Ma gä de̱mbäbihu̱ rä kꞌoi yä profeta: Habacuc
1. ¿Por hanja di ntiendehu̱ xä ñho näꞌä mi tsa rä profeta Habacuc?
1 Nuꞌmu̱ di hanthu̱ ge rä Xiꞌmhai xa ñuꞌtsi ko yä xuñha, di tsahu̱ ngu rä profeta Habacuc nuꞌmu̱ bi ꞌñembäbi Jeoba: «¿Por hanja gi jaki gä handi yä tsꞌo tꞌo̱tꞌe? ꞌNe, ¿por hanja gi hopi dä nja yä ntsꞌomꞌu̱i?» (Hab. 1:3; 2 Tim. 3:1, 13). Mu̱ gä ntso̱ꞌmihu̱ de nuꞌu̱ yä tꞌo̱tꞌe bi thogi Habacuc ꞌne näꞌä bi yꞌofo, ma dä maxkägihu̱ gä ze̱tihu̱ mientra dä zo̱ho̱ näꞌä rä pa de gä juisio (2 Ped. 3:7).
2. ¿Hanja dä za gä udihu̱ ge di ndo̱ꞌmihu̱ ngu Habacuc?
2 Ma gä yꞌohu̱ mänjuäntho. Mäske rä profeta Habacuc bi thogi ndunthi yä xuñha, näꞌä bi ndo̱ꞌmi ꞌne bi sigi bi mpe̱fi pa rä Zi Dada Jeoba (Hab. 2:1). Jeoba bi xipäbi Habacuc, ge näꞌä ma xä kumpli näꞌä xki mää ꞌne nuꞌu̱ yä ꞌme̱go mi yꞌo mänjuäntho ma xa bongi (Hab. 2:2-4). ¿Te utkägihu̱ nunä thogi? Pa nuju̱ mänꞌa mähyoni gä kamfrihu̱ ge ma dä ꞌñepu̱ näꞌä pa de gä juisio, mäske hindi pädihu̱ hämꞌu̱. Rä jamfri geꞌä ma dä maxkägihu̱ gä ndo̱ꞌmihu̱ ꞌne pa gä sigi gä uñhu̱ ntꞌo̱de (Heb. 10:38, 39).
3. ¿Por hanja pe̱ꞌtsi te gä pe̱päbihu̱ rä Zi Dada Jeoba ko rä johya?
3 Di johyahu̱ ngeꞌä di pe̱päbihu̱ Jeoba. Nuꞌmu̱ Gog de Magog dä tsapi dä huati rä hnini Jeoba, ma dä nheki hängu rä jamfri di pe̱ꞌtsihu̱ (Ezeq. 38:2, 10-12). Nuꞌmu̱ ja nꞌa rä tuhni, tso̱ho̱ yä pa xa xä ñhei asta pa nuꞌu̱ täte. Yä jäꞌi di mꞌe̱di nuꞌu̱ yä ñho pe̱ꞌtsi, kasi otho rä ñhuni ꞌne hingi mꞌu̱i xä ñho. ¿Te ma gä pe̱fihu̱ xti zo̱ho̱ nuꞌu̱ yä xuñha? Habacuc mi pädi ge ma xä thogi yä xuñha, pe näꞌä bi me̱päbi rä Zi Dada Jeoba ko ndunthi rä johya (Hab. 3:16-19). «Rä johya Jeoba» geꞌä ma dä maxkägihu̱ ꞌnehe, pa gä ze̱tihu̱ nuꞌu̱ yä xuñha dä ꞌñepu̱ (Neh. 8:10; Heb. 12:2).
4. ¿Te mä ꞌme̱fi di pe̱ꞌtsihu̱ dende nubye̱ ꞌne pa xudi ndämäni?
4 Rä Zi Dada Jeoba ma dä sigi dä ꞌñuti nuꞌu̱ toꞌo ma dä ñäni ha näꞌä rä pa de gä juisio (Hab. 2:14). Nuꞌu̱ yä jäꞌi ma dä nangi de rä du ꞌnehe ma dä bädi de rä Zi Dada Jeoba. Hänge dende nubye̱, ma gä honihu̱ hanja gä ñähu̱ de geꞌä ꞌne de nuꞌu̱ yä ꞌme̱fi xa mähotho xä hyoki (Sal. 34:1; 71:17).