¡Xa ja yä tuhni po ränge yä politika! | ¿Te udi rä Biblia?

Po gatꞌho rä Xiꞌmhai xa ja yä tuhni po ränge yä politika.

¿Por hanja xi ja yä tuhni po ränge yä politika? ¿Ma dä zo̱ho̱ rä pa dä uadi? ¿Te udi rä Biblia?

Ya xki mhää ge ma xä nja yä tuhni po ränge yä politika

Rä Biblia bi mää tengu nuꞌu̱ yä pa di ꞌmu̱hu̱ tꞌembi «yä gäxä pa», yä jäꞌi hingä ma xä ꞌmu̱i de acuerdo ꞌne po geꞌä ma xä nja yä tuhni.

• «Pe mähyoni gi pädi ge ha yä gäxä pa, ma dä ꞌñepu̱ yä tsꞌo tꞌo̱tꞌe nuꞌu̱ xä ñhei toꞌo dä ze̱ti. Ngeꞌä yä jäꞌi ma dä mädise̱, [...] hingä ma dä nja yä jamädi, hingä ma dä kumpli näꞌä di promete, [...] hinte mä kohi ma dä ne dä ja, [...] hinte mä nhuekäte ma dä senti, [...] dyä traisionero, hinte mä tsꞌofo ma dä ne dä yꞌo̱de, dyä ñꞌexmänsu» (2 Timoteo 3:1-4).

Ha rä Biblia xä tꞌofo te mä xuñha ma xä nja mäpaya, ꞌne ge yä jäꞌi ma xä nju̱tsꞌi kontra yä gobiernu (Lucas 21:9). Pe nuꞌu̱ yä tuhni ja po ränge yä politika hingä ma dä dura pa nzäntho.

Nuꞌu̱ yä tuhni ja po yä politika ma dä uadi

Rä Biblia udi ge Äjuä ma dä hñäki gatꞌho nuꞌu̱ yä gobiernu de rä Xiꞌmhai, ꞌne ma dä hñutsꞌi rä Gobiernu ha mähetsꞌi.

• «Rä Zi Dada de mähetsꞌi ma dä hñutsꞌi nꞌa rä gobiernu. [...] Nunä gobiernu ma dä xutꞌi ꞌne ma dä huati gatꞌho nuꞌu̱ yä gobiernu, ꞌne ho̱nse̱ꞌä ma dä mända pa nzäntho» (Daniel 2:44).

Ha rä gobiernu Äjuä ma dä nja nꞌa rä mꞌu̱i temäꞌentho, ꞌne yä jäꞌi ma dä mꞌu̱i en paz po gatꞌho rä Xiꞌmhai.

• Rä Hesu go geꞌä ma dä mända ha rä Gobiernu Äjuä, ꞌne näꞌä tꞌembäbi «rä Prinsipe näꞌä häki yä tuhni» (Isaías 9:6, 7).

• Dende nubye̱ nuꞌu̱ toꞌo faxte ha nunä gobiernu ya mꞌu̱i en paz. Rä Biblia mää de geꞌu̱: «Nuꞌu̱ yä däjuai, kongeꞌu̱ ma dä hyoki yä tꞌabi, ꞌne nuꞌu̱ yä lansa kongeꞌu̱ ma dä hyoki yä tꞌe̱xi. Ya hingä ma dä gu̱tsꞌi yä däjuai yä dähni kontra märꞌa yä dähni, ngeꞌä nuꞌu̱ ya hingä ma dä bädi yä tuhni» (Isaías 2:3, 4).

Mu̱ gi ne gi pädi mä nꞌa tu̱i, hñeti nunä artículo «¿Que cosas logrará el Reino de Dios?» ꞌne hyandi rä bideo ¿Te meꞌä rä Tsꞌu̱tꞌhui Äjuä?