Ma gä usahu̱ xä ñho rä mfistꞌofo Enseña

Nuꞌu̱ yä jäꞌi di umbäbihu̱ nꞌa rä estudio udi ge ne dä me̱päbi rä bolunta Jeoba, nuꞌmu̱ pe̱fi nuꞌu̱ yä ntꞌudi xä bädi de rä Mäkä Tꞌofo (Sal. 1:1-3). Mu̱ gä usahu̱ xä ñho nuꞌu̱ yä mfatsꞌi pe̱ꞌtsi rä mfistꞌofo Enseña, ma dä za gä fatsꞌihu̱ nuꞌu̱ yä jäꞌi pa dä me̱päbi Jeoba.

Yä mu̱di ntꞌani. Kada nꞌa de nuꞌu̱ yä ntheke hñä rä mfistꞌofo Enseña fu̱di ko rꞌa yä ntꞌani ꞌne ha näꞌä nthekeꞌä uni yä mpengi. Ora ma gi fu̱di gi nxadihu̱ nꞌa rä ntheke, dä za gi hñeti kada nꞌa de nuꞌu̱ yä ntꞌani huxpu̱ pa dä hyandi näꞌä ri estudio te ma dä bädi ha näꞌä ntheke, pe ogi to̱ꞌmi dä dädi nuꞌu̱ yä ntꞌani. O dä za gi yꞌapäbi dä mää te di mbeni de kada nꞌa de nuꞌu̱ yä ntꞌani, mu̱ hingä geꞌä dä dädi ogi xipäbi rä mpengi, ngeꞌä geꞌä ma dä maxꞌäꞌi gi hyandi te pädi ꞌne hanja dä za gi fatsꞌi pa ntiende mänꞌa xä ñho nuꞌu̱ yä ntꞌudi (Prov. 16:23; 18:13).

Rä apendise. Mu̱ näꞌä jäꞌi gi umbäbi nꞌa rä estudio bi ntiende xä ñho näꞌä ntheke, dä za gä mbitabi dä nxadise̱ rä apendise de näꞌä temä, ꞌne xki nxadihu̱ mänꞌaki dä za gi yꞌambäbi mu̱ pe̱ꞌtsi rꞌa yä ntꞌani. O mu̱ gi handi ge mähyoni, dä za gi ꞌuekehu̱ nꞌa hängu minuto pa gi nxadihu̱ mäxo̱ge rä apendise o ho̱nse̱ rꞌa yä parrafo. Dä za gi yꞌapi dä hñeti yä parrafo ꞌne yꞌo̱tpäbi nuꞌu̱ yä ntꞌani gä huahni ora ngi ñhoki.

Rä rekuadro de gä repaso. Xti uadi kada nꞌa rä ntheke, ehe nꞌa rä rekuadro habu̱ hutsꞌi yä mpengi nuꞌu̱ yä mu̱di ntꞌani. Dä za gi hñeti ko näꞌä ri estudio pa gi da ngue̱nda mu̱ bi ntiende xä ñho ꞌne mu̱ dä za dä ꞌñuti märꞌaa. Mꞌe̱fa de gi hñetihu̱ rä mpengi nuꞌu̱ yä ntꞌani ꞌne nuꞌu̱ yä testo huxpu̱, yꞌapäbi ri estudio dä usa nuꞌu̱ yä testo pa dä mää por hanja näꞌä hutsꞌi ha rä rekuadro hää mäjuäni (Hech. 17:2, 3).