¿Te mä humu̱i ja pa nuꞌu̱ yä jäꞌi xä du?

1. ¿Te mä hogä noya uni Äjuä de nuꞌu̱ yä jäꞌi xä du?

Mi zo̱ni rä Hesu ha Betania, näꞌä tꞌu̱kä hnini mi ja getbu̱ de Jerusalen, bi bädi ge ya mi pe̱ꞌtsi goho yä pa de xki du näꞌä rä ntsitsꞌi rä Hesu mi rä thuhu Lasaro. Rä Hesu bi ma ko nuꞌu̱ yä nju Lasaro mi yä thuhu Märta ꞌne Märia pa bä handi habu̱ xki tꞌagi. Nguntꞌä, bi muntsꞌi xi ndunthi yä jäꞌi. ¡Hängu rä johya bi me̱ꞌtsi Märta ꞌne Märia nuꞌmu̱ bi hyandi ge rä Hesu bi gu̱tsꞌi Lasaro de rä du! Hñeti Juan 11:21-24, 38-44.

Märta ya mi pädi de nuꞌu̱ yä hogä noya uni Äjuä de nuꞌu̱ yä jäꞌi xä du. Ya mi pädi ge Jeoba beni dä gu̱tsꞌi nuꞌu̱ yä jäꞌi xä du pa dä mꞌu̱i mänꞌaki nuua ha rä Xiꞌmhai. Hñeti Job 14:14, 15.

2. ¿Te thogi ko nuꞌu̱ yä jäꞌi xä du?

Äjuä bi hyoki yä jäꞌi ko rä fonthai (Génesis 2:7; 3:19). Yä jäꞌi hingi pe̱ꞌtsi nꞌa espiritu o nꞌa alma näꞌä ꞌmu̱i ha yä ndoyꞌo ꞌne ha yä ngo̱. Nuꞌmu̱ yä jäꞌi tu, hinte mä alma po̱ni. Nuꞌmu̱ yä jäꞌi tu, tu ꞌnehe rä bo̱yꞌo ꞌne ya hinte di mbeni. Hänge mi nuhu Lasaro de rä du, hinte bi mää mu̱ te bä handi o bä thogi nuꞌmu̱ bi du. Ngeꞌä nuꞌu̱ yä jäꞌi xä du hinte handi, hinte di mbeni ha nixi hinte tsa. Hñeti Eclesiastés 9:5, 6, 10.

¿Di kastiga Äjuä ha rä tsibi nuꞌu̱ yä jäꞌi xä du? Ndunthi yä jäꞌi enä ge Äjuä di kastiga ha rä nidu nuꞌu̱ yä jäꞌi tu. Pe hingä mäjuäni, rä Mäkä Tꞌofo udi ge nuꞌu̱ yä jäꞌi xä du hinte tsa ꞌne hinte di mbeni. Hänge Äjuä xa di u̱ rä mfeni ꞌne hindi ho nuꞌmu̱ yä jäꞌi udi ge ja nꞌa kastigo ha rä nidu. Ngeꞌä nunä nꞌa däta nhemhñä o nkꞌuamba kontra Äjuä. Hñeti Jeremías 7:31.

Hyandi rä bideo ¿Te thogi ko nuꞌu̱ yä jäꞌi xä du?

3. ¿Dä za dä ñä ko nuju̱ nuꞌu̱ yä jäꞌi xä du?

Nuꞌu̱ yä jäꞌi xä du hingi tsa dä ñä ha nixi tsa dä yꞌo̱de (Salmo 115:17). Pe ꞌmu̱i rꞌa yä tsꞌo e̱nxe̱ nuꞌu̱ di nzofo yä jäꞌi pa njabu̱ nuyu̱ dä hñuyämu̱i ge bi pengi nuꞌu̱ yä jäꞌi xä du (2 Pedro 2:4, NM). Jeoba di mändagihu̱ ge hingä tsapi gä nzofohu̱ nuꞌu̱ yä jäꞌi xä du. Hñeti Deuteronomio 18:10, 11.

4. ¿Toꞌo nuꞌu̱ ma dä nuhu̱ de rä du?

Ndunthi yä miyon nuꞌu̱ yä jäꞌi xä du, ma dä mengi dä mꞌu̱i nuua ha rä Xiꞌmhai. ꞌNehe, Äjuä ma dä gu̱tsꞌi asta rꞌa de nuꞌu̱ yä jäꞌi himbi bädi Äjuä ꞌne bi me̱fi yä tsꞌo tꞌo̱tꞌe. Hñeti Lucas 23:43, NM ꞌne Hechos 24:15.

Nuꞌu̱ yä jäꞌi ma dä nuhu de rä du, ma dä za dä bädi näꞌä xa mäjuäni de Äjuä, ma dä gamfri ꞌne ma dä yꞌo̱te rä Hesu (Apocalipsis [Revelación] 20:11-13). Nuꞌu̱ yä jäꞌi ma dä nuhu de rä du, pe̱ꞌtsi te dä me̱fi näꞌä xä ñho pa njabu̱ dä za dä mꞌu̱i pa nzäntho nuua ha rä Xiꞌmhai. Hñeti Juan 5:28, 29.

5. ¿Te utkägihu̱ de Jeoba nuꞌmu̱ di pädihu̱ ge ma dä gu̱tsꞌi nuꞌu̱ yä jäꞌi xä du?

Äjuä bä pe̱hni rä Tꞌu̱ pa bi du po nuju̱, ꞌne njabu̱ bi uni näꞌä humu̱i pa nuꞌu̱ yä jäꞌi xä du. Nuꞌmu̱ di pädihu̱ ge Jeoba ma dä gu̱tsꞌi nuꞌu̱ yä jäꞌi xä du, di handihu̱ hängu di mäkägihu̱ Jeoba, ꞌne xa rä hojäꞌi ko nuju̱ mäske di pe̱ꞌtsihu̱ rä tsꞌoki. Nuꞌmu̱ xti gu̱tsꞌi Jeoba nuꞌu̱ xä du, ¿toꞌo xa gi hohmä gi hyandi? Hñeti Juan 3:16 ꞌne Romanos 6:23.