Samuel nzäntho bi me̱fi näꞌä di ho rä Zi Dada Jeoba

Samuel mi ꞌmu̱i ꞌne mi mpe̱fi ha rä tabernäkulo dende mi nꞌa zi tꞌu̱kä bätsi. Ha rä tabernäkulo ja mi pani yä jäꞌi pa mi xo̱kämbeni Jeoba. ¿Gi ne gi pädi hanja ja bi zo̱ho̱ bi mꞌu̱hni Samuel? Nde, mꞌe̱tꞌo ma gä pädihu̱ de Anä, näꞌä rä nänä Samuel.

Po ndunthi yä je̱ya, Anä hingä mi tsa dä me̱ꞌtsi yä bätsi mäske xa mi nehmä. Hänge bi xatuäbi Jeoba ꞌne bi ꞌñembi: “Po rä mäte, faxkägi Zi Dada Jeoba”. ꞌNe bi prometebi: “Mu̱ gi rꞌakägi nꞌa zi bätsi, ma gä pe̱hni dä ꞌmu̱i ꞌne dä mpe̱fi ha rä tabernäkulo”. Jeoba bi yꞌo̱de näꞌä sadiꞌä, ꞌne Anä bi me̱ꞌtsi nꞌa zi bätsi näꞌä bi ꞌñembäbi Samuel. Mi me̱ꞌtsi Samuel hñuu o goho nje̱ya, Anä bi kumpli rä promesa ꞌne bi zitsꞌi ha rä tabernäkulo pa ja bä pe̱päbini rä Zi Dada Jeoba.

Eli geꞌä mi rä däta majhä mi mpe̱fi ha rä tabernäkulo, nuꞌu̱ yoho yä tꞌu̱ ꞌnehe ja mi mpe̱fini de gä majhä. Yä jäꞌi mi pe̱ꞌtsi te dä me̱fi näꞌä xä ñho, ngeꞌä ha rä tabernäkulo ja mi so̱kämbenini rä Zi Dada Jeoba. Pe Samuel mi handi ge nuꞌu̱ yä tꞌu̱ Eli mi pe̱fi yä tsꞌo tꞌo̱tꞌe. ¿Gi kamfri ge Samuel ꞌnehe bi me̱fi yä tsꞌo tꞌo̱tꞌe?... Samuel nzäntho bi me̱fi näꞌä mi ho rä Zi Dada Jeoba, ja ngu xki ꞌñuti rä dada ꞌne rä nänä.

¿Te gi handi ge mi ja mꞌe̱di xä me̱fi Eli ko nuꞌu̱ yoho yä tꞌu̱?... Mi ja mꞌe̱di xä kastiga nuꞌu̱ yä tꞌu̱ po nuꞌu̱ yä tsꞌo tꞌo̱tꞌe mi pe̱fi, ꞌne ya hinxä hyopäbihmä xä sigi xä mpe̱fi ha rä ngu Jeoba. Pe Eli hinte mi xipäbi nuꞌu̱ yä tꞌu̱, hänge rä Zi Dada Jeoba bi nkue̱ kongeꞌu̱ ꞌne bi mää ge ma xä kastiga Eli ꞌne nuꞌu̱ yoho yä tꞌu̱.

Nꞌa xui nuꞌmu̱ Samuel mi ähä, bi yꞌo̱de ge ngu toꞌo bi nzofo ꞌne bi ꞌñembi: “¡Samuel!”. Nubye̱, Samuel nguntꞌä bi ma bä tsu̱di Eli, ꞌne bi ꞌñembi: “¿Gä nzokägi?”. Pe Eli bi dädi: “Hinä, nuga hindä nzoꞌi”. Po yo mꞌiki Samuel bi yꞌo̱de ge toꞌo xki nzofo. Hänge rä hñuꞌki, Eli bi ꞌñembäbi Samuel: «Mu̱ gi yꞌo̱de ge toꞌo dä nzoꞌi mänꞌaki, thädi ꞌne ꞌñembäbi: “Ñä Jeoba, nuga di o̱de”». Samuel bi me̱fi njabu̱, ꞌne Jeoba bi ꞌñembäbi: “Xipäbi Eli ge ma gä kastigabi rä familia po gatꞌho nuꞌu̱ yä tsꞌo tꞌo̱tꞌe xä me̱fi”. ¿Gi handi ge bi japäbi xä ñhei Samuel dä umbäbi Eli nunä raso?... Mäske Samuel bi ntsu, pe näꞌä bi me̱fi näꞌä xki xipäbi Jeoba. Xibye̱, ¿bi kumpli näꞌä xki mää Jeoba? Hää, nuꞌu̱ yoho yä tꞌu̱ Eli bi tho, ꞌnepu̱ Eli bi du ꞌnehe.

Pe Samuel bi zoogi nꞌa rä hogä kꞌoi pa nuju̱. Mäske mi handi ge märꞌa mi pe̱fi yä tsꞌo tꞌo̱tꞌe, näꞌä nzäntho bi me̱fi näꞌä mi ho rä Zi Dada Jeoba. ¿Xi nuꞌi? ¿Ma gi nja ngu Samuel ꞌne nzäntho ma gi pe̱fi näꞌä di ho rä Zi Dada Jeoba? Mu̱ gi pe̱fi njabu̱, ma gi japi dä johya ri dada, ri nänä, ꞌne rä Zi Dada Jeoba.