Imformäsio pa nuˈu̱ ma dä ntini

NUˈU̱ YÄ KOSA XÄ MˈE̱DI. Mu̱ gi tini nˈa rä kosa näˈä xä mˈe̱di, hñätsˈi habu̱ bi ja nunä departamento. Mu̱ go te xkä ˈme̱di, gi ma gi ñˈani ha nunä departamento. ˈNehe ja di debe gi tsˈitsˈiua nuˈu̱ yä bätsi xä mˈe̱di. Nunä departamento hinxä thutsˈi pa dä su yä bätsi, hänge po rä mäte, suhu̱ ri bätsihu̱ ˈne ogi he̱gihu̱ dä ñˈobu̱se̱.

NXIXTEHE. Nuˈu̱ yä thuhni ja asta ndelante de rä plataforma, geˈu̱ xä tˈeke pa nuˈu̱ yä ku ma dä nxixtehe. Mu̱ ma gi nxixtehe, mähyoni gi hñudi ha nuya yä luga näˈä nsabdo de di xudi, änte de dä mu̱di rä discurso de gä nxixtehe. ˈNehe, debe gi hñätsˈi ri toalla ˈne gi huahni xä ñho te mä dutu ma gi usa.

PRIMEROS AUXILIOS. Nunä departamento HO̱NSE̱ PA YÄ EMERGENCIA.

TOˈO NE DÄ MFAXTE. Mu̱ gi ne gi mfaxte de gä boluntario ha rä däta mhuntsˈi, gi ma ha nunä departamento pa dä siˈi habu̱ dä za gi mfaxte.

YÄ ACOMODADOR. Yä acomodador xä thutsˈi pa dä maxˈäˈi. Jamäsu nuˈu̱ yä instrucción dä rˈaˈi tanto ha rä estacionamiento, ha yä pasillo, ora gi ˈueke yä thuhni o ha märˈa yä asunto.

YÄ DONÄSIO. Pa gä pe̱ˈtsihu̱ nunä däta mhuntsˈi xä tˈo̱tˈe ndunthi yä gasto, xä nrenta yä thuhni, yä pantalla, rä sonido ˈne märˈa yä tˈo̱tˈe; pa njabu̱ gä disfrutahu̱ de nunä däta mhuntsˈi ˈne pa mänˈa dä ze̱di mä ntsitsˈihu̱ ko Äjuä. Nuˈu̱ yä donäsio gi unihu̱ faxte pa dä njutˈi nuya yä gasto ˈne di ñˈusa pa dä njutˈi näˈä rä mäkä ˈme̱fi di tˈo̱tˈe po gatˈho rä Xiˈmhai. Xä thutsˈi yä kaha de gä donäsio ha ndunthi yä luga de rä auditorio. Di jamädihe ndunthi po gatˈho nuˈu̱ yä donäsio gi unihu̱. Rä Cuerpo Gobernante di jamädiˈihu̱ po gatˈho näˈä rä mfatsˈi gi umbäbihu̱ rä Tsˈu̱tˈhui Äjuä.

YÄ THUHNI. ˈÑudi rä tˈekˈei ˈne rä mhäte po märˈaa. Dä za gi ˈueke yä thuhni ho̱nse̱ pa ri familia, pa nuˈu̱ gi ñˈoui ha ri karro, o pa nuˈu̱ yä jäˈi gi umbi rä curso de rä Mäkä Tˈofo. Po rä mäte, ogi ˈueke yä thuhni mu̱ hingä ma gi usa.

MÄ NˈA RÄ MHUNTSˈI

NGUNSADI PA YÄ EBANJELISADOR DE RÄ TSˈU̱TˈHUI ÄJUÄ. Gatˈho nuˈu̱ yä prekursor pe̱ˈtsi entre 23 asta 65 yä je̱ya, ˈne ne dä ma ha nunä rä ngunsadi, ˈmu̱i imbitado pa dä ntini ha näˈä rä mhuntsˈi ma dä tˈo̱tˈe ndomingo de di ndee. Dende ha rä plataforma ma dä mhää te mä ora ˈne habu̱ ma dä tˈo̱tˈe nunä mhuntsˈi.