Japi dä te ri mhäte po märꞌaa

1, 2. a) ¿Por hanja rä apostol Pablo bi ꞌñenä ge rä mhäte ge «mänꞌa xi rä dängi de gatꞌho»? b) ¿Te mä ntꞌani ma gä thädihu̱?

NUꞌMU̱ rä apostol Pablo bi no̱ni nuꞌu̱ yä hogä mꞌu̱i ngu rä jamfri, rä humu̱i ꞌne rä mhäte, näꞌä bi ꞌñenä ge rä mhäte geꞌä «mänꞌa xi rä dängi de gatꞌho» (1 Cor. 13:13). ¿Por hanja bi ꞌñenä njabu̱? Ngeꞌä mäpaya di o̱thu̱ ntsꞌe̱di po gä tedehu̱ näꞌä rä jamfri ꞌne rä humu̱i di pe̱ꞌtsihu̱ de gä handihu̱ hanja nꞌa rä pa, rä Zi Dada Jeoba ma dä kumpli yä promesa. Pe ha rä Paraiso, ya hingä ma dä ja mꞌe̱di gä tedehu̱ nunä humu̱i. ¿Por hanja hinä? Ngeꞌä nuju̱se̱ ma gä hanthu̱ hanja rä Zi Dada Jeoba ma dä kumpli gatꞌho näꞌä xä prometegihu̱. Pe hingi thogi njabu̱ ko rä mhäte. ¿Por hanja hinä? Ngeꞌä mäske ma grä ꞌmu̱ihu̱ ha rä Paraiso, tobe ma dä ja mꞌe̱di gä sigihu̱ gä tedehu̱ nunä rä mhäte po rä Zi Dada Jeoba ꞌne po gatꞌho yä ku.

² Koꞌmu̱ nzäntho di ja mꞌe̱di gä tedehu̱ rä mhäte, ma gä handihu̱ hñuu yä ntꞌani: 1) ¿Por hanja di debe gä mädihu̱ nꞌa ngu mänꞌaa? 2) ¿Hanja dä za gä udihu̱ ge hää di mädihu̱ nꞌa ngu mänꞌaa? ꞌNe 3) ¿te dä za gä pe̱fihu̱ pa gä japäbihu̱ dä te näꞌä rä mhäte di sentihu̱ po mä kuhu̱?

¿POR HANJA DI DEBE GÄ MÄDIHU̱ NꞌA NGU MÄNꞌAA?

3. ¿Te mä raso di pe̱ꞌtsihu̱ pa gä mädihu̱ nꞌa ngu mänꞌaa?

³ ¿Por hanja di debe gä mädihu̱ nꞌa ngu mänꞌaa? Di pe̱ꞌtsihu̱ ndunthi yä raso pa gä mädihu̱ nꞌa ngu mänꞌaa. Por ejemplo, ora di mädihu̱ nꞌa ngu mänꞌaa, di udihu̱ ge xa mäjuäni di de̱nihu̱ rä Hesu. Mi mꞌu̱kua ha rä Xiꞌmhai rä Hesu bi ꞌñembäbi nuꞌu̱ yä apostol: «Mu̱ gi pe̱fihu̱ njabu̱, gatꞌho ma dä bädi ge nuꞌähu̱ go mä de̱niꞌihu̱, mu̱ gi mädihu̱ entre geꞌähu̱» (Juan 13:​35, TNM). ꞌNehe, rä mhäte jakägihu̱ gä mꞌu̱ihu̱ unido. Rä apostol Pablo bi ꞌñenä ge rä mhäte «jakhu̱ gä nꞌathohu̱ pa gä ꞌmu̱hu̱ ko nꞌadä rä mfeni» (Col. 3:14). Ja mä nꞌa rä raso de por hanja di debe gä mädihu̱ nꞌa ngu mänꞌaa. Rä apostol Juan bi ꞌñembäbi nuꞌu̱ yä kristianu de rä mu̱di siglo: «Nuꞌä toꞌo mädi Äjuä, mähyoni ꞌnehe dä mädi rä ku» (1 Juan 4:21). Ora di udihu̱ rä mhäte po gatꞌho yä ku, ꞌnehe di udihu̱ rä mhäte po rä Zi Dada Jeoba.

4, 5. ¿Te mä ejemplo ma dä maxkägihu̱ pa gä handihu̱ hanja ꞌmu̱i näꞌä rä mhäte di pe̱ꞌspäbihu̱ rä Zi Dada Jeoba?

⁴ ¿Por hanja dä za gä eñhu̱ ge näꞌä rä mhäte di udihu̱ po gatꞌho yä ku, udi ꞌnehe hängu rä mhäte di pe̱ꞌspäbihu̱ rä Zi Dada Jeoba? Ma gä hutsꞌihu̱ nꞌa rä ejemplo, di pädihu̱ ge mä korasohu̱ di mpe̱fi mähye̱gi ko märꞌa yä parte de mä ndoyꞌohu̱. Hänge mu̱ nꞌa rä mediko ne dä bädi tengu ꞌmu̱i ri koraso, ¿xkä da ngue̱nda ge näꞌä tohni ri yꞌe̱ pa dä senti hanja sagi ri koraso ꞌne dä bädi mu̱ di mpe̱fi xä ñho o hinä? ¿Te utkägihu̱ nunä ejemplo?

⁵ Njabu̱ ꞌnehe, pa gä pädihu̱ mu̱ xa mäjuäni di mädihu̱ rä Zi Dada Jeoba mähyoni gä handihu̱ mu̱ xa mäjuäni di mädihu̱ gatꞌho yä ku. Mu̱ di dahu̱ ngue̱nda ge xä käni näꞌä rä mhäte di pe̱ꞌspäbihu̱ yä ku, nuꞌmu̱ zäi ge ꞌnehe xä käni näꞌä rä mhäte di pe̱ꞌspäbihu̱ rä Zi Dada Jeoba. Pe mu̱ di nzäihu̱ gä utihu̱ mä kuhu̱ hängu di mädihu̱, signifika ge xa tse̱di ꞌnehe näꞌä rä mhäte di pe̱ꞌspäbihu̱ rä Zi Dada Jeoba.

6. ¿Por hanja di debe gä tumämu̱ihu̱ mu̱ di handihu̱ ge xä käni näꞌä rä mhäte di pe̱ꞌspäbihu̱ yä ku? (1 Juan 4:​7-9, 11).

⁶ ¿Por hanja di debe gä tumämu̱ihu̱ mu̱ di handihu̱ ge näꞌä rä mhäte di pe̱ꞌspäbihu̱ yä ku xä käni? Ngeꞌä signifika ge ꞌmu̱i en peligro näꞌä rä amista di pe̱ꞌspäbihu̱ rä Zi Dada Jeoba. Geꞌä udi nuꞌu̱ yä noya bi yꞌofo rä apostol Juan nuꞌmu̱ bi ꞌñenä ge mu̱ nꞌa rä kristianu «hingi mädi rä ku to go handi, hanja dä mädi Äjuä to go hinxä hyandi» (1 Juan 4:​20, RN). ¿Te utkägihu̱ nuya yä noya? Ge rä Zi Dada Jeoba ma dä numäñhogihu̱ ho̱nse̱ mu̱ di mädihu̱ nꞌa ngu mänꞌaa (hñeti 1 Juan 4:​7-9, 11).

¿TE MÄHYONI GÄ PE̱FIHU̱ PA GÄ UDIHU̱ GE DI MÄDIHU̱ MÄ KUHU̱?

7, 8. ¿Te mähyoni gä pe̱fihu̱ pa gä udihu̱ ge di mädi mä kuhu̱?

⁷ Ha rä Mäkä Tꞌofo njatꞌä di tinihu̱ nunä mhända: «Mädihu̱ nꞌa ngu mänꞌaa» (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Pe näꞌä rä mhäte di sentihu̱ hingi tsa toꞌo dä hyandi ngeꞌä po̱ho̱ mbo de ha mä korasohu̱. Hänge, ¿hanja dä za gä ju̱kihu̱ näꞌä rä mhäte ja mbo ha mä korasohu̱ pa njabu̱ märꞌaa dä hyandi? Po mäde de näꞌä di mäñhu̱ ꞌne näꞌä di pe̱fihu̱.

⁸ Ja ndunthi yä modo de hanja dä za gä utihu̱ gatꞌho mä kuhu̱ ge di mädihu̱. Rä Mäkä Tꞌofo xikägihu̱ rꞌa de nuya yä forma ora enä: «Mäñhu̱ näꞌä mäjuäni nꞌa ngu mänꞌaa» (Zac. 8:16). «ꞌMu̱hu̱ nꞌa rä hogä mꞌu̱i nꞌa ngu nꞌaa» (Mar. 9:​50, RN). «En cuanto gi ꞌñudihu̱ rä tꞌekꞌei nꞌa ngu mänꞌaa, go dä ju̱tꞌihu̱ rä ꞌñuu» (Rom. 12:​10, TNM). «Ko rä johya uñhu̱ ntsaya nꞌa ngu mänꞌaa» (Rom. 15:​7, TNM). «Sigi gi [ . . . ] mpumbäbihu̱ nꞌa ngu mänꞌaa» (Col. 3:​13, TNM). «Sigi gi mfaxu̱ nꞌa ngu mänꞌaa pa gi ndudehu̱ nuꞌu̱ ri ꞌmatsꞌihu̱» (Gál. 6:​2, TNM). «Hñuꞌmpämu̱ihu̱ nꞌa ngu mänꞌaa» (1 Tes. 4:18). «Sigi gi [ . . . ] nupämfenihu̱ nꞌa ngu mänꞌaa» (1 Tes. 5:​11, TNM). «Xadihu̱ nꞌa ngu mänꞌaa» (Sant. 5:​16, TNM).

9. ¿Por hanja dä za gä eñhu̱ ge ora di huꞌmpäbihu̱ yä mu̱i märꞌaa geꞌä ꞌnehe ri bo̱ni gä udihu̱ rä mhäte? (Hyandi ꞌnehe yä foto).

⁹ Ma gä handihu̱ mänꞌa xä ñho te ri bo̱ni ora rä apostol Pablo bi ꞌñenä «hñuꞌmpämu̱ihu̱ nꞌa ngu mänꞌaa». ¿Por hanja dä za gä eñhu̱ ge ora di huꞌmpäbihu̱ yä mu̱i märꞌaa geꞌä ꞌnehe ri bo̱ni gä udihu̱ rä mhäte? Nꞌa rä mfistꞌofo de gä imbestigasio mää ge rä apostol Pablo bi usa rä noya hñuꞌmpämu̱ihu̱ de rä idioma griego, ꞌne signifika ora toꞌo ꞌmai ha rä lado nꞌa rä jäꞌi pa dä nupäbi rä mfeni ora thogi yä xuñha. Ora di huꞌmpäbihu̱ rä mu̱i nꞌa rä ku näꞌä di sufri, di fatsꞌihu̱ pa dä sigi dä ñꞌo ha näꞌä rä ꞌñuu tsitsꞌi ha rä te pa nzäntho. Hänge ora di ꞌuekehu̱ rä tiempo pa di kompañähu̱ nuꞌu̱ mä zi kuhu̱ thogi yä sufrimiento ꞌne zoni po yä dumu̱i, signifika ge di mädihu̱ ndunthi (2 Cor. 7:​6, 7, 13).

10. ¿Por hanja toꞌo xa mäjuäni di senti rä nhuekäte hingä ho̱nse̱ mäntho?

¹⁰ Nꞌa rä jäꞌi näꞌä senti rä nhuekäte po nuꞌu̱ di sufri hingä ho̱nse̱ mäntho. ¿Por hanja di mäñhu̱ njabu̱? Ngeꞌä ora nꞌa rä jäꞌi senti rä nhuekäte po nuꞌu̱ di sufri, ꞌnehe ꞌmu̱i dispuesto dä hñuꞌmpäbi yä mu̱i ꞌne honi rä forma hanja dä matsꞌi. Hää, nꞌa rä jäꞌi mꞌe̱tꞌo di senti rä nhuekäte, ꞌne näꞌä nhuekäte geꞌä japäbi dä hyoni rä modo hanja dä matsꞌi märꞌaa o dä hñuꞌmpäbi yä mu̱i. Geꞌä pe̱fi rä Zi Dada Jeoba. Rä apostol Pablo bi ꞌñenä ge rä Zi Dada Jeoba «go geꞌä mä Dadahu̱ nuꞌä pe̱skähu̱ rä nthekäte ꞌne go geꞌä nzäntho hubgä mä mu̱ihu̱». Hää, näꞌä rä nthekäte senti rä Zi Dada Jeoba po yä jäꞌi geꞌä japäbi dä hyoni rä modo hanja dä hñuꞌmpäbi yä mu̱i (2 Cor. 1:3). Ora rä apostol Pablo bi ꞌñenä ge rä Zi Dada Jeoba «go geꞌä mä Dadahu̱ nuꞌä pe̱skähu̱ rä nthekäte», udi ge rä nthekäte bi ehe de rä Zi Dada Jeoba. Näꞌä rä nthekäte pe̱skägihu̱ geꞌä japäbi dä hubgä mä mu̱ihu̱ ora di thohu̱ yä tsꞌo thogi (2 Cor. 1:4). Ja ngu nꞌa rä po̱tꞌhe habu̱ ehe rä dehe ꞌne japi dä tsaya rä nduthe yä jäꞌi, njabu̱ ꞌnehe rä Zi Dada Jeoba japi dä tsaya näꞌä rä u̱gi ꞌne rä dumu̱i senti ha rä koraso yä jäꞌi. Pe xi nuju̱, ¿te dä za gä pe̱fihu̱ pa gä de̱mbäbihu̱ rä ejemplo rä Zi Dada Jeoba ꞌne gä sentihu̱ rä nthekäte ꞌne gä huꞌmpäbihu̱ yä mu̱i nuꞌu̱ toꞌo thogi yä sufrimiento? Mähyoni gä potꞌihu̱ nuꞌu̱ yä hogä mꞌu̱i ma dä maxkägihu̱ gä sentihu̱ rä nthekäte pa njabu̱ dä za gä huꞌmpäbihu̱ yä mu̱i märꞌaa. ¿Ndaꞌu̱ nuꞌu̱ yä hogä mꞌu̱i? Ma gä handihu̱.

11. ¿Te ma dä maxkägihu̱ gä sigihu̱ gä mädihu̱ mä kuhu̱ ꞌne gä huꞌmpäbihu̱ yä mu̱i ora thogi yä xuñha? (Colosenses 3:12; 1 Pedro 3:8).

¹¹ ¿Te ma dä maxkägihu̱ gä sigihu̱ gä mädihu̱ mä kuhu̱ ꞌne gä huꞌmpäbihu̱ yä mu̱i ora thogi yä xuñha? Mu̱ hindi sentihu̱ rä nhuekäte po märꞌaa, mähyoni gä nxadihu̱ gä sentihu̱ näꞌä di sentiꞌu̱ ꞌne gä imäjinähu̱ ge go gekhu̱ di thogihu̱ näꞌä thogiꞌu̱. ꞌNehe mähyoni gä nxadihu̱ gä mädihu̱ ꞌne gä ñhojäꞌihu̱ kongeꞌu̱ (hñeti Colosenses 3:12; 1 Pedro 3:8). Ora di potꞌihu̱ nuya yä hogä mꞌu̱i mähye̱gi ko rä nhuekäte, geꞌä ma dä jakägihu̱ gä nehu̱ gä huꞌmpäbihu̱ yä mu̱i nuꞌu̱ mä kuhu̱ thogi yä xuñha. Rä Hesu bi ꞌñenä: «Nuꞌä gi beñhu̱ ha ri mfenihu̱ go geꞌä gi mäñhu̱ ꞌnehe. Nuꞌä toꞌo bengä yä hogä mfeni mängä yä hogä noya» (Mat. 12:​34, 35). Ja ngu di handihu̱, mu̱ ha mbo mä korasohu̱ ja rä mhäte, geꞌä ma dä jakägihu̱ gä huꞌmpäbihu̱ yä mu̱i mä kuhu̱ ora thogi yä u̱gi ꞌne yä dumu̱i.

¿HANJA DÄ ZA GÄ JAPÄBIHU̱ DÄ ZE̱DI NÄꞌÄ RÄ MHÄTE DI PE̱ꞌSPÄBIHU̱ MÄ KUHU̱?

12. a) ¿De te di debe gä nsuhu̱? b) ¿Te ma gä handihu̱?

¹² Rä Zi Dada Jeoba di mändagihu̱ «gä mädihu̱ nꞌa ngu mänꞌaa» (1 Juan 4:7). Mi mꞌu̱kua rä Hesu ha rä Xiꞌmhai, bi ꞌñenä ge gä nsuhu̱ ngeꞌä ha nuya yä gäxä pa «ma dä ꞌme̱di rä mhäte» (Mat. 24:12). Nuya yä noya bi mängä rä Hesu hindi signifika ge bi mää ge entre yä kristianu hingä ma dä mädi. Pe mäske njabu̱, mähyoni gä nsuhu̱ ngeꞌä ha rä xiꞌmhai xi ndunthi nuꞌu̱ yä jäꞌi hingi udi rä mhäte ꞌne hindi nehu̱ dä hyo̱xkägihu̱ yä mꞌu̱i. Po rängeꞌä ma gä handihu̱ hanja dä za gä pädihu̱ mu̱ näꞌä rä mhäte di sentihu̱ po mä kuhu̱, mänꞌa xä ze̱di o yꞌo ri käni.

13. ¿Habu̱ ma dä nheki mu̱ xa mäjuäni di mädihu̱ yä ku?

¹³ ¿Hanja dä za gä pädihu̱ mu̱ tse̱di näꞌä rä mhäte di sentihu̱ po mä kuhu̱? Dä za gä pädihu̱ po näꞌä rä modo hanja di portahu̱ ora thogi yä xuñha (2 Cor. 8:8). ¿Ngu te mä xuñha? Rä apostol Pedro bi ꞌñenä: «Ogi pumfrihu̱ xa gi mädihu̱ nꞌa ngu mänꞌaa. Ngeꞌä rä mhäte koꞌmi nꞌa tꞌo̱ꞌtse yä pekado» (1 Ped. 4:​8, TNM). Hää, ora mä kuhu̱ komete yä error o o̱tkägihu̱ rä ntsꞌomꞌu̱i, ja ma dä nhekini mu̱ tse̱di o hinä näꞌä rä mhäte di sentihu̱ po geꞌu̱.

14. Ja ngu di handihu̱ ha 1 Pedro 4:​8, ¿tengu näꞌä rä mhäte di debe gä potꞌihu̱? Mää nꞌa rä ejemplo.

¹⁴ Ma gä handihu̱ xä ñho te ri bo̱ni näꞌä bi mää rä apostol Pedro. Ha rä versículo 8 enä: «Xa gi mädihu̱». Njabu̱ udi ge ndunthi näꞌä rä mhäte di debe gä sentihu̱. Rä apostol Pedro bi usa yä noya xa gi mädihu̱ de rä idioma griego ꞌne di signifika «näꞌä di ntu̱ngi». Ha nunä versículo rä apostol Pedro bi mää te di logra näꞌä rä mhäteꞌä ora bi ꞌñenä: «Koꞌmi nꞌa tꞌo̱ꞌtse yä pekado». Hää, nunä mhäte xa di ntu̱ngi ngu nꞌa rä tela ꞌne koꞌmi hingä ho̱nse̱ nꞌatho ni yoho yä pekado, sino logra dä goꞌmi nꞌa tꞌo̱ꞌtse yä pekado. Ha nunä versículo rä noya koꞌmi signifika «pumbäbi». Hää, ja ngu nꞌa rä tela näꞌä dä za dä goꞌmi nꞌa rä mancha, rä mhäte tsa dä goꞌmi nuꞌu̱ yä error märꞌaa.

15. ¿Te di lograhu̱ gä pe̱fihu̱ mu̱ tse̱di näꞌä rä mhäte di sentihu̱ po gatꞌho mä kuhu̱? (Colosenses 3:13).

¹⁵ Mäske rꞌabu̱ xa di jakägihu̱ xä ñhei, näꞌä rä mhäte di pe̱ꞌspäbihu̱ gatꞌho yä ku debe dä maxkägihu̱ pa gä pumbäbihu̱ ora di komete yä error (hñeti Colosenses 3:13). Ora di lograhu̱ gä pumbäbihu̱ mä kuhu̱, di udihu̱ ge xa tse̱di mä mhätehu̱ ꞌne di nheki hängu di ne gä johyabihu̱ rä koraso rä Zi Dada Jeoba. ¿Pe te mä nꞌa ma dä maxkägihu̱ pa gä pumbäbihu̱ mä kuhu̱ ora komete yä error kontra gekhu̱ o nuꞌmu̱ pe̱fi nꞌa rä tꞌo̱tꞌe näꞌä di mfadagihu̱?

16, 17. ¿Te ma dä maxkägihu̱ gä pumbäbihu̱ mä kuhu̱ ꞌne gä borrahu̱ de ha mä mfenihu̱ mu̱ nꞌa rä pa bi ofendegihu̱? Hñutsꞌi nꞌa rä ejemplo. (Hyandi ꞌnehe yä foto).

¹⁶ Mu̱ hingä geꞌä pe̱fi mä kuhu̱, mänꞌa dä hogi gi hyandi nuꞌu̱ yä hogä mꞌu̱i pe̱ꞌtsi ꞌne näꞌä pe̱fi xä ñho. Ma gä hutsꞌihu̱ nꞌa rä ejemplo. Imäjinä ge nuꞌu̱ xkä muntsꞌi ko märꞌa yä ku ꞌne pa ri uadi gä häi rꞌa yä foto. Pe ora gi handi mänꞌaki nuꞌu̱ yä foto gi da ngue̱nda ge jabu̱ rꞌa habu̱ rꞌa yä ku himbi bo̱ni xä ñho. ¿Te ma gi pe̱fi? Zäi ge ma gi hñäki nuꞌu̱ himbi bo̱ni ꞌne ma gi kohui nuꞌu̱ yä foto habu̱ gi handi ge gatꞌho yä ku thede ꞌne bi bo̱ni xä ñho.

¹⁷ Näꞌä di e̱ntꞌihu̱ ha mä mfenihu̱ de näꞌä thogi ko mä kuhu̱, ꞌñenä nuꞌu̱ yä foto di desidihu̱ gä pe̱ꞌtsihu̱. Mäske rꞌabu̱ mä kuhu̱ komete yä error, ¿pe hingä mäjuäni ge xä me̱fi ndunthi yä hogä tꞌo̱tꞌe ꞌne xtä thogihu̱ yä hogä rato kongeꞌu̱? ¿Hänge te dä hogi gi pe̱fi ora yä ku di ofendeꞌi ko näꞌä mää o ko näꞌä pe̱fi? ¿Ma gi desidi gi yꞌe̱ntꞌi ha ri mfeni? ¿Ma gi borra de ri mfeni ja ngu ora gi häki nꞌa rä foto näꞌä himbi bo̱ni xä ñho? (Prov. 19:11; Efes. 4:32). Hää, mänꞌa xä ñho gä e̱ntꞌihu̱ ha mä mfenihu̱ nuꞌu̱ yä hogä rato ꞌne yä hogä esperiensia xtä thogihu̱ ko nuꞌu̱ mä kuhu̱, ꞌne gä häkihu̱ de ha mä mfenihu̱ mu̱ nꞌa rä pa bi ofendegihu̱.

¿POR HANJA MÄNꞌA XA MÄHYONI GÄ UDIHU̱ RÄ MHÄTE HA NUYA YÄ PA DI ꞌMU̱IHU̱?

18. ¿Te bi ꞌñutkägihu̱ nunä ntꞌudi dä nxadihu̱?

¹⁸ ¿Por hanja di ne gä tedehu̱ ꞌne gä japäbihu̱ dä ze̱di näꞌä rä mhäte di sentihu̱ po mä kuhu̱? Ja ngu ya dä handihu̱, ora di udihu̱ rä mhäte po gatꞌho yä ku, di udihu̱ ge ꞌnehe di mädihu̱ rä Zi Dada Jeoba. ¿Hanja dä za gä udihu̱ ge xa mäjuäni di mädihu̱ mä kuhu̱? Mähyoni gä huꞌmpäbihu̱ yä mu̱i ora thogi yä xuñha. Mu̱ xa mäjuäni di huekihu̱ mä kuhu̱, ma gä honihu̱ rä modo hanja gä nupäbihu̱ yä mfeni ꞌne gä huꞌmpäbihu̱ yä mu̱i. ¿Te mä nꞌa dä za gä pe̱fihu̱ pa njabu̱ dä ze̱di näꞌä rä mhäte di sentihu̱ po geꞌu̱? Mähyoni gä mꞌu̱ihu̱ dispuesto gä pumbäbihu̱ mä kuhu̱ ora di ofendegihu̱.

19. ¿Por hanja mäpaya mänꞌa xa mähyoni gä udihu̱ rä mhäte po mä kuhu̱?

¹⁹ ¿Por hanja mäpaya mänꞌa xa mähyoni gä udihu̱ rä mhäte po mä kuhu̱? Rä apostol Pedro bi uni nꞌa rä däta raso nuꞌmu̱ bi ꞌñenä: «Ya xä ꞌñepu̱ näꞌä rä pa habu̱ ma dä gätsꞌi gatꞌho yä tꞌo̱tꞌe xä ntsꞌo. Hänge [ . . . ] xa gi mädihu̱ nꞌa ngu mänꞌaa» (1 Ped. 4:​7, 8, TNM). Ngu ri thogi kada nꞌa rä pa, mänꞌa ri mꞌu̱i getbu̱ rä fin. ¿Te bi mängä rä Hesu ge to̱ꞌmpäbi nuꞌu̱ yä de̱ni? Näꞌä bi ꞌñenä: «Toräza dä u̱tsaꞌihu̱ ngeꞌä xkä kamfrigihu̱» (Mat. 24:9). Pa gä täpäbihu̱ yä ntꞌu̱tsate mähyoni gä mädihu̱ ꞌne gä mꞌu̱ihu̱ unido. Rä Zithu di trata dä dibidigihu̱ pe hingä ma gä hopäbihu̱, ngeꞌä näꞌä rä mhäte di sentihu̱ po gatꞌho mä kuhu̱ «geꞌä di jakhu̱ gä nꞌathohu̱ pa gä ꞌmu̱hu̱ ko nꞌadä rä mfeni» (Col. 3:14; Filip. 2:​1, 2).