Jeoba di garantisa ge ma dä japi dä Mparaiso rä Xiꞌmhai

1. ¿Te mä garantia bi umbäbi rä Zi Dada Jeoba yä israelita pa bi ꞌñuti ge gatꞌho näꞌä xki promete ma xä kumpli?

RÄ PROFETA Isaías bi mää ge Jeoba näꞌä nꞌa rä Zi Dada näꞌä mängä näꞌä mäjuäni ꞌne nunka faya. Rä noya «mäjuäni» ha rä idioma hebreo ri bo̱ni «amén». Rä noya amén ri bo̱ni «geꞌä dä njabu̱» o «xa mäjuäni» (Is. 65:​16, ꞌne rä nota). Rä Mäkä Tꞌofo usa ndunthi yä mꞌiki rä noya amén, ngu nꞌa rä garantia ge xa mäjuäni näꞌä pe̱fi o mää rä Zi Dada Jeoba ꞌne rä Hesu. Hänge ora rä Zi Dada Jeoba bi usa rä profeta Isaías pa bi zofo rä hnini Israel, näꞌä mi ne ge yä israelita xä hyandi ge gatꞌho nuꞌu̱ yä promesa rä Zi Dada Jeoba mi ꞌmu̱i garantisado ge ma xä kumpli.

2. ¿Por hanja dä za gä kamfrihu̱ ge rä Zi Dada Jeoba hää ma dä kumpli yä promesa, ꞌne ndaꞌu̱ nuꞌu̱ yä ntꞌani ma gä thädihu̱?

² Xi nuju̱, ¿dä za gä kamfrihu̱ näꞌä xä promete rä Zi Dada Jeoba? Ya xki thogi ngu 800 yä je̱ya de näꞌä rä tiempo bi mꞌu̱i rä profeta Isaías, rä apostol Pablo bi mää ge dä za gä pe̱ꞌspäbihu̱ rä komfiansa nuꞌu̱ yä promesa Äjuä. Rä apostol Pablo bi ꞌñenä: «Äjuä hingi tsa dä ñhate» (Heb. 6:18). Zäi ge xtä handihu̱ ge nꞌa rä po̱tꞌhe näꞌä uni rä dehe xä ñꞌu, nunka uni näꞌä rä dehe xä ñꞌuxi. Njabu̱ ꞌnehe, rä Zi Dada Jeoba nzäntho mää näꞌä mäjuäni ꞌne nunka mää yä nkꞌuamba. Hänge dä za gä kamfrihu̱ ge rä Zi Dada Jeoba ma dä kumpli gatꞌho näꞌä xä promete, ꞌne hinte mä raso di pe̱ꞌtsihu̱ pa gä dudahu̱ de Geꞌä. Ha nunä ntꞌudi di nxadihu̱ ma gä thädihu̱ nuya yä ntꞌani: ¿Te xä promete rä Zi Dada Jeoba dä me̱fi po gekhu̱? ¿Te mä garantia xä uni rä Zi Dada Jeoba pa gä kamfrihu̱ ge näꞌä xä promete hää ma dä kumpli?

¿TE XÄ PROMETE RÄ ZI DADA JEOBA?

3. a) ¿Te mä promesa di nupkägihu̱ mä mfenihu̱? (Apocalipsis 21:​3, 4). b) ¿Hanja thädi rꞌa yä jäꞌi ora di petehu̱ de nunä promesa?

³ Ma gä handihu̱ nꞌa de nuꞌu̱ yä promesa xä uni rä Zi Dada Jeoba ꞌne xa di nupkägihu̱ mä mfenihu̱ (hñeti Apocalipsis 21:​3, 4). Rä Zi Dada Jeoba di prometegihu̱ ge «ya hindä nja rä du, ni yä tsꞌoni, ni yä dumu̱i, nixi yä u̱gi». Ora di po̱nihu̱ di ungä ntꞌo̱dehu̱ rä Noya Äjuä, di usahu̱ nunä rä testo pa gä utihu̱ yä zi jäꞌi te mä mꞌu̱i ma gä pe̱ꞌtsihu̱ ha rä Paraiso. Pe, ¿xkä da ngue̱nda hanja thädi kasi gatꞌho yä jäꞌi ora di utihu̱ nunä promesa udi rä Mäkä Tꞌofo? Rꞌaa enä: «Di ntꞌo̱de xa mähotho pe ngu hindi kamfri».

4. a) ¿Ndaꞌu̱ nuꞌu̱ yoho yä tꞌo̱tꞌe ya mi pädi rä Zi Dada Jeoba ge ma xä thogi? b) ¿Te mä nꞌa xä uni rä Zi Dada Jeoba aparte de nuꞌu̱ yä promesa?

⁴ Nuꞌmu̱ rä Zi Dada Jeoba bi japäbi rä apostol Juan bi yꞌofo te mä mꞌu̱i ma gä pe̱ꞌtsihu̱ ha rä Paraiso, Jeoba mi pädi xä ñho ge nunä promesa ma gä usahu̱ mäpaya pa gä utihu̱ yä zi jäꞌi de näꞌä rä Gobiernu ma dä hä nuua ha rä Xiꞌmhai. Rä Zi Dada Jeoba ꞌnehe mi pädi ge ndunthi yä jäꞌi ma xä japäbi xä ñhei dä gamfri nunä promesa (Is. 42:9; 60:2; 2 Cor. 4:​3, 4). Hänge, ¿te dä za gä pe̱fihu̱ pa hingä he̱gihu̱ de gä kamfrihu̱ nunä promesa hutsꞌi ha Apocalipsis 21:​3, 4, ꞌne pa gä fatsꞌihu̱ märꞌa yä jäꞌi dä gamfri ge xa mäjuäni ma dä kumpli? Rä Zi Dada Jeoba hingä ho̱nse̱ bi uni nunä rä promesa, sino ke ꞌnehe xä uni yä prueba pa dä za gä kamfrihu̱. ¿Ngu te mä prueba o te mä garantia xä uni?

JEOBA DI GARANTISA YÄ PROMESA

5. ¿Te mä raso rꞌakägihu̱ rä Zi Dada Jeoba pa gä kamfrihu̱ ge mäjuäni ma dä japi dä Mparaiso rä Xiꞌmhai, ꞌne habu̱ di tinihu̱ nuꞌu̱ yä raso?

⁵ Jabu̱ rꞌa yä testo de rä Mäkä Tꞌofo habu̱ di tinihu̱ nuꞌu̱ yä raso rꞌakägihu̱ rä Zi Dada Jeoba pa gä kamfrihu̱ ge mäjuäni ma dä japi dä Mparaiso rä Xiꞌmhai. Rꞌa de nuya yä testo enä: «Näꞌä toꞌo mi hudi ha mähetsꞌi bi ꞌñenä: “¡Hyandi! Di hoki mä rꞌayꞌo gatꞌho yä tꞌo̱tꞌe. [ . . . ] Yꞌofo nuya yä noya, ngeꞌä näꞌä di xiꞌi mäjuäni ꞌne hingä ma dä faya [ . . . ]. ¡Nuya yä noya ya xä kumpli! Go geki drä Alfa ꞌne drä Omega, go rä mu̱digi ꞌne go rä gätsꞌigi”» (Apoc. 21:​5, 6a, TNM).

6. ¿Te mä testo de rä Mäkä Tꞌofo japi dä te mä komfiansahu̱ ge näꞌä xä promete rä Zi Dada Jeoba mäjuäni ma dä kumpli?

⁶ ¿Por hanja japi dä ze̱di mä komfiansahu̱ näꞌä hutsꞌi ha Apocalipsis 21:​5, 6? Ha rä mfistꞌofo Apocalipsis. . . ¡se acerca su magnífica culminación! ha rä nxii 303, yä parrafo 8 ꞌne 9 enä: «Ha nuya yä testo, di handihu̱ ge rä Zi Dada Jeoba ꞌñenä go rꞌakägihu̱ rä documento nꞌa rä hai ꞌne asta di firmä pa gä kamfribihu̱». Ha näꞌä documentoꞌä, ꞌñenä go hutsꞌi Apocalipsis 21:​3, 4 ꞌne näꞌä promesa uni rä Zi Dada Jeoba. ꞌNepu̱ ha yä versículo 5 ꞌne 6 ꞌñenä go bi uni rä firmä ngu nꞌa rä garantia ge näꞌä rä promesa ma dä kumpli. Ma gä handihu̱ te mä noya usa rä Zi Dada Jeoba ora uni nunä garantia.

7. ¿Toꞌo fu̱di ñä ha Apocalipsis 21:5 ꞌne por hanja xa di nupkägihu̱ mä mfenihu̱?

⁷ Ha rä mfistꞌofo Apocalipsis rä Zi Dada Jeoba bi xipäbi directamente rä apostol Juan ge dä yꞌofo nuya yä noya: «Näꞌä toꞌo mi hudi ha mähetsꞌi bi ꞌñenä. . .» (Apoc. 21:5a). Hää, nuya yä noya hingo bi uni nꞌa rä e̱nxe̱ nixi rä Hesu, sino mismo rä Zi Dada Jeoba. Rä Mäkä Tꞌofo mää ge rä Zi Dada Jeoba nunka «hate» (Tito 1:2). Hänge di pe̱ꞌtsihu̱ ndunthi yä raso pa gä kamfrihu̱ ge näꞌä hutsꞌi ha Apocalipsis 21:​5, 6 mäjuäni ma dä kumpli.

«¡HYANDI! DI HOKI MÄ RꞌAYꞌO GATꞌHO YÄ TꞌO̱TꞌE»

8. ¿Te mää rä Zi Dada Jeoba pa di garantisa ge näꞌä rä promesa hää ma dä kumpli? (Isaías 46:10).

⁸ Nubye̱ ma gä handihu̱ te ri bo̱ni rä noya «¡Hyandi!» (Apoc. 21:5). Rä noya «¡Hyandi!» ehe de rä idioma griego ꞌne di tinihu̱ ndunthi yä mꞌiki ha rä mfistꞌofo Apocalipsis. Nꞌa rä mfistꞌofo mää ge rä noya ¡Hyandi!, japäbi näꞌä toꞌo heti o o̱de nuya yä noya mänꞌa dä jamäsu nuꞌu̱ yä noya sigi. ¿Ndaꞌu̱ nuꞌu̱ yä noya bi sigi bi mää rä Zi Dada Jeoba? Näꞌä bi ꞌñenä: «Di hoki mä rꞌayꞌo gatꞌho yä tꞌo̱tꞌe». Mäske rä Zi Dada Jeoba ma dä hä mꞌe̱fa nuya yä jäpi, ora bi ja nunä promesa näꞌä bi ꞌñenä: «Di hoki» pa dä garantisa ge nuꞌu̱ yä promesa hää ma dä kumpli (hñeti Isaías 46:10).

9. a) Ja ngu di handihu̱ ha Apocalipsis 21:​5, ¿te bi ne bi mää rä Zi Dada Jeoba ora bi ꞌñenä «di hoki mä rꞌayꞌo gatꞌho yä tꞌo̱tꞌe»? b) ¿Te di signifika «rä ꞌme̱tꞌo mähetsꞌi ꞌne rä ꞌme̱tꞌo xiꞌmhai» ꞌne te ma dä me̱fi rä Zi Dada Jeoba kongeꞌu̱?

⁹ Ma gä handihu̱ te mä nꞌa bi ne bi mää rä Zi Dada Jeoba ha Apocalipsis 21:5 ora bi ꞌñenä: «Di hoki mä rꞌayꞌo gatꞌho yä tꞌo̱tꞌe». Nuya yä noya udi ge rä Zi Dada Jeoba ma dä ja yoho yä tꞌo̱tꞌe: Ma dä paati ꞌne ma dä hyoki habu̱ xä tsꞌoki. Mꞌe̱tꞌo ma gä handihu̱ te mä tꞌo̱tꞌe ma dä paati. Rä Mäkä Tꞌofo enä: «Nunä rä ꞌme̱tꞌo mähetsꞌi ꞌne rä ꞌme̱tꞌo xiꞌmhai bi gätsꞌi» (Apoc. 21:​1, Ár ꞌRaꞌyo Nkohi Jö [RN]). Rä «ꞌme̱tꞌo mähetsꞌi» signifika nuꞌu̱ yä gobiernu o ha rä yꞌe̱ rä Zithu ꞌne nuꞌu̱ yä u̱xjua (Mat. 4:​8, 9; 1 Juan 5:19). Rꞌabu̱ rä Mäkä Tꞌofo usa rä noya xiꞌmhai pa dä referi yä jäꞌi (Gén. 11:1; Sal. 96:1). Hänge ora rä Mäkä Tꞌofo enä «rä ꞌme̱tꞌo xiꞌmhai» signifika gatꞌho nuꞌu̱ yä tsꞌomꞌu̱i jäꞌi ꞌmu̱i mäpaya. ꞌNe ora enä ge «rä ꞌme̱tꞌo mähetsꞌi ꞌne rä ꞌme̱tꞌo xiꞌmhai bi gätsꞌi» signifika ge rä Zi Dada Jeoba ma dä hñäki gatꞌho yä gobiernu ꞌne gatꞌho yä tsꞌomꞌu̱i jäꞌi, ꞌne ma dä hñutsꞌi nꞌa rä rꞌayꞌo gobiernu dende ha mähetsꞌi ꞌne ha rä Xiꞌmhai ma dä zoogi ho̱nse̱ nuꞌu̱ yä hojäꞌi.

10. ¿Te mä nꞌa ne dä mää rä Zi Dada Jeoba ora enä «Di hoki mä rꞌayꞌo gatꞌho yä tꞌo̱tꞌe»?

¹⁰ ¿Te mä nꞌa ne dä mää rä Zi Dada Jeoba ora enä «Di hoki mä rꞌayꞌo gatꞌho yä tꞌo̱tꞌe»? (Apoc. 21:5). Rä Zi Dada Jeoba ma dä hyoki rä Xiꞌmhai habu̱ xä tsꞌoki ꞌne ma dä matsꞌi yä jäꞌi pa dä zopu̱ rä pekado asta xa dä zo̱ho̱ dä mperfecto. Ja ngu bi mää rä profeta Isaías, rä Xiꞌmhai ma dä gohi ngu näꞌä rä Paraiso mi ja ri mu̱di ha rä jardin de Edén. Rä Zi Dada Jeoba ma dä maxkägihu̱ kada nꞌa de gekhu̱ pa gä tsohu̱bu̱ rä pekado ꞌne ma dä hñäki gatꞌho yä ñheni. Por ejemplo, Jeoba ma dä yꞌo̱the nuꞌu̱ yä zi jäꞌi hingi tsa dä ñꞌo, nuꞌu̱ hingi handi, nuꞌu̱ hingi o̱de, ꞌne asta ma dä gu̱tsꞌi nuꞌu̱ xä du (Is. 25:8; 35:​1-7).

NUYA YÄ NOYA «HINGÄ MA DÄ FAYA» ꞋNE «YA XÄ KUMPLI»

11. ¿Te bi mändabi rä Zi Dada Jeoba dä me̱fi rä apostol Juan, ꞌne por hanja?

¹¹ Nuꞌmu̱ rä Zi Dada Jeoba bi mändabi rä apostol Juan dä yꞌofo näꞌä promesa, ꞌnehe bi garantisabi ge nunä promesa «mäjuäni ꞌne hingä ma dä faya» ꞌne ge hinte mä raso ja pa gä dudahu̱ ge ma dä kumpli (Apoc. 21:5). Hängu di jamädibihu̱ rä apostol Juan ngeꞌä bi yꞌo̱de ꞌne bi yꞌofo näꞌä bi mhändabi. Po geꞌä nubye̱ tsa gä pädihu̱ de nuꞌu̱ yä promesa rä Zi Dada Jeoba ꞌne de nuꞌu̱ yä jäpi to̱bgägihu̱.

12. Ora te di promete rä Zi Dada Jeoba, ¿por hanja Näꞌä hää ri ꞌñepäbi dä ꞌñenä «¡Nuya yä noya ya xä kumpli!»?

¹² ꞌNepu̱ rä Zi Dada Jeoba bi ꞌñenä: «¡Nuya yä noya ya xä kumpli!» (Apoc. 21:6). Ha nunä testo di handihu̱ ge ora rä Zi Dada Jeoba enä «ya xä kumpli», ꞌñenä go ya bi kumpli näꞌä rä promesa de dä hä nꞌa rä Paraiso nuua ha rä Xiꞌmhai. Hää, nuya yä noya udi ge hinto ma dä hñäkuäbi de dä kumpli näꞌä xä promete. Pe rä Zi Dada Jeoba bi mängä märꞌa yä noya näꞌä mänꞌa japäbi dä ze̱di nunä garantia bi uni.

«GO GEKI DRÄ ALFA ꞌNE DRÄ OMEGA»

13. ¿Por hanja rä Zi Dada Jeoba enä ge go geꞌä rä «Alfa» ꞌne rä «Omega»?

¹³ Ja ngu ya dä mäñhu̱, ha nuꞌu̱ yä thandi o bisio bi me̱ꞌtsi rä apostol Juan, rä Zi Dada Jeoba geꞌä bi ñä directamente hñu mꞌiki (Apoc. 1:8; 21:​5, 6; 22:13). Ha nuya hñu mꞌiki Jeoba bi ꞌñenä: «Go geki drä Alfa ꞌne drä Omega». Alfa geꞌä rä mu̱di letra de rä abecedario ha rä idioma griego, ꞌne omega geꞌä rä gäxä letra. ¿Por hanja rä Zi Dada Jeoba enä ge go geꞌä rä Alfa ꞌne rä Omega? Signifika ge ora fu̱di hoki nꞌa rä ꞌme̱fi, pe̱ꞌtsi te di huati.

14. a) ¿Hämꞌu̱ bi no̱ni rä letra «Alfa» rä Zi Dada Jeoba ꞌne hämꞌu̱ ma dä no̱ni rä letra «Omega»? b) ¿Te di garantisagihu̱ rä Zi Dada Jeoba ha Génesis 2:​1-3?

¹⁴ Nuꞌmu̱ rä Zi Dada Jeoba bi hyoki Adán ꞌne Eva, bi xipäbi pa te xki hyoki ꞌne xki ꞌñegi nuua ha rä Xiꞌmhai. Rä Mäkä Tꞌofo enä: «Äjuä bi jäpi ꞌne bi ꞌñembäbi: “Pe̱ꞌtsihu̱ yä bätsi ꞌne ndunthihu̱. Ñuꞌtsihu̱ rä xiꞌmhai ꞌne suhu̱”» (Gén. 1:28). Mi mängä njabu̱ rä Zi Dada Jeoba ꞌñenä go bi no̱ni näꞌä rä mu̱di letra rä thuhu «Alfa». Ma dä zo̱ho̱ rä pa habu̱ nuꞌu̱ yä bätsi Adán ꞌne Eva ma dä ñuꞌtsi rä Xiꞌmhai ꞌne ma dä japi dä Mparaiso. Näꞌä rä paꞌä, rä Zi Dada Jeoba ꞌñenä go ma dä no̱ni näꞌä rä gäxä letra ꞌne ma dä ꞌñenä «Omega». Mi uadi bi hyoki «mähetsꞌi, rä xiꞌmhai, ꞌne gatꞌho nuꞌä jani», rä Zi Dada Jeoba bi garantisa ge ma dä kumpli näꞌä xä promete. ¿Te bi me̱fi? Bi ꞌueke näꞌä rä yoto ma pa ꞌne bi mää ge nunä pa «xä nsundatho» (hñeti Génesis 2:​1-3). ¿Xi te ri bo̱ni nuya yä noya? Ge rä Zi Dada Jeoba bi ꞌueke näꞌä rä yoto rä pa, pa dä kumpli näꞌä xä beni dä me̱fi ko yä jäꞌi ꞌne rä Xiꞌmhai. Xti uadi näꞌä rä yoto mä pa, gatꞌho nuꞌu̱ yä promesa ya xä huati xä kumpli.

15. ¿Por hanja xä za toꞌo xä mbeni ge rä Zithu bi hñäkuäbi rä Zi Dada Jeoba de dä kumpli ko näꞌä mi mbeni dä me̱fi ko yä jäꞌi ꞌne rä Xiꞌmhai?

¹⁵ Nuꞌmu̱ Adán ꞌne Eva bi desidi hindä yꞌo̱te rä Zi Dada Jeoba, nuꞌu̱ bi zo ha rä pekado. Pe hingä ho̱nse̱ꞌu̱, ꞌnehe bi zokuäbi rä pekado ꞌne rä du gatꞌho nuꞌu̱ yä bätsi ma xä mꞌu̱i (Rom. 5:12). ¿Xibye̱ te ma xä thogi? ¿Ya hingä ma xä logra Äjuä xä ñuꞌtsi rä Xiꞌmhai ko nuꞌu̱ yä hojäꞌi ꞌne yä perfecto? ¿Ma xä logra rä Zithu xä hñäkuäbi rä Zi Dada Jeoba pa nunka xä ꞌñenä «Omega»? Zäi ge rä Zithu nubye̱ hää bi mbeni ge xki tsꞌombäbi rä ꞌme̱fi rä Zi Dada Jeoba. Tal vez rä Zithu bi ꞌñenä: «Nubye̱ hää Jeoba ma dä hyo Adán ꞌne Eva ꞌne zäi ge ma dä hyokä mä nꞌa rä ñꞌo̱ho̱ ꞌne mä nꞌa rä ꞌme̱hñä. Mu̱ dä me̱fi njabu̱ nubye̱ hää ma dä za gä enä ge Jeoba näꞌä nꞌa rä kꞌuamba». ¿Por hanja bi mbeni njabu̱? Ngeꞌä nja ngu di handihu̱ ha Génesis 1:​28, rä Zi Dada Jeoba bi ꞌñembäbi Adán ꞌne Eva: «Pe̱ꞌtsihu̱ yä bätsi ꞌne ndunthihu̱. Ñuꞌtsihu̱ rä xiꞌmhai ꞌne suhu̱». Mu̱ rä Zi Dada Jeoba xä hyo Adán ꞌne Eva, hingä ma xä mꞌu̱i yä bätsi pa xä ñuꞌtsi rä Xiꞌmhai ꞌne nubye̱ hää rä Zithu ma xä ꞌñenä: «Jeoba bi hyatꞌi nuyu̱ yä jäꞌi ꞌne himbi kumpli näꞌä bi prometebi».

16. ¿Te mä oportunida bi mbeni rä Zithu ge mi pe̱ꞌtsi?

¹⁶ Zäi ge rä Zithu asta bi ꞌñenä: «En caso de ke Jeoba dä hyopäbi Adán ꞌne Eva dä sigi dä te ꞌne dä me̱ꞌtsi yä bätsi, nuyu̱ nunka ma dä zo̱ho̱ dä mperfecto. Nu xkä handi njabu̱, geꞌä mä oportunida di pe̱ꞌtsi pa gä embäbi Jeoba: “Nunka ma gi logra gi hyandi ge ha Xiꞌmhai dä mꞌu̱i nuꞌu̱ yä jäꞌi yä yꞌo̱de ꞌne yä perfecto”» (Ecl. 7:20; Rom. 3:23).

17. a) ¿Te bi me̱fi rä Zi Dada Jeoba pa bi resolbe näꞌä rä xuñha bä hä Adán, Eva ꞌne rä Zithu? b) ¿Te ma dä thogi nuꞌmu̱ xti uadi dä mända rä Hesu po 1.000 yä je̱ya? (Hyandi ꞌnehe rä foto).

¹⁷ Pe rä Zithu nunka bi imäjinä hanja rä Zi Dada Jeoba ma xä resolbe näꞌä xuñha bä hä Adán, Eva ꞌne rä Zithu (Sal. 92:5). Rä Zi Dada Jeoba bi hyopäbi ge Adán ꞌne Eva xä me̱ꞌtsi yä bätsi, ꞌne njabu̱ bi ꞌñudi ge di kumpli näꞌä di promete ꞌne hinto ma dä za dä ꞌñembäbi ge rä kꞌuamba. ꞌNehe Jeoba bi ꞌñudi ge hinto ma dä za dä ꞌñembäbi ge näꞌä nꞌa rä fracasado, sino gatꞌho näꞌä di promete di kumpli. ¿Te bi me̱fi? Nuꞌmu̱ rä Zithu bi japäbi Adán ꞌne Eva bi ꞌuengi de rä ꞌñuu rä Zi Dada Jeoba, Jeoba nguntꞌä bi mää ge ma xä mꞌu̱i toꞌo xä ñäni nuꞌu̱ yä jäꞌi yä yꞌo̱de (Gén. 3:15; 22:18). Rä Zithu nunka bi imäjinä ge Jeoba ma xä uni nꞌa rä njutꞌi pa xä ñäni yä mexiꞌmhai. Koꞌmu̱ rä Zithu näꞌä nꞌa rä egoista, näꞌä hingi senti ninꞌa tu̱i rä mhäte. Hänge nunka bi imäjinä ge po näꞌä rä mhäte pe̱skägihu̱ rä Zi Dada Jeoba ma xä mꞌu̱i dispuesto dä me̱hnä rä hmäkä Tꞌu̱ pa dä uni nꞌa rä njutꞌi po gekhu̱ (Mat. 20:28; Juan 3:16). ¿Te ma dä logra rä Zi Dada Jeoba ko näꞌä rä njutꞌi bi uni? Xti uadi näꞌä 1.000 yä je̱ya de dä mända rä Hesu, nuꞌu̱ yä jäꞌi dyä yꞌo̱de ꞌne dyä perfecto ma dä mꞌu̱i pa nzäntho nuua ha rä Xiꞌmhai. Ma dä mꞌu̱i ha nꞌa rä Paraiso ja ngu mi ꞌne rä Zi Dada Jeoba dende ri mu̱di. Xti uadi dä kumpli nunä rä promesa, nubye̱ hää rä Zi Dada Jeoba ma dä za dä ꞌñenä: «¡Ya dä huati mä ꞌme̱fi!». Hää, ꞌñenä go mä dä no̱ni näꞌä rä gäxä letra rä thuhu «Omega».

JAPI DÄ ZE̱DI RI KOMFIANSA GE JEOBA HÄÄ MA DÄ HÄ NꞌA RÄ PARAISO

18. ¿Te mä raso di pe̱ꞌtsihu̱ pa gä kamfrihu̱ ge rä Zi Dada Jeoba hää xa mäjuäni ma dä kumpli näꞌä xä promete? (Hyandi rä rekuadro «Hñuu yä raso rꞌakägihu̱ Jeoba pa gä kamfrihu̱ ge ma dä kumpli näꞌä xä promete»).

¹⁸ Ya dä handihu̱ por hanja dä za gä kamfrihu̱ ge rä Xiꞌmhai hää ma dä Mparaiso. ¿Te mä raso dä za gä xipäbihu̱ märꞌa pa ꞌnehe dä gamfri ge rä Zi Dada Jeoba hää xa mäjuäni ma dä kumpli näꞌä xä promete? 1) Rä Mäkä Tꞌofo udi ge rä Zi Dada Jeoba go geꞌä di ja nunä rä promesa ora enä: «Näꞌä toꞌo mi hudi ha mähetsꞌi bi ꞌñenä: “¡Hyandi! Di hoki mä rꞌayꞌo gatꞌho yä tꞌo̱tꞌe”». Hää, rä Zi Dada Jeoba ne dä kumpli näꞌä xä promete, ꞌne pe̱ꞌtsi gatꞌho rä tsꞌe̱di ꞌne rä mfädi pa dä jabu̱. 2) Rä Mäkä Tꞌofo udi ge ora rä Zi Dada Jeoba bi ja nunä promesa, näꞌä bi ꞌñenä: «Yꞌofo nuya yä noya, ngeꞌä näꞌä di xiꞌi mäjuäni ꞌne hingä ma dä faya [ . . . ]. ¡Nuya yä noya ya xä kumpli!». Ha nunä testo di handihu̱ ge ora ñä rä Zi Dada Jeoba ꞌñenä go yä bi kumpli näꞌä rä promesa de dä ha nꞌa rä Paraiso nuua ha rä Xiꞌmhai. 3) Rä Zi Dada Jeoba enä: «Go geki drä Alfa ꞌne drä Omega». Nunä di signifika ge nuꞌmu̱ Jeoba fu̱ti nꞌa rä ꞌme̱fi, Näꞌä di huati. Ko nuya hñuu yä raso, rä Zi Dada Jeoba ma dä ꞌñudi ge rä Zithu go geꞌä rä kꞌuamba ꞌne rä fracasado.

19. ¿Te dä za gi pe̱fi mu̱ nꞌa rä jäꞌi hingi kamfri ora gi uti näꞌä rä promesa hutsꞌi ha Apocalipsis 21:4?

¹⁹ Ogi pumfri ge ri komfiansa po rä Zi Dada Jeoba ꞌne nuꞌu̱ yä promesa, mänꞌa di te ora gi predikabi yä jäꞌi ꞌne gi xipäbi te mä garantia xä uni rä Zi Dada Jeoba ge hää ma dä kumpli näꞌä xä promete. ¿Te dä za gi pe̱fi mu̱ nꞌa rä jäꞌi hingi kamfri ora gi uti näꞌä promesa hutsꞌi ha Apocalipsis 21:4? Dä hogi gi ꞌñuti näꞌä hutsꞌi ha yä versículo 5 ꞌne 6 pa gi ꞌñuti ge ko nuya yä noya, rä Zi Dada Jeoba ꞌñenä go di firmä nꞌa rä documento pa di garantisa ge ma dä kumpli gatꞌho näꞌä xä promete (Is. 65:16).