Ma gä udihu̱ näꞌä mäjuäni

Dende rä zänä septiembre, ha rä he̱ꞌmi Programä pa yä mhuntsꞌi Rä Mꞌu̱i ꞌne yä ꞌMe̱fi yä Kristianu ma dä ehe nꞌa rä rꞌayꞌo presentasion rä thuhu «Ma gä udihu̱ näꞌä mäjuäni». Nunä presentasion ma dä ꞌñutkägihu̱ hanja gä udihu̱ nꞌa rä tema de rä Mäkä Tꞌofo po mäde de gä usahu̱ nꞌa rä ntꞌani ꞌne nꞌa rä testo.

Mu̱ di ho dä yꞌo̱de näꞌä jäꞌi di umbäbihu̱ ntꞌo̱de, nuꞌmu̱ dä za gä tsokuäbihu̱ nꞌa rä he̱ꞌmi o gä utuäbihu̱ nꞌa rä bideo de jw.org ꞌne gä kohihu̱ gä pengihu̱ mä nꞌa rä pa. Mähyoni gä o̱thu̱ ntsꞌe̱di pa gä pengihu̱ nguntꞌä. Nuꞌu̱ yä rꞌayꞌo presentasion ꞌne yä asignación, ma dä thäi ha nuꞌu̱ yä rekuadro enä «Näꞌä udi rä Mäkä Tꞌofo» de rä mfistꞌofo ¿Te xa mäjuäni udi rä Mäkä Tꞌofo? Ha nuꞌu̱ yä rekuadroꞌu̱ hutsꞌi märꞌa yä testo nuꞌu̱ dä za gä usahu̱ pa gä jahu̱ yä rebisita o yä estudio ko ho̱nse̱ rä Mäkä Tꞌofo.

Ja ho̱nse̱ nꞌa rä ꞌñuu näꞌä tsitsꞌi ha rä te (Mt 7:13, 14). Koꞌmu̱ nuꞌu̱ yä jäꞌi di umbäbihu̱ ntꞌo̱de pe̱ꞌtsi rꞌa nꞌañꞌo yä jamfri ꞌne yä nzäi, mähyoni gä honihu̱ hanja gä utuäbihu̱ de rä Noya Äjuä pa njabu̱ gä tso̱mbäbihu̱ ha yä koraso (1Ti 2:4). Nu xkä pädihu̱ hanja gä udihu̱ rꞌa nꞌañꞌo yä tema ko rä Mäkä Tꞌofo, mänꞌa ma gä pe̱ꞌtsihu̱ rä johya ꞌne ma gä fatsꞌihu̱ mänꞌa xä ñho yä jäꞌi pa dä bädi de Äjuä (2Ti 2:15).