Ma gä usahu̱ xä ñho rä Mäkä Tꞌofo ngu nꞌa rä ñhee

Santiago —nꞌa de nuꞌu̱ yä yꞌofo de rä Mäkä Tꞌofo— bi ꞌñenä ge rä Noya Äjuä ngu nꞌa rä ñhee, ngeꞌä faxkägihu̱ gä handihu̱ tengu mä mꞌu̱ihu̱ ꞌne te ja mbo ha mä korasohu̱ (Sant. 1:​22-25). Ma gä handihu̱ hñuu yä mfatsꞌi nuꞌu̱ dä maxkägihu̱ gä usahu̱ xä ñho rä Mäkä Tꞌofo ngu nꞌa rä ñhee.

Ogi heti rä Mäkä Tꞌofo de gä so̱ni. Xi nuꞌi, ¿gi nzäi gi hyandä ri ꞌmai ha nꞌa rä ñhee de gä so̱ni? Zäi ge ora gi jabu̱ nixi gi da ngue̱nda ge mähyoni gi ñhoki mänꞌa xä ñho. Rꞌabu̱ geꞌä dä za dä thogi ꞌnehe ora di hetihu̱ rä Mäkä Tꞌofo. Mu̱ di hetihu̱ de gä so̱ni hindä za gä dahu̱ ngue̱nda habu̱ di fayahu̱. Po rängeꞌä, yꞌo̱tꞌe ntsꞌe̱di po gi dedikabi rä tiempo.

Jamäsu habu̱ go di jaꞌi mꞌe̱di gi mpe̱fi, hingä nuꞌu̱ märꞌaa. Zäi ge rꞌabu̱ mentä gi ñhoki ha nꞌa rä ñhee, nxu̱tha de geꞌi yꞌobu̱ märꞌa yä jäꞌi ꞌne en lugar de go gi hyandi habu̱ di jaꞌi mꞌe̱di gi ñhoki, go gi handi habu̱ di japäbi mꞌe̱di dä ñhoki märꞌaa. Geꞌä dä za dä thogi ꞌnehe ora di hetihu̱ rä Mäkä Tꞌofo. En lugar de gi hyandi habu̱ go di jaꞌi mꞌe̱di gi mpe̱fi, go gi handi habu̱ di japäbi mꞌe̱di dä mpe̱fi märꞌaa.

Ogi desanimä. Mu̱ ho̱nse̱ di handihu̱ näꞌä hindi hohu̱ de gekhu̱ ha nꞌa ñhee, dä za gä desanimähu̱. Pa hindä thogi njabu̱ ora di hetihu̱ rä Mäkä Tꞌofo, yꞌo̱tꞌe ntsꞌe̱di po gi de̱mbäbi rä mꞌu̱i rä Zi Dada Jeoba ꞌne ogi to̱ꞌmi thogi de näꞌä hindä za gi pe̱fi (Sant. 3:17).