Rä apostol Pedro xa mäjuäni mi mädi Äjuä hänge hinte bi hyopäbi dä hñäkuäbi de dä de̱ni rä Hesu. Por ejemplo, nꞌa rä pa yä jäꞌi bi nkue̱ ꞌne bi zopu̱ rä Hesu ngeꞌä himbi ho näꞌä bi mää (Juan 6:68). Hää, yä jäꞌi bi zopu̱ rä Hesu ꞌne himbi umbäbi rä oportunida de dä esplika te mi ne dä mää. ¿Te bi me̱fi Pedro? Näꞌä bi gohi ko rä Hesu ꞌne ndelante de gatꞌho yä jäꞌi bi ꞌñembäbi: «Mä zi Hmuuꞌihe, ¿toꞌo ja gä te̱ñhe? [ . . . ] Ho̱nse̱ꞌi gi mängä yä noya de rä te pa nzäntho». Rä Hesu mi pädi xä ñho ge tanto Pedro ꞌne nuꞌu̱ märꞌa yä apostol, ma xä zopu̱se̱ ꞌne ma xä bandonä. Pe mäske njabu̱, rä Hesu himbi u̱tsa Pedro sino bi ꞌñudi ge mi pe̱ꞌspäbi ndunthi rä komfiansa. Mi pädi ge mäske Pedro ma xä dagi, näꞌä ma xä nangi mänꞌaki pa xä sigi xä ñꞌo ha rä ꞌñuu rä Zi Dada Jeoba (Luc. 22:​31, 32). Rä Hesu mi pädi xä ñho ge gatꞌho yä jäꞌi xä mꞌu̱i ko rä tsꞌoki, hänge bi ꞌñenä: «Mäske ja ri pahahu̱ pa gi pe̱fihu̱ näꞌä xä ñho, ri ndoyꞌohu̱ di japäbi xä ñhei» (Mar. 14:​38, TNM). Hänge rä Hesu mi pädi xä ñho ge Pedro ma xä nangi de näꞌä error xki komete ora bi nega hñu mꞌiki. Po geꞌä, mi nuhu rä Hesu de rä du, bi ma bä honi rä Pedro pa bi ñäuise̱ (Mar. 16:7; Luc. 24:34; 1 Cor. 15:5). ¿Dä za gi imäjinä hängu bi nupäbi rä mfeni Pedro mi hyandi rä Hesu? w23.09 rä nxii 22, yä parr. 9, 10

Nuꞌu̱ yä jäꞌi pe̱ꞌspäbi ndunthi rä jamfri ꞌne rä komfiansa Äjuä, näꞌä pumbäbi gatꞌho yä pekado ꞌne ya hingi häxä ngue̱nda (Sal. 32:​1, 2). Hää, pa rä Zi Dada Jeoba ꞌñenä hinte mä pekado pe̱ꞌtsi nuꞌu̱ yä jäꞌiꞌu̱. Mäske Abrahán, David, ꞌne märꞌa yä jäꞌi rꞌabu̱ hingä geꞌä mi pe̱fi, pe Äjuä bi mää ge mi handi ngu yä hojäꞌi ꞌne hinte mä thai mi tu. ¿Por hanja? Ha näꞌä tiempoꞌä ndunthi yä jäꞌi xki desidi hindä me̱päbi Äjuä, pe Abrahán, David, ꞌne märꞌa yä jäꞌi xki ꞌñudi ge mi kamfri ꞌne mi pe̱ꞌspäbi rä komfiansa rä Zi Dada Jeoba (Efes. 2:12). Ha näꞌä rä karta bi yꞌofo rä apostol Pablo pa nuꞌu̱ yä kristianu mi ꞌmu̱i ha Roma, bi ꞌñenä ge ja nꞌa rä rekisito pa nuꞌu̱ ne dä yꞌo̱tꞌe rä amigo rä Zi Dada Jeoba. ¿Te mä rekisitoꞌä? Mähyoni dä me̱ꞌspäbi rä jamfri ꞌne rä komfiansa. Abrahán ꞌne David, geꞌä bi me̱fi ꞌne geꞌä dä za gä pe̱fihu̱ ꞌnehe mäpaya. w23.12 rä nxii 3, yä parr. 6, 7

¿Te mä sacrificio dä za gä umbäbihu̱ rä Zi Dada Jeoba mäpaya? Dä za gä usahu̱ de mä tiempohu̱, mä tsꞌe̱dihu̱ ꞌne gatꞌho näꞌä di pe̱ꞌtsihu̱ pa gä apoyahu̱ rä Gobiernu Äjuä. Mu̱ xa gä o̱thu̱ ntsꞌe̱di po gä pe̱päbihu̱ rä Zi Dada Jeoba nubye̱ di tehu̱, ma gä udihu̱ ge di balorahu̱ näꞌä rä däta nsu di pe̱ꞌtsihu̱ de gä pe̱päbihu̱ ngu mä Zi Dadahu̱. Rä apostol Pablo bi no̱ni rꞌa yä tꞌo̱tꞌe nuꞌu̱ hindi debe gä deskuidahu̱ ora di xo̱kämbenihu̱ rä Zi Dada Jeoba (Heb. 10:​22-25). Por ejemplo, bi mää ge xa mähyoni gä xatuäbihu̱ rä Zi Dada Jeoba, gä xipäbihu̱ märꞌa yä jäꞌi de Geꞌä ꞌne de näꞌä xä promete dä me̱fi, ꞌne hingä he̱gihu̱ de gä ntinihu̱ ha yä mhuntsꞌi. Hää, rä apostol Pablo bi ꞌñenä ge koꞌmu̱ «di hanthu̱ ya ꞌmu̱i getbu̱ rä pa» Jeoba, xa mähyoni gä nupämfenihu̱ ko mä kuhu̱. ꞌNehe, ha nuꞌu̱ yä gäxä capítulo de rä mfistꞌofo Apocalipsis, di handihu̱ hanja nꞌa rä e̱nxe̱ Jeoba enä: «¡Xo̱kämbeni Äjuä!» (Apoc. 19:10; 22:9). Hää, asta yo mꞌiki enä «¡Xo̱kämbeni Äjuä!» pa dä ꞌñudi ge xa mähyoni gä pe̱fihu̱ njabu̱. ¡Hänge nunka di debe gä pumfrihu̱ näꞌä dä pädihu̱bye̱ de rä mäkä templo rä Zi Dada Jeoba, ꞌne de näꞌä rä däta nsu di pe̱ꞌtsihu̱ de gä adorahu̱ ꞌne gä pe̱päbihu̱! w23.10 rä nxii 29, yä parr. 17, 18