Ma gä hokihu̱ mänꞌa xä ñho mä sadihu̱

1. ¿Te mä imbitasio rꞌakägihu̱ rä Zi Dada Jeoba? (Hyandi ꞌnehe yä foto).

¿TOꞌO di akudihu̱ ora di honihu̱ yä konseho o di honihu̱ toꞌo dä hubgä mä mu̱ihu̱? Hää, di akudihu̱ ko rä Zi Dada Jeoba. Rä Biblia enä: «Xatuäbihu̱ njatꞌä Äjuä» (1 Tes. 5:17, TNM). Ja ngu di handihu̱, ¡Jeoba mismo di mbitagihu̱ gä xatuäbihu̱! Nuju̱ hindi debe gä ntsuhu̱ o gä ntsahu̱ gä akudihu̱ ko rä Zi Dada Jeoba ora di honihu̱ dä gu̱nkägihu̱ ꞌne dä maxkägihu̱ (Prov. 3:5, 6). Rä Zi Dada Jeoba nzäntho ja rä tiempo pa dä yꞌo̱xkägihu̱ ora go gä nehu̱ gä xatuäbihu̱.

2. ¿Te ma gä handihu̱?

² Rä sadi xi nꞌa rä däta regalo näꞌä xä rꞌakägihu̱ rä Zi Dada Jeoba. Pe mäske di pädihu̱ ge nunä nꞌa rä däta regalo, rꞌabu̱ xa ja ndunthi te gä pe̱fihu̱ ꞌne jakägihu̱ xä ñhei gä ꞌuekehu̱ rä tiempo pa gä mplatikahu̱ ko rä Zi Dada Jeoba. Rꞌabu̱ nuju̱se̱ di sentihu̱ ge di ja mꞌe̱di gä hokihu̱ mänꞌa xä ñho mä sadihu̱. Ha nunä ntꞌudi di nxadihu̱, ma gä handihu̱ te bi me̱fi rä Hesu pa mi ꞌueke rä tiempo ꞌne mi mplatikaui rä Zi Dada Jeoba. Ma gä pädihu̱ hanja dä za gä de̱mbäbihu̱ rä ejemplo ꞌne gä hokihu̱ mänꞌa xä ñho mä sadihu̱. ꞌNehe ma gä pädihu̱ hanja ha mä sadihu̱ dä za gä no̱nihu̱ ku̱tꞌa yä däta tꞌo̱tꞌe.

RÄ HESU BI ꞌUEKE RÄ TIEMPO PA DÄ XATUÄBI JEOBA

3. ¿Te mi pädi xä ñho rä Hesu?

³ Rä Hesu mi pädi xä ñho ge rä Zi Dada Jeoba xa di ho toꞌo dä xatuäbi. Änte de dä ꞌñehe ha rä Xiꞌmhai, rä Hesu mi ꞌmu̱i ko rä Dada ha mähetsꞌi ꞌne näꞌä bi hyandi hanja rä Zi Dada Jeoba mi o̱de ꞌne mi thädi nuꞌu̱ yä sadi mi ja nuꞌu̱ yä amigo mi ꞌmu̱kua ha rä Xiꞌmhai. Hinte mä duda ja ge rä Hesu bi hyandi hanja rä Zi Dada Jeoba bi dädi rä sadi Ana, rä rey David, rä profeta Elías ꞌne märꞌaa (1 Sam. 1:10, 11, 20; 1 Rey. 19:4-6; Sal. 32:5). Po rängeꞌä, mi mꞌu̱kua ha rä Xiꞌmhai rä Hesu bi ꞌñuti nuꞌu̱ yä de̱ni ge xa mi debe dä xatuäbi rä Zi Dada Jeoba ꞌne dä me̱ꞌspäbi rä komfiansa ge Näꞌä ma dä dädi (Mat. 7:7-11).

4. ¿Te mä ejemplo bi zoogi rä Hesu ꞌne te dä za gä pädihu̱ de geꞌä?

⁴ Rä Hesu bi umbäbi nꞌa rä hogä ejemplo nuꞌu̱ yä de̱ni de hanja di debe gä xatuäbihu̱ rä Zi Dada Jeoba. Mi mꞌu̱kua ha rä Xiꞌmhai, näꞌä njatꞌä xa mi xatuäbi rä Dada. Rä Hesu mi pe̱ꞌtsi ndunthi te dä me̱fi ꞌne xa mi de̱ni ndunthi yä jäꞌi. Pe mäske njabu̱, näꞌä pe̱ꞌtsi te mi ꞌueke rä tiempo pa mi mplatikaui rä Zi Dada Jeoba (Mar. 6:31, 45, 46). Pa geꞌä, rä Hesu mi nangi xa nꞌihi pa mi xatuäbi rä Zi Dada Jeoba (Mar. 1:35). Rä Biblia ꞌnehe mää ge nꞌa rä pa, rä Hesu bi xatuäbi rä Zi Dada Jeoba gatꞌho rä xui pa bi yꞌapäbi dä matsꞌi dä tomä nꞌa rä hogä desision (Luc. 6:12, 13). Näꞌä rä xui änte de xä tho, rä Hesu xa bi xatuäbi rä Zi Dada Jeoba ngeꞌä mi pädi ge mänꞌitꞌho ma xä ñhandui rä du ꞌne himi ne dä fayabi rä Dada (Mat. 26:39, 42, 44).

5. ¿Hanja dä za gä de̱mbäbihu̱ rä ejemplo rä Hesu ora di xatuäbihu̱ rä Zi Dada Jeoba?

⁵ Rä ejemplo rä Hesu utkägihu̱ ge mäske xa ja ndunthi te gä pe̱fihu̱, mähyoni gä ꞌuekehu̱ rä luga pa gä xatuäbihu̱ rä Zi Dada Jeoba. Ja ngu rä Hesu, rꞌabu̱ di ja mꞌe̱di gä nangihu̱ xa nꞌihi o gä ꞌuekehu̱ rä tiempo mäske ya dä nxui pa gä mplatikahu̱ ko rä Zi Dada Jeoba. Njabu̱, ma gä utihu̱ rä Zi Dada Jeoba hängu di balorahu̱ näꞌä rä däta nsu di pe̱ꞌtsihu̱ de gä mplatikahu̱ Kongeꞌä. Nꞌa rä zi nju rä thuhu Lynne, beni ge xa bi johya nuꞌmu̱ bi bädi ge mi tsa dä xatuäbi rä Zi Dada Jeoba. Nunä zi nju enä: «Ora dä pädi ge mi tsa gä mplatikaꞌme rä Zi Dada Jeoba, dende geꞌmu̱ dä handi ngu nꞌa mä amigo näꞌä dä za gä ñäꞌmee. Nubye̱ nzäntho di honi rä forma de hanja gä hoki xä ñho mä sadi». Zäi ge ndunthi de gekhu̱ dä sentihu̱ ngu rä zi nju Lynne nuꞌmu̱ dä pädihu̱ ge mi tsa gä mplatikahu̱ ko rä Zi Dada Jeoba. Pe nubye̱, ma gä handihu̱ ku̱tꞌa yä tꞌo̱tꞌe nuꞌu̱ dä za gä no̱nihu̱ ora di xatuäbihu̱ rä Zi Dada Jeoba.

KU̱TꞌA YÄ TꞌO̱TꞌE NUꞌU̱ DI DEBE GÄ NO̱NIHU̱ HA MÄ SADIHU̱

6. Ja ngu di handihu̱ ha Apocalipsis 4:10, 11, ¿te ri ꞌñepäbi dä hñäni rä Zi Dada Jeoba?

⁶ Ma gä eꞌspäbihu̱ rä nsu Jeoba. Nꞌa rä pa rä apostol Juan bi hyandi hanja 24 yä ndä, mi adora rä Zi Dada Jeoba ha mähetsꞌi. Nuyu̱ mi eꞌspäbi rä nsu rä Zi Dada Jeoba ꞌne mi enä: «Mä Hmuuꞌihe ꞌne mä Äjuäꞌihe, ri ꞌñepi drä nsundaꞌi ꞌne dä tꞌetsꞌä ri nsu ꞌne dä mhää ge go grä Ndä» (hñeti Apocalipsis 4:10, 11). Ja ngu di handihu̱, yä e̱nxe̱ pe̱ꞌtsi ndunthi yä raso pa dä ꞌñeꞌspäbi rä nsu rä Zi Dada Jeoba ꞌne dä nsunda. Yä e̱nxe̱ bi ꞌmu̱i ha mähetsꞌi ꞌne pädi xä ñho tenguꞌä rä mꞌu̱i rä Zi Dada Jeoba ꞌne geꞌä japäbiꞌu̱ dä mädi ꞌne dä ꞌñeꞌspäbi rä nsu (Job 38:4-7).

7. ¿Te dä za gä xipäbihu̱ rä Zi Dada Jeoba pa gä eꞌspäbihu̱ rä nsu ora di xatuäbihu̱?

⁷ Nuju̱ ꞌnehe debe gä eꞌspäbihu̱ rä nsu rä Zi Dada Jeoba ora di mplantikahu̱ kongeꞌä. Mähyoni gä xipäbihu̱ por hanja di mädihu̱ ꞌne te di hohu̱ de Geꞌä. Ora di nxadihu̱ rä Mäkä Tꞌofo mähyoni gä o̱tꞌehu̱ ntsꞌe̱di po gä handihu̱ te mä mꞌu̱i pe̱ꞌtsi rä Zi Dada Jeoba. ꞌNepu̱ mähyoni gä xipäbihu̱ te di sentihu̱ po Geꞌä (Job 37:23; Rom. 11:33). Hää, mähyoni gä eꞌspäbihu̱ rä nsu rä Zi Dada Jeoba ngeꞌä joꞌo mä nꞌa toꞌo di sugägihu̱ ꞌne di ñängägihu̱ ja ngu di sugägihu̱ꞌä (1 Sam. 1:27; 2:1, 2).

8. ¿Po te mä tꞌo̱tꞌe dä za gä jamädibihu̱ rä Zi Dada Jeoba? (1 Tesalonicenses 5:18).

⁸ Ma gä jamädibihu̱ rä Zi Dada Jeoba. Di pe̱ꞌtsihu̱ ndunthi yä raso pa gä jamädibihu̱ rä Zi Dada Jeoba (hñeti 1 Tesalonicenses 5:18). Mähyoni gä umbäbihu̱ njamädi po gatꞌho nuꞌu̱ yä hogä tꞌo̱tꞌe di pe̱ꞌtsihu̱ ngeꞌä gatꞌho bi ehe de Geꞌä (Sant. 1:17). Por ejemplo, dä za gä umbäbihu̱ njamädi po nunä Xiꞌmhai mähotho habu̱ di ꞌmu̱ihu̱, po gatꞌho näꞌä xä hyoki, po mä tehu̱, po mä familiahu̱, po mä amigohu̱ ꞌne po näꞌä rä promesa xä ja de dä hä nꞌa rä mꞌu̱i temäꞌentho. ꞌNehe dä hogi gä umbäbihu̱ njamädi ngeꞌä hokägihu̱ gä ntsitsꞌihu̱ Kongeꞌä.

9. ¿Por hanja rꞌabu̱ xä ñhei gä pädihu̱ gä uñhu̱ njamädi?

⁹ Mähyoni gä o̱tꞌehu̱ ntsꞌe̱di po gä handihu̱ hyaxtho nuꞌu̱ yä hogä tꞌo̱tꞌe di hänihu̱ de rä Zi Dada Jeoba ꞌne gä umbäbihu̱ njamädi. Di ꞌmu̱ihu̱ ha nꞌa rä Xiꞌmhai habu̱ ndunthi yä jäꞌi hingi ho dä ungä njamädi. Yä jäꞌi mänꞌa tuyämu̱i po näꞌä ne dä me̱ꞌtsi ke po dä ungä njamädi po näꞌä ya pe̱ꞌtsi. Mu̱ hingä nsuhu̱ dä za gä njahu̱bu̱ ꞌnehe, ꞌne ora di xatuäbihu̱ rä Zi Dada Jeoba ho̱nse̱ ma gä tumämu̱ihu̱ po te gä apäbihu̱ ꞌne hingä po gä umbäbihu̱ njamädi po näꞌä ya xä rꞌakägihu̱. Pa hingä njahu̱bu̱, mähyoni ge hyaxtho gä umbäbihu̱ njamädi rä Zi Dada Jeoba po näꞌä xä me̱fi po gekhu̱ (Luc. 6:45).

10. ¿Te xä me̱fi nꞌa rä zi nju ꞌne hanja xä matsꞌi? (Hyandi ꞌnehe rä foto).

¹⁰ Ora di pädihu̱ gä uñhu̱ njamädi, geꞌä faxkägihu̱ pa gä ze̱tihu̱ yä xuñha. Ma gä handihu̱ rä esperiensia rä zi nju Kyung-sook, di tinihu̱ ha rä revista La Atalaya de rä 15 de enero de 2015. Nunä zi nju bi zu̱di xa ntsꞌe̱di rä cáncer ha yä pulmu. Mꞌe̱fa bi ꞌñenä: «Ora bi sikägi ge mi tsu̱kägi rä cáncer xi dä tumämu̱i ꞌne xi dä ntsu. Dä senti ge xti ꞌme̱di gatꞌho». ¿Pe te bi matsꞌi nunä zi nju? Nunä zi nju pede ge de gä xui, änte de dä ma dä ähä, mi po̱tsꞌe ha rä techo rä nguu pa mi mplatikaui rä Zi Dada Jeoba ꞌne pa mi umbäbi njamädi po gatꞌho nuꞌu̱ yä hogä tꞌo̱tꞌe xki me̱ꞌtsi durante rä pa. Geꞌä mi huꞌmpäbi rä mu̱i ꞌne ko ngatꞌho rä koraso mi xipäbi rä Zi Dada Jeoba hängu mi mädi. Nunä zi nju bi hyandi hanja rä Zi Dada Jeoba fatsꞌi yä amigo ora di ñhandui yä xuñha. ꞌNehe bi da ngue̱nda ge mäske tso̱kägihu̱ yä xuñha, ꞌnehe di hänihu̱ ndunthi yä jäpi. Ja ngu rä zi nju Kyung-sook, mäske di ñhanduihu̱ yä xuñha o yä prueba ꞌnehe hyaxtho di hänihu̱ yä jäpi de rä Zi Dada Jeoba ꞌne di debe gä umbäbihu̱ njamädi. Ora di jamädibihu̱, geꞌä ma dä maxkägihu̱ pa gä ze̱tihu̱ ꞌne pa hindä däkägihu̱ yä dumu̱i.

11. ¿Por hanja nuꞌu̱ yä de̱ni rä Hesu mi japäbi mꞌe̱di rä balo?

¹¹ Ma gä apäbihu̱ Jeoba rä balo pa gä predikahu̱. Änte de dä mengi rä Hesu ha mähetsꞌi, bi ꞌñembäbi nuꞌu̱ yä de̱ni: «Dahu̱ mäjuäni de geki nuua Jerusalén, ꞌne gatꞌho rä ngu̱ni Judea, ꞌne nuni Nsamaria, ꞌne gatꞌho mäxo̱ge rä ngu̱ni rä xiꞌmhai» (Hech. 1:8; Luc. 24:46-48). Mi thogi rꞌa yä pa, nuꞌu̱ yä judío mi gu̱tꞌi rä ꞌñuu bi zitsꞌi rä apostol Pedro ꞌne rä apostol Juan ante nuꞌu̱ yä autorida mi fädi ngu rä Sanedrín. ꞌNepu̱ bi mhändabi ya hindä predika ꞌne bri amenäsa (Hech. 4:18, 21). ¿Te bi me̱fi nuyu̱ yoho yä apostol?

12. Ja ngu di handihu̱ ha Hechos 4:29, 31, ¿te bi me̱fi nuꞌu̱ yä de̱ni rä Hesu?

¹² Mäske bri amenäsa rä apostol Pedro ꞌne rä apostol Juan, nuyu̱ bi ꞌñembäbi nuꞌu̱ yä autorida: «¿Hage gi beñhu̱ xä ñho njabu̱ ha rä thandi Äjuä ge go ri ꞌñepi gä o̱tꞌähe ri pahahu̱ ke rä paha Äjuä? Ngeꞌä nuje hindä za toꞌo dä hñägähe gä mäñhe de nuꞌä stä hanthe ꞌne nuꞌä stä o̱he» (Hech. 4:19, 20). Nuꞌu̱ yä judío mi gu̱tꞌi rä ꞌñuu, bi hye̱gi bi ma rä apostol Pedro ꞌne rä apostol Juan. Nuyu̱ bi ma bä muntsꞌi ko nuꞌu̱ märꞌa yä de̱ni rä Hesu ꞌne mähye̱gi bi xatuäbi rä Zi Dada Jeoba ꞌne bi yꞌapäbi dä sigi dä matsꞌi dä me̱päbi rä bolunta. Nuyu̱ bi ꞌñembäbi rä Zi Dada Jeoba: «Faxkähe pa hingä ntsuhe gä ñähe de ri mäkä noya». Rä Mäkä Tꞌofo udi ge rä Zi Dada Jeoba bi dädi näꞌä rä sadiꞌä (hñeti Hechos 4:29, 31).

13. ¿Te dä za gä pädihu̱ de rä zi ku Jin-hyuk?

¹³ Mu̱ yä autorida dä proibigihu̱ gä predikahu̱, dä za gä de̱mbäbihu̱ yä ejemplo nuꞌu̱ yä de̱ni rä Hesu ꞌne gä sigi gä predikahu̱. Geꞌä bi me̱fi rä zi ku Jin-hyuk. Nuni zi ku mi o fadi ngeꞌä himi nthintꞌi ha yä politika nixi ha märꞌa yä asunto. Ha mbo rä fadi, nuni zi ku bi mhändabi dä hyandi nuꞌu̱ märꞌa yä yꞌofadi. Pe ho̱nse̱ mi debe dä ma duä kꞌäni pa dä yꞌambäbi mu̱ te mi japäbi mꞌe̱di ꞌne bi mhändabi ge hindä ñä de rä Biblia kongeꞌu̱. Pe rä zi ku Jin-hyuk bi yꞌapäbi rä Zi Dada Jeoba ge dä umbäbi rä balo ꞌne dä matsꞌi pa dä hyoni yä oportunida pa dä predikabi nuꞌu̱ yä yꞌofadiꞌu̱ (Hech. 5:29). Näꞌä zi ku enä: «Rä Zi Dada Jeoba bi dädi nuꞌu̱ mä sadi ꞌne bi rꞌakägi rä balo ꞌne rä mfädi. Bi maxkägi pa gä uti de rä Mäkä Tꞌofo märꞌa yä yꞌofadi, mäske kada ndi ñäꞌmee ndi uti ho̱nse̱ ku̱tꞌa minuto. De gä xui ndi opäbi yä karta nuꞌu̱ yä yꞌofadi ꞌne ndi ntregäbi rä hyaxꞌä». Ja ngu rä zi ku Jin-hyuk, nuju̱ ꞌnehe dä za gä apäbihu̱ rä Zi Dada Jeoba ge dä rꞌakägihu̱ rä balo ꞌne rä mfädi pa dä maxkägihu̱ gä sigi gä predikahu̱ mäske yä autorida dä proibigihu̱.

14. ¿Te ma dä maxꞌäꞌi gi täpäbi yä dumu̱i ꞌne yä xuñha? (Salmo 37:3, 5).

¹⁴ Ma gä apäbihu̱ Jeoba dä maxkägihu̱ pa gä täpäbihu̱ yä dumu̱i ꞌne yä xuñha. Ndunthi de gekhu̱ di thogihu̱ yä dumu̱i ngeꞌä xä du nꞌa mä amigohu̱ o nꞌa mä familiahu̱, ngeꞌä di tꞌu̱tsagihu̱, ngeꞌä di hñenihu̱ o di hñeni mä familiahu̱. Rä COVID-19 ꞌne yä gerra, mänꞌa bä hänkägihu̱ yä dumu̱i ꞌne yä xuñha. Po rängeꞌä, di ja mꞌe̱di gä xatuäbihu̱ rä Zi Dada Jeoba ꞌne gä petehu̱ gatꞌho näꞌä di sentihu̱. Mähyoni gä mplatikahu̱ Kongeꞌä ꞌñenä ora di mplatikahu̱ ko nꞌa mä amigohu̱. Mu̱ gi jabu̱, ogi duda ge rä Zi Dada Jeoba ma dä maxꞌäꞌi (hñeti Salmo 37:3, 5).

15. ¿Hanja faxkägihu̱ gä xatuäbihu̱ Jeoba ora di ñhanduihu̱ yä dumu̱i ꞌne yä xuñha? Mää nꞌa rä ejemplo.

¹⁵ Mu̱ hingä he̱gihu̱ de gä xatuäbihu̱ rä Zi Dada Jeoba, geꞌä ma dä maxkägihu̱ gä tse̱tꞌhu̱ gatꞌho yä tsꞌo thogi (Rom. 12:12). Rä Zi Dada Jeoba handi nuꞌu̱ yä dumu̱i ꞌne yä xuñha di thogihu̱, ꞌne «Näꞌä o̱tsꞌe nuꞌu̱ mafi adi rä mfatsꞌi» (Sal. 145:18, 19). Kristie, nꞌa rä zi nju näꞌä pe̱ꞌtsi 29 nje̱ya ꞌne rä precursora, xä hyandi ge xa mäjuäni näꞌä mää nunä rä salmo. Nunä zi nju nse̱kitho bi zo̱päbi yä ñheni, ꞌne po geꞌä xa bi ntso̱ꞌmi ꞌne bi durämu̱i. Mꞌe̱fa, rä nänä Kristie bi sipäbi ge mi tsu̱di nꞌa rä tsꞌo ñheni näꞌä mi otho rä ꞌñethi. Rä zi nju Kristie enä: «Xa dä xatuäbi rä Zi Dada Jeoba pa xä maxkägi gä ze̱ti kada nꞌa rä pa. Pe ꞌnehe xa dä o̱tꞌe ntsꞌe̱di pa hingä he̱gi rä Zi Dada Jeoba; hindä he̱gi yä mhuntsꞌi, ꞌne hyaxtho ndi nxadi rä Mäkä Tꞌofo. Rä sadi geꞌä bi maxkägi gä ze̱ti ora hingä ndi pädi te gä o̱tꞌe. Hängu bi nupkägi mä mfeni gä pädi ge rä Zi Dada Jeoba nzäntho mi ꞌmu̱i ha mä lado. Mäske hingä nguntꞌä dä hogi de näꞌä rä ñheni, pe rä Zi Dada Jeoba bi dädi mä sadi ꞌne bi rꞌakägi nꞌa rä tsaya ha mä mfeni». Hää, nunka di debe gä pumfrihu̱ ge rä Zi Dada Jeoba ja rä tsꞌe̱di pa dä maxkägihu̱ ora di thogihu̱ yä dumu̱i ꞌne yä xuñha (2 Ped. 2:9).

16. ¿Por hanja di honihu̱ rä mfatsꞌi rä Zi Dada Jeoba pa gä ze̱tihu̱ yä tentasio?

¹⁶ Ma gä apäbihu̱ rä Zi Dada Jeoba dä maxkägihu̱ gä ze̱tihu̱ yä tentasio. Koꞌmu̱ xtä mꞌu̱ihu̱ ko rä pekado njatꞌä di nehu̱ gä pe̱fihu̱ näꞌä xä ntsꞌo. Hänge mähyoni xa gä o̱tꞌehu̱ ntsꞌe̱di po gä pe̱fihu̱ näꞌä xä ñho ꞌne gä ze̱tihu̱ yä tentasio. ꞌNehe hindi debe gä pumfrihu̱ ge rä Zithu, nzäntho ma dä yꞌo̱tꞌe ntsꞌe̱di pa dä jakägihu̱ gä pe̱fihu̱ näꞌä xä ntsꞌo o pa dä jakägihu̱ gä tagihu̱ ha yä tentasio. Por ejemplo, näꞌä di usa nuꞌu̱ yä dibersio hingi tꞌaxi pa dä tsꞌoni mä mfenihu̱ ꞌne dä jakägihu̱ gä pe̱fihu̱ näꞌä xä ntsꞌo ꞌne njabu̱ rä Zi Dada Jeoba ya hindä numäñhogihu̱ (Mar. 7:21-23; Sant. 1:14, 15).

17. ¿Te mä nꞌa di debe gä pe̱fihu̱ pa hingä tagihu̱ ha yä tentasio? (Hyandi ꞌnehe yä foto).

¹⁷ Po mä tsꞌe̱dise̱hu̱ hindä za gä täpäbihu̱ yä tentasio. Hänge mähyoni gä apäbihu̱ rä Zi Dada Jeoba ge dä maxkägihu̱. Geꞌä bi ꞌñuti rä Hesu nuꞌu̱ yä de̱ni dä yꞌapäbi rä Zi Dada Jeoba ꞌne dä ꞌñembi: «Oxki hopi gä tagihe ha yä tentasio, ñängägihe de rä Zithu» (Mat. 6:13). Rä Zi Dada Jeoba näꞌä nzäntho ne dä maxkägihu̱, pe mähyoni gä apäbihu̱ rä mfatsꞌi. Pe hingä kombasta gä xatuäbihu̱, sino ke pe̱ꞌtsi te gä huxu̱ de mä partehu̱ pa gä u̱tsahu̱ ꞌne gä ꞌuegehu̱ de nuꞌu̱ yä tꞌo̱tꞌe jakägihu̱ gä pe̱ꞌtsihu̱ yä tsꞌo mfeni (Sal. 97:10). Pe̱ꞌtsi te gä u̱tsahu̱ nuꞌu̱ yä mfeni di xani rä Zithu ꞌne go gä ñuꞌtsihu̱ ha mä ñäxuhu̱ yä hogä mfeni. Pa geꞌä, mähyoni gä nxadihu̱ rä Mäkä Tꞌofo, gä ntinihu̱ ha yä mhuntsꞌi ꞌne gä uñhu̱ ntꞌo̱de rä Noya Äjuä. Mu̱ gä pe̱fihu̱ njabu̱, rä Zi Dada Jeoba di promete dä maxkägihu̱ pa hingä tagihu̱ ha nuꞌu̱ yä tentasio (1 Cor. 10:12, 13).

18. ¿Te mähyoni gi xipäbi rä Zi Dada Jeoba ora gi xatuäbi?

¹⁸ Ha nuya yä gäxä pa di ꞌmu̱hu̱, kada nꞌa de gekhu̱ xa mähyoni gä xatuäbihu̱ rä Zi Dada Jeoba pa gä yꞌohu̱ mänjuäntho ha rä ꞌñuu ꞌne hingä fayabihu̱. Hyaxtho ꞌueke rä tiempo pa gi mplatikaui rä Zi Dada Jeoba ꞌne xipäbi gatꞌho näꞌä ja ha ri koraso (Sal. 62:8). ꞌÑeꞌspäbi rä nsu rä Zi Dada Jeoba ꞌne umbäbi njamädi po gatꞌho nuꞌu̱ yä tꞌo̱tꞌe rꞌaꞌi kada nꞌa rä pa. Yꞌapäbi rä mfatsꞌi pa gi pe̱ꞌtsi rä balo ꞌne hingi ntsu gi predika. Bäntebi dä rꞌaꞌi rä mfatsꞌi pa gi täpäbi yä xuñha ꞌne yä tentasio. Ogi hopäbi te dä hñäkꞌäꞌi de gi xatuäbi rä Zi Dada Jeoba. Pe zäi ge gi ñꞌanibye̱: «¿Hanja thädi mä sadihu̱ rä Zi Dada Jeoba?». Ma gä timbäbihu̱ rä mpengi nunä ntꞌani ha näꞌä rä ntꞌudi xä ꞌñepu̱.