RÄ NTꞌANI 4
¿Te ri ꞌñehe gä pe̱fi nuꞌmu̱ di o̱tꞌe nꞌa rä tsꞌoki?
MU̱ GO DI GEꞌI, ¿TE MA GI PE̱FI?
Imäjinä: Tim mi ñꞌengä pelota ko yä amigo, ꞌne nse̱kitho bi tempäbi rä bidrio de rä bentanä rä besinu.
Mu̱ go di geꞌi Tim, ¿te ma gi pe̱fi?
HÑUDI ꞌNE NTSO̱ꞌMI
GI PE̱ꞌTSI HÑUU YÄ OPCIÓN:
Gi nextꞌi gi ma.
Gi hyoni toꞌo gi hyo̱xä rä thai.
Gi xipäbi ri besinu näꞌä bi thogi ꞌne gi xipäbi ge ma gi jutꞌi näꞌä dañu gä yꞌo̱tꞌe.
Zäi ge gi nehmä gi huahni rä opción A. Pe hindi mporta te mä tsꞌoki gi o̱tꞌe, nzäntho mänꞌa xä ñho gi rekonose.
HÑUU YÄ RASO PA GI REKONOSE NUꞌU̱ RI TSꞌOKI
Geꞌä mänꞌa xä ñho gi pe̱fi.
Rä Mäkä Tꞌofo enä: «Di nehe gä ñꞌonradohe ha gatꞌho yä tꞌo̱tꞌe» (Hebreos 13:18, TNM).
Mu̱ gi rekonose ri tsꞌoki, dä za gi hñäni rä mpumbäte.
Rä Mäkä Tꞌofo enä: «Näꞌä toꞌo ägi yä tsꞌoki hingä ma dä mabi xä ñho, pe näꞌä toꞌo dä mää yä tsꞌoki ꞌne dä zopu̱, ma dä me̱ꞌtsi rä nthekäte» (Proverbios 28:13).
Pe näꞌä mänꞌa xa mähyoni: ma gi johyabi rä koraso Jeoba.
Rä Mäkä Tꞌofo enä: «Jeoba di u̱tsa nuꞌu̱ yä hyate, pe Näꞌä pe̱ꞌtsi xa nꞌa rä hogä ntsitsꞌi ko nuꞌu̱ pe̱fi näꞌä xä ñho» (Proverbios 3:32).
Karina pe̱ꞌtsi 20 nje̱ya ꞌne nꞌa rä mꞌiki xa mi tihi ko rä karro hänge bi nju̱ꞌspäbi nꞌa rä multa, ꞌne himbi xipäbi yä dada. Pe nꞌa nje̱ya mꞌe̱fa, rä dada bi da ngue̱nda ge Karina xki gutꞌi nꞌa rä multa. Karina enä: «¡Bä hänkägi ndunthi yä xuñha!».
¿Te bi bädi de geꞌä? Karina enä: «Mu̱ gi ägi nuꞌu̱ ri tsꞌoki gi o̱tꞌe, mänꞌa ma dä häñꞌäꞌi ndunthi yä xuñha mꞌe̱fa».
TE DÄ ZA GI PÄDI DE NUꞌU̱ RI TSꞌOKI
Rä Mäkä Tꞌofo enä: «Ngeꞌä gatꞌhogihu̱ xi di o̱thu̱ ndunthi yä tꞌo̱tꞌe xä ntsꞌo» (Santiago 3:2). ꞌNe ja ngu ya dä hanthu̱, mänꞌa xä ñho gi rekonose nguntꞌä nuꞌu̱ ri tsꞌoki, njabu̱ ma gi ꞌñudi ge gä responsable ꞌne ge gi pädi gi rekonose ora hingä geꞌä gi pe̱fi.
ꞌNepu̱, mähyoni gi pädi de nuꞌu̱ ri tsꞌoki. Nꞌa rä nxutsi rä thuhu Vera bi ꞌñenä: «Di o̱tꞌe ntsꞌe̱di po ga handi nuꞌu̱ mä tsꞌoki ngu nꞌa rä oportunida pa gä pädi te gä pe̱fi mä nꞌa rä mꞌiki o ꞌnehe pa mänꞌa gä ñhojäꞌi». Xi nuꞌi, ¿te ma gi pe̱fi mu̱ go gi thogi nuya yoho yä tꞌo̱tꞌe?
Nꞌaa. Nuꞌi gä mipäbi rä bisikleta ri dada ꞌne gä tsꞌoni, ¿te ma gi pe̱fi?
Hinte gi xipäbi ꞌne gi to̱ꞌmi ge hindä da ngue̱nda.
Gi xipäbi ri dada te bi thogi.
Gi xipäbi ri dada te bi thogi pe gi hyo̱xä rä thai märꞌaa.
Yoho. Nuꞌi gä reproba nꞌa rä examen ngetꞌho hingä estudia, ¿te ma gi pe̱fi?
Gi mää ge gä reproba ri examen ngetꞌho xa mi xä ñhei.
Gi mää ge gä reproba ngetꞌho hingä estudia.
Gi mää ge rä xahnäte bi reprobaꞌi ngetꞌho di u̱tsaꞌi.
Mu̱ hingi häki de ri mfeni nuꞌu̱ yä tsꞌoki xkä yꞌo̱tꞌe, ꞌñenä ngu nuꞌmu̱ gi yꞌoni nꞌa rä karro ꞌne ho̱nse̱ gi handi ha rä ñhee te xä ꞌñe mꞌe̱fa de geꞌi pe hingi handi te ja ndelante.
Nubye̱ beni nuꞌu̱ yoho yä ejemplo dä mäñhu̱. Pe nubye̱, imäjinä ge go geꞌi 1) rä dada ꞌne 2) rä xahnäte. ¿Te ma gi mbeni de ri tꞌu̱ o de ri yꞌoskuela mu̱ nguntꞌä bi rekonose näꞌä rä tsꞌoki bi yꞌo̱tꞌe? ¿Te ma gi mbeni de ri tꞌu̱ o de ri yꞌoskuela mu̱ himbi rekonose näꞌä rä tsꞌoki bi yꞌo̱tꞌe?
Nubye̱ beni nꞌa de nuꞌu̱ yä tsꞌoki gä yꞌo̱tꞌe näꞌä je̱ya ja bi thogi, ꞌne thädi nuya yä ntꞌani:
¿Te mä tsꞌoki gä yꞌo̱tꞌe? ¿Te gä pe̱fi?
Hinte dä mää.
Dä ho̱xä rä thai märꞌaa.
Nguntꞌä dä mää.
Mu̱ hingä rekonose näꞌä ri tsꞌoki, ¿te gä senti mꞌe̱fa?
Dä johya ngeꞌä hinto bi da ngue̱nda.
Bi u̱ mä mfeni, ngeꞌä hinte dä mää.
¿Te gi mbeni ge mänꞌa xä hogi xkä pe̱fi?
¿Te gä pädi de näꞌä ri tsꞌoki?
¿TE GI MBENI?
¿Por hanja rꞌa yä jäꞌi di japi xä ñhei dä rekonose yä tsꞌoki?
¿Te dä za dä mbeni yä jäꞌi de geꞌi mu̱ nzäntho gi ägi ri tsꞌoki? Pe, ¿te ma dä mbeni de geꞌi yä jäꞌi mu̱ gi rekonose nuꞌu̱ ri tsꞌoki? (Lucas 16:10.)