Yä apostol himbi ntsu bi ungä ntꞌo̱de rä noya Äjuä

BI THOGI 10 yä pa nuꞌmu̱ rä Hesu xki bo̱tsꞌe ha mähetsꞌi, ha Jerusalen ha nꞌa rä dängo yä judio mi tꞌembi rä Pentekostes ha näꞌä rä je̱ya 33, xki muntsꞌi 120 yä de̱ni rä Hesu ha nꞌa rä nguu. Nthämfri bi ntꞌo̱de nꞌa rä bu̱nthi xi ntsꞌe̱di, ꞌne nuꞌu̱ yä de̱ni rä Hesu bi mu̱di bi ñä rꞌanꞌañꞌo yä ñhäki nuꞌu̱ himi pädihmähä. ¿Por hanja? Ngeꞌä nuꞌu̱ bi hñäni rä mäkä tsꞌe̱di Äjuä.

Ha rä hnini Jerusalen xki zo̱ho̱ xi ndunthi yä zo̱nte nuꞌu̱ xki ꞌñehe de ndunthi yä hnini pa dä ntini ha näꞌä rä dängo. Himi pädi te dä mängä nuꞌu̱ yä jäꞌi nuꞌmu̱ bi yꞌo̱de hanja nuꞌu̱ yä de̱ni rä Hesu mi tsa dä ñä ndunthi yä ñhäki ꞌne njabu̱ mi tsa dä ñäui gatꞌho yä jäꞌi. Xibye̱ ¿hanja mi njabu̱? Pa yä jäꞌi dä bädi, rä Pedro bi benduäbi näꞌä xki mängä nꞌa rä mꞌe̱hni Äjuä mrä thuhu rä Joel habu̱ xki mää ge Äjuä ma dä pe̱ntuäbi rä mäkä tsꞌe̱di nuꞌu̱ yä de̱ni pa dä ja yä milagro ꞌne märꞌa yä dängä tꞌo̱tꞌe (Joel 2:28, 29). Nuyu̱ yä milagro bi ꞌñudi ge näꞌä rä mhuntsꞌi bi zoogi rä Kristo geꞌä mi pe̱ꞌtsuäbi rä jäpi Äjuä pe näꞌä rä hnini Israel hinä. Hänge dende geꞌmu̱, toꞌo dä ne dä me̱päbi Äjuä pe̱ꞌtsi dä de̱ni rä Kristo.

Nuꞌu̱ yä nkontra rä Kristo bi yꞌo̱tue ndunthi yä ntsꞌomꞌu̱i nuꞌu̱ yä gamfri. Nꞌa rä pa, rꞌaa bi tꞌe̱ntꞌä ha rä fadi, pe mi nxui bä ehe nꞌa rä e̱nxe̱, bi gu̱ki ꞌne bi ꞌñembäbi ge dä sigi dä ungä ntꞌo̱de rä noya Äjuä. Mi hyatsꞌi, bi yu̱tꞌi ha näꞌä rä templo pa dä mää toꞌo mi geꞌä rä Kristo. Nuꞌu̱ yä makhä xi bi nkue̱ ꞌne bi ꞌñembäbi ge ya hindä ungä ntꞌo̱de rä noya Äjuä. Pe nuꞌu̱ yä apostol himbi ntsu ꞌne bi dädi: «Nuje mänꞌa ri ꞌñepi gä o̱tꞌhe Äjuä ke yä mhända yä mexiꞌmhai» (Hechos 5:28, 29).

Nuꞌu̱ yä nkontra rä Kristo mänꞌa bi ntsꞌomꞌu̱i. Rꞌa yä judio bi mää ge xki yꞌo̱de hanja nuꞌu̱ yä de̱ni rä Kristo xki zani Äjuä. Hänge rä Esteban bi tꞌumbi rä du ko yä nkꞌahni. ꞌNe mi mahni nꞌa rä bäsjäꞌi mrä mengu Tarso mrä thuhu Saulo, nuꞌä ꞌnehe bi ho bi hyandi hanja bi tꞌumbi rä du rä Esteban. Mꞌe̱fa bi ma ha Damäsko pa duä ju̱ gatꞌho nuꞌu̱ yä de̱ni rä Hesu. Pe ha rä ꞌñuu, nꞌa rä ñotꞌi bä ehe ha mähetsꞌi ꞌne bi xada rä Saulo. Nthämfri bi yꞌo̱de toꞌo bi ñä ꞌne bi ꞌñenä: «Saulo, Saulo, ¿hanja gi hongägi pa gi yꞌo̱tkä rä ntsꞌomꞌu̱i?». Nuꞌmu̱ rä Saulo bi dädi ꞌne bi ꞌñenä: «¿Toꞌoꞌi?». Nuꞌä bi dädi ꞌne bi ꞌñenä: «Nuga go geke drä Hesu» (Hechos 9:3-5).

Bi thogi hñu pa, ꞌnepu̱ rä Hesu bi me̱hni nꞌa rä de̱ni mrä thuhu rä Anänias pa dä xokuäbi yä da rä Saulo. Rä Saulo bi nku̱ꞌmdehe ꞌne bi mu̱di bi ungä ntꞌo̱de rä noya Äjuä ko rä johya. Mꞌe̱fa rä Saulo bi tꞌembi rä apostol Pablo, näꞌä bi ñꞌo ndunthi ha yä hnini pa bi ungä ntꞌo̱de rä noya Äjuä.

Nuꞌu̱ yä mu̱di de̱ni rä Hesu mi xipi de rä Tsꞌu̱tꞌhui Äjuä se̱he̱ nuꞌu̱ yä judio ꞌne yä samäritano. Pe nꞌa rä pa, nꞌa rä e̱nxe̱ bi zo̱ni rä Kornelio, nꞌa rä ndaro mrä me Romä. Nuni mi kamfri näꞌä rä Zi Dada mäjuäni. Näꞌä rä e̱nxe̱ bi mändabi rä Kornelio duä tsii rä apostol Pedro. Rä Pedro ko märꞌa yä gamfri bi ma bä uti de rä noya Äjuä rä Kornelio ꞌne nuꞌu̱ mi ꞌmu̱i ha rä nguu. Mi ñä rä Pedro ha nthämfri nuꞌu̱ yä gamfri bi hñäni rä mäkä tsꞌe̱di Äjuä, hänge rä Pedro bi mändabi dä nku̱ꞌmdehe de rä thuhu rä Hesu. Dende geꞌmu̱, yä jäꞌi de gatꞌho yä hnini dä za dä hñäni nꞌa rä te pa nzäntho. Nubye̱ hää, nuꞌu̱ yä gamfri xki zoogi rä Hesu xki ñhoki xä ñho pa dä ungä ntꞌo̱de yä hogä noya de rä tsꞌu̱tꞌhui Äjuä ha gatꞌho rä xiꞌmhai.

(Ehe ha rä mfistꞌofo Hechos 1:1–11:21.)