¿Te dä za gi pe̱fi mu̱ gi tsu ꞌne gi tsa ge gi ꞌmu̱se̱?

¿Gi handi nuni zi tꞌu̱kä bätsi huxkua ha rä kꞌoi? Nuni zi bätsi di nheki ge ꞌmu̱se̱ ꞌne ja te xä pidi, ¿hänge hää? ¿Xkä thogi njabu̱ nꞌa rä pa?... Gatꞌho xtä thogihu̱ njabu̱. Ha rä Mäkä Tꞌofo mää ge rꞌa yä amigo rä Zi Dada Jeoba, bi zo̱ho̱ bi ntsu ꞌne bi za ge mi ꞌmu̱se̱. Nꞌa de geꞌu̱ mi rä thuhu Elias. Ma gä handihu̱ te bi thogi.

O̱tꞌe xi ndunthi yä je̱ya, Elias mi ꞌmu̱i ha rä hnini Israel, änte de dä mꞌu̱i rä Hesu. Ha nuꞌu̱ yä paꞌu̱, näꞌä rey mi rä thuhu Akab, ꞌne rä ꞌme̱hñä mi rä thuhu Jesabel. Akab ꞌne Jesabel hingä mi xo̱kämbeni Jeoba, näꞌä rä Zi Dada xa mäjuäni. Nuyu̱ mi xo̱kämbeni näꞌä hyate zidada mi rä thuhu Baal. Ndunthi de nuꞌu̱ yä israelita, bi mu̱di ꞌnehe bi xo̱kämbeni Baal. Näꞌä reinä Jesabel xa mi nda tsꞌomꞌu̱i ꞌne mi ne dä hyo gatꞌho nuꞌu̱ yä jäꞌi mi xo̱kämbeni Jeoba. Hää, ¡mi ne dä hyo ꞌnehe Elias! ¿Gi pädi te bi me̱fi Elias?...

¡Elias bi ꞌmatꞌi bi ma yabu̱! Bi ma ha rꞌa yä yꞌotꞌä hai ꞌne bä ñꞌägi ha nꞌa rä kueba. ¿Gi pädi por hanja bi ꞌmatꞌi bi ma Elias?... Ngetꞌho xa bi ntsu. Pe Elias hingä mi pe̱ꞌtsi por hanja xä ntsu, ¿gi pädi por hanja? Elias mi pädi ge mi pe̱ꞌtsi rä mfatsꞌi rä Zi Dada Jeoba. Jeoba ya xki ꞌñuti Elias hängu rä tsꞌe̱di pe̱ꞌtsi. Nꞌa rä pa, Jeoba bi dädi näꞌä rä sadi Elias, ꞌne bä japi bä käi rä tsibi de mähetsꞌi. ¡Jeoba ya xki ꞌñuti Elias hängu rä tsꞌe̱di mi pe̱ꞌtsi pa dä matsꞌi!

Mientra Elias xki ñꞌägi ha näꞌä kueba, Jeoba bi nzofo ꞌne bi yꞌambäbi: “¿Xi te gi hongua?”. Elias bi dädi: “Mä mꞌe̱tꞌo mi ꞌmu̱i märꞌa yä jäꞌi nuꞌu̱ mi xo̱kämbeniꞌi, pe nubye̱, ho̱nse̱ nuga di kohi, ꞌne xa di tsu dä thogägi”. Elias mi hurämu̱i ge ya xki tho gatꞌho nuꞌu̱ yä jäꞌi mi pe̱päbi rä Zi Dada Jeoba. Pe Jeoba bi ꞌñembäbi: “¡Hingä ho̱nse̱ꞌi gi kohi! ꞌMu̱i mä 7.000 yä jäꞌi nuꞌu̱ di xo̱kämbenigi. Ogi tsu, ¡di pe̱ꞌtsi mä nꞌa rä ꞌme̱fi pa geꞌi!”. ¿Te bi za Elias mi yꞌo̱de njabu̱?... ¡Zäi ge xa bi umbi ndunthi rä johya!

¿Te dä za gi pädi de näꞌä bi thogi Elias?... Mäske rꞌabu̱ ma gi ntsu ꞌne ma gi tsa ge gi ꞌmu̱se̱, nuꞌi gi pe̱ꞌtsi ndunthi ri amigo nuꞌu̱ di mäꞌi ꞌne di mädi rä Zi Dada Jeoba. Oxki pumfri, ¡rä Zi Dada Jeoba pe̱ꞌtsi ndunthi rä tsꞌe̱di ꞌne nzäntho ma dä maxꞌäꞌi! ¿Di rꞌaꞌi rä johya gi pädi ge nunka ma gi ꞌmu̱se̱?...