Rä du rä Kristo

RÄ Hesu bi ungä ntꞌo̱de rä noya Äjuä hñu nje̱ya mädee. Näꞌä mi pädi ge mänꞌitꞌho ma dä du nuua ha rä Xiꞌmhai. Nuꞌu̱ yä makhä mñä judio mi honi hanja dä hyo, pe mi tsu te dä mängä yä jäꞌi, ngeꞌä nuyu̱ mi handi rä Hesu ngu nꞌa rä mꞌe̱hni Äjuä. Nubye̱, rä Zithu bi yu̱tꞌi ha rä mfeni rä Judas —näꞌä mrä apostol rä Hesu— pa bi traisionä rä xahnäte. Nuꞌu̱ yä makhä bi guꞌti rä Judas 30 yä bojä de gä plata.

Näꞌä rä xui mi ja rä dängo de gä Paskua, rä Hesu xki muntsꞌi ko nuꞌu̱ yä apostol pa dä ja näꞌä rä fenäte. Rä Hesu bi ꞌñembi rä Judas ge dä bo̱ni dä ma, ꞌnepu̱ rä Kristo bi ja nꞌa rä rꞌayꞌo fenäte näꞌä tꞌembi rä Gäxä Ntꞌoxi rä Kristo. Bi gu̱ nꞌa xe̱ni rä thuhme, bi yꞌapä Äjuä dä jäpi ꞌnepu̱ bi umbäbi nuꞌu̱ 11 yä apostol ꞌne bi ꞌñenä: «Gehnä ri bo̱ni mä ndoyꞌo ma gä uni po rängeꞌähu̱. Sigi gi yꞌo̱thu̱ njaua ngu nꞌa rä fenäte de gekägi». ꞌNepu̱, bi gu̱ nꞌa rä kopa mi po rä binu de gä the̱ngä obxi ꞌne bi ꞌñenä: «Nunä kopa gehnä ri bo̱ni nꞌa rä rꞌayꞌo kohi di o̱tꞌe ko näꞌä mä ji ma gä fani» (Lucas 22:19, 20, NM).

Näꞌä rä gäxä xui bi mꞌu̱kua rä Hesu, bi ꞌñuti ndunthi yä tꞌo̱tꞌe nuꞌu̱ yä apostol. Bi umbi nꞌa rä rꞌayꞌo mhända, ge dä me̱ꞌtsi rä mhäte, bi ꞌñenä: «Mu̱ [nuꞌähu̱] gi mädihu̱ nꞌa ngu mä nꞌaa [...] gatꞌho ma dä bädi ge mäjuäni» gi te̱ngägihu̱ (Juan 13:34, 35). Bi ꞌñembäbi ge hindä duyämu̱i po näꞌä ma dä thogi rä Hesu ꞌne bi xatuäbi Äjuä po rängeꞌu̱. Mi uadi, bi tuti yä jähñä pa Äjuä ꞌnepu̱ bi ma.

Mi tso̱ni rä Hesu ha rä uädri Jetsemäni, bi ndandiñähmu ꞌne ko ngatꞌho rä koraso bi xatuäbi Jeoba. Nthämfri bi zo̱ho̱ rꞌa yä ndaro ko yä däjuai, yä makhä ꞌne märꞌa yä jäꞌi pa bi gu̱ rä Hesu. Rä Judas xki ꞌñembi nuꞌu̱ yä jäꞌi: näꞌä gi hyanthu̱ gä tsu̱ꞌtsuäbi rä hmi geꞌä rä Hesu. Yä ndaro bi zixä rä Kristo, nuꞌu̱ yä apostol bi dämä ma rä nhestꞌihi.

Ha yä dängä tsꞌu̱tꞌhui yä judio, rä Hesu bi mꞌai ꞌne bi mää ge nuꞌä mrä Tꞌu̱ Äjuä. Kongehnä, nuꞌu̱ yä nzaya bi hyo̱xä rä thai rä Hesu ge xki zani Äjuä. Toꞌo mi tsani Äjuä mi tꞌumbäbi rä du. Hänge rä Hesu bi tꞌembi dä thogi ha mänꞌa rä tsꞌu̱tꞌhui habu̱ mi hudi rä Ponsio Pilato, näꞌä rä ndä de ha rä hnini Romä. Nuni rä ndä bi hyandi ge rä Hesu hinte mä tsꞌoki mi tu, mäske njabu̱ rä Pilato himbi za te bi yꞌo̱tꞌe, ngeꞌä yä jäꞌi bi yꞌadi dä tꞌumbi rä du rä Hesu.

Yä ndaro bi zitsꞌi rä Hesu ha nꞌa rä luga mi tꞌembi Golgota o Ñäxmädu, ꞌne bi tsꞌu̱ti ha nꞌa rä zaa. Mi zo̱ rä hyadi pe nthämfri bi mꞌe̱xui. Mi ndee bi du rä Hesu ꞌne bi nja nꞌa rä mbiꞌmhai xi ntsꞌe̱di. Rä ndoyꞌo rä Hesu bi tꞌagi ha nꞌa rä oꞌtsi xki thoki ha nꞌa rä do. Rä hyaxꞌä yä makhä bi guꞌmi xä ñho näꞌä rä oꞌtsi ꞌne bi mända drä su. ¿Ja bi gohini rä Hesu ha näꞌä rä ntꞌagi? Hinä, mänꞌitꞌho ma dä thogi nꞌa rä dängä milagro näꞌä hixki nheki.

(Ehe ha rä Mateo ha yä ntheke 26 ꞌne 27, rä Marcos ha yä ntheke 14 ꞌne 15, rä Lucas ha yä ntheke 22 ꞌne 23 ꞌne ha rä Juan yä ntheke 12 asta 19.)