Hanja dä za gä uñhu̱ ntꞌo̱de mänꞌa xä ñho: ma gä usahu̱ rä mfistꞌofo Enseña

Por hanja mähyoni. Nꞌa de nuꞌu̱ yä erramienta mänꞌa di usahu̱ pa di uñhu̱ ntꞌo̱de, geꞌä rä mfistꞌofo Enseña. Pe pa gä fu̱dihu̱ nꞌa rä estudio mꞌe̱tꞌo pe̱ꞌtsi te gä tsokuäbihu̱ yä jäꞌi. Hänge mähyoni gä pähu̱ hanja gä usahu̱ nuꞌmu̱ di uñhu̱ ntꞌo̱de (Prov. 22:29). Kada nꞌa rä territorio di nꞌañꞌo de märꞌaa, hänge yä publikador ma dä huahni te mä presentasion dä usa.

Te dä za gä pe̱fihu̱:

Huahni nꞌa rä temä ꞌne nꞌa rä ntꞌani de rä mfistꞌofo Enseña näꞌä gi pädi ge ma dä ho yä jäꞌi. Dä za gi yꞌo̱tpäbi nꞌa de nuꞌu̱ yä mu̱di ntꞌani ehe ha näꞌä ntheke. Mꞌe̱fa de dä dädi näꞌä jäꞌi, hñeti nꞌa testo de rä Mäkä Tꞌofo, ꞌne ko nꞌa hängu minuto nxadihu̱ nꞌa parrafo de näꞌä ntheke gä huahni.
Usa nuꞌu̱ yä nxii 3 asta 6 de rä mfistꞌofo Enseña pa gi hyandi te tupäbi yä mu̱i yä jäꞌi, ꞌne ꞌñuti te udi rä Mäkä Tꞌofo de nuꞌu̱ yä temä. Nꞌa manera, dä za gi no̱ni nꞌa de nuꞌu̱ yä notisia ja xä thogi, ꞌne xipäbi ge rꞌa yä jäꞌi nehmä dä bädi rä mpengi nuꞌu̱ yä ntꞌani hutsꞌi rä nxii 3. Mä nꞌa manera, xipäbi ge gi tso̱ni yä besinu pa gi ꞌñuti te mä hogä humu̱i ja pa xudi ndämäni. ꞌÑuti nuꞌu̱ yä kꞌoi hutsꞌi ha rä xii 4 ꞌne 5, ꞌne yꞌambäbi: «¿Ndañꞌä de nuya yä promesa gi hohmä gi hyandi dä kumpli?». O mä nꞌa manera, dä za gi xipäbi ge gi tso̱ni pa gi ñähu̱ de rꞌa yä ntꞌani nuꞌu̱ tupäbi yä mu̱i yä jäꞌi. ꞌÑuti nuꞌu̱ yä ntꞌani ehe ha rä nxii 6 ꞌne yꞌambäbi: «¿Ndañꞌä de nuya yä ntꞌani gi ne timbäbi rä mpengi?».
Yꞌo̱tꞌe ntsꞌe̱di po gi fu̱di yä estudio dende rä mu̱di mꞌiki gi tso̱ni yä jäꞌi. Dä za gi ꞌñenä: «Di umbäbihe nunä mfistꞌofo yä besinu pa dä nxadi rä Mäkä Tꞌofo, ¿ya xki hyandi nunä he̱ꞌmi? [Hyopi dä dädi näꞌä jäꞌi.] Mu̱ ja ri tiempo, di nehmä gä utꞌäꞌi hanja dä za gi nxadi ri Mäkä Tꞌofo ko rä mfatsꞌi nunä mfistꞌofo».

Pe̱fi nuya yä tsꞌofo nunä zänä:

Nsaya rꞌa yä presentasion ha ri Mhuntsꞌi de gä Familia.
Ora gi ungä ntꞌo̱de ko märꞌa yä publikador, xipäbi te mä presentasion gi mbeni gi usa (Prov. 27:17). Mu̱ gi handi ge näꞌä ri presentasion ngu hindi ho yä jäꞌi, mänꞌa dä hogi gi paati.