RÄ LECCIÓN 52
¿Por hanja mähyoni gä jamäsuhu̱ hanja di ñheehu̱ ꞌne hanja di ñhokihu̱?
Kada nꞌa rä jäꞌi pe̱ꞌtsäse̱ yä gusto ꞌne di huahnise̱ hanja dä ñhee ꞌne hanja dä ñhoki. Pe rä Biblia uni rꞌa yä konseho nuꞌu̱ dä za dä maxkägihu̱ ora di huahnihu̱ te mä dutu gä hehu̱ ꞌne hanja di ne gä ñhokihu̱. Mu̱ gä jamäsuhu̱ nuꞌu̱ yä konseho, ma gä johyahu̱ tanto nuju̱ ngu rä Zi Dada Jeoba.
1. ¿Te mä tsꞌofo uni rä Biblia nuꞌu̱ dä za dä maxkägihu̱ gä huahnihu̱ te mä dutu gä hehu̱ ꞌne hanja gä ñhokihu̱?
Nuꞌu̱ xa mäjuäni yä kristianu «debe dä ñhee ngu ri ꞌñehe ꞌne hindä ñhoki de gä ntꞌetsꞌi, sino ke ora di ñhoki debe dä ꞌñudi ge ja yä mfeni» ꞌne pe̱ꞌtsi te dä nheki ge «pe̱päbi Äjuä» (1 Timoteo 2:9, 10, TNM). Ha nuya yä testo dä za gä pädihu̱ goho yä kosa: 1) Debe gä “ñheehu̱ ngu ri ꞌñehe”. Mu̱ xkä ntini ha yä mhuntsꞌi yä testigo rä Jeoba, zäi ge xkä handi ge kada nꞌa de geꞌu̱ pe̱ꞌtsi rꞌa nꞌañꞌo yä gusto. Pe näꞌä rä modo de hanja di ñhee ꞌne hanja di ñhoki, udi ge pe̱ꞌspäbi rä tꞌekꞌei rä Zi Dada Jeoba. 2) Hindi debe gä ñhokihu̱ «de gä ntꞌetsꞌi». Signifika ge hindi debe gä huxu̱ nuꞌu̱ yä dutu japi dä nheki mä ndoyꞌohu̱, nixi gä usahu̱ yä dutu pa gä ñꞌetsꞌihu̱. 3) Ora di ñhokihu̱, debe gä udihu̱ ge ja mä mfenihu̱. Di udihu̱ ge ja mä mfenihu̱ ora hindi hutsꞌihu̱ cualquiera rä dutu ho̱nse̱ ngeꞌä yꞌo de gä moda. 4) Nuꞌu̱ mä dutuhu̱ ꞌne näꞌä rä modo de hanja di ñhokihu̱, debe dä nheki ge di pe̱päbihu̱ Äjuä (1 Corintios 10:31, TNM).
2. Ora di huahnihu̱ te mä dutu gä hehu̱ o hanja gä ñhokihu̱, ¿por hanja mähyoni gä o̱thu̱ ngue̱nda te ma dä mbeni märꞌa yä kristianu?
Mäjuäni ge kada nꞌa rä jäꞌi pe̱ꞌtsi nderecho dä huahni te mä dutu dä hyee. Pe nuju̱ ya di pe̱päbihu̱ rä Zi Dada Jeoba, mähyoni gä hudi gä ntso̱ꞌmihu̱ ꞌne gä handihu̱ mu̱ nuꞌu̱ mä dutuhu̱ o näꞌä rä modo de hanja di ñhokihu̱, dä za dä japäbi märꞌa dä mfada o dä ntsa. Nuju̱ di ne gä jamäsuhu̱ nunä rä konseho uni rä Biblia ora enä: «Kada nꞌa de gekhu̱ ma gä pe̱fihu̱ näꞌä di numäñho mä mikꞌeihu̱ pa rä ñhoui, ꞌne pa gä fatsꞌihu̱ dä ze̱di rä jamfri» (hñeti Romanos 15:1, 2, TNM).
3. Ora di huahnihu̱ te mä dutu gä hehu̱ o hanja gä ñhokihu̱, ¿por hanja mähyoni gä o̱thu̱ ngue̱nda te di mbeni nuꞌu̱ yä jäꞌi hingi pädi Äjuä?
Hindi mporta habu̱ di yꞌohu̱ o te di pe̱fihu̱, nzäntho di jamäsuhu̱ nuꞌu̱ mä dutu di hehu̱. Pe ora di ntinihu̱ ha yä mhuntsꞌi o di predikahu̱, tobe mänꞌa di jamäsuhu̱ hanja di ñhokihu̱. ¿Por hanja? Ngeꞌä hindi nehu̱ ge yä jäꞌi dä ñä xä ntsꞌo de näꞌä rä mensaje di hätsꞌihu̱, sino ke di nehu̱ ge näꞌä mä heehu̱ ꞌne hanja xtä ñhokihu̱ «dä ꞌñeꞌtsuäbi rä nsu näꞌä utkägihu̱ Äjuä», pa njabu̱ märꞌa yä zi jäꞌi dä ne dä bädi de Geꞌä (Tito 2:10, TNM).
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ te ma dä maxkägihu̱ pa gä huahnihu̱ xä ñho te mä dutu gä hehu̱ ꞌne hanja gä ñhokihu̱, ꞌne njabu̱ gä udihu̱ ge di pe̱päbihu̱ rä Zi Dada Jeoba.
Nuꞌu̱ mä heehu̱ ꞌne näꞌä rä modo de hanja xtä ñhokihu̱, udi mu̱ di pe̱ꞌspäbihu̱ rä tꞌekꞌei o hinä nuꞌu̱ yä jäꞌi pe̱ꞌtsi rä autorida. Mäske rä Zi Dada Jeoba mänꞌa di mportabi näꞌä ja ha mä korasohu̱, pe ora di jamäsuhu̱ hanja di ñheehu̱ ꞌne hanja di ñhokihu̱, di udihu̱ ge di pe̱ꞌspäbihu̱ rä tꞌekꞌei.
4. Mu̱ di nheki xä ñho hanja xtä ñhokihu̱, di udihu̱ rä tꞌekꞌei po rä Zi Dada Jeoba
¿Te mä raso di pe̱ꞌtsihu̱ pa gä ñheehu̱ ꞌne gä ñhokihu̱ xä ñho? Hñetihu̱ Salmo 47:2, ꞌnepu̱ thädihu̱ nuya yä ntꞌani:
Mu̱ nunka gä pumfrihu̱ ge di utihu̱ märꞌa yä jäꞌi de rä Zi Dada Jeoba, ¿hanja geꞌä ma dä maxkägihu̱ gä huahnihu̱ xä ñho te mä dutu gä hehu̱ ꞌne hanja gä ñhokihu̱?
¿Gi kamfri ge hää mähyoni gä handihu̱ te mä dutu di hehu̱ ꞌne hanja di ñhokihu̱ ora di ntinihu̱ ha yä mhuntsꞌi o di predikahu̱? ¿Por hanja?
5. Te ma dä maxkägihu̱ gä huahnihu̱ xä ñho te mä dutu gä hehu̱ ꞌne hanja gä ñhokihu̱
Hindi mporta mu̱ xä mädi o hinä nuꞌu̱ mä dutu di hutsꞌihu̱, ndaꞌä mänꞌa di mporta ge xträ ntꞌaxi ꞌne di nheki xä ñho. Hñetihu̱ 1 Corintios 10:24, TNM ꞌne 1 Timoteo 2:9, 10, TNM. ꞌNepu̱ ñähu̱, ¿por hanja dä hogi gä ebitahu̱...
... nuꞌu̱ yä dutu hinxä ntꞌaxi o nuꞌu̱ yä dutu haräza xä njatho?
... nuꞌu̱ yä dutu xä ntsꞌiꞌmi, nuꞌu̱ yä dozu̱ dutu ꞌne nuꞌu̱ yä dutu japäbi dä nhekitho mä ndoyꞌohu̱?
Mäpaya yä kristianu yä hingi ꞌmu̱i ja ngu mi mända nuꞌu̱ yä ley bi tꞌumbäbi rä Moisés. Pe nuꞌu̱ yä leyꞌu̱ utkägihu̱ te di mbeni rä Zi Dada Jeoba. Hñetihu̱ Deuteronomio 22:5, ꞌnepu̱ thädihu̱ nunä rä ntꞌani:
¿Por hanja nꞌa rä ñꞌo̱ho̱ hindi debe dä ñhoki pa dä nheki ngu nꞌa rä ꞌme̱hñä, nixi nꞌa rä ꞌme̱hñä hindi debe dä ñhoki pa dä nheki ngu nꞌa rä ñꞌo̱ho̱?
Hñetihu̱ 1 Corintios 10:32, 33, TNM ꞌne 1 Juan 2:15, 16, TNM, ꞌnepu̱ thädihu̱ nuya yä ntꞌani:
¿Por hanja di debe gä tumämu̱ihu̱ mu̱ nuꞌu̱ yä ku de rä mhuntsꞌi, o nuꞌu̱ yä jäꞌi de rä komunida di mfada o hingi numäñho näꞌä rä modo de hanja di ñheehu̱ o hanja di ñhokihu̱?
¿Tengu di ñhee ꞌne hanja di ñhoki nuꞌu̱ yä jäꞌi de näꞌä rä komunida o hnini habu̱ gi ꞌmu̱i?
¿Gi kamfri ge xä ñho pa nꞌa rä kristianu nuꞌu̱ yä dutu o nuꞌu̱ yä moda usa nuꞌu̱ yä jäꞌiꞌu̱? ¿Por hanja?
Ja ndunthi yä forma de hanja gä ñheehu̱ ꞌne gä ñhokihu̱ nsinke gä ofendehu̱ rä Zi Dada Jeoba.
RꞌA YÄ JÄꞌI ENÄ: «Nuga di pe̱ꞌtsi nderecho gä ñhee ꞌne gä ñhoki ja ngu di ne».
Xi nuꞌi, ¿gi ꞌmu̱i de acuerdo ko näꞌä mängä nuꞌu̱ yä jäꞌi? ¿Por hanja?
NÄꞌÄ DÄ PÄDIHU̱
Mu̱ di nheki xä ñho näꞌä rä modo hanja di ñheehu̱ ꞌne hanja di ñhokihu̱, nuꞌmu̱ di udihu̱ rä tꞌekꞌei po rä Zi Dada Jeoba ꞌne po märꞌa yä jäꞌi.
Pa gä benihu̱
¿Por hanja rä Zi Dada Jeoba ne gä jamäsuhu̱ hanja di ñheehu̱ ꞌne hanja di ñhokihu̱?
¿Te mä testo de rä Biblia dä za dä maxkägihu̱ gä huahnihu̱ xä ñho te ma gä heehu̱ ꞌne hanja ma gä ñhokihu̱?
Mu̱ di jamäsuhu̱ hanja di ñheehu̱ ꞌne hanja di ñhokihu̱, ¿te ma dä mbeni yä jäꞌi de rä Zi Dada Jeoba?
HABU̱ DÄ ZA GI PÄDI MÄ NꞌA TU̱I
Hyandi te udi de gekhu̱ näꞌä rä modo de hanja di ñheehu̱ ꞌne di ñhokihu̱.
Xa dä mbeni xä ñho mꞌe̱tꞌo änte de gi ja nꞌa rä tatuaje ha ri ndoyꞌo.
Hyandi nuꞌu̱ märꞌa yä konseho uni rä Biblia pa dä maxkägihu̱ gä huahnihu̱ xä ñho hanja gä ñheehu̱ ꞌne hanja gä ñhokihu̱.
Nꞌa rä zi ꞌme̱hñä mi mbeni ge toꞌo dä ñhee de gä hyoya, geꞌä mi ho Äjuä. Hyandi te bi matsꞌi pa bi paati näꞌä mi mbeni.
«¡Xa hingä ndi ho hanja mi ñhee ꞌne hanja mi ñhoki märꞌaa!» (¡Despertad!, 22 de diciembre de 2003)