¿Hanja dä za gä pädihu̱ de nuꞌu̱ yä publikador pe̱ꞌtsi ndunthi rä esperiensia?

Nuju̱ di handihu̱ ko ndunthi rä muui nuꞌu̱ yä zi ku pe̱ꞌtsi ndunthi rä esperiensia. Rꞌaa xä me̱päbi rä Zi Dada Jeoba po ndunthi yä je̱ya. Märꞌaa, ja getya xä me̱ꞌtsi rä esperiensia ha rä tꞌungä ntꞌo̱de. Nuyu̱ yä zi ku xä zo̱ho̱ xä hyandi hanja ha nuya yä gäxä pa, rä Hesu di gu̱hni rä hnini Äjuä ꞌne di gu̱tꞌi rä ꞌñuu pa di tꞌungä ntꞌo̱de ꞌne di tꞌuti yä zi jäꞌi de Jeoba (Mat. 28:19, 20). ꞌNehe durante nuꞌu̱ yä je̱ya xä me̱päbi, xä hyandi hanja Jeoba xä umbäbi rä tsꞌe̱di pa xä ze̱ti nuꞌu̱ yä xuñha xä thogi (2 Cor. 4:7). Nuju̱ dä za gä pädihu̱ ndunthi de nuyu̱ yä zi ku. Nuyu̱ di umbäbi ndunthi rä johya dä ꞌñuti märꞌaa näꞌä xä bädi (Sal. 71:18). Hänge dä hogi gä honihu̱ yä oportunida pa gä pädihu̱ de gehyu̱. ¿Hanja dä za gä jahu̱?

Ha rä tꞌungä ntꞌo̱de. Pa dä bädi dä ungä ntꞌo̱de xä ñho nuꞌu̱ yä rꞌayꞌo publikador, mähyoni toꞌo dä ꞌñuti. Nuju̱ dä za gä pädihu̱ ndunthi mu̱ gä handihu̱ hanja di ungä ntꞌo̱de nuꞌu̱ yä ku pe̱ꞌtsi ndunthi rä esperiensia. (Hyandi rä rebista La Atalaya, 15 de febrero de 2015, ha rä nxii 16, ha rä parrafo 2.) Xi nuꞌi, ¿hanja xä maxꞌäꞌi nuꞌmu̱ gi ungä ntꞌo̱de ko nuꞌu̱ yä ku pe̱ꞌtsi ndunthi rä esperiensia?

¿Dä za gi mbitabi nꞌa de nuꞌu̱ yä ku dä bo̱ni dä ungä ntꞌo̱de kongeꞌi? Mu̱ nꞌa de nuꞌu̱ yä zi ku hingi tsa dä bo̱ni dä ungä ntꞌo̱de ngeꞌä di hñeni, dä hogi gi yꞌambäbi mu̱ dä za gi tsitsꞌi ha rä nguu nꞌa de nuꞌu̱ yä zi jäꞌi gi uti de rä Noya Äjuä, pa dä maxꞌäꞌi gi umbäbi rä estudio. Mꞌe̱fa, dä za gi yꞌapäbi rꞌa yä tsꞌofo nuꞌu̱ dä maxꞌäꞌi gi ungä ntꞌo̱de mänꞌa xä ñho.

ꞌUeke ri tiempo pa gi ñä kongeꞌu̱. Pa gi pädi de nuꞌu̱ yä zi ku pe̱ꞌtsi ndunthi rä esperiensia, mähyoni gi ꞌueke ri tiempo pa gi ñäui. Mbitabi ha ri Mhuntsꞌi de gä Familia. Mu̱ näꞌä zi ku di hñeni, yꞌambäbi mu̱ dä za gi yꞌo̱tꞌe ri Mhuntsꞌi de gä Familia ha rä nguu. Yꞌapäbi dä xiꞌi hanja bi zo̱ho̱ bi bädi de Jeoba, ꞌne te mä jäpi xä hñäni. Yꞌambäbi te mä mpadi xä hyandi ha rä mhuntsꞌi, ꞌne hängu rä johya xä me̱ꞌtsi de dä me̱päbi rä Zi Dada Jeoba.

Kada nꞌa de nuꞌu̱ yä zi ku, rꞌa nꞌañꞌo rä esperiensia pe̱ꞌtsi. Hänge ogi to̱ꞌmi dä me̱ꞌtsi gatꞌho rä mfädi o rä tsꞌe̱di pa gatꞌho habu̱ gi hohmä dä maxꞌäꞌi. Kada nꞌa de gekhu̱ rꞌa nꞌañꞌo rä mfädi xä rꞌakhu̱ Äjuä (Rom. 12:6-8). Rꞌa yä zi ku ya yä zi däta jäꞌi, hänge rꞌabu̱ hingi tsa dä thogi ndunthi rä tiempo kongekhu̱. Pe nuju̱ dä za gä pädihu̱ ndunthi de geꞌu̱ po gatꞌho näꞌä rä esperiensia xä me̱ꞌtsi ha rä hnini Jeoba.