Hanja dä za gä uñhu̱ ntꞌo̱de mänꞌa xä ñho: ma gä fu̱dihu̱ yä estudio ko rä foyeto Äjuä pe̱ꞌtsi rꞌa yä hogä noya pa nuꞌi
Por hanja xa mähyoni. Pa gä fatsꞌihu̱ yä jäꞌi, mähyoni gä pädi gä udihu̱ xä ñho rä Noya Äjuä (Mat. 28:19, 20). Gatꞌho dä za gä udihu̱ xä ñho mu̱ gä usahu̱ nuꞌu̱ yä mfatsꞌi xä tꞌakägihu̱. Rä foyeto Äjuä pe̱ꞌtsi rꞌa yä hogä noya pa nuꞌi, bi thoki pa dä maxkägihu̱ gä utihu̱ märꞌa näꞌä mäjuäni de Äjuä. Dä za gä usahu̱ pa gä fu̱dihu̱ yä estudio dende ri mu̱di ꞌne ko ho̱nse̱ nꞌa hängu minutotho.
Pe̱fi nuya yä tsꞌofo nunä zänä:
Yꞌapäbi Jeoba ge dä maxꞌäꞌi gi ne gi uni ꞌne gi fu̱di nꞌa rä estudio. ꞌNehe, yꞌapäbi ge dä maxꞌäꞌi pa gi ꞌñudi mänꞌa xä ñho rä Noya (Filip. 2:13).
Ha ri Mhuntsꞌi de gä Familia o nuꞌmu̱ gi nxadise̱ rä Mäkä Tꞌofo, nsaya ꞌne mepye̱ nꞌa rä presentasion, pa njabu̱ xki po̱ni gi ungä ntꞌo̱de, ma dä za gi mää näꞌä ri presentasion ko ngatꞌho ri koraso ꞌne dä za gi fu̱di nꞌa rä estudio.