Ja ngu rä Hesu, ma gä nxo̱nihu̱ gä predikahu̱ ko ndunthi rä johya

1. ¿Por hanja yä testigo rä Jeoba di nꞌañꞌo de gatꞌho märꞌa yä relijion?

YÄ TESTIGO RÄ JEOBA di nꞌañꞌohu̱ de gatꞌho märꞌa yä relijion. ¿Por hanja? Ngeꞌä nuju̱ di de̱mbäbihu̱ rä ejemplo Ñhesukristo ꞌne xa di o̱thu̱ ntsꞌe̱di po gä predikabihu̱ gatꞌho yä jäꞌi (Tito 2:14). Pe mäske njabu̱, rꞌabu̱ rꞌa de gekhu̱ dä za dä jakägihu̱ xä ñhei gä tinihu̱ rä johya ora di predikahu̱. Nꞌa rä zi ku näꞌä faxte de gä anciano ha rä mhuntsꞌi bi ꞌñenä: «Rꞌabu̱ hingi ja mä ganä gä po̱ni gä predika».

2. ¿Por hanja rꞌabu̱ di jakägihu̱ xä ñhei gä sentihu̱ rä johya ora di po̱nihu̱ di predikahu̱?

² ¿Por hanja rꞌabu̱ dä za dä jakägihu̱ xä ñhei gä tinihu̱ rä johya ora di predikahu̱? Zäi ge jabu̱ märꞌa yä ꞌme̱fi ha rä hnini rä Zi Dada Jeoba nuꞌu̱ mänꞌa di hohu̱ ke gä po̱nihu̱ gä predikahu̱. Por ejemplo, ora di faxtehu̱ habu̱ thoki yä Ngu de gä Mhuntsꞌi, ora di nupäbihu̱ yä mfeni yä zi ku, o nuꞌmu̱ di fatsꞌihu̱ nuꞌu̱ mä zi kuhu̱ habu̱ bi ja yä tsꞌo thogi; zäi ge mäntꞌä di handihu̱ hanja po̱ni xä ñho näꞌä mä ꞌme̱fihu̱ ꞌne geꞌä jakägihu̱ gä sentihu̱ xä ñho. Ha nuya yä ꞌme̱fi, ja nꞌa rä hogä ntsitsꞌi ꞌne nuꞌu̱ yä ku di fatsꞌihu̱ xa di balora ne ungä njamädi po näꞌä di pe̱fihu̱ po geꞌu̱. Geꞌä jakägihu̱ xa gä johyahu̱. Pe hingi njabu̱ ora di po̱nihu̱ gä predikahu̱. ¿Por hanja? Mu̱ ya o̱tꞌe ndunthi yä je̱ya de di predikahu̱ ha nꞌadä rä luga ꞌne yä jäꞌi ya hingi ne dä yꞌo̱de o asta te xikägihu̱, zäi ge geꞌä jakägihu̱ gä ꞌme̱dihu̱ rä johya (Mat. 10:22). Koꞌmu̱ di ꞌmu̱ihu̱ ha yä gäxä pa, di pädihu̱ ge yä jäꞌi mänꞌa ma dä u̱tsagihu̱. ¿Hänge te ma dä maxkägihu̱ pa dä te o pa hingä ꞌme̱dihu̱ näꞌä rä johya di sentihu̱ ora di po̱nihu̱ di predikahu̱?

3. ¿Te utkägihu̱ Lucas 13:​6-9 de rä Hesu?

³ ¿Te ma dä maxkägihu̱ pa gä tinihu̱ rä johya ora di po̱nihu̱ di predikahu̱? Rä ejemplo rä Hesu. Rä Mäkä Tꞌofo udi ge nuꞌmu̱ bi mꞌu̱kua ha rä Xiꞌmhai, näꞌä himbi desanimä; sino ke ngu mi thogi yä pa, rä johya mänꞌa mi te (hñeti Lucas 13:​6-9).a Rä Hesu bi hñutsꞌi nꞌa rä ejemplo pa bi kompara hanja näꞌä rä mäkä ꞌme̱fi bi ja, ꞌñenä näꞌä rä ꞌme̱fi bi ja nꞌa rä ñꞌo̱ho̱ näꞌä po hñu nje̱ya bi su nꞌa rä ꞌmai gä igo, pe nunka bi uni rä fruta. Njabu̱ ꞌnehe, rä Hesu po hñu nje̱ya bi predikabi yä judío, pe ho̱nse̱ nꞌa hängutho bi mꞌu̱i dispuesto bi gamfri ꞌne bi de̱ni. Pe ja ngu näꞌä ñꞌo̱ho̱ himbi hye̱gi de bi su näꞌä ꞌmai gä igo ngeꞌä mi to̱ꞌmi ge nꞌa rä pa xä uni rä fruta; rä Hesu ꞌnehe himbi hye̱gi de bi predikabi nuꞌu̱ yä judío. Sino ke mänꞌa xa bi yꞌo̱tꞌe ntsꞌe̱di po bi predikabi ko ndunthi rä johya ꞌne bi hyoni hanja bi tso̱mbäbi ha yä koraso ko näꞌä mi uti.

4. ¿Ndaꞌu̱ nuꞌu̱ goho yä tꞌo̱tꞌe ma gä pädihu̱ de rä Hesu?

⁴ Ha nunä ntꞌudi di nxadihu̱, ma gä pädihu̱ hanja rä Hesu xa bi nxo̱ni ꞌne bi predika ko ngatꞌho rä ganä ha nuꞌu̱ yä gäxä rꞌato nzänä bi mꞌu̱kua ha rä Xiꞌmhai. Ma gä pädihu̱ nuya goho yä tꞌo̱tꞌe de rä Hesu: 1) Bi prokura mꞌe̱tꞌo bi me̱päbi rä bolunta rä Zi Dada Jeoba, 2) xa bi jamäsu näꞌä mi mängä rä Noya Äjuä ge ma xä thogi, 3) xa bi me̱ꞌtsuäbi rä komfiansa rä Zi Dada Jeoba ge ma xä matsꞌi, ꞌne 4) himbi ꞌme̱di rä johya, ꞌne nunka bi pumfri ge mi ꞌmu̱i ndunthi yä jäꞌi nuꞌu̱ ma xä ho xä yꞌo̱de rä Noya Äjuä.

BI PROKURA MꞌE̱TꞌO BI ME̱PÄBI RÄ BOLUNTA JEOBA

5. ¿Hanja bi ꞌñudi rä Hesu ge mi prokura dä me̱päbi mꞌe̱tꞌo rä bolunta rä Zi Dada Jeoba?

⁵ Ko gatꞌho rä ganä rä Hesu bi predika nuꞌu̱ «yä hogä notisia de rä Tsꞌu̱tꞌhui Äjuä» (Luc. 4:​43, TNM). ¿Por hanja? Ngeꞌä mi pädi ge mi geꞌä rä bolunta rä Dada hänge geꞌä bi prokura bi me̱fi mꞌe̱tꞌo. Mäske mi pädi ge ya mi ꞌme̱di nꞌa hängu nzänä pa xä tho, mi thogi tanto ha yä tꞌu̱kä hnini ngu ha yä däta hnini pa mi uti yä jäꞌi de rä Noya Äjuä (Luc. 13:22). Pe hingä ho̱nse̱ꞌä, ꞌnehe bi ꞌñuti nuꞌu̱ yä de̱ni hanja dä predika ꞌnehe (Luc. 10:1).

6. ¿Pa te thoki gatꞌho nuꞌu̱ yä ꞌme̱fi ha rä hnini rä Zi Dada Jeoba? (Hyandi ꞌnehe yä kꞌoi).

⁶ Mäpaya ꞌnehe, gä uñhu̱ ntꞌo̱de nuꞌu̱ yä hogä notisia de rä Tsꞌu̱tꞌhui Äjuä, geꞌä rä ꞌme̱fi ne rä Zi Dada Jeoba ꞌne rä Hesu gä pe̱fihu̱ mꞌe̱tꞌo (Mat. 24:14; 28:​19, 20). Gatꞌho nuꞌu̱ yä mäkä ꞌme̱fi ja ha rä hnini rä Zi Dada Jeoba, di tꞌo̱tꞌe pa njabu̱ dä za dä tꞌungä ntꞌo̱de de rä Noya Äjuä po gatꞌho rä Xiꞌmhai. Por ejemplo, di thoki yä Ngu de gä Mhuntsꞌi pa njabu̱ dä nja habu̱ dä ntini ꞌne dä xo̱kämbeni ꞌnehe rä Zi Dada Jeoba nuꞌu̱ yä zi jäꞌi di predikabihu̱. Gatꞌho nuꞌu̱ yä ꞌme̱fi di tꞌo̱tꞌe ha yä ngu Betel ꞌne ha nuꞌu̱ märꞌa yä luga nguꞌu̱tho, faxte pa dä za dä tꞌungä ntꞌo̱de de rä Noya Äjuä. Ha nuꞌu̱ yä luga habu̱ bi ja yä mbiꞌmhai ꞌne märꞌa yä tsꞌo thogi, tꞌumbäbi rä mfatsꞌi nuꞌu̱ mä zi kuhu̱ bi ꞌmu̱hni, pa dä me̱ꞌtsi näꞌä di japäbi mꞌe̱di ꞌne njabu̱ dä za dä sigi dä xo̱kämbeni rä Zi Dada Jeoba ꞌne dä predika mänꞌaki. Pa rä Zi Dada Jeoba, gä po̱nihu̱ gä predikahu̱ geꞌä rä ꞌme̱fi mänꞌa xa mähyoni gä jahu̱. Mu̱ hingä pumfrihu̱ ge geꞌä rä bolunta, geꞌä ma dä rꞌakägihu̱ rä tsꞌe̱di pa gä po̱nihu̱ gä utihu̱ yä zi jäꞌi de rä Noya Äjuä. Rä zi ku János bi ꞌmu̱i ha rä dähni Hungría ꞌne faxte de gä anciano ha nꞌa rä mhuntsꞌi. Nuni zi ku enä: «Mäske di faxte ha märꞌa yä ꞌme̱fi ha rä hnini rä Zi Dada Jeoba, pe nzäntho di o̱tꞌe ntsꞌe̱di po gä beni ge ꞌnehe di debe gä po̱ni gä predika».

7. ¿Por hanja rä Zi Dada Jeoba ne gä sigihu̱ gä predikahu̱? (1 Timoteo 2:​3, 4).

⁷ ¿Te mänꞌa ma dä rꞌakägi rä tsꞌe̱di pa gä po̱nihu̱ gä predikahu̱? Mähyoni gä sentihu̱ po yä zi jäꞌi näꞌä di senti rä Zi Dada Jeoba po geꞌu̱. Näꞌä ne ge gatꞌho yä jäꞌi dä yꞌo̱de ꞌne dä asepta nuꞌu̱ yä hogä notisia di predikahu̱, ngeꞌä geꞌä ma dä ñämbäbi yä te (hñeti 1 Timoteo 2:​3, 4, TNM). Po geꞌä, rä Zi Dada Jeoba utkägihu̱ ꞌne rꞌakägihu̱ yä mfatsꞌi pa gä udihu̱ xä ñho de rä Noya, ꞌne njabu̱ gä tso̱mbäbihu̱ ha yä koraso nuꞌu̱ yä zi jäꞌi di predikabihu̱. Por ejemplo, rä foyeto Mädi yä jäꞌi, utkägihu̱ hanja gä fu̱dihu̱ gä ñähu̱ ko nꞌa rä zi jäꞌi, pa njabu̱ mꞌe̱fa dä za gä fu̱dihu̱ gä umbäbihu̱ nꞌa rä ntꞌudi de rä Mäkä Tꞌofo. Mäske hindä zo̱ho̱ dä me̱päbi rä Zi Dada Jeoba mäpaya, tal vez näꞌä di utihu̱ nubye̱, geꞌä ma dä matsꞌi pa dä desidi dä mꞌu̱i de rä lado rä Zi Dada Jeoba xti hyandi dä nja näꞌä rä däta mbidi o däta tribulación. Gä benihu̱ njabu̱, geꞌä faxkägihu̱ pa gä sigihu̱ gä predikahu̱.

BI JAMÄSU NÄꞌÄ MI MÄNGÄ RÄ NOYA ÄJUÄ

8. ¿Te bi me̱fi rä Hesu nuꞌmu̱ bi bädi te mi mää rä Noya Äjuä de geꞌä?

⁸ Rä Hesu mi pädi hanja ma xä kumpli näꞌä ya mi hutsꞌi ha rä Noya Äjuä. Hänge mi pädi xä ñho ge ho̱nse̱ mi pe̱ꞌtsi hñu nje̱ya mädee pa dä predikabi yä jäꞌi (Dan. 9:​26, 27). ꞌNehe mi pädi xä ñho hämꞌu̱ ꞌne hanja ma xä tho, ngeꞌä ya mi hutsꞌi ha rä Noya Äjuä (Luc. 18:​31-34). Koꞌmu̱ rä Hesu mi pädi xä ñho te mi mää rä Noya Äjuä de geꞌä, xa bi nxo̱ni pa bi predika ꞌne bi me̱fi gatꞌho näꞌä xki mändabi rä Zi Dada Jeoba.

9. ¿Te jakägihu̱ gä nxo̱nihu̱ gä predikahu̱ ko ngatꞌho mä ganähu̱?

⁹ Gä pädihu̱ ꞌnehe te udi rä Mäkä Tꞌofo ge ma dä thogi mänꞌitꞌho, geꞌä faxkägihu̱ pa gä nxo̱nihu̱ gä predikahu̱ ko ngatꞌho mä ganähu̱. Gä handihu̱ nuꞌu̱ yä tsꞌo tꞌo̱tꞌe thogi ha rä Xiꞌmhai ꞌne hanja di porta yä jäꞌi, geꞌä faxkägihu̱ pa gä dahu̱ ngue̱nda ge ya di ꞌmu̱ihu̱ ha yä gäxä pa, ꞌne ge ya hindi ꞌme̱di ndunthi pa dä uadi gatꞌho nuya yä tsꞌo tꞌo̱de. Rä Mäkä Tꞌofo ꞌnehe mää ge ha näꞌä «rä tiempo de rä fin», rä rey de rä sur (Reino Unido ꞌne Estados Unidos) ꞌne rä rey de rä norte (Rusia ꞌne nuꞌu̱ märꞌa yä dähni di mfaxhui) ma dä nju̱tsꞌi pa dä ntuhni nꞌa kontra mä nꞌaa (Dan. 11:40). ꞌNehe xtä ntiendehu̱ ge yä ua näꞌä rä däta imagen no̱ni ha Daniel 2:​43-45 go geꞌu̱ yä dähni Reino Unido ꞌne Estados Unidos. Rä Mäkä Tꞌofo mää ge mänꞌitꞌho rä Gobiernu o rä Tsꞌu̱tꞌhui Äjuä, ma dä huati gatꞌho nuꞌu̱ yä gobiernu mꞌu̱kua ha rä Xiꞌmhai. Mäpaya di handihu̱ hanja di kumpli gatꞌho näꞌä mää rä Mäkä Tꞌofo, ꞌne geꞌä faxkägihu̱ pa gä dahu̱ ngue̱nda te mä tiempo di ꞌmu̱ihu̱. Geꞌä jakägihu̱ gä nxo̱nihu̱ ꞌne gä sigihu̱ gä predikahu̱ ko ngatꞌho mä ganähu̱.

10. ¿Hanja di nupkägihu̱ mä mfeni ora di handihu̱ ge di kumpli gatꞌho näꞌä mää rä Mäkä Tꞌofo?

¹⁰ Rä Mäkä Tꞌofo ꞌnehe xikägihu̱ te ma dä thogi mänꞌitꞌho, hänge xa di o̱thu̱ ntsꞌe̱di po gä po̱nihu̱ gä predikahu̱ ꞌne gä xipäbihu̱ yä jäꞌi nuya yä notisia. Nꞌa rä zi nju rä thuhu Carrie näꞌä bi ꞌmu̱i ha rä República Dominicana enä: «Ora di imäjinä gatꞌho nuꞌu̱ yä tꞌo̱tꞌe xa mähotho ma dä hä rä zi Dada Jeoba mänꞌitꞌho, geꞌä jakägi gä beni ge nuya yä hogä notisia xa mähyoni dä yꞌo̱de gatꞌho yä jäꞌi. Mäpaya yä jäꞌi pe̱ꞌtsi ndunthi yä xuñha ꞌne yä dumu̱i, ꞌne di pädi ge nuꞌu̱ yä hogä notisia xikägihu̱ rä Mäkä Tꞌofo, hindi debe gä pädise̱ sino ke ꞌnehe di debe gä xipäbi nuꞌu̱ yä zi jäꞌi». Ora di handihu̱ hanja mäpaya di kumpli näꞌä mää rä Mäkä Tꞌofo, geꞌä di nupkägihu̱ mä mfenihu̱ pa gä nxo̱nihu̱ gä predikahu̱. Di pädihu̱ ge rä Zi Dada Jeoba go geꞌä rꞌakägihu̱ rä mfatsꞌi pa gä jahu̱ nunä mäkä ꞌme̱fi. Nꞌa rä zi nju rä thuhu Leila bi ꞌmu̱i ha rä dähni Hungría enä: «Isaías 11:​6-9 utkägi ge hindi mporta te mä mꞌu̱i tsitsꞌi nꞌa rä jäꞌi, rä Zi Dada Jeoba dä za dä matsꞌi pa dä paatä rä mfeni ꞌne rä mꞌu̱i. Geꞌä di nupkägi mä mfeni pa gä predikabi asta nuꞌu̱ yä zi jäꞌi di nheki ge hingä ma dä ne dä yꞌo̱de». Nꞌa zi ku rä thuhu Christopher bi ꞌmu̱i ha rä dähni Zambia enä: «Ja ngu mää ha Marcos 13:​10, yä hogä notisia de rä Tsꞌu̱tꞌhui Äjuä di tꞌungä ntꞌo̱de po gatꞌho rä Xiꞌmhai, ꞌne pa geki xi nꞌa rä däta nsu gä mfaxte gä predika ꞌnehe». Xi nuꞌi, ¿te mä testo de rä Mäkä Tꞌofo nupꞌäꞌi ri mfeni pa gi sigi gi po̱ni gi predika?

XA BI ME̱ꞌTSUÄBI RÄ KOMFIANSA JEOBA

11. ¿Por hanja rä Hesu mi japäbi mꞌe̱di dä sigi dä me̱ꞌtsuäbi rä komfiansa rä Zi Dada Jeoba? (Lucas 12:​49, 53).

¹¹ Rä Hesu mi pe̱ꞌtsuäbi rä komfiansa rä Zi Dada Jeoba ge go geꞌä ma xä matsꞌi pa xä sigi xä predika ko ngatꞌho rä ganä. Mäske rä Hesu mi predika ko ndunthi rä tꞌekꞌei, mi pädi xä ñho ge näꞌä mi udi hingä ma xä ho rꞌa yä jäꞌi hänge po geꞌä ma xä tꞌu̱tsa (hñeti Lucas 12:​49, 53, TNM). Nuꞌu̱ yä jäꞌi mi gu̱tꞌi rä ꞌñuu ha yä nijä, xa bi u̱tsa rä Hesu po näꞌä mi udi ꞌne ndunthi yä mꞌiki bi trata dä hyo (Juan 8:59; 10:​31, 39). Mäske njabu̱, rä Hesu bi sigi bi predika ngeꞌä mi pädi xä ñho ge rä Zi Dada Jeoba mi ꞌmu̱i kongeꞌä. Rä Hesu bi ꞌñenä: «Hindi yꞌose̱, sino ke mä Dada näꞌä toꞌo bä pe̱nkägi, ꞌmu̱i kongeki» (Juan 8:​16, TNM). ꞌNehe bi ꞌñenä: «Hinxä hye̱gäse̱, ngeꞌä nzäntho di o̱tꞌä nuꞌä di hoꞌä» (Juan 8:29).

12. ¿Te bi bembäbi rä Hesu nuꞌu̱ yä de̱ni ꞌne por hanja?

¹² Rä Hesu bi bembäbi nuꞌu̱ yä de̱ni ge mi debe dä me̱ꞌtsuäbi rä komfiansa rä Zi Dada Jeoba ge ma xä matsꞌi xti zo̱päbi yä ntꞌu̱tsate. Njatꞌä bi bembäbi ge rä Zi Dada Jeoba ma xä mꞌu̱hni pa xä matsꞌi (Mat. 10:​18-20; Luc. 12:​11, 12). ꞌNehe, rä Hesu bi bembäbi nuꞌu̱ yä de̱ni ge mi debe xa dä nsu (Mat. 10:16; Luc. 10:3). ꞌNehe bi ꞌñembäbi ge mu̱ yä jäꞌi hinxä ne xä yꞌo̱de, himi debe dä obligabi (Luc. 10:​10, 11). Bi ꞌñembäbi ge mu̱ xä tꞌu̱tsa habu̱ mi tso̱ni, xä hyoni mä nꞌa rä luga habu̱ dä ma dä predika (Mat. 10:23). Mäske rä Hesu xa mi ho dä predika ꞌne mi pädi ge rä Zi Dada Jeoba mi umbäbi rä mfatsꞌi; himbi thogi habu̱ mi pädi ge mi ja yä peligro (Juan 11:​53, 54).

13. ¿Po hanja di pädihu̱ xä ñho ge rä Zi Dada Jeoba ma dä maxkägihu̱ ꞌnehe mäpaya?

¹³ Mäpaya ꞌnehe xa di u̱tsagihu̱ yä jäꞌi, hänge di jakägihu̱ mꞌe̱di rä mfatsꞌi rä Zi Dada Jeoba pa gä sigihu̱ gä predikahu̱ ko ndunthi rä ganä (Apoc. 12:17). ¿Po hanja di pädihu̱ xä ñho ge rä Zi Dada Jeoba ma dä maxkägihu̱ kada nꞌa de gekhu̱? Ha Juan rä capítulo 17 di handihu̱ hanja rä Hesu bi yꞌapäbi rä Dada pa dä su kada nꞌa de nuꞌu̱ yä apostol, ꞌne rä Zi Dada Jeoba bi yꞌo̱de nunä sadi. Ha rä mfistꞌofo Hechos ꞌnehe pede hanja rä Zi Dada Jeoba bi matsꞌi nuꞌu̱ yä apostol pa bi sigi bi predika ko ngatꞌho yä ganä mäske xa bi thogi yä ntꞌu̱tsate. Ha näꞌä rä sadi bi ja rä Hesu, ꞌnehe bi yꞌapäbi rä Zi Dada Jeoba ge xä jamäsu gatꞌho nuꞌu̱ ma xä zo̱ho̱ xä gamfri mꞌe̱fa. Hänge dä za gä pe̱ꞌtsuäbihu̱ rä komfiansa rä Zi Dada Jeoba ge näꞌä ma dä sigi dä dädi näꞌä rä sadi bi ja rä Hesu, ꞌne ma dä maxkägihu̱ kada nꞌa de gekhu̱ ja ngu bi matsꞌi nuꞌu̱ yä apostol (Juan 17:​11, 15, 20).

14. ¿Po hanja di pädihu̱ ge dä za gä sigihu̱ gä predikahu̱ ko ngatꞌho mä ganähu̱? (Hyandi ꞌnehe rä kꞌoi).

¹⁴ Ngu ri thogi yä pa, mänꞌa ma dä jakägihu̱ xä ñhei gä predikahu̱. Pe rä Hesu bi promete ge nzäntho ma gä pe̱ꞌtsihu̱ näꞌä rä mfatsꞌi di jakägihu̱ mꞌe̱di pa gä sigihu̱ gä predikahu̱ ko ngatꞌho mä ganähu̱ (Luc. 21:​12-15). Ja ngu rä Hesu ꞌne nuꞌu̱ yä apostol, di hopäbihu̱ ge yä zi jäꞌi dä desidi mu̱ ne dä yꞌo̱de o hinä. Pe mu̱ hingi ne dä yꞌo̱de, hindi diskutihu̱ kongeꞌu̱. Mäpaya ja rꞌa yä dähni habu̱ yä autorida o rä gobiernu di proibi toꞌo dä predika. Pe nuꞌu̱ yä zi ku bi ꞌmu̱hni, xä dini rä modo hanja dä predika ngeꞌä pe̱ꞌtsuäbi rä komfiansa rä Zi Dada Jeoba hingä nuꞌu̱ yä tsꞌe̱dise̱. Rä Zi Dada Jeoba bi umbäbi rä mfatsꞌi nuꞌu̱ yä mu̱di kristianu pa bi za bi predika ha gatꞌho nuꞌu̱ yä luga mi fädi ha näꞌä rä tiempoꞌä. Mäpaya, di pe̱ꞌtsuäbihu̱ ꞌnehe rä komfiansa rä Zi Dada Jeoba ge ma dä maxkägihu̱ pa gä sigihu̱ gä predikahu̱ asta nuꞌmu̱ go dä ꞌñenä ge ya bi uadi nunä mäkä ꞌme̱fi (2 Tim. 4:17). Hinte mä duda ja: ¡Mu̱ gä pe̱ꞌtsuäbihu̱ rä komfiansa rä Zi Dada Jeoba, ma dä za gä sigihu̱ gä predikahu̱ ko ngatꞌho mä ganähu̱!

HIMBI ꞌME̱DI RÄ JOHYA

15. ¿Por hanja di pädihu̱ ge rä Hesu nunka bi ꞌme̱di rä johya ora mi predika?

¹⁵ Rä Hesu mi pädi xä ñho ge rꞌa yä zi jäꞌi hää ma xä ne xä yꞌo̱de nuꞌu̱ yä hogä notisia de rä Tsꞌu̱tꞌhui Äjuä. Geꞌä bi matsꞌi pa himbi ꞌme̱di rä johya ꞌne bi sigi bi predika. Nuꞌmu̱ ya ma xä uadi rä je̱ya 30 —nuꞌmu̱ ya mi o̱tꞌe kasi nꞌa nje̱ya de mi predika rä Hesu—, bi hyandi hanja ndunthi yä jäꞌi ya xki ñhoki pa dä yꞌo̱de rä Noya Äjuä. Rä Hesu bi hyandi nuyu̱ yä zi jäꞌi ngu nꞌa rä huähi näꞌä ya xki ñätsꞌi pa dä sofo (Juan 4:35). Mi thogi kasi nꞌa nje̱ya, bi ꞌñembäbi nuꞌu̱ yä apostol: «Xi ja ndunthi rä sofo» (Mat. 9:​37, 38). Mꞌe̱fa bi ꞌñembäbi mänꞌaki nuꞌu̱ yä de̱ni: «Xi ndunthi rä sofo [ . . . ]. Hänge yꞌaphu̱ Äjuä nuꞌä toꞌo rä me̱ti rä sofo duä pe̱hnä ndunthi yä me̱fi» (Luc. 10:2). Rä Hesu nunka bi pumfri ge mi ꞌmu̱i ndunthi yä jäꞌi nuꞌu̱ ma xä ho xä yꞌo̱de rä Noya Äjuä. Ora mi handi ge nꞌa rä zi jäꞌi mi o̱de, geꞌä mänꞌa xa mi japäbi dä johya (Luc. 10:21).

16. ¿Ndaꞌu̱ nuꞌu̱ yoho yä ejemplo bi mää rä Hesu pa bi nupäbi yä mfeni nuꞌu̱ yä de̱ni? (Lucas 13:​18-21; hyandi ꞌnehe rä kꞌoi).

¹⁶ Rä Hesu bi matsꞌi ꞌne bi nupäbi yä mfeni nuꞌu̱ yä de̱ni pa himbi ꞌme̱di rä johya ꞌne bi sigi bi predika. Pa geꞌä, bi mää yoho yä ejemplo (hñeti Lucas 13:​18-21, TNM). 1) Rä Hesu bi mää ge nuꞌu̱ yä hogä notisia de rä Tsꞌu̱tꞌhui Äjuä, ꞌñenä ngu rä ndaa de gä mostasa näꞌä xa di te asta dä zo̱ho̱ dä nja nꞌa rä däta arbol. Kongehnä, rä Hesu bi ne bi mää ge ma xä zo̱ho̱ rä pa habu̱ xi ndunthi yä jäꞌi ma xä asepta rä Noya Äjuä; ꞌñenä näꞌä rä arbol de gä mostasa, ma xä sigi xä te ꞌne hinto ma xä za xä hñäkuäbi. 2) Rä Hesu ꞌnehe bi mää ge nuꞌu̱ yä hogä notisia de rä Tsꞌu̱tꞌhui Äjuä, ꞌñenä ngu rä lebadura. Näꞌä bi usa nunä ejemplo pa bi ꞌñudi ge mäske ri mu̱di ꞌñenä hinto mi ne dä yꞌo̱de; pe mꞌe̱fa, po gatꞌho rä Xiꞌmhai ma xä tꞌungä ntꞌo̱de nuꞌu̱ yä hogä notisia de rä Tsꞌu̱tꞌhui Äjuä, ꞌne xi ndunthi nuꞌu̱ yä jäꞌi ma xä asepta ꞌne ma xä paatä yä mfeni ꞌne yä mꞌu̱i.

17. ¿Te di nupkägihu̱ mä mfenihu̱ pa gä sigihu̱ gä predikahu̱ ko ndunthi rä johya?

¹⁷ Ora di benihu̱ hanja nuꞌu̱ yä hogä notisia de rä Tsꞌu̱tꞌhui Äjuä fatsꞌi yä zi jäꞌi po gatꞌho rä Xiꞌmhai, geꞌä di nupkägihu̱ mä mfenihu̱ pa gä sigihu̱ gä predikahu̱. Tatꞌä je̱ya, yä miyontho nuꞌu̱ yä zi jäꞌi di ntini ha rä Fenäte de rä du rä Hesu ꞌne di nxadi rä Mäkä Tꞌofo. ꞌNehe yä mꞌotho nuꞌu̱ yä zi jäꞌi po̱ni dä predika kongekhu̱ ꞌne di nxixtehe. Hindi pädihu̱ mä hängu nuꞌu̱ yä zi jäꞌi ma dä asepta rä Noya Äjuä, pe hää di pädihu̱ ge rä Zi Dada Jeoba sigi muntsꞌi yä zi jäꞌi de gatꞌho yä dähni, pa dä bädi de geꞌä ꞌne dä bongi xti ꞌñepu̱ näꞌä rä däta mbidi o däta tribulación (Apoc. 7:​9, 14). Hää, rä Zi Dada Jeoba go geꞌä rä dueñu de gatꞌho rä sofo, ꞌne handi ge tobe kohi mä ndunthi nuꞌu̱ yä zi jäꞌi ma dä ne dä bädi de geꞌä ꞌne ma dä paatä yä mꞌu̱i. Gä pädihu̱ njabu̱, ¿hänge di nupkägihu̱ mä mfenihu̱ pa gä sigihu̱ gä predikahu̱ ko ndunthi rä johya?

18. ¿Te di nehu̱ dä hyandi yä jäꞌi ora di predikahu̱?

¹⁸ Nuꞌu̱ yä de̱ni rä Hesu, nzäntho xä predika ko ndunthi rä johya ꞌne rä ganä. Nuꞌmu̱ yä jäꞌi bi hyandi hanja yä apostol himi tsu ꞌne mi predika ko ndunthi rä johya, nuꞌu̱ bi da ngue̱nda ge mi geꞌu̱ yä de̱ni rä Hesu (Hech. 4:13). Nuju̱ ꞌnehe, di nehu̱ ge yä jäꞌi dä hyandi ge ora di predikahu̱; di predikahu̱ ko ndunthi rä johya ꞌne rä ganä ja ngu bi ja rä Hesu.