Watchtower BIBLIOTECA HA INTERNET
Watchtower
BIBLIOTECA HA INTERNET
Ñañu
O̱
  • Ä
  • ä
  • E̱
  • e̱
  • O̱
  • o̱
  • U̱
  • u̱
  • ꞌ
  • RÄ MÄKÄ TꞌOFO
  • YÄ HE̱ꞌMI
  • YÄ MHUNTSꞌI
  • w23 julio yä nxii 14-19
  • «Sigi gi ze̱tihu̱»

Otho rä bideo pa nunä testo o parrafo.

Punꞌgägihe, hingi tsa dä xogi nunä bideo.

  • «Sigi gi ze̱tihu̱»
  • Yꞌo̱dehu̱ (Pa gä nxadihu̱) 2023
  • Yä subtítulo
  • Rä imformäsio ngunätho
  • ¿HABU̱ DI DEBE GÄ DEFENDEBIHU̱ YÄ MHÄNDA RÄ ZI DADA JEOBA?
  • ¿TE MÄ TRAMPA USA RÄ ZITHU PA DÄ JAKÄGIHU̱ DÄ ZABIGIHU̱ ꞌNE GÄ ꞌUEGEHU̱ DE YÄ MHÄNDA RÄ ZI DADA JEOBA?
  • ¿TE DEBE GÄ PE̱FIHU̱ PA GÄ SIGI GÄ ZE̱TIHU̱?
  • MA GÄ SIGI GÄ ZE̱TIHU̱ ꞌNE GÄ DEFENDEBIHU̱ YÄ LEY JEOBA
  • Nzäntho ma gä pe̱päbihu̱ Jeoba
    Ko rä johya ma gä ntuhuhu̱ pa Jeoba
  • ¿Gi handi rä te ja ngu handi Äjuä?
    «Oxki ma gi hye̱gihu̱ näꞌä rä mhäte xä rꞌakhu̱ Äjuä»
  • Nꞌa rä rꞌayꞌo líder ꞌne yoho yä ꞌme̱hñä xa himi tsu
    Nuꞌu̱ yä ntꞌudi ma gi pädi de rä Mäkä Tꞌofo
  • Hyandi rä te ngu handi Äjuä
    ¿Te xa mäjuäni udi rä Mäkä Tꞌofo?
Yꞌo̱dehu̱ (Pa gä nxadihu̱) 2023
w23 julio yä nxii 14-19

RÄ NTꞌUDI PA GÄ NXADIHU̱ 31

«Sigi gi ze̱tihu̱»

«Zi kuhu̱, sigi gi ze̱tihu̱» (1 COR. 15:58, TNM).

RÄ JÄHÑÄ 122 Nzäntho ma gä pe̱päbihu̱ Jeoba

TE MA GÄ HANTHU̱a

1, 2. Nuju̱ di pe̱päbihu̱ rä Zi Dada Jeoba, ¿por hanja di njahu̱ ngu nuꞌu̱ yä däta to̱nꞌgu bi thoki ha rä hnini Tokio? (1 Corintios 15:58).

PO RÄ je̱ya 1978, ha rä hnini Tokio de rä dähni Japón bi mu̱di bi thoki nꞌa rä to̱nꞌgu de gä 60 piso. Ora yä jäꞌi mi thogi, mi ñꞌani mu̱ näꞌä rä to̱nꞌgu mi thoki ma xä ze̱ti o hinä nuꞌu̱ yä mbiꞌmhai ja njatꞌä ha näꞌä lugaꞌä. Pe, ¿te bi me̱fi nuꞌu̱ yä bämhñä mi hoki nunä to̱nꞌgu? Mäske nunä to̱nꞌgu xa mrä däta, bi hyoni hanja bi japäbi pa njabu̱ mäske xä hmäni ora mi tso̱ho̱ yä mbiꞌmhai, hinxä dehmi nuya yä nguu nixi xä yo̱tꞌe. Mäpaya nuju̱ di pe̱phu̱ rä Zi Dada Jeoba di njahu̱ ngu nunä rä däta to̱nꞌgu. ¿Por hanja?

2 Nuju̱ di pe̱päbihu̱ rä Zi Dada Jeoba, di o̱thu̱ ntsꞌe̱di pa njabu̱ gä jamäsuhu̱ näꞌä di mända rä Zi Dada Jeoba ꞌne hingä fayabihu̱ (hñeti 1 Corintios 15:58, TNM). Pe ꞌnehe mähyoni gä udihu̱ ge di pädihu̱ gä o̱dehu̱ ꞌne di ntiendehu̱. Hää, di o̱tehu̱ yä mhända Jeoba, pe ꞌnehe di o̱thu̱ ntsꞌe̱di po gä udihu̱ rä ñhojäꞌi ꞌne rä nhuekäte (Sant. 3:17). Nuju̱ di pe̱päbihu̱ rä Zi Dada Jeoba, mähyoni gä handihu̱ ngu ri ꞌñehe nuꞌu̱ yä mhända ꞌne yä tsꞌofo: nixi di debe gä ñꞌexigentehu̱, ha nixi di debe gä handäthohu̱ hanja dri ꞌme̱ꞌtuäbi rä tꞌekꞌei nuꞌu̱ yä mhända. Ha nunä ntꞌudi di nxadihu̱, ma gä handihu̱ te di debe gä pe̱fihu̱ pa njabu̱ gä ze̱tihu̱ ꞌne gä defendebihu̱ yä mhända rä Zi Dada Jeoba. ꞌNehe ma gä handihu̱ ku̱tꞌa yä forma de hanja rä Zithu trata dä jakägihu̱ gä ꞌuegehu̱ de yä mhända rä Zi Dada Jeoba, ꞌne te di debe gä pe̱fihu̱ pa hingä tagihu̱ ha nuꞌu̱ yä trampa.

¿HABU̱ DI DEBE GÄ DEFENDEBIHU̱ YÄ MHÄNDA RÄ ZI DADA JEOBA?

3. Ja ngu di handihu̱ ha Hechos 15:28, 29, ¿te mä mhända xä rꞌakägihu̱ rä Zi Dada Jeoba?

3 Mäpaya rꞌa yä jäꞌi pe̱ꞌtsi rä autorida pa dä hyoki yä ley. Pe rä Zi Dada Jeoba go geꞌä pe̱ꞌtsi gatꞌho rä autorida de dä hyoki yä ley. Yä ley Jeoba, xä mända dä tꞌofo claro ꞌne hingi hei toꞌo dä ntiende (Is. 33:22). Por ejemplo ha yä pa nuꞌu̱ yä mu̱di kristianu, yä apostol geꞌu̱ mi gutꞌi rä ꞌñuu ꞌne bi mää hñuu yä forma hanja di debe gä defendebihu̱ yä mhända rä Zi Dada Jeoba: 1) Hindi debe gä xo̱kämbenihu̱ yä hyate zidada ꞌne di debe gä adorahu̱ ho̱nse̱ rä Zi Dada Jeoba, 2) mähyoni gä pe̱ꞌspäbihu̱ rä tꞌekꞌei rä ji. ꞌNe 3) mähyoni gä ꞌuegehu̱ de nuꞌu̱ yä pekado o̱tꞌe yä ꞌñätsa jäꞌi ko yä ndoyꞌo (hñeti Hechos 15:28, 29, TNM). Xi nuju̱, ¿te di debe gä pe̱fihu̱ pa gä udihu̱ ge di defendebihu̱ yä ley rä Zi Dada Jeoba?

4. ¿Te ri bo̱ni gä adorahu̱ ho̱nse̱ rä Zi Dada Jeoba? (Apocalipsis 4:11).

4 Hindi nsundahu̱ nixi di adorahu̱ yä jäꞌi nixi yä tꞌo̱tꞌe, ho̱nse̱ rä Zi Dada Jeoba. Rä Zi Dada Jeoba bi mändabi yä israelita ge ho̱nse̱ꞌä dä xo̱kämbeni ꞌne dä adora (Deut. 5:6-10). Nꞌa rä pa, nuꞌmu̱ rä Diablo bi hñuꞌtsuäbi rꞌa yä tentasio rä Hesu, rä Hesu bi ꞌñenä ge di debe gä adorahu̱ ho̱nse̱ rä Zi Dada Jeoba (Mat. 4:8-10). Hindi ndänehu̱ yä imagen, yä santo, hindi tratahu̱ ngu yä zidada yä politiko, nuꞌu̱ gu̱tꞌi rä ꞌñuu ha yä nijä, nixi nuꞌu̱ yä jäꞌi yä famoso. Nuju̱ di pädihu̱ xä ñho ge rä Zi Dada Jeoba, Näꞌä toꞌo bi hyoki gatꞌho yä tꞌo̱tꞌe go geꞌä ri ꞌñepäbi gä xo̱kämbenihu̱ ꞌne gä adorahu̱ (hñeti Apocalipsis 4:11).

5. ¿Por hanja di udihu̱ rä tꞌekꞌei po rä ji ꞌne rä bida?

5 Di udihu̱ rä tꞌekꞌei po rä ji ꞌne rä bida. ¿Por hanja? Ngeꞌä rä Zi Dada Jeoba enä ge rä ji geꞌä ri bo̱ni rä bida, ꞌne nunä nꞌa rä regalo näꞌä bi ehe de Geꞌä (Lev. 17:14). Mäyaꞌmu̱ nuꞌmu̱ rä Zi Dada Jeoba po ri mu̱di bi umbäbi nse̱ki yä jäꞌi dä zipäbi yä ngo̱ yä zuꞌue, Näꞌä bi ñꞌembäbiꞌu̱ ge ho̱nse̱ rä ngo̱ mi debe dä zipäbi pe rä ji hinä (Gén. 9:4). Nunä mhända bi yo uni mänꞌaki rä Zi Dada Jeoba nuꞌmu̱ po mäde de Moisés bi tꞌumbäbi yä Ley rä hnini Israel (Lev. 17:10). ꞋNehe ha yä pa nuꞌu̱ yä mu̱di kristianu —po mäde de nuꞌu̱ yä apostol rä Hesu—, rä Zi Dada Jeoba bi mända mänꞌaki ge drä ebita rä ji (Hech. 15:28, 29, TNM). Nuju̱ di udihu̱ ge di jamäsuhu̱ ꞌne di defendehu̱ nunä mhända, nuꞌmu̱ di o̱tꞌehu̱ ngue̱nda rä Zi Dada Jeoba ora di pahu̱ ko rä mediko ꞌne di huahnihu̱ te mä tratamiento gä aseptahu̱.b

6. ¿Te dä za gä pe̱fihu̱ pa gä ꞌuegehu̱ de yä pekado ꞌne gä pe̱ꞌtsihu̱ nꞌa rä mꞌu̱i xä ntꞌaxi ja ngu di mända rä Zi Dada Jeoba?

6 Di o̱tꞌehu̱ ntsꞌe̱di po gä o̱tehu̱ nuꞌu̱ yä mhända rä Zi Dada Jeoba pa hingä tagihu̱ ha yä pekado (Heb. 13:4). Rä apostol Pablo bi uni nunä konseho: «Hyohu̱ nuꞌu̱ yä nkꞌatꞌi pe̱ꞌtsi ri ndoyꞌohu̱». Ja ngu di handihu̱, rä Zi Dada Jeoba xikägihu̱ ge mähyoni gä o̱thu̱ ntsꞌe̱di pa gä häkihu̱ de ha mä mfenihu̱ ꞌne de ha mä korasohu̱ nuꞌu̱ yä nkꞌatꞌi tsitsꞌi ha yä pekado. Por ejemplo, di ebitahu̱ gä handihu̱ o gä pe̱fihu̱ nuꞌu̱ yä kosa ma dä jakägihu̱ gä pe̱fihu̱ yä pekado ko mä ndoyꞌohu̱ (Col. 3:5, TNM; Job 31:1). ꞌNe ora tso̱ho̱ nꞌa rä tentasio, nguntꞌä di häkihu̱ de ha mä ñäxuhu̱ nuꞌu̱ yä tsꞌo mfeni dä za dä tsꞌoni näꞌä rä amista di pe̱ꞌtsihu̱ ko rä Zi Dada Jeoba.

7. ¿Te di ꞌmu̱ihu̱ desidido gä pe̱fihu̱ ꞌne por hanja?

7 Rä Zi Dada Jeoba to̱ꞌmi gä o̱tehu̱ yä mhända ko ngatꞌho mä korasohu̱ (Rom. 6:17). Yä ley ꞌne yä konseho nzäntho pa mä ñhouihu̱, ꞌne nuju̱ hindä za gä patihu̱ nuꞌu̱ yä mhändaꞌu̱ (Is. 48:17, 18; 1 Cor. 6:9, 10). Di ne gä o̱tꞌehu̱ ntsꞌe̱di po gä o̱tehu̱ yä mhända rä Zi Dada Jeoba ꞌne njabu̱ gä johyabihu̱ rä koraso. Di mbenihu̱ ngu nꞌa rä yꞌofo de rä Mäkä Tꞌofo nuꞌmu̱ bi ꞌñenä: «Di ꞌmu̱i desidido gä pe̱fi ri mhända nzäntho asta rä fin» (Sal. 119:112). Pe di pädihu̱ ge rä Zithu nzäntho usa yä trampa pa dä jakägihu̱ gä ꞌuegehu̱ de yä mhända rä Zi Dada Jeoba. ¿Ngu te mä trampa usa?

¿TE MÄ TRAMPA USA RÄ ZITHU PA DÄ JAKÄGIHU̱ DÄ ZABIGIHU̱ ꞌNE GÄ ꞌUEGEHU̱ DE YÄ MHÄNDA RÄ ZI DADA JEOBA?

8. ¿Pa te di usa rä Zithu yä ntꞌu̱tsate?

8 Yä ntꞌu̱tsate. Kontal gä ꞌuegehu̱ de yä mhända rä Zi Dada Jeoba, rä Zithu xa honi hanja dä jakägihu̱ dä zabi tanto mä ndoyꞌohu̱ ngu mä mfenihu̱. Hää, näꞌä ne dä tsꞌoni näꞌä rä amista di pe̱ꞌtsihu̱ ko rä Zi Dada Jeoba (1 Ped. 5:8). Nuꞌu̱ yä mu̱di kristianu bri amenäsa, bri nhaꞌmpäbi ꞌne bi tho ngeꞌä mi ꞌmu̱i desidido dä yꞌo̱te yä mhända rä Zi Dada Jeoba (Hech. 5:27, 28, 40; 7:54-60). Mäpaya, rä Zithu ꞌnehe usa yä ntꞌu̱tsate ꞌne yä ntsꞌomꞌu̱i kontra gekhu̱. Ja ngu ha rä dähni Rusia ꞌne ha märꞌa yä luga, mä kuhu̱ xa bi tꞌo̱ꞌtuäbi ndunthi yä ntsꞌomꞌu̱i ꞌne bi tꞌe̱ntꞌi fadi.

9. ¿Te bi thogi nꞌa rä ku ꞌne por hanja xa mähyoni gä nsuhu̱ de nuꞌu̱ yä trampa hutsꞌi rä Zithu?

9 Nuꞌu̱ yä trampa hutsꞌi pa gä tagihu̱ rꞌamätsꞌu̱u̱. Rä Zithu hingä ho̱nse̱ di usa yä ntꞌu̱tsate ꞌne yä ntsꞌomꞌu̱i kontra gekhu̱, sino ꞌnehe pe̱gi rꞌa yä trampa pa dä jakägihu̱ gä tagihu̱ rꞌamätsꞌu̱u̱ (Efes. 6:11). Ma gä handihu̱ te bi thogi nꞌa rä ku rä thuhu Robert. Po näꞌä ñheni mi pe̱ꞌtsi mi ja mꞌe̱di drä opera. Nuni zi ku bi ꞌñembäbi yä mediko: «Dä thogiꞌä dä thogi, hindi asepta dä sitkägi rä ji». Näꞌä rä mediko bi promete ge ma xä respetabi rä bolunta. Pe näꞌä xui ma xrä opera, ora ya bi gose̱ mä nꞌa rä mediko bi ma bä nuu Robert ꞌne bi ꞌñembäbi: «Zäi ge hingä ma dä ja mꞌe̱di drä sitꞌäꞌi rä ji, pe ja dä bongi ma gä hähe rä ji pa mu̱ gä honihu̱». Zäi ge näꞌä mediko bi hñurämu̱i ge rä ku Robert ma xä paati näꞌä rä desision. Pe näꞌä ku xa bi sigi bi ze̱ti ꞌne bi sigi bi defende yä mhända rä Zi Dada Jeoba.

10. ¿Por hanja nꞌa rä däta trampa näꞌä di mbeni nuꞌu̱ yä jäꞌi hingi pe̱päbi Jeoba? (1 Corintios 3:19, 20).

10 Näꞌä mbeni nuꞌu̱ hingi pe̱ꞌspäbi rä tꞌekꞌei yä ley Jeoba. Mu̱ gä fu̱dihu̱ gä mbenihu̱ ja ngu di mbeni nuꞌu̱ yä jäꞌi hingi pe̱päbi rä Zi Dada Jeoba, ma dä jakägihu̱ gä ꞌuengihu̱ de rä ꞌñuu ꞌne ma gä he̱gihu̱ de gä defendebihu̱ yä ley (hñeti 1 Corintios 3:19, 20). Rä mfeni nunä xiꞌmhai ne dä jakägihu̱ gä pe̱ꞌtsihu̱ yä tsꞌo nkꞌatꞌi pa gä pe̱fihu̱ näꞌä xä ntsꞌo. Ha yä pa nuꞌu̱ yä mu̱di kristianu, yä jäꞌi mi ho dä xo̱kämbeni yä hyate zidada ꞌne xa mi ho dä me̱fi yä pekado ko yä ndoyꞌo. Rꞌa yä kristianu de rä mhuntsꞌi Pérgamo ꞌne Tiatira bi dagi ꞌnehe ha nunä trampa. Hänge rä Hesu bi zu̱i nuya yoho yä mhuntsꞌi ngeꞌä hinte mi sipäbi nuꞌu̱ yä kristianu mi o̱tꞌe njabu̱ (Apoc. 2:14, 20). Mu̱ hingä nsuhu̱, ꞌnehe dä za gä tagihu̱ ha nunä däta trampa. Ngeꞌä nuꞌu̱ yä jäꞌi di pädihu̱ o asta mä familiahu̱, rꞌabu̱ xikägihu̱ ge xa xä ñhei nuꞌu̱ yä mhända rä Zi Dada Jeoba ꞌne ge dä za gä pe̱fihu̱ näꞌä go gä nehu̱ ko mä ndoyꞌohu̱. Näꞌä xikägihu̱ dä za dä jakägihu̱ gä mbenihu̱ ge yä ley rä Zi Dada Jeoba ya hingi ja yä muui mäpaya.

11. ¿Te hindi debe gä pe̱fihu̱?

11 Rꞌabu̱, dä za gä mbenihu̱ ge nuꞌu̱ yä tsꞌofo o nuꞌu̱ yä instrucción uni rä hnini rä Zi Dada Jeoba debe dä ehe mänꞌa claro, ꞌne rꞌabu̱ asta di ne gä huꞌtsise̱hu̱ de mä mfenihu̱ näꞌä hingi udi rä Mäkä Tꞌofo (1 Cor. 4:6). Gehnä rä pekado bi yꞌo̱tꞌe nuꞌu̱ mi gu̱tꞌi rä ꞌñuu ha yä nijä ha yä pa rä Hesu. Nuꞌmu̱ rä Hesu bi mꞌu̱kua ha rä Xiꞌmhai, bi hyandi hanja nuꞌu̱ mi gu̱tꞌi rä ꞌñuu ha yä nijä ya xki paati näꞌä mi mända rä Ley rä Zi Dada Jeoba ꞌne go xki imbentase̱ märꞌa yä ley nuꞌu̱ mi japäbi xä ñhei dä kumpli yä jäꞌi (Mat. 23:4). Pe rä Zi Dada Jeoba nzäntho xä uni yä ley ꞌne yä tsꞌofo ha rä Noya ꞌne po mäde de rä hnini (Prov. 3:5-7). Hänge hingi ja mꞌe̱di gä imbentahu̱ märꞌa yä mhända habu̱ kada nꞌa rä kristianu debe dä desidise̱ te di debe dä me̱fi.

12. ¿Te pe̱fi rä Zithu pa xani yä nkꞌuamba?

12 Yä nkꞌuamba. Rä Zithu usa yä nkꞌuamba ꞌne nuꞌu̱ yä tsꞌo mfeni de nunä xiꞌmhai pa hatꞌi ꞌne di dibidi yä jäꞌi (Col. 2:8). Geꞌä bi nheki ha rä pa nuꞌu̱ yä mu̱di kristianu, rä Zithu bi usa nuꞌu̱ yä mfeni yä bämhñä, nuꞌu̱ yä ntꞌudi xki imbentase̱ yä judío, ꞌne yä mfeni rꞌa yä jäꞌi nuꞌu̱ mi mää ge mi debe dä sigi nuꞌu̱ yä Ley xki tꞌumbäbi Moisés. Nunä xi nꞌa rä däta trampa habu̱ bi dagi yä jäꞌi, ngeꞌä ko nuya yä nkꞌuamba bi japäbi hindä hyoni näꞌä rä mfädi bi ehe de rä Zi Dada Jeoba. Mäpaya, rä Zithu usa rä telebision, rä internet, rä radio, pa di xani yä nkꞌuamba ꞌne pa di xani nuꞌu̱ yä notisia hingä mäjuäni bi ehe de yä politiko. Geꞌä bi thogi durante rä COVID-19.c Nuꞌu̱ yä testigo rä Jeoba bi jamäsu ꞌne bi me̱fi näꞌä bi mända rä hnini rä Zi Dada Jeoba durante nunä ñheni, himbi thogi nuꞌu̱ yä u̱gi ꞌne yä xuñha bi me̱ꞌtsi nuꞌu̱ himbi yꞌo̱de nuya yä instrucción (Mat. 24:45).

13. ¿Por hanja hindi debe gä hopäbihu̱ ge märꞌa yä tꞌo̱tꞌe dä hñägägihu̱ mä tiempohu̱?

13 Nuꞌu̱ yä tꞌo̱tꞌe hägägihu̱ mä tiempohu̱. Mähyoni ge nzäntho gä pädihu̱ gä huahnihu̱ ndaꞌu̱ nuꞌu̱ yä tꞌo̱tꞌe mänꞌa xa di mporta (Filip. 1:9, 10). Ja rꞌa yä tꞌo̱tꞌe nuꞌu̱ hägägihu̱ näꞌä rä tiempo debe gä dedikabihu̱ nuꞌu̱ yä tꞌo̱tꞌe mänꞌa xä ñho. Di pädihu̱ ge xa mähyoni gä ñunihu̱, gä dibertihu̱ ꞌne gä mpe̱fihu̱. Pe mu̱ hingä nsuhu̱, dä za dä hñägägihu̱ gatꞌho de mä tiempohu̱ (Luc. 21:34, 35). Mäpaya di o̱dehu̱ ge ja yä uelga, yä politiko ꞌne märꞌa yä bämhñä di diskuti de rꞌa nꞌañꞌo yä asunto. Pe nuju̱ mähyoni gä nsuhu̱ pa hingä distraehu̱ ko nuꞌu̱ yä tꞌo̱tꞌeꞌu̱, ngeꞌä nunä nꞌa rä trampa xä hñutsꞌi rä Zithu pa gä huadihu̱ gä apoyahu̱ nuꞌu̱ yä jäꞌiꞌu̱ ꞌne go gä ꞌuegehu̱ de rä Ley rä Zi Dada Jeoba. Ma gä handihu̱ te di debe gä pe̱fihu̱ pa njabu̱ hingä tagihu̱ ha nunä rä trampa.

¿TE DEBE GÄ PE̱FIHU̱ PA GÄ SIGI GÄ ZE̱TIHU̱?

Rꞌa yä foto: 1) Nꞌa rä däta to̱nꞌgu xä thokuäbi xä ñho rä simiento. 2) Nꞌa rä ku ñuꞌtsi rä directriz médica. Ha rä tablet di usa rä lección 39 de rä mfistꞌofo «¡Johya pa nzäntho!».

Pa gä sigi gä defendebihu̱ rä Ley rä Zi Dada Jeoba, mähyoni gä benihu̱ por hanja dä umbäbihu̱ mä bidahu̱ ꞌne dä nxixtehehu̱. Mähyoni gä nxadihu̱ rä Mäkä Tꞌofo ꞌne gä hudihu̱ gä ntso̱ꞌmihu̱ näꞌä utkägihu̱. ꞌNehe mähyoni gä pe̱ꞌtsihu̱ nꞌa rä koraso näꞌä tse̱di ꞌne gä pe̱ꞌspäbihu̱ rä komfiansa rä Zi Dada Jeoba. (Hyandi yä parrafo 14-18).

14. ¿Te ma dä maxkägihu̱ pa gä ꞌmu̱ihu̱ de rä lado Jeoba?

14 Beni nuꞌmu̱ gä umbäbi ri bida rä Zi Dada Jeoba ꞌne gä nxixtehe. Nuꞌi gä uni nuya yoho yä paso ngeꞌä ngi ne gi ꞌmu̱i de rä lado rä Zi Dada Jeoba. Beni te bi kombenseꞌi ge gehnä rä ꞌñuu Äjuä. Nuꞌi gä konose toꞌo rä Zi Dada Jeoba ꞌne gä desidi gi pe̱ꞌspäbi rä tꞌekꞌei, gi mädi ꞌne gi handi ngu ri Dada. Ri komfiansa po geꞌä bi te ꞌne geꞌä bi jaꞌi gä arrepenti de gatꞌho ri pekado. Gä tsopu̱ nuꞌu̱ yä tꞌo̱tꞌe di u̱tsa rä Zi Dada Jeoba ꞌne gä fu̱di gä pe̱fi nuꞌu̱ yä tꞌo̱tꞌe di ho. Zäi ge asta bi haxämhaiꞌi ora gä pädi ge rä Zi Dada Jeoba bi punꞌäꞌi gatꞌho ri tsꞌoki (Sal. 32:1, 2). Gä desidi gi ntini ha yä mhuntsꞌi ꞌne gi ꞌñuti märꞌa yä zi jäꞌi näꞌä xki pädi de rä Mäkä Tꞌofo. Nubye̱ ya grä testigo rä Jeoba, gi sigi gi yꞌo ha näꞌä rä ꞌñuu tsitsꞌi ha nꞌa rä te pa nzäntho Ꞌne xkä desidi nunka gi po̱ni de nunä ꞌñuu (Mat. 7:13, 14).

15. ¿Hanja faxkägihu̱ gä nxadihu̱ rä Noya Äjuä ꞌne gä hudihu̱ gä ntso̱ꞌmihu̱ näꞌä utkägihu̱?

15 Ma gä nxadihu̱ rä Noya Äjuä ꞌne ma gä hudi gä ntso̱ꞌmihu̱ näꞌä utkägihu̱. Nꞌa rä arbol näꞌä thätꞌi xä ñho yä yꞌu̱u̱ hingä ma dä dagi xti zo̱ho̱ nꞌa rä däyꞌe o nꞌa rä bu̱nthi. Njabu̱ ꞌnehe, mu̱ näꞌä mä komfiansahu̱ di pe̱ꞌspäbihu̱ rä Zi Dada Jeoba xä nthätꞌi xä ñho ko näꞌä udi rä Mäkä Tꞌofo, hingä ma gä tagihu̱ ha nuꞌu̱ yä trampa pe̱gi rä Zithu. Ora di te nꞌa rä arbol, yä yꞌu̱u̱ ꞌnehe yꞌo ri ntꞌu̱tꞌi ꞌne ri nthätꞌi mbo rä hai. Njabu̱ ꞌnehe, ora di nxadihu̱ rä Mäkä Tꞌofo mä komfiansahu̱ po näꞌä utkägihu̱ rä Zi Dada Jeoba mänꞌa di te ꞌne di kombensegihu̱ ge nunä gehnä rä ꞌñuu mänꞌa xä ñho (Col. 2:6, 7). Ora di hetihu̱ rä Mäkä Tꞌofo, ma gä hudi gä ntso̱ꞌmihu̱ ꞌne gä handihu̱ hanja di benefisiabi rä hnini rä Zi Dada Jeoba nuꞌu̱ yä konseho ꞌne yä ley di umbäbi. Por ejemplo, nꞌa rä pa rä profeta Ezequiel bi hyandi hanja nꞌa rä e̱nxe̱ mi e̱ni rä templo. Näꞌä bi hyandi Ezequiel utkägihu̱ ge debe gä pe̱ꞌspäbihu̱ rä tꞌekꞌei nuꞌu̱ yä ley xä uni rä Zi Dada Jeoba de hanja di debe drä so̱kämbeni (Ezeq. 40:1-4; 43:10-12).d Nuju̱ ꞌnehe di hänihu̱ ndunthi yä benefisio ora di ꞌuekehu̱ rä tiempo pa di nxadihu̱ nuꞌu̱ yä ntꞌudi xä ñhei ehe ha rä Mäkä Tꞌofo.

16. ¿Hanja bi matsꞌi Robert dä me̱ꞌtsi nꞌa rä koraso näꞌä di ze̱ti? (Salmo 112:7).

16 Ma gä japu̱ dä ze̱di mä korasohu̱. Nꞌa rä pa rä rey David bi yꞌofo nꞌa rä thuhu habu̱ mi mää ge nunka ma xä hye̱gi de xä mädi rä Zi Dada Jeoba. Näꞌä bi ꞌñenä njaua: «Mä koraso xa tse̱ti, oh mä Zi Dadaꞌi, mä koraso xa tse̱ti» (Sal. 57:7). Nuju̱ ꞌnehe dä za gä pe̱ꞌtsihu̱ nꞌa rä koraso näꞌä tse̱di ꞌne näꞌä pe̱ꞌspäbi ndunthi rä komfiansa rä Zi Dada Jeoba (hñeti Salmo 112:7). ¿Te bi matsꞌi Robert —näꞌä rä zi ku dä no̱nihu̱ ha rä parrafo 9— pa bi me̱ꞌtsi nꞌa rä koraso näꞌä xa mi tse̱di? Nuꞌmu̱ nꞌa rä mediko bi ꞌñembäbi rä ku Robert ge ma xä njani rä ji pa mu̱ xä ja mꞌe̱di, rä zi ku Robert mäntꞌä bi ꞌñenä: «Mu̱ gi kamfrihu̱ ge ma dä ja mꞌe̱di rä ji, mänꞌa dä hogi gä po̱ni de nunä hospital». Rä zi ku Robert sigi enä: «Hindä duda ninꞌa tu̱i gä defende rä Ley rä Zi Dada Jeoba, nixi hingä ndi tumämu̱i te ma xä thogi kongeki ngeꞌä dä rechaza rä ji».

Rꞌa yä foto: 1) Yä to̱nꞌgu xä yo̱tꞌe mi thogi nꞌa rä mbiꞌmhai. Pe näꞌä rä däta to̱nꞌgu bi thokuäbi xä ñho rä simiento himbi yo̱tꞌe. 2) Näꞌä rä ku mi ñuꞌtsi rä directriz médica, nubye̱ bi o ha rä hospital ꞌne ñäui näꞌä rä mediko bi tso̱ni mi nxui.

Mu̱ gä tedehu̱ mä komfiansahu̱ po rä Zi Dada Jeoba, geꞌä ma dä maxkägihu̱ pa gä defendebihu̱ yä ley hindi mporta te mä xuñha dä zo̱kägihu̱. (Hyandi rä parrafo 17).

17. ¿Te dä za gä pädihu̱ de näꞌä bi thogi rä ku Robert? (Hyandi ꞌnehe yä foto).

17 Rä ku Robert ya xki desidi dende änte dä defendebi rä Ley rä Zi Dada Jeoba, hingä asta nuꞌmu̱ ya mi o ha rä hospital. Rä ku Robert mi ne ko ngatꞌho rä koraso dä me̱fi näꞌä di ho rä Zi Dada Jeoba. Pa geꞌä, dende änte bi hyoni rä imformäsio ha rä Mäkä Tꞌofo ꞌne ha nuꞌu̱ yä he̱ꞌmi rꞌakägihu̱ rä hnini rä Zi Dada Jeoba pa bi bädi te di mbeni Jeoba de rä bida ꞌne rä ji. Gatꞌho näꞌä bi bädi, geꞌä bi japi bi mꞌu̱i kombensido ge rä Zi Dada Jeoba di jäpi nuꞌu̱ o̱te ꞌne di defendebi yä ley. Ja ngu rä ku Robert, hindi mporta te mä xuñha dä ꞌñekägihu̱, nuju̱ ꞌnehe dä za gä japäbihu̱ dä ze̱di mä korasohu̱ pa gä defendebihu̱ yä ley rä Zi Dada Jeoba.

Mäske mi ja nꞌa rä däyꞌe, Barac ꞌne yä soldado bi gäi de rä tꞌo̱ho̱ pa bi ntunkui Sísara ko nuꞌu̱ yä soldado, mientra nuyu̱ ꞌne yä tsanza bi ntsꞌatꞌi ha yä bo̱hai.

Barac ꞌne nuꞌu̱ yä soldado ko ndunthi rä balo bi nte̱hui Sísara ꞌne rä ejército (Hyandi rä parrafo 18)

18. ¿Te utkägihu̱ näꞌä bi thogi Barac? (Hyandi rä kꞌoi de rä mu̱di nxii).

18 Ma gä pe̱ꞌspäbihu̱ rä komfiansa Jeoba. Barac bi mabi xä ñho ngeꞌä bi me̱fi nuꞌu̱ yä instrucción bi uni rä Zi Dada Jeoba. Pa näꞌä rä tiempoꞌä yä israelita hixki ñhoki pa nꞌa rä gerra; ninꞌa rä escudo nixi nꞌa rä lansa himi pe̱ꞌtsi. Mäske njabu̱, rä Zi Dada Jeoba bi ꞌñembäbi Barac ge xä ma xä ntuhni kontra Sísara ꞌne nuꞌu̱ yä soldado mäske xa mi pe̱ꞌtsi ndunthi yä arma (Juec. 5:8). Nꞌa rä ꞌme̱hñä mrä profeta mrä thuhu Débora bi ꞌñembäbi Barac ge dä gäi de rä tꞌo̱ho̱ Tabor asta ha rä ꞌmatha pa dä ntunkui Sísara ꞌne nuꞌu̱ 900 yä tsanza de gä tuhni. Koꞌmu̱ mrä ꞌmatha, zäi ge yä israelita bi mbeni ge ma xä japäbi xä ñhei xä ntunkui Sísara ko nuꞌu̱ yä soldado ngeꞌä nuꞌu̱ mi hñä nuꞌu̱ yä tsanza xa mi tihi. Zäi ge mäske Barac himbi ntiende por hanja rä Zi Dada Jeoba xki mändabi dä me̱fi njabu̱, nuni ko yä soldado bi yꞌo̱de ꞌne bi gäi ha rä ꞌmatha. Mientra Barac ꞌne nuꞌu̱ yä soldado bi gäi, rä Zi Dada Jeoba bä pe̱hni nꞌa rä däta däyꞌe ꞌne nguntꞌä bi ñuxä yä dehe ꞌne bi nja yä bo̱hai. Hänge nuꞌu̱ yä tsanza Sísara bi ntsꞌatꞌi ha yä bo̱hai ꞌne njabu̱ rä Zi Dada Jeoba bi matsꞌi Barac pa bi ntäte (Juec. 4:1-7, 10, 13-16). Njabu̱ ꞌnehe mäpaya, rä Zi Dada Jeoba ma dä maxkägihu̱ pa gä täpäbihu̱ yä xuñha pe ho̱nse̱ mu̱ gä o̱tehu̱ nuꞌu̱ yä tsꞌofo ꞌne yä mhända rꞌakägihu̱ po mäde de rä hnini (Deut. 31:6).

MA GÄ SIGI GÄ ZE̱TIHU̱ ꞌNE GÄ DEFENDEBIHU̱ YÄ LEY JEOBA

19. Xi nuꞌi, ¿por hanja gi ne gi sigi gi ze̱ti ꞌne gi defendebi yä ley Jeoba?

19 Mientra di ꞌmu̱hu̱ ha nunä tsꞌo xiꞌmhai, pe̱ꞌtsi te di debe gä sigi gä ze̱tihu̱ ꞌne gä defendebihu̱ yä ley Jeoba (1 Tim. 6:11, 12; 2 Ped. 3:17). Ja ngu ya dä handihu̱, rä Zithu usa yä ntꞌu̱tsate, hutsꞌi yä trampa pa gä tagihu̱ rꞌamätsꞌu̱u̱, usa ꞌnehe näꞌä di mbeni nuꞌu̱ hingi pe̱ꞌspäbi rä tꞌekꞌei yä ley Jeoba, usa yä nkꞌuamba ꞌne nuꞌu̱ yä tꞌo̱tꞌe hägägihu̱ mä tiempohu̱ pa gä ꞌuengihu̱ de yä ley rä Zi Dada Jeoba (Efes. 4:14). Pe nuju̱ di ꞌmu̱ihu̱ desidido gä o̱tꞌehu̱ ntsꞌe̱di pa hingä tagihu̱ ha nuya yä trampa. Hää, di ꞌmu̱ihu̱ desidido gä mädihu̱ rä Zi Dada Jeoba ko ngatꞌho mä korasohu̱ ꞌne gä o̱tehu̱ nuꞌu̱ yä tsꞌofo ꞌne yä mhända. Pe ꞌnehe, hindi ne gä ñꞌexigentehu̱ nixi gä imbentahu̱ märꞌa yä mhända nuꞌu̱ hinxä uni rä Zi Dada Jeoba. Ha näꞌä rä ntꞌudi xä ꞌñepu̱ ma gä handihu̱ hanja tanto rä Zi Dada Jeoba ngu rä Hesu, hingä yä exigente ꞌne di komprendegihu̱. ꞌNehe ma gä pädihu̱ hanja dä za gä de̱mbäbihu̱ yä ejemplo.

¿TE MA GI THÄDI?

  • ¿Habu̱ di debe gä defendebihu̱ yä mhända rä Zi Dada Jeoba?

  • ¿Te mä trampa usa rä Zithu pa dä jakägihu̱ dä zabigihu̱ ꞌne gä ꞌuegehu̱ de yä mhända rä Zi Dada Jeoba?

  • ¿Te debe gä pe̱fihu̱ pa gä sigi gä ze̱tihu̱?

RÄ JÄHÑÄ 129 Ma gä sigihu̱ gä ze̱tihu̱

a Dende ha nuꞌu̱ yä pa Adán ꞌne Eva, rä Zithu xä japi xä mbeni yä jäꞌi ge dä za dä mändase̱ ꞌne go dä desidise̱ ndaꞌä xä ñho ꞌne ndaꞌä hinä. Näꞌä dä nehmä dä hyandi ge hingä jamäsuhu̱ nuꞌu̱ yä mhända rä Zi Dada Jeoba ꞌne nuꞌu̱ yä instrucción uni rä hnini. Pe nunä ntꞌudi ma dä maxkägihu̱ pa njabu̱ hingä ne gä mändase̱hu̱ ꞌne go gä desidihu̱ gä pe̱fihu̱ gatꞌho näꞌä di mändagihu̱ rä Zi Dada Jeoba.

b Pa gi tini mä nꞌa tu̱i rä imformäsio de hanja dä za gi pe̱ꞌspäbi rä tꞌekꞌei rä ji ja ngu adi rä Zi Dada Jeoba, hyandi rä lección 39 de rä mfistꞌofo ¡Johya pa nzäntho!

c Tini mä nꞌa tu̱i rä imformäsio ha jw.org habu̱ enä «Ogi kamfri gatꞌho nuꞌu̱ yä notisia dri xani».

d Pa gi tini mä nꞌa tu̱i rä imformäsio de gehnä, hyandi yä capítulo 13 ꞌne 14 de rä mfistꞌofo La adoración pura de Jehová: ¡por fin restaurada!

    Biblioteka ha Internet Otomí (Valle del Mezquital) (2000-2025)
    Kotˈi ri kuenta
    Ku̱tˈi ha ri kuenta
    • Ñañu
    • Pe̱mpäbi märꞌaa
    • Paati hanja di nheki
    • Copyright © 2025 Watch Tower Bible and Tract Society of Pennsylvania
    • Condiciones de Uso
    • Política de privacidad
    • Configuración de privacidad
    • JW.ORG
    • Ku̱tˈi ha ri kuenta
    Pe̱mpäbi märꞌaa