¿Por hanja dä nehe bi tꞌengägihe yä testigo rä Jeoba?

Rä Mäkä Tꞌofo udi ge Jeoba geꞌä rä thuhu Äjuä (Éxodo 6:3; Salmo 83:18). Nꞌa rä testigo mää näꞌä pädi o näꞌä xä hyandi de nꞌa rä tꞌo̱tꞌe.

Hänge nuje dä nehe bi tꞌengägihe yä testigo rä Jeoba ngeꞌä di xipäbihe yä jäꞌi näꞌä xa mäjuäni de rä Zi Dada Jeoba, näꞌä rä Hyokäte de gatꞌho rä Xiꞌmhai (Apocalipsis [Revelación] 4:11). ꞌNehe ngeꞌä di umbäbihe ntꞌo̱de yä jäꞌi de näꞌä xtä pädihe ha rä Mäkä Tꞌofo ꞌne po mäde de näꞌä rä mꞌu̱i di pe̱ꞌtsihe (Isaías 43:10-12; 1 Pedro 2:12).