MÄ MꞌU̱IHU̱ NGU YÄ KRISTIANU

Pädi gi huahni xä ñho konte ma gi diberti

¿Por hanja xa mähyoni gä pädi gä huahnihu̱ xä ñho konte ma gä dibertihu̱? Ngeꞌä ora di huahnihu̱ nꞌa rä pelikula, nꞌa rä thuhu, nꞌa rä página de Internet, nꞌa rä mfistꞌofo, o nꞌa rä videojuego; di huahnihu̱ konte ma gä ñuꞌtsihu̱ mä mfenihu̱. Nuꞌu̱ yä kosa di huahnihu̱ pa gä dibertihu̱, dä za dä afekta mä mfenihu̱ ꞌne hanja di portahu̱. Ngeꞌä kasi gatꞌho nuꞌu̱ yä dibersio ja mäpaya, di ñꞌoui yä tꞌo̱tꞌe nuꞌu̱ di u̱tsa Jeoba (Sl 11:5; Gál 5:19-21). Hänge rä Mäkä Tꞌofo nzäntho di animägihu̱ gä e̱ntꞌihu̱ ha mä mfenihu̱ nuꞌu̱ yä tꞌo̱tꞌe eꞌspäbi rä nsu Jeoba (Flp 4:8).

HYANDIHU̱ RÄ BIDEO ¿TE MÄ DIBERSIO DÄ ZA GÄ HUAHNI? MꞌE̱FA THÄDIHU̱ NUYA YÄ NTꞌANI:

¿Hanja ri hñätsꞌi rꞌa de nuꞌu̱ yä dibersio ja mäpaya, ko nuꞌu̱ yä ntꞌeni de gä lucha mi ja mäyaꞌmu̱ ha rä hnini Roma?
¿Hanja dä za gä fatsꞌihu̱ nuꞌu̱ yä bäsjäꞌi de rä mhuntsꞌi pa dä huahni yä hogä dibersio?
¿Hanja faxkägihu̱ Romanos 12:9 ora di huahnihu̱ konte ma gä dibertihu̱?
¿Te mä dibersio xä ntꞌaxi ja habu̱ gi ꞌmu̱i?

YÄ DIBERSIO NUꞌU̱ DI HANDÄTHOHU̱ ꞌNE YÄ DIBERSIO HABU̱ DI PARTISIPAHU̱

Ndunthi de nuꞌu̱ yä dibersio ja mäpaya, hingi ja mꞌe̱di gä partisipahu̱. Por ejemplo, yä pelikula, yä mfistꞌofo ꞌne nuꞌu̱ yä programä po̱ni ha rä telebision, udi näꞌä pe̱fi märꞌa yä jäꞌi ꞌne nuju̱ ho̱nse̱ di handäthohu̱. Mäske rꞌabu̱ xä ñho nuya yä dibersio, mänꞌa xä ñho nuꞌu̱ yä dibersio habu̱ dä za gä partisipahu̱. Por ejemplo, rꞌa yä jäꞌi di diberti ora pe̱i nꞌa rä instrumento o nuꞌmu̱ pinta nꞌa rä kuadro. Märꞌaa, di ho dä ma dä ungä nꞌa rä gatꞌi o dä ma dä ñꞌeni. Hindi mporta te mä dibersio di huahnihu̱, nunka di debe gä pumfrihu̱ ge mähyoni gä pe̱fihu̱ «gatꞌho yä tꞌo̱tꞌe pa rä nsunda Äjuä» (1Co 10:31).