Rꞌa yä idea pa gi nxadi rä Mäkä Tꞌofo

Näꞌä debe gä pe̱fihu̱ mꞌe̱tꞌo

Mäpaya gatꞌho di pe̱ꞌtsihu̱ ndunthi te gä pe̱fihu̱ ꞌne rꞌabu̱ ya ho̱nse̱ kohi nꞌa zi tu̱itho rä tiempo pa gä hudihu̱ gä nxadihu̱ rä Mäkä Tꞌofo. ¿Hänge te dä hogi gä pe̱fihu̱ pa gä probechahu̱ xä ñho näꞌä rä zi tu̱kä tiempo kohi? Nꞌaa, usa xä ñho näꞌä rä tiempo xkä ꞌueke pa gi nxadi rä Mäkä Tꞌofo. Mänꞌa dä hogi gä nxadihu̱ xä ñho nꞌa zi tu̱i rä imformäsio ke gä hetihu̱ xa ndunthi rä imformäsio de gä so̱ni.

Yoho, hyandi te mä imformäsio debe gi nxadi mꞌe̱tꞌo (Efes. 5:15, 16). Gehnä dä hogi gi pe̱fi:

• Hñeti rä Mäkä Tꞌofo hyaxtho (Sal. 1:2). Dä za gi fu̱di po gi hñeti nuꞌu̱ yä capítulo de rä Mäkä Tꞌofo ehe tatꞌä semänä pa rä mhuntsꞌi Rä Mꞌu̱i ꞌne yä ꞌMe̱fi yä Kristianu.

• Nxadi näꞌä rä imformäsio ma gä handihu̱ ha yä mhuntsꞌi, tanto ko rä revista Yꞌo̱dehu̱ ꞌne rä Programä pa yä mhuntsꞌi. ꞌNehe hyoki nuꞌu̱ ri komentario ma gi uni (Sal. 22:22).

• Ora gi handi ge kohi nꞌa tu̱i rä tiempo, yꞌo̱tꞌe ntsꞌe̱di po gi hñeti ꞌnehe nuꞌu̱ märꞌa yä revista, gi hyandi yä bideo ꞌne nuꞌu̱ märꞌa yä imformäsio di ꞌmo̱ꞌtse ha jw.org.

• ꞌUeke rä tiempo näꞌä ma gi usa pa gi nxadise̱ rä Mäkä Tꞌofo ꞌne gi hyoni rä imformäsio de nꞌa rä xuñha näꞌä gi thogi, de nꞌa rä duda o ntꞌani gi pe̱ꞌtsi, o de mä nꞌa rä asunto o ntꞌudi näꞌä gi ne gi ntiende mänꞌa xä ñho. Ha jw.org habu̱ enä «Actividades para estudiar la Biblia» ja gehni ꞌnehe dä za gi huahni te mä imformäsio gi ne gi nxadi.