunä rä thogi ko nꞌa rä dängo rä thuhu rä Paskua.

Nuꞌmu̱ mi du näꞌä rä mu̱di tꞌu̱ rä faraon, nubye̱ hää bi hyopi rä Moises ꞌne yä israelita dä bo̱ni de gehni Ejipto. Yä israelita bi dämä ñhoki pa dä bo̱ni pe rä faraon bi yobri ngeꞌä xki hyopi dä bo̱ni, hänge ko nuꞌu̱ yä ndaro ꞌne yä tsanza de gä tuhni bi te̱tuäbi nuꞌu̱ yä israelita. Mi tso̱ni ha rä ñäni rä ndehe mrä thuhu rä mar Rojo, ꞌñenä mi otho hanja dä thogi yä israelita. Pe rä Zi Dada Jeoba bi hyeke näꞌä rä ndehe pa njabu̱ bi za bi thogi rä hnini. Yä ejipsio bi tsapi dä thogi ꞌnehe pe Äjuä bi japi bi njotꞌi nuꞌu̱ yä dehe. Rä faraon ꞌne gatꞌho yä ndaro bi jätꞌi.

Mꞌe̱fa, nuꞌu̱ yä israelita bi ntsaya getbu̱ ha näꞌä rä tꞌo̱ho̱ rä thuhu Sinäi. Ja gehni rä Zi Dada Jeoba bi ja nꞌa rä kohi kongeꞌu̱. Jeoba bi umbäbi rꞌa yä mhända rä Moises pa yä israelita. Nuꞌu̱ yä mhända ma xä gu̱hni, ma xä su ꞌne ma xä ꞌñuti hanja dä mꞌu̱i. Mu̱ yä israelita xä yꞌo̱de nuꞌu̱ yä mhända, Äjuä ma xä mꞌu̱i kongeꞌu̱ ꞌne porängehyu̱ Jeoba ma xä jäpi märꞌa yä hnini.

Ndunthi nuꞌu̱ yä israelita himbi me̱ꞌtsuäbi rä jamfri Äjuä. Hänge Jeoba bi zu̱i ꞌne bi japäbi dä ñꞌo 40 yä je̱ya ha rꞌa yä yꞌotꞌä hai. Nuyu̱ habu̱räza bi ñꞌo. Rä Moises bi huahni rä Josue pa go dä gu̱hni yä israelita. Nubye̱ hää, bi zo̱ho̱ näꞌä rä pa mi to̱ꞌmi yä israelita pa dä yu̱tꞌi ha näꞌä rä hai xki ñäꞌti Äjuä rä Abran.

(Ehe ha rä Éxodo, rä Levítico, rä Números, rä Deuteronomio, rä Salmo 136:10-15 ꞌne ha rä Hechos 7:17-36.)