Yä jähñä utkähu̱ ꞌne nupkä mä mfenihu̱

DE GATꞌHO nuꞌu̱ yä mfistꞌofo pe̱ꞌtsi rä Mäkä Tꞌofo, rä Salmos geꞌä mänꞌa rä dängi. Hutsꞌi ndunthi yä jähñä. Bi zitsꞌi 1,000 yä je̱ya pa bi tꞌofo gatꞌho nuꞌu̱ yä jähñä. Ha nuꞌu̱ yä jähñä di nheki ge nuꞌu̱ toꞌo bi yꞌofo mi johya, mi eꞌtsuäbi rä nsu ꞌne mi umbä njamädi Äjuä, di nheki nuꞌu̱ yä u̱gi, yä ntso̱ꞌmi ꞌne yä dumu̱i mi pe̱ꞌtsi nuꞌmu̱ mi yobri de yä tsꞌoki xki me̱fi. Gatꞌho nuꞌu̱ yä jäꞌi bi yꞌofo nuya yä jähñä mi pe̱ꞌtsi nꞌa rä hogä ntsitsꞌi ko Äjuä. Ma gä handihu̱ te mä mfeni hutsꞌi ha rä mfistꞌofo Salmos.

Jeoba Näꞌä toꞌo xa rä Dängä tsꞌu̱tꞌhui de gatꞌho rä xiꞌmhai, geꞌä ri ꞌñepi gä eꞌtsuähu̱ rä nsu ꞌne gä xo̱kämbenihu̱. Ha rä Salmo 83:18 enä: «Nuꞌi, ri thuhu Jeoba, nuꞌi se̱he̱ꞌi go geꞌe xä Ñhetsꞌiꞌi de gatꞌho rä xiꞌmhai». Ndunthi yä salmo eꞌtsuä rä nsu Jeoba ngeꞌä xä hyoki mähetsꞌi, yä tso̱o̱, rä te nuua ha rä Xiꞌmhai ꞌne mä ndoyꞌohu̱ xa tsꞌamähotho (Salmos 8, 19, 139 ꞌne 148). Rꞌaa eꞌtsuä rä nsu Jeoba ngeꞌä nuni rä Zi Dada di ñäni ꞌne di su nuꞌu̱ yä jäꞌi o̱te yä mhända (Salmos 18, 97 ꞌne 138). Rꞌaa tutuäbi yä jähñä ngeꞌä Jeoba näꞌä rä Zi Dada de gä tsꞌu̱tꞌhui fatsꞌi nuꞌu̱ joꞌo toꞌo dä ñäni. ꞌNehe ma dä kastiga nuꞌu̱ yä tsꞌomꞌu̱i jäꞌi (Salmos 11, 68 ꞌne 146).

Jeoba umbä rä mfatsꞌi ꞌne di nupäbi yä mfeni nuꞌu̱ di mädi Äjuä. Ndunthi yä jäꞌi pädi näꞌä rä jähñä de rä Salmo 23, rä Dabid bi mää ge näꞌä mä Zi Dadahu̱ bi ꞌmu̱i ha mähetsꞌi ꞌñenä ngu nꞌa rä zi mayꞌo näꞌä di gu̱hni ꞌne di su yä zi de̱ti. Ha rä Salmo 65:2 jakägihu̱ gä benihu̱ ge Jeoba go geꞌä «o̱de yä sadi». Ha rä Salmo 39 ꞌne 51 xä nupäbi rä mfeni ndunthi nuꞌu̱ toꞌo xä me̱fi yä dängä tsꞌoki. Rä Dabid di nheki ge xa mäjuäni mi yobri ko nuꞌu̱ yä dängä tsꞌoki xki yꞌo̱tꞌe ꞌne udi ge mi kamfri ge Jeoba ma xä punduäbi. Ha rä Salmo 55:22 xikägihu̱ gä pe̱ꞌtsuäbihu̱ rä jamfri rä Zi Dada Jeoba ꞌne gä e̱ntꞌuähu̱ ha rä yꞌe̱ gatꞌho mä dumu̱ihu̱.

Ko näꞌä rä Tsꞌu̱tꞌhui rä Mesia, Jeoba ma dä hä nꞌa rä rꞌayꞌo xiꞌmhai. Ha yä Salmo hutsꞌi ndunthi yä noya nuꞌu̱ mää de rä Mesia, näꞌä rä Ndä xki mängä Äjuä ge ma dä hñutsꞌi. Ja ngu rä Salmo 2 mää ge nuni rä Ndä ma dä huati gatꞌho nuꞌu̱ yä hnini di nkontraui rä tsꞌu̱tꞌhui. Rä Salmo 72 udi ge ma dä hñäki rä thuhu, yä tsꞌomꞌu̱i jäꞌi ꞌne nuꞌu̱ toꞌo hingi o̱tꞌe rä tsꞌu̱tꞌhui xä ñho. Rä Salmo 46:9 mää ge ko näꞌä rä Tsꞌu̱tꞌhui rä Mesia, Jeoba ma dä hñäki gatꞌho yä tuhni ꞌne ma dä tehmi nuꞌu̱ yä nzafi de gä tuhni. Rä Salmo 37 mää ge ha näꞌä rä rꞌayꞌo xiꞌmhai ma dä njoꞌo yä tsꞌomꞌu̱i jäꞌi ꞌne nuꞌu̱ yä hojäꞌi ma dä mꞌu̱i pa nzäntho ha nꞌa rä hogä mꞌu̱i temäꞌentho.

(Ehe ha rä mfistꞌofo yä Salmos.)