RÄ LECCIÓN 10
¿Hanja ma dä maxꞌäꞌi gi ntini ha nuꞌu̱ yä mhuntsꞌi o̱tꞌe yä testigo rä Jeoba?
¿Ya xrä mbitaꞌi gi ntini ha nuꞌu̱ yä mhuntsꞌi o̱tꞌe yä testigo rä Jeoba? Mu̱ nunka xkä ntini ha nꞌa de nuꞌu̱ yä mhuntsꞌi, zäi ge gi ntsa nꞌa tu̱i gi ntini po rä mu̱di. Zäi ge gi ñꞌanise̱: «¿Te di tꞌo̱tꞌe ha nuꞌu̱ yä mhuntsꞌiꞌu̱? ¿Por hanja yä Testigo hingi he̱gi de dä ntini ha nuꞌu̱ yä mhuntsꞌi? ¿Mähyoni gä ma ꞌnehe ha nuꞌu̱ yä mhuntsꞌiꞌu̱?». Nde, ma gi pädi hanja mu̱ gi ntini ko märꞌa ha yä mhuntsꞌi, ma dä maxꞌäꞌi pa dä ze̱di näꞌä ri ntsitsꞌi ko Äjuä ꞌne ma dä maxꞌäꞌi ha ri mꞌu̱i.
1. ¿Por hanja yä testigo rä Jeoba o̱tꞌe yä mhuntsꞌi?
Hyandi hanja rä rey David bi mää te mi japäbi dä muntsꞌi ko märaa. Näꞌä bi ꞌñenä: «Ha rä däta mhuntsꞌi, nuga ma gä nsunda Jeoba» (Salmo 26:12). Mäpaya ꞌnehe, yä testigo rä Jeoba tini ndunthi rä johya de dä ntini ha yä mhuntsꞌi. Po gatꞌho rä Xiꞌmhai, tatꞌä semänä pe̱ꞌtsi yä mhuntsꞌi pa dä nsunda Äjuä, dä tutuäbi yä jähñä ꞌne dä xatuäbi. ꞌNehe nꞌa hängu mꞌiki rä je̱ya, yä testigo rä Jeoba o̱tꞌe yä däta mhuntsꞌi.
2. ¿Te ma gi pädi ha yä mhuntsꞌi?
Gatꞌho näꞌä mhää ha yä mhuntsꞌi di tꞌudi ko rä Biblia ꞌne dri «esplika xä ñho te ri bo̱ni nuꞌu̱ yä noyaꞌu̱» (hñeti Nehemías 8:8). Ha yä mhuntsꞌi ma gi pädi mä ndunthi de rä Zi Dada Jeoba ꞌne tenguꞌä rä mꞌu̱i. Entremäs gi pädi hängu di mäꞌäꞌi, geꞌä ma dä jaꞌäꞌi gi mädi ꞌnehe, ꞌne ma gi ne gi yꞌo̱tꞌe ri amigo. ꞌNehe, ha yä mhuntsꞌi ma gi pädi hanja rä Zi Dada Jeoba ma dä ꞌñutꞌäꞌi hanja gi ꞌmu̱i pa njabu̱ gi disfruta de ri te (Isaías 48:17, 18).
3. ¿Hanja ma dä maxꞌäꞌi gi konose nuꞌu̱ märꞌa yä jäꞌi di ntini ha nuꞌu̱ yä mhuntsꞌi o̱tꞌe yä testigo rä Jeoba?
Rä Zi Dada Jeoba di mändagihu̱ «gä beñhu̱ hanja dä za gä nupä mfenihu̱ nꞌa ngu mänꞌaa pa gä mädihu̱ ꞌne pa gä o̱thu̱ yä hogä ꞌme̱fi. ꞌNe hiñhaꞌmu̱ gä ꞌuegehu̱ de mä mhuntsꞌihu̱» (Hebreos 10:24, 25). Ha yä mhuntsꞌi ma gi konose märꞌa yä zi jäꞌi nuꞌu̱ ja ngu nuꞌi, di mädi rä mikꞌei ꞌne xa ne dä bädi Äjuä. ꞌNehe ma gi hyandi ge nuꞌu̱ di ntini ha yä mhuntsꞌi, o̱tꞌe ntsꞌe̱di po dä nupä mfeni nꞌa ngu mänꞌaa ko näꞌä xä bädi de rä Biblia (hñeti Romanos 1:11, 12, TNM). Gi nuhmä ge ha yä mhuntsꞌi ma gi konose märꞌa yä zi jäꞌi nuꞌu̱ ꞌmu̱i ko ndunthi rä johya mäske di ñhandui yä xuñha ꞌne yä dumu̱i. Hää, po geꞌä rä Zi Dada Jeoba ne gä ntinihu̱ ha gatꞌho yä mhuntsꞌi.
HANJA DÄ ZA DÄ MAXꞌÄꞌI RÄ NOYA ÄJUÄ
Pädi tengu nuꞌu̱ yä mhuntsꞌi o̱tꞌe yä testigo rä Jeoba ꞌne por hanja xa xä ñho toꞌo dä ntini.
4. Tengu nuꞌu̱ yä mhuntsꞌi o̱tꞌe yä testigo rä Jeoba
Nuꞌu̱ yä mu̱di kristianu, mi nzäi dä muntsꞌi mähye̱gi pa dä xo̱kämbeni rä Zi Dada Jeoba (Romanos 16:3-5). Hñetihu̱ Colosenses 3:16, ꞌnepu̱ thädihu̱ nunä rä ntꞌani:
¿Te mi pe̱fi nuꞌu̱ yä mu̱di kristianu pa mi xo̱kämbeni rä Zi Dada Jeoba?
Mäpaya, yä testigo rä Jeoba ꞌnehe di ntini ha yä Ngu de gä Mhuntsꞌi pa di xo̱kämbeni ꞌne di nsunda rä Zi Dada Jeoba. Pa gi hyandi hanja di tꞌo̱tꞌe nuꞌu̱ yä mhuntsꞌiꞌu̱, yꞌe̱ntsꞌihu̱ rä BIDEO. Hyandihu̱ näꞌä dibujo habu̱ udi te thogi durante, änte ꞌne mꞌe̱fa de nꞌa rä mhuntsꞌi, ꞌnepu̱ thädihu̱ nuya yä ntꞌani:
Ja ngu ya gä heti ha Colosenses 3:16, ¿gi kamfri ge näꞌä pe̱fi yä testigo rä Jeoba ha yä mhuntsꞌi, geꞌä mi pe̱fi ꞌnehe nuꞌu̱ yä mu̱di kristianu? ¿Por hanja?
¿Te gä ho de rä bideo o de näꞌä rä dibujo habu̱ di nheki hanja yä testigo rä Jeoba o̱tꞌe yä mhuntsꞌi?
Hñetihu̱ 2 Corintios 9:7, TNM, ꞌnepu̱ thädihu̱ nunä rä ntꞌani:
¿Por hanja hingi tꞌadi yä bojä ha yä mhuntsꞌi yä testigo rä Jeoba?
Ri xahnäte ma dä ꞌñutꞌäꞌi te mä imformäsio ma dä thandi ha näꞌä mhuntsꞌi xä ꞌñepu̱.
De näꞌä ma dä thandi ha rä mhuntsꞌi, ¿te mä imformäsio gi handi ge mähotho o gi handi ge ma dä maxꞌäꞌi?
¿Gi pädi?
Ha jw.org/ote dä za gi tini habu̱ ꞌne te mä pa o̱tꞌe yä mhuntsꞌi yä testigo rä Jeoba po gatꞌho rä Xiꞌmhai.
Ha yä mhuntsꞌi tꞌuni yä discurso, tꞌe̱ntsꞌi yä bideo, ꞌne tꞌudi hanja toꞌo dä predika ꞌne dä ñudi de rä Noya Äjuä. Gatꞌho yä mhuntsꞌi fu̱di ꞌne huadi ko nꞌa rä zi jähñä ꞌne nꞌa rä sadi.
Ha rꞌa yä parte de rä mhuntsꞌi, dä za dä partisipa nuꞌu̱ xä ntini.
Gatꞌho yä jäꞌi ꞌmu̱i imbitado pa dä ntini ha nuya yä mhuntsꞌi: yä familia, yä medinthäti, yä soltero, yä zi däta jäꞌi ꞌne yä zi bätsi.
Ha nuꞌu̱ yä mhuntsꞌi o̱tꞌe yä testigo rä Jeoba, hinte ma gi jutꞌi pa gi ku̱tꞌi, nixi mboo hinte mä bojä tꞌadi.
5. Pa gi ntini ha yä mhuntsꞌi rꞌabu̱ ma dä ja mꞌe̱di gi ja yä sacrificio
¿Gi pädi te mi pe̱fi José ko rä familia pa mi ntini tatꞌä je̱ya ha näꞌä rä ngo de rä Pascua? Koꞌmu̱ nuꞌu̱ mi ꞌmu̱i ha Nazaret, nuꞌu̱ pe̱ꞌtsi te mi ju̱ rä ꞌñuu ꞌne mi yꞌo kasi hñupa; mi rꞌani ha rꞌa yä tꞌo̱ho̱ asta xa dä tso̱ni ha Jerusalén habu̱ mi tꞌo̱tꞌe näꞌä rä ngoꞌä. Hñetihu̱ Lucas 2:39-42, TNM, ꞌnepu̱ thädihu̱ nuya yä ntꞌani:
¿Te mä sacrificio gi kamfri ge mi ja José ko rä familia pa mi ntini ha näꞌä rä ngo mi tꞌo̱tꞌe ha Jerusalén?
Xi nuꞌi, ¿te mä sacrificio ma dä ja mꞌe̱di gi ja pa dä za gi ntini ha yä mhuntsꞌi?
¿Gi kamfri ge di bale rä penä gi ntini ha yä mhuntsꞌi? ¿Por hanja?
Rä Noya Äjuä udi ge xa mähyoni gä ntinihu̱ ha yä mhuntsꞌi, pa njabu̱ mähye̱gi ko märꞌa yä ku gä xo̱kämbenihu̱ rä Zi Dada Jeoba. Hñetihu̱ Hebreos 10:24, 25, ꞌnepu̱ thädihu̱ nunä rä ntꞌani:
¿Por hanja hindi debe gä ꞌme̱dihu̱ yä mhuntsꞌi?
RꞌA YÄ JÄꞌI ENÄ: «Mientra gi nxadi rä Noya Äjuä ꞌne gi pe̱fi näꞌä di mända, hindi ja mꞌe̱di gi muntsꞌi ko märꞌaa pa gi xo̱kämbeni Äjuä».
Mu̱ toꞌo dä xiꞌi njabu̱, ¿te mä testo de rä Biblia o te mä ejemplo dä hogi gi beni pa hingi pumfri näꞌä to̱ꞌmi rä Zi Dada Jeoba gä pe̱fihu̱?
NÄꞌÄ DÄ PÄDIHU̱
Ora di ntinihu̱ ko märꞌa ha yä mhuntsꞌi, mähye̱gi di xo̱kämbenihu̱ ꞌne di nsundahu̱ rä Zi Dada Jeoba. ꞌNehe, yä mhuntsꞌi faxkägihu̱ pa gä pädihu̱ mä ndunthi de rä Zi Dada Jeoba, ꞌne pa dä ze̱di mä mhätehu̱ ꞌne mä ntsitsꞌihu̱ kongeꞌä.
Pa gä benihu̱
¿Por hanja rä Zi Dada Jeoba engägihu̱ gä ntinihu̱ ko märꞌaa ha yä mhuntsꞌi?
¿Te ma gi pädi ha nuꞌu̱ yä mhuntsꞌi o̱tꞌe yä testigo rä Jeoba?
Mu̱ gi ntini ha nuꞌu̱ yä mhuntsꞌi, ¿hanja gi kamfri ge ma dä maxꞌäꞌi?
HABU̱ DÄ ZA GI PÄDI MÄ NꞌA TU̱I
¿Gi ntsa gi ntini ha yä mhuntsꞌi? Hyandi hanja nꞌa rä zi ñꞌo̱ho̱ mi senti njabu̱ ꞌnehe, pe nuꞌmu̱ bi ntini ha näꞌä rä mu̱di mhuntsꞌi; dende geꞌmu̱ ya himbi faya tatꞌä semänä.
¡Nunka ma gä pumfrihe näꞌä rä hogä ꞌñehe bi tꞌakägihe! (4:16)
Hyandi hanja nꞌa rä bäsjäꞌi xa bi ho yä mhuntsꞌi, ꞌne te bi me̱fi pa bi za bi sigi bi ntini.
Hyandi te di mbeni nuꞌu̱ yä bäsjäꞌi di ntini ha yä mhuntsꞌi.
«¿Por hanja xä ñho gi ntini ko märꞌa ha yä mhuntsꞌi?» (Ehe ha jw.org)
Hyandi hanja nꞌa rä ñꞌo̱ho̱ näꞌä xa mrä bo̱ka, bi paati rä mꞌu̱i nuꞌmu̱ bi mu̱di bi ntini ha nuꞌu̱ yä mhuntsꞌi o̱tꞌe yä testigo rä Jeoba.
«Nzäntho ndi mfoxä rä pistola habu̱ ndi yꞌo» (La Atalaya, 1 de julio de 2014)