¿Te dä za gä pe̱fihu̱ pa gä handihu̱ ge Jeoba xa mäjuäni ma dä hä nꞌa rä hogä mꞌu̱i ha rä Xiꞌmhai?

1, 2. ¿Te mähyoni gä pe̱fihu̱ mentä di to̱ꞌmihu̱ dä hä nꞌa rä hogä mꞌu̱i rä Zi Dada Jeoba?

HÄNGU di balorahu̱ nunä promesa xä ja rä Zi Dada Jeoba: dä hñäki nuya yä tsꞌo tꞌo̱tꞌe di handihu̱ ha rä Xiꞌmhai pa go dä hä nꞌa rä mꞌu̱i temäꞌentho (2 Ped. 3:13). Mäske hindi pädihu̱ hämꞌu̱ ma dä zo̱ho̱ näꞌä rä paꞌä, gatꞌho näꞌä di handihu̱ thogi mäpaya udi ge ya hingä ma gä to̱ꞌmihu̱ ndunthi (Mat. 24:32-34, 36; Hech. 1:7).

² Hindi mporta hängu nje̱ya di pe̱ꞌtsihu̱ de di pe̱päbihu̱ rä Zi Dada Jeoba, mähyoni gä tedehu̱ näꞌä rä komfiansa di pe̱ꞌspäbihu̱. ¿Por hanja? Ngeꞌä mu̱ hingä nsuhu̱, näꞌä rä komfiansa di pe̱ꞌspäbihu̱ rä Zi Dada Jeoba dä za dä käni. Rä apostol Pablo bi ꞌñenä ge rä ñꞌäjamfri geꞌä «rä pekado xa mäntꞌä hu̱skägihu̱» (Heb. 12:1, TNM). Pa hingä hopäbihu̱ dä käni mä jamfrihu̱, mähyoni ge njatꞌä gä handihu̱ te mä raso di pe̱ꞌtsihu̱ pa gä kamfrihu̱ ge rä Zi Dada Jeoba nguntꞌä ma dä hä näꞌä rä hogä mꞌu̱i xä prometegihu̱ (Heb. 11:1).

3. ¿Te ma gä handihu̱ ha nunä ntꞌudi di nxadihu̱?

³ Ha nunä ntꞌudi di nxadihu̱, ma gä handihu̱ hñuu yä tꞌo̱tꞌe nuꞌu̱ ma dä maxkägihu̱ pa mänꞌa gä kamfribihu̱ rä Zi Dada Jeoba ge hää ma dä hä nꞌa rä hogä mꞌu̱i nuua ha rä Xiꞌmhai: 1) Mähyoni gä hudihu̱ ꞌne gä ntso̱ꞌmihu̱ te ri bo̱ni näꞌä rä njutꞌi bi uni rä Zi Dada Jeoba, 2) mähyoni gä hudihu̱ ꞌne gä ntso̱ꞌmihu̱ hängu rä tsꞌe̱di pe̱ꞌtsi rä Zi Dada Jeoba, ꞌne 3) mähyoni gä pe̱fihu̱ nuꞌu̱ yä tꞌo̱tꞌe di ho rä Zi Dada Jeoba. ꞌNepu̱ ma gä handihu̱ hanja näꞌä bi xipäbi rä Zi Dada Jeoba rä profeta Habacuc, ma dä japi dä ze̱di mä komfiansahu̱ ꞌnehe mäpaya. Pe änte de geꞌä, ma gä handihu̱ por hanja xa mähyoni gä kamfribihu̱ rä Zi Dada Jeoba ge hää ma dä hä nꞌa rä hogä mꞌu̱i nuua ha rä Xiꞌmhai.

¿POR HANJA XA MÄHYONI GÄ PE̱ꞌSPÄBIHU̱ RÄ KOMFIANSA RÄ ZI DADA JEOBA?

4. ¿Ngu te mä te desision di tomähu̱ hyaxtho habu̱ udi mu̱ di pe̱ꞌspäbihu̱ rä komfiansa rä Zi Dada Jeoba o hinä?

⁴ Hyaxtho di jakägihu̱ mꞌe̱di nꞌa rä däta komfiansa po rä Zi Dada Jeoba, ngeꞌä hyaxtho di tomähu̱ yä desision de nuya yä asunto: yä ntsitsꞌi o yä amigo, yä dibersio, yä asunto de te mä educación gä huahnihu̱, rä nthäti, yä bätsi, rä ꞌme̱fi ꞌne märꞌaa. Hänge mähyoni gä ñꞌanise̱hu̱: «Näꞌä di pe̱fi, ¿udi ge xa mäjuäni di kamfri ge rä Zi Dada Jeoba ma dä hñäki gatꞌho nuya yä tsꞌo tꞌo̱tꞌe ja mäpaya ꞌne go ma dä hä nꞌa rä mꞌu̱i temäꞌentho?, o ¿näꞌä di pe̱fi udi ge di de̱mbäbi yä mꞌu̱i nuꞌu̱ yä jäꞌi hingi pädi rä Zi Dada Jeoba?» (Mat. 6:19, 20; Luc. 12:16-21). Mu̱ xa mäjuäni di kamfrihu̱ ge rä Zi Dada Jeoba ya nguntꞌä ya ma dä hä nꞌa rä hogä mꞌu̱i, geꞌä ma dä maxkägihu̱ gä tomähu̱ yä hogä desision hyaxtho.

5, 6. ¿Por hanja xa di ja mꞌe̱di gä pe̱ꞌspäbihu̱ ndunthi rä komfiansa rä Zi Dada Jeoba ora di ñhanduihu̱ yä ntꞌu̱tsate, yä ñheni, o märꞌa yä xuñha? Mää nꞌa rä ejemplo.

⁵ ꞌNehe di ja mꞌe̱di gä pe̱ꞌspäbihu̱ ndunthi rä komfiansa rä Zi Dada Jeoba ora di ñhanduihu̱ yä ntꞌu̱tsate, yä ñheni, o märꞌa yä xuñha nuꞌu̱ dä za dä japäbi dä uentꞌä mä jamfrihu̱. Ora ja penä fu̱di nuya yä xuñha, rꞌabu̱ di ze̱tihu̱ ko ndunthi rä balo. Pe ko rä tiempo dä za dä zabigihu̱. Hänge di ja mꞌe̱di gä pe̱ꞌspäbihu̱ ndunthi rä komfiansa rä Zi Dada Jeoba, pa njabu̱ dä za gä sigihu̱ gä pe̱päbihu̱ ko ndunthi rä johya mäske di thogihu̱ yä xuñha (Rom. 12:12; 1 Ped. 1:6, 7).

⁶ Ora di thogihu̱ yä däta xuñha, rꞌabu̱ dä za gä sentihu̱ ge rä Zi Dada Jeoba xa di tarda dä hä näꞌä rä hogä mꞌu̱i xä prometegihu̱. ¿Signifika ge mä jamfrihu̱ ya xä käni o ya xä uentꞌi? Hinä. Ma gä hutsꞌihu̱ nꞌa rä ejemplo: Ora tso̱ho̱ nuꞌu̱ yä pa xa xä tse̱, di sentihu̱ ge nunka ma dä thogi nuya yä pa. Pe nuꞌu̱ yä pahyadi, pe̱ꞌtsi te tso̱ho̱. Njabu̱ ꞌnehe, ora di ꞌmu̱ihu̱ desanimädo di sentihu̱ ge nunka ma dä zo̱ho̱ näꞌä rä rꞌayꞌo xiꞌmhai xä prometegihu̱ rä Zi Dada Jeoba. Pe mu̱ di pe̱ꞌspäbihu̱ ndunthi rä komfiansa rä Zi Dada Jeoba, hinte mä duda ma gä pe̱ꞌtsihu̱ ge näꞌä ma dä kumpli näꞌä xä promete (Sal. 94:3, 14, 15; Heb. 6:17-19). Mu̱ gä pe̱ꞌspäbihu̱ ndunthi rä komfiansa rä Zi Dada Jeoba, geꞌä ma dä maxkägihu̱ pa gä pe̱päbihu̱ dä thogiꞌä dä thogi.

7. ¿Ndaꞌä mä nꞌa rä raso di pe̱ꞌtsihu̱ pa gä japäbihu̱ dä ze̱di mä komfiansahu̱ po rä Zi Dada Jeoba?

⁷ ¿Ndaꞌä mä nꞌa rä raso di pe̱ꞌtsihu̱ pa gä japäbihu̱ dä ze̱di mä komfiansahu̱ po rä Zi Dada Jeoba? Ngeꞌä ora di predikahu̱ ꞌne di xipäbihu̱ yä jäꞌi ge rä Zi Dada Jeoba ma dä hä nꞌa rä mꞌu̱i temäꞌentho nuua ha rä Xiꞌmhai, rꞌaa enä: «Nuga hindi kamfri ge ma dä thogi njabu̱» (Mat. 24:14; Ezeq. 33:32). Hänge mu̱ hingä nsuhu̱, de tanto di o̱dehu̱ njabu̱ dä za dä hyo̱xkägihu̱ näꞌä di mbeniꞌu̱. Pa hingä thogihu̱ njabu̱, ma gä handihu̱ hñuu yä tꞌo̱tꞌe nuꞌu̱ ma dä japi dä ze̱di mä komfiansahu̱ po rä Zi Dada Jeoba.

HÑUDI ꞌNE NTSO̱ꞌMI HÄNGU RÄ MUUI PE̱ꞌTSI NÄꞌÄ RÄ NJUTꞌI BI UNI JEOBA

8, 9. ¿Te mähyoni gä pe̱fihu̱ pa njabu̱ mänꞌa gä kamfrihu̱ ge rä Zi Dada Jeoba hää ma dä hä nꞌa rä mꞌu̱i temäꞌentho nuua ha rä Xiꞌmhai?

⁸ Pa gä japäbihu̱ dä ze̱di mä komfiansahu̱ po rä Zi Dada Jeoba, mähyoni ge njatꞌä gä benihu̱ te ri bo̱ni ꞌne hängu rä muui pe̱ꞌtsi näꞌä rä njutꞌi bi uni po gekhu̱. Nuꞌmu̱ rä Zi Dada Jeoba bi uni rä Tꞌu̱ ngu nꞌa rä njutꞌi, geꞌä nꞌa rä garantia bi uni pa gä kamfribihu̱ ge gatꞌho näꞌä xä promete ma dä kumpli. Ora di ꞌuekehu̱ rä tiempo pa gä imäjinähu̱ te gatꞌho bi thogi ora bi uni näꞌä rä njutꞌi, geꞌä jakägihu̱ gä kamfrihu̱ ge rä Zi Dada Jeoba hää ma dä hä nꞌa rä mꞌu̱i temäꞌentho nuua ha rä Xiꞌmhai. ¿Por hanja di mäñhu̱ njabu̱?

⁹ Mähyoni gä imäjinähu̱ hanja bi ja näꞌä rä njutꞌi rä Zi Dada Jeoba: ha mähetsꞌi rä Zi Dada Jeoba mi ꞌmu̱hui rä Hesu, geꞌä mrä hmäkä Tꞌu̱ ꞌne geꞌä xa mrä amigo. Pe mäske njabu̱, rä Zi Dada Jeoba bi ꞌmu̱i dispuesto bä pe̱hni rä Tꞌu̱ pa bi mꞌu̱i nuua ha rä Xiꞌmhai ngu nꞌa rä jäꞌi näꞌä hinte mä pekado mi ñꞌoui. Mi mꞌu̱kua rä Hesu ha rä Xiꞌmhai, näꞌä xa bi sufri ꞌne pa ri uadi bi tho ꞌne bi tsꞌu̱ti ha nꞌa rä zaa. ¿Gi da ngue̱nda näꞌä rä presio bi gutꞌi rä Zi Dada Jeoba? (Juan 3:16; 1 Ped. 1:18, 19). ¿Gi kamfri ge rä Zi Dada Jeoba —näꞌä rä Zi Dada de gä mhäte— ma xä hyopäbi xä sufri ꞌne xä du rä Tꞌu̱ embalde? Hinä. Rä Zi Dada Jeoba bi mꞌu̱i dispuesto bi gutꞌi nꞌa rä presio xi rä dängi, pa njabu̱ dä za gä pe̱ꞌtsihu̱ rä oportunida de gä ꞌmu̱ihu̱ pa nzäntho nuua ha rä Xiꞌmhai.

HÑUDI GI NTSO̱ꞌMI ꞌNE BENI HÄNGU RÄ TSꞌE̱DI PE̱ꞌTSI RÄ ZI DADA JEOBA

10. ¿Te utkägihu̱ de rä Zi Dada Jeoba Efesios 3:20?

¹⁰ ꞌNehe ma gä japäbihu̱ dä ze̱di mä komfiansahu̱ po rä Zi Dada Jeoba mu̱ gä hudihu̱ gä ntso̱ꞌmihu̱ ꞌne gä benihu̱ hängu rä tsꞌe̱di pe̱ꞌtsi. Hää, Näꞌä pe̱ꞌtsi rä tsꞌe̱di pa dä kumpli gatꞌho näꞌä xä promete. Pe ndunthi yä jäꞌi japäbi xä ñhei dä gamfri ge rä Zi Dada Jeoba ma dä hä nꞌa rä mꞌu̱i temäꞌentho ꞌne nꞌa rä te pa nzäntho nuua ha rä Xiꞌmhai. Pe Jeoba näꞌä hingä nꞌa rä jäꞌi, näꞌä geꞌä rä Zi Dada xa mäjuäni näꞌä pe̱ꞌtsi Gatꞌho rä Tsꞌe̱di pa dä kumpli näꞌä xä promete (Job 42:2; Mar. 10:27). ¿Gi da ngue̱nda por hanja rä Zi Dada Jeoba di promete dä hä nꞌa rä te pa nzäntho nuua ha rä Xiꞌmhai? (Hñeti Efesios 3:20).

11. No̱ni rꞌa de nuꞌu̱ yä promesa bi ja rä Zi Dada Jeoba ꞌne ge xmä ñhei toꞌo dä gamfri ge hää ma xä kumpli (hyandi rä rekuadro «Rꞌa de nuꞌu̱ yä promesa bi ja rä Zi Dada Jeoba ꞌne xmä ñhei toꞌo dä gamfri ge hää ma xä kumpli»).

¹¹ Ha rä Biblia hutsꞌi rꞌa de nuꞌu̱ yä promesa bi ja rä Zi Dada Jeoba nuꞌu̱ xmä ñhei toꞌo dä gamfri ge hää ma xä kumpli. Por ejemplo: Jeoba bi prometebi Abrahán ꞌne Sara ge mäske nuꞌu̱ ya xa myä zi däta jäꞌi, Sara ma xä me̱ꞌtsi nꞌa rä zi bätsi (Gén. 17:15-17). ꞌNehe, rä Zi Dada Jeoba bi prometebi Abrahán ge nuꞌu̱ yä ꞌme̱to ꞌne yä bongꞌme̱to —nuꞌu̱ mꞌe̱fa bi fädi ngu yä israelita— ma xä hñäni de gä erensia rä hnini Canaán. Pe hinto mi tsa dä gamfri ge ma xä thogi njabu̱, ngeꞌä po ndunthi yä je̱ya yä israelita bi mꞌu̱i de gä esclavo ha Egipto. Mi thogi xi ndunthi yä je̱ya, Jeoba bi ꞌñembäbi nꞌa rä zi ꞌme̱hñä mrä thuhu Elisabet ge ma xä me̱ꞌtsi nꞌa rä zi bätsi mäske nuni ya xa mrä zi däta jäꞌi. ¡ꞌNe njabu̱ bi thogi! Po näꞌä rä tiempoꞌä, Jeoba ꞌnehe bä pe̱hni nꞌa rä e̱nxe̱ pa bi xipäbi María —nꞌa rä nxutsi näꞌä tobe hixki nthäti— ge go gehni xki huahni pa dä nänä de näꞌä rä Tꞌu̱. Njabu̱ Jeoba bi kumpli näꞌä rä promesa xki ja ha rä jardin de Edén dende mi o̱tꞌe rꞌa yä mꞌo yä je̱ya (Gén. 3:15).

12. ¿Te utkägihu̱ Josué 23:14 ꞌne Isaías 55:10, 11 de näꞌä xä promete rä Zi Dada Jeoba?

¹² Ora di handihu̱ ha rä Mäkä Tꞌofo hanja xä usa rä tsꞌe̱di rä Zi Dada Jeoba pa xä kumpli yä promesa, geꞌä jakägihu̱ gä kamfrihu̱ ge ma dä kumpli näꞌä xä promete ꞌne ma dä hä nꞌa rä hogä mꞌu̱i nuua ha rä Xiꞌmhai (hñeti Josué 23:14; Isaías 55:10, 11). Näꞌä rä komfiansa di pe̱ꞌspäbihu̱ rä Zi Dada Jeoba, geꞌä ma dä maxkägihu̱ pa gä fatsꞌihu̱ märꞌa yä zi jäꞌi dä ntiende ꞌne dä hyandi ge näꞌä rä hogä mꞌu̱i xä promete rä Zi Dada Jeoba, hää ma dä kumpli ꞌne ge nunä hingä nꞌa rä tꞌi. Rä Zi Dada Jeoba di promete dä kumpli ꞌne xä ꞌñenä: «Nuya yä noya go gehya mäjuäni ꞌne ma dä nja ngu xtä mää» (Apoc. 21:1, 5).

MA GÄ PE̱FIHU̱ NUꞌU̱ YÄ TꞌO̱TꞌE DI HO RÄ ZI DADA JEOBA

13. ¿Hanja faxkägihu̱ yä mhuntsꞌi?

¹³ Ora di pe̱fihu̱ nuꞌu̱ yä tꞌo̱tꞌe di ho rä Zi Dada Jeoba, geꞌä ꞌnehe japäbi dä te mä komfiansahu̱ po Geꞌä. Por ejemplo, hängu faxkägihu̱ ora di ntinihu̱ ha yä mhuntsꞌi. Anna,b nꞌa rä zi nju näꞌä uni mäxo̱ge de rä tiempo pa pe̱päbi rä bolunta rä Zi Dada Jeoba, enä: «Ja ngu nꞌa rä däta bo̱jä näꞌä di tꞌe̱ntꞌi ha rä ndehe pa dä hyu̱ꞌtsi nꞌa rä barko ꞌne njabu̱ hindä ñuntꞌi, njabu̱ ꞌnehe yä mhuntsꞌi xä matsꞌi mä jamfri pa hindä ñuntꞌi ha nunä tsꞌo xiꞌmhai. Mäske näꞌä zi ku uni nꞌa rä discurso hingä nꞌa rä xahnäte näꞌä xa pädi dä ñä xä ñho, nuga nzäntho di ho gä jamäsu näꞌä udi. Näꞌä di o̱de ha yä mhuntsꞌi nzäntho faxkägi pa mänꞌa di ntiende näꞌä udi rä Noya Äjuä ꞌne geꞌä japäbi dä te mä komfiansa po rä Zi Dada Jeoba». Hää, ja ngu rä zi nju Anna, näꞌä di o̱dehu̱ ha yä mhuntsꞌi ꞌnehe faxkägihu̱ pa dä ze̱di mä komfiansahu̱ po rä Zi Dada Jeoba (Rom. 1:11, 12; 10:17).

14. ¿Hanja faxkägihu̱ gä predikahu̱?

¹⁴ ꞌNehe di japäbihu̱ dä ze̱di mä komfiansahu̱ po rä Zi Dada Jeoba ora di predikahu̱ (Heb. 10:23). Nꞌa rä zi nju rä thuhu Barbara, bi Ntestigo dende o̱tꞌe thogi de 70 yä je̱ya. Nunä zi nju enä: «Ora di predika geꞌä japäbi dä ze̱di mä jamfri. Di da ngue̱nda ge entremäs di uti yä zi jäꞌi de rä Zi Dada Jeoba ꞌne de nuꞌu̱ yä promesa, mänꞌa di te mä komfiansa po Geꞌä».

15. ¿Hanja faxkägihu̱ mu̱ di nzäihu̱ gä nxadihu̱ rä Mäkä Tꞌofo? (Hyandi ꞌnehe yä foto).

¹⁵ Gä nxadise̱hu̱ rä Mäkä Tꞌofo ꞌnehe japi dä ze̱di mä komfiansahu̱ po rä Zi Dada Jeoba. Susan enä ge xä matsꞌi ndunthi dä yꞌofo te mä pa ꞌne te mä ora ma dä nxadise̱ rä Mäkä Tꞌofo. Nunä zi nju enä: «De gä ndomingo di nxadi rä revista Yꞌo̱dehu̱. De gä nonxi ꞌne de gä märte, di nxadi näꞌä rä imformäsio ma dä tꞌudi ha näꞌä rä mhuntsꞌi ja entre semänä. ꞌNe nuꞌu̱ märꞌa yä pa pongi, xtä huahni mä nꞌa rä asunto de rä Mäkä Tꞌofo näꞌä di nxadi». Koꞌmu̱ nunä zi nju xä hyoki nꞌa rä lista de te ma dä me̱fi kada nꞌa rä pa, geꞌä xä matsꞌi pa dä sigi dä te rä jamfri ꞌne rä komfiansa po rä Zi Dada Jeoba. Mä nꞌa rä zi nju rä thuhu Irene, ya o̱tꞌe ndunthi yä je̱ya pe̱päbi rä Zi Dada Jeoba ha nꞌa rä ngu Betel. Nunä zi nju enä: «Hängu di te mä komfiansa po rä Zi Dada Jeoba ora di handi hanja xä kumpli nuꞌu̱ yä profecíac hutsꞌi ha rä Mäkä Tꞌofo».

«HINTE MÄ DUDA JA GE MA DÄ KUMPLI»

16. ¿Pa toꞌo ꞌnehe nuꞌu̱ yä noya bi xipäbi rä Zi Dada Jeoba rä profeta Habacuc? (Hebreos 10:36, 37).

¹⁶ Ndunthi yä amigo rä Zi Dada Jeoba, ya o̱tꞌe ndunthi yä je̱ya to̱ꞌmi dä uadi nuꞌu̱ yä tsꞌo tꞌo̱tꞌe di nheki ha rä Xiꞌmhai. Rꞌabu̱ dä za gä mbenihu̱ ge di tarda pa dä zo̱ho̱ näꞌä rä paꞌä. Pe rä Zi Dada Jeoba, pädi xä ñho ꞌne di komprende näꞌä di sentihu̱. Hänge bi ꞌñembäbi näꞌä rä profeta de mäyaꞌmu̱ mrä thuhu Habacuc: «Tobe hinxä zo̱ho̱ rä tiempo pa dä kumpli näꞌä gä handi, ꞌne nunä nguntꞌä ri joni asta rä fin, ꞌne hingä ma dä faya. Mäske ꞌñenä di tarda, ¡sigi gi ndo̱ꞌmi! Ngeꞌä hinte mä duda ja ge ma dä kumpli. ¡Hingä ma dä zo̱ho̱ ndee!» (Hab. 2:3). Näꞌä bi mängä Jeoba hingä ho̱nse̱ pa rä profeta Habacuc, sino ꞌnehe pa nuju̱ mäpaya. Ha rä Mäkä Tꞌofo di handihu̱ ge rä apostol Pablo bi mää ge debe gä benihu̱ ge näꞌä rä paꞌä, ya mero ma dä zo̱ho̱ (hñeti Hebreos 10:36, 37). Hänge mäske di sentihu̱ ge näꞌä rä paꞌä ya bi tarda, mähyoni gä benihu̱ ge näꞌä xä promete rä Zi Dada Jeoba hinte mä duda ja ge ma dä kumpli. Hää, «¡hingä ma dä zo̱ho̱ ndee!».

17. ¿Hanja bi jamäsu rä zi nju Louise näꞌä rä konseho hutsꞌi ha Habacuc 2:3?

¹⁷ Po ndunthi yä je̱ya, yä amigo rä Zi Dada Jeoba xä jamäsu nunä konseho hutsꞌi ha Habacuc 2:3 habu̱ enä: «¡Sigi gi ndo̱ꞌmi!». Ja ngu nꞌa rä zi nju rä thuhu Louise, bi mu̱di bi me̱päbi rä Zi Dada Jeoba dende rä je̱ya 1939. Nunä zi nju enä: «Nuga ndi humämu̱i ge Armagedón ma xä zo̱ho̱ änte de gä kumpli 18 nje̱ya, pe himbi thogi njabu̱. ¿Te xä maxkägi durante nuya yä je̱ya? Xä maxkägi ndunthi gä handi te udi rä Mäkä Tꞌofo de nuꞌu̱ yä amigo rä Zi Dada Jeoba bi me̱ꞌtsi ndunthi rä pasensia. Por ejemplo: Noé, Abrahán, José ꞌne märꞌaa, pe̱ꞌtsi te bi do̱ꞌmi ꞌne bi me̱ꞌtsi rä pasensia pa bi hñäni näꞌä rä jäpi xki prometebi rä Zi Dada Jeoba. Ora di handi hanja nuꞌu̱ bi me̱ꞌtsi ndunthi rä pasensia, geꞌä faxkägi pa gä handi ge näꞌä rä pa rä Zi Dada Jeoba ya ꞌmu̱i getbu̱». Ja ngu rä zi nju Louise, ndunthi de nuꞌu̱ xä me̱päbi rä Zi Dada Jeoba po ndunthi yä je̱ya di mbeni njabu̱ ꞌnehe.

18. Ora di handihu̱ yä tso̱o̱, yä planta, yä zuꞌue ꞌne yä jäꞌi, ¿te di aseguragihu̱ ge ma dä me̱fi rä Zi Dada Jeoba?

¹⁸ Mäjuäni ge näꞌä rä hogä mꞌu̱i xä prometegihu̱ rä Zi Dada Jeoba tobe hindi handihu̱. ¿Pe gi pädi? Mäyaꞌmu̱ himi ja yä tso̱o̱, nixi yä planta, nixi yä zuꞌue, nixi yä jäꞌi. Pe ko rä tiempo nuyu̱ bi zo̱ho̱ bi nja ngeꞌä rä Zi Dada Jeoba go bi hyoki (Gén. 1:1, 26, 27). Njabu̱ ꞌnehe, mu̱ rä Zi Dada Jeoba xä promete dä hä nꞌa rä hogä mꞌu̱i nuua ha rä Xiꞌmhai, Näꞌä ma dä kumpli. Rä Zi Dada Jeoba ya xä hñutsꞌi nꞌa rä pa habu̱ ma dä kumpli näꞌä rä promesa. Nubye̱ hää ma dä za gä handihu̱ nꞌa rä mꞌu̱i temäꞌentho po gatꞌho rä Xiꞌmhai habu̱ gatꞌho yä jäꞌi ma dä mꞌu̱i ko rä johya, ꞌne hinte mä sufrimiento ma dä nja. Xti njabu̱, ya nixi ma gä beñhu̱ ge nꞌa rä pa bi nja nuya yä sufrimiento di handihu̱ mäpaya (Is. 65:17; Apoc. 21:3, 4).

19. ¿Te mähyoni gä pe̱fihu̱ pa gä japäbihu̱ dä te ꞌne dä ze̱di mä komfiansahu̱ po rä Zi Dada Jeoba ꞌne po nuꞌu̱ yä promesa xä ja?

¹⁹ Mientra di to̱ꞌmihu̱ dä zo̱ho̱ näꞌä rä rꞌayꞌo xiꞌmhai xä promete rä Zi Dada Jeoba, ma gä sigihu̱ gä o̱tꞌehu̱ ntsꞌe̱di pa gä japäbihu̱ dä te mä komfiansahu̱ po Geꞌä ꞌne po nuꞌu̱ yä promesa xä ja. Pa geꞌä mähyoni gä pe̱fihu̱ nuya hñuu yä tꞌo̱tꞌe: 1) Mähyoni gä hudihu̱ ꞌne gä ntso̱ꞌmihu̱ te ri bo̱ni näꞌä rä njutꞌi bi uni rä Zi Dada Jeoba, 2) mähyoni gä hudihu̱ ꞌne gä ntso̱ꞌmihu̱ hängu rä tsꞌe̱di pe̱ꞌtsi rä Zi Dada Jeoba, ꞌne 3) mähyoni gä pe̱fihu̱ nuꞌu̱ yä tꞌo̱tꞌe di ho rä Zi Dada Jeoba. Mu̱ gä jahu̱bu̱, ma gä de̱mbäbihu̱ rä ejemplo nuꞌu̱ yä amigo rä Zi Dada Jeoba de mäyaꞌmu̱ ꞌne ma gä hänihu̱ ꞌnehe näꞌä xä prometegihu̱ (Heb. 6:11, 12; Rom. 5:5).