¿O̱de Jeoba mä sadi?

1, 2. ¿Por hanja rꞌabu̱ dä za gä sentihu̱ ge rä Zi Dada Jeoba hingi thädi mä sadihu̱?

«HYONI Jeoba pa gi tini näꞌä xa mäjuäni rä johya, ꞌne näꞌä ma dä rꞌaꞌi näꞌä desia ri koraso» (Sal. 37:4). ¿Hänge xa mähotho nunä rä promesa di ja rä Zi Dada Jeoba? ¿Pe signifika nuya yä noya ge rä Zi Dada Jeoba mäntꞌä ma dä rꞌakägihu̱ gatꞌho näꞌä di apäbihu̱? Mähyoni ge kada nꞌa de gekhu̱ gä o̱tꞌäse̱hu̱ nunä ntꞌani. ¿Por hanja? Ma gä hutsꞌihu̱ hñuu yä ejemplo: 1) Nꞌa rä zi nju apäbi rä Zi Dada Jeoba dä matsꞌi pa dä za dä ntini ha rä Ngunsadi pa yä Evangelizador de rä Tsꞌu̱tꞌhui Äjuä, pe thogi yä je̱ya ꞌne hingi tso̱päbi rä imbitasio. 2) Nꞌa rä bäsjäꞌi di hñeni ꞌne apäbi rä Zi Dada ge dä matsꞌi pa dä thogi näꞌä rä ñheni pe̱ꞌtsi ꞌne njabu̱ dä za dä mfaxte mä ndunthi ha rä mhuntsꞌi, pe thogi yä pa ꞌne näꞌä rä ñheni di sigi. 3) Rꞌa yä dada ne ge yä bätsi nunka dä ꞌuengi de rä ꞌñuu rä Zi Dada Jeoba. Hänge ha yä sadi apäbi Jeoba ge dä matsꞌi kada nꞌa de geꞌu̱. Pe nꞌa de nuꞌu̱ yä bätsi bi desidi bi zopu̱ rä Zi Dada Jeoba.

² Xi nuꞌi, ¿jabu̱ te xkä apäbi rä Zi Dada Jeoba pe gi senti ge näꞌä hinxä dädi ri sadi? Ora thogi njabu̱, zäi ge dä za gi mbeni ge rä Zi Dada Jeoba fatsꞌi ꞌne thädi yä sadi märꞌaa, pe hingi thädi ri sadi. O rꞌabu̱ dä za gi mbeni ge rä Zi Dada Jeoba hingi thädi ri sadi ngeꞌä jabu̱ te xkä o̱tꞌe o xkä fayabi. Njabu̱ bi senti nꞌa rä zi nju rä thuhu Juanita.b Nunä zi nju ko rä däme bi xatuäbi rä Zi Dada Jeoba ꞌne bi ꞌñembäbi ge mi ne dä ma dä mfaxte ha rä ngu Betel. Juanita enä: «Ndi humämu̱i ge mäntꞌä ma xä tsꞌokägihe. Pe bi thogi yä zänä, yä je̱ya ꞌne nunka bi zo̱kägihe rä imbitasio. Xti xipäbihe rä Zi Dada Jeoba näꞌä ndi nehe ꞌne hingä ndi pädi por hanja hixki dädi mä sadihe. Dä ꞌme̱di mä johya ꞌne rꞌabu̱ ndi mbeni ge zäi xti fayabihe rä Zi Dada Jeoba hänge hixki dädi mä sadihe».

3. ¿Te ma gä pädihu̱?

³ Zäi ge rꞌabu̱ ꞌnehe di ñꞌanihu̱: «¿O̱de Jeoba mä sadi?». Mäyaꞌmu̱, rꞌa de nuꞌu̱ yä amigo rä Zi Dada Jeoba, ꞌnehe bi yꞌo̱tꞌe nunä rä ntꞌani (Job 30:20; Sal. 22:2; Hab. 1:2). ¿Te ma dä kombensegihu̱ ge Jeoba hää thädi mä sadihu̱? (Sal. 65:2). Pa gä thädihu̱ nunä ntꞌani, mꞌe̱tꞌo ma gä thädihu̱ nuya hñuu yä ntꞌani: 1) ¿Te dä za gä to̱ꞌmihu̱ de rä Zi Dada Jeoba? 2) ¿Te to̱ꞌmi rä Zi Dada Jeoba de gekhu̱?, ꞌne 3) ¿por hanja rꞌabu̱ di ja mꞌe̱di gä paatihu̱ näꞌä di apäbihu̱ rä Zi Dada Jeoba?

¿TE DÄ ZA GÄ TO̱ꞌMIHU̱ DE RÄ ZI DADA JEOBA?

4. Ja ngu di handihu̱ ha Jeremías 29:​12, ¿te di prometegihu̱ rä Zi Dada Jeoba?

⁴ Jeoba di prometegihu̱ dä yꞌo̱de mä sadihu̱ (hñeti Jeremías 29:12). Rä Zi Dada Jeoba xa di mäkägihu̱ ꞌne nunka e̱stä nxu̱tha mä sadihu̱ (Sal. 10:17; 37:28). ¿Pe signifika ge ma dä rꞌakägihu̱ gatꞌho näꞌä di apäbihu̱? Hinä. Rꞌa de nuꞌu̱ yä tꞌo̱tꞌe di apäbihu̱, ma dä rꞌakägihu̱ asta nuꞌmu̱ xti hä näꞌä rä rꞌayꞌo xiꞌmhai.

5. ¿Te o̱tꞌe ngue̱nda rä Zi Dada Jeoba änte dä dädi mä sadihu̱?

⁵ Rä Zi Dada Jeoba handi mu̱ näꞌä di apäbihu̱ pa mähye̱gi ko rä bolunta o hinä (Is. 55:​8, 9). Pe, ¿ndaꞌä rä bolunta Jeoba? Rä Zi Dada Jeoba hingä ma dä ntsaya asta xa dä hyandi ge ha rä Xiꞌmhai, dä mꞌu̱i ho̱nse̱ nuꞌu̱ yä jäꞌi ꞌmu̱i dispuesto dä yꞌo̱te ꞌne dä hyandi ngu rä Gobernante. Hää, Jeoba ne ge nuya yä jäꞌi dä mꞌu̱i unido ꞌne mähye̱gi dä me̱päbi ko ndunthi rä johya. Pe rä Zithu hingä geꞌä ne, ꞌne trata dä kombensegihu̱ ge mänꞌa xä ñho gä pe̱fihu̱ näꞌä go gä nehu̱ (Gén. 3:​1-5). Po geꞌä rä Zi Dada Jeoba xä hyopäbi yä jäꞌi dä mändase̱ ꞌne dä huahnise̱ te mä ꞌñuu ne dä gu̱u̱ pa njabu̱ dä ꞌñudi ge hingä mäjuäni näꞌä xä mängä rä Zithu. ¿Gi da ngue̱nda por hanja mäpaya di handihu̱ ndunthi yä sufrimiento ꞌne yä xuñha? (Ecl. 8:9). Rä Zi Dada Jeoba xä desidi hindä resolbe gatꞌho nuya yä xuñha di handihu̱ mäpaya. ¿Por hanja? Ngeꞌä mu̱ dä hñäki rꞌa de nuya yä xuñha, yä jäꞌi hingä ma dä rekonose ge honi rä mfatsꞌi rä Zi Dada Jeoba, ꞌne ma dä hñuyämu̱i ge tsa dä mändase̱.

6. ¿Por hanja xa mähyoni gä benihu̱ ge rä Zi Dada Jeoba di mäkägihu̱ ꞌne ge nunka o̱tꞌe yä injustisia?

⁶ Mäske näꞌä di apäbihu̱ rä Zi Dada Jeoba, mähye̱gi ko näꞌä apäbi märꞌa yä ku, rꞌabu̱ Jeoba ma dä dädi mä sadihu̱ de rꞌa nꞌañꞌo yä forma. Por ejemplo, nꞌa rä pa rä rey Ezequías xa bi ñheni ꞌne bi bäntebi rä Zi Dada Jeoba ge xä matsꞌi. Rä Zi Dada Jeoba bi yꞌo̱de rä sadi ꞌne bi yꞌothe (2 Rey. 20:​1-6). Rä apostol Pablo po̱de ꞌnehe bi me̱ꞌtsi nꞌa rä ñheni ꞌne mi senti ge nunä ñheni mi ngu nꞌa rä ꞌmini näꞌä xki nꞌo̱tꞌe ha rä ngo̱, hänge bi bäntebi rä Zi Dada ge xä hñäkuäbi. Pe rä Zi Dada Jeoba himbi hñäkuäbi nunä ñheni (2 Cor. 12:​7-9). Ha yä pa nuꞌu̱ yä mu̱di kristianu, rä rey Herodes mi ne dä hyo rä apostol Pedro ꞌne Santiago. Yä ku de rä mhuntsꞌi bi xatuäbi rä Zi Dada Jeoba pa xä matsꞌi rä apostol Pedro, ꞌne zäi ge ꞌnehe bi yꞌapäbi dä matsꞌi Santiago. ¿Pe te bi thogi? Santiago bi tho. Pe nꞌa rä e̱nxe̱ bi matsꞌi rä apostol Pedro pa bi ñäni rä te (Hech. 12:​1-11). Zäi ge di ñꞌanihu̱: «¿Por hanja rä Zi Dada Jeoba bi matsꞌi rä apostol Pedro, pe himbi matsꞌi Santiago? Rä Mäkä Tꞌofo hingi mää, pe dä za gä mꞌu̱ihu̱ seguro ge rä Zi Dada Jeoba nunka o̱tꞌe yä injustisia ꞌne ge mi mädi tanto rä apostol Pedro ngu Santiago (Deut. 32:4; Apoc. 21:14).c Zäi ge rꞌabu̱ di handihu̱ ge rä Zi Dada Jeoba hingi thädi mä sadihu̱ ja ngu di to̱ꞌmihu̱. Ora thogi njabu̱ hindi reklamäbihu̱ rä Zi Dada Jeoba, ngeꞌä di pädihu̱ xä ñho ge näꞌä di mäkägihu̱ ꞌne näꞌä nunka o̱tꞌe yä injustisia (Job 33:13).

7. ¿Te hinxä ñho gä pe̱fihu̱ ꞌne por hanja?

⁷ Ma gä o̱thu̱ ntsꞌe̱di po hingä komparahu̱ näꞌä di thogihu̱ ko näꞌä thogi märꞌaa. Por ejemplo, ora di o̱dehu̱ ge nꞌa rä ku pede hanja rä Zi Dada Jeoba bi umbäbi näꞌä bi yꞌapäbi ha rä sadi, rꞌabu̱ dä za gä eñhu̱: «Geꞌä ꞌnehe dä apäbi rä Zi Dada Jeoba, ¿nuꞌmu̱ por hanja himbi dädi mä sadi ꞌne go bi dädi rä sadi rä ku?». Geꞌä bi mbeni nꞌa rä zi nju rä thuhu Anna. Rä däme bi ñheni de gä cáncer. Po nuya yä pa, ꞌnehe bi ñheni de gä cáncer yoho yä zi nju ya myä zi däta jäꞌi. Anna mi xatuäbi rä Zi Dada Jeoba ꞌne mi apäbi ge xä matsꞌi tanto rä däme ngu nuya yoho yä zi nju. Mꞌe̱fa, nuya yä zi nju mi tsu̱di rä cáncer bi hogi, pe rä däme go bi du. Rä zi nju Anna mi ñꞌanise̱: «¿Por hanja rä Zi Dada Jeoba bi matsꞌi nuya yoho yä zi nju, pe hingo bi matsꞌi mä däme?». Ninꞌa de gekhu̱ hindi pädihu̱ por hanja bi thogi njabu̱. Pe hää di pädihu̱ ge rä Zi Dada Jeoba, mänꞌitꞌho ma dä hñäki gatꞌho yä sufrimiento ꞌne asta ma dä gu̱tsꞌi nuꞌu̱ xä du (Job 14:15).

8. a) Ja ngu di handihu̱ ha Isaías 43:​2, ¿te pe̱fi rä Zi Dada Jeoba pa faxkägihu̱? b) ¿Hanja faxkägihu̱ rä sadi ora di thogihu̱ yä prueba? (Hyandi rä bideo ¡Hängu faxkägihu̱ rä sadi!).

⁸ Rä Zi Dada Jeoba nunka ma dä hye̱gäse̱hu̱. Ja ngu nꞌa rä dada näꞌä xa di mädi yä zi bätsi, rä Zi Dada Jeoba xa di mäkägihu̱ ꞌne hingi ho dä hyandi gä sufrihu̱ (Is. 63:9). Pe mäske njabu̱, rä Zi Dada Jeoba hingi hägägihu̱ gatꞌho yä xuñha (hñeti Isaías 43:2). Pe hää di prometegihu̱ dä maxkägihu̱ gä ñhanduihu̱ gatꞌho yä xuñha. Pa geꞌä di rꞌakägihu̱ rä mäkä tsꞌe̱di pa dä za gä ze̱tihu̱. ꞌNehe di promete ge mänꞌitꞌho ma dä hñäki gatꞌho yä xuñha, yä u̱gi ꞌne yä sufrimiento (Luc. 11:13; Filip. 4:13). Hää, dä za gä mꞌu̱ihu̱ seguro ge hindi mporta te mä xuñha di thogihu̱, rä Zi Dada Jeoba ma dä rꞌakägihu̱ näꞌä di jakägihu̱ mꞌe̱di pa gä ze̱tihu̱ ꞌne pa hingä ꞌuengihu̱ de rä ꞌñuu.d

¿TE TO̱ꞌMI RÄ ZI DADA JEOBA DE GEKHU̱?

9. ¿Te benꞌgägihu̱ rä Zi Dada Jeoba ha Santiago 1:​6, 7?

⁹ Jeoba to̱ꞌmi gä pe̱ꞌspäbihu̱ ndunthi rä komfiansa (Heb. 11:6). Ora yä xuñha xa tsiꞌti, dä za dä jakägihu̱ gä dudahu̱ ge rä Zi Dada Jeoba faxkägihu̱. Pe rä Mäkä Tꞌofo xikägihu̱ ge ko rä mfatsꞌi ꞌne rä tsꞌe̱di rä Zi Dada Jeoba, dä za gä täpäbihu̱ gatꞌho yä xuñha (Sal. 18:29). Hänge hindi debe gä hopäbihu̱ ge yä duda dä ñuxä ha mä mfenihu̱. Mänꞌa dä hogi gä xatuäbihu̱ rä Zi Dada Jeoba ko ngatꞌho mä korasohu̱ ꞌne gä pe̱ꞌspäbihu̱ rä komfiansa ge näꞌä ma dä dädi mä sadihu̱ (hñeti Santiago 1:​6, 7).

10. ¿Te xä me̱fi rꞌa yä ku ora apäbi rä mfatsꞌi rä Zi Dada Jeoba?

¹⁰ Mꞌe̱fa de di xatuäbihu̱ rä Zi Dada Jeoba, näꞌä to̱ꞌmi ge ꞌnehe gä pe̱fihu̱ näꞌä di tokagihu̱. ¿Te xä me̱fi rꞌa yä ku pa xä za xä ntini ha yä däta mhuntsꞌi? Mꞌe̱tꞌo xä xatuäbi rä Zi Dada Jeoba pa dä tꞌumbä nse̱ki ha yä ꞌme̱fi. ¿Hanja xä dädi rä Zi Dada Jeoba? Xä umbäbi rä balo nuyu̱ yä ku pa hinxä ntsu dä ñäui yä patro. Pe mu̱ tꞌembäbi ge otho nse̱ki, nuyu̱ yä ku xä gu̱ rä balo pa xä ma xä ñäui mänꞌaki yä patro ꞌne rꞌabu̱ asta xä ofrese dä hyoni nꞌa rä jäꞌi toꞌo dä za dä ma dä mpe̱fi po geꞌu̱. Märꞌa yä ku xä ofresebi yä patro dä mpe̱fi mä nꞌa rä pa mäske hindrä juꞌti.

11. ¿Por hanja njatꞌä di debe gä xipäbihu̱ rä Zi Dada Jeoba ge dä yꞌo̱de mä sadihu̱ ꞌne dä rꞌakägihu̱ näꞌä di apäbihu̱?

¹¹ Jeoba ne ge njatꞌä gä xipäbihu̱ näꞌä tupkä mä mu̱ihu̱ (1 Tes. 5:17). Rä Hesu bi ꞌñudi ge rꞌabu̱ rä Zi Dada Jeoba hingä mäntꞌä ma dä rꞌakägihu̱ näꞌä di apäbihu̱ (Luc. 11:9). Po geꞌä mähyoni gä sigihu̱ gä xatuäbihu̱ rä Zi Dada Jeoba ko ngatꞌho mä korasohu̱ (Luc. 18:​1-7). Ora njatꞌä di xipäbihu̱ rä Zi Dada Jeoba näꞌä di ne dä rꞌakägihu̱, di utihu̱ ge xa mäjuäni di tumämu̱ihu̱ po näꞌä di apäbihu̱ ꞌne ge di pe̱ꞌspäbihu̱ rä komfiansa ge Näꞌä ma dä dädi mä sadihu̱.

¿POR HANJA RꞌABU̱ DÄ HOGI GÄ PAATIHU̱ NÄꞌÄ DI APÄBIHU̱ RÄ ZI DADA JEOBA?

12. a) ¿Te dä hogi gä ñꞌanihu̱ ꞌne por hanja? b) ¿Te debe gä pe̱fihu̱ pa njabu̱ ora di xatuäbihu̱ rä Zi Dada Jeoba dä nheki ge di pe̱ꞌspäbihu̱ rä tꞌekꞌei? (Hyandi rä rekuadro «Nuꞌu̱ mä sadi di ja, ¿udi ge di pe̱ꞌspäbi rä tꞌekꞌei Jeoba?»).

¹² Mu̱ di handihu̱ ge rä Zi Dada Jeoba tobe hinxä dädi mä sadihu̱, dä hogi gä o̱tꞌehu̱ hñuu yä ntꞌani: Nꞌaa, «Näꞌä di adi, ¿geꞌä mänꞌa xä ñho?». Rꞌabu̱ di sentihu̱ ge di pädihu̱ näꞌä di apäbi rä Zi Dada Jeoba. Pe rꞌabu̱ rä Zi Dada Jeoba handi ge näꞌä di apäbihu̱ hingä ma dä yꞌo̱tkägihu̱ rä ñho. ꞌNehe ora di xatuäbihu̱ ꞌne di xipäbihu̱ hanja di nehu̱ dä resolbe nꞌa rä asunto, rꞌabu̱ Näꞌä handi ge ja mä nꞌa rä solusio mänꞌa xä ñho. Ndunthi yä mꞌiki di apäbihu̱ rä Zi Dada Jeoba nꞌa rä tꞌo̱tꞌe näꞌä hingi pa mähye̱gi ko rä bolunta (1 Juan 5:14). Por ejemplo, ja ngu dä handihu̱ ha rä parrafo 1, ¿gi beni te xki yꞌadi rꞌa yä dada? Zäi ge gatꞌho yä dada ne ge yä zi bätsi dä sigi dä me̱päbi rä Zi Dada Jeoba. Pe mähyoni gä benihu̱ ge rä Zi Dada Jeoba hinto di obligabi pa dä me̱päbi, sino kada nꞌa de gekhu̱ —asta yä bätsi— debe gä huahnise̱hu̱ gä pe̱päbihu̱ rä Zi Dada Jeoba (Deut. 10:​12, 13; 30:​19, 20). Nuꞌmu̱, ¿te di debe dä yꞌadi yä dada ꞌne yä nänä ha yä sadi? Dä hogi dä yꞌapäbi rä Zi Dada Jeoba ge gatꞌho näꞌä uti yä zi bätsi, dä tso̱mbäbi ha yä koraso pa njabu̱ dä ne dä me̱päbi ꞌnehe (Prov. 22:6; Efes. 6:4).

13. Ja ngu di handihu̱ ha Hebreos 4:​16, ¿hämꞌu̱ thädi Jeoba mä sadihu̱?

¹³ Gehnä rä yoho rä ntꞌani di debe gä o̱tꞌehu̱ ora di handihu̱ ge Jeoba hinxä dädi mä sadihu̱: «¿Por hanja rä Zi Dada Jeoba hingä mäntꞌä rꞌakägi näꞌä di apäbi?». Rꞌabu̱ di nehu̱ ge rä Zi Dada Jeoba mäntꞌä dä rꞌakägihu̱ näꞌä di apäbihu̱. Pe rä Zi Dada Jeoba mänꞌa pädi xä ñho hämꞌu̱ xa di jakägihu̱ mꞌe̱di näꞌä di apäbihu̱ (hñeti Hebreos 4:16). Hänge ora gi handi ge rä Zi Dada Jeoba hinxä dädi ri sadi, ogi mbeni ge Näꞌä hingi ne dä rꞌaꞌi näꞌä gi apäbi. Mänꞌa dä hogi gi mbeni ge Näꞌä eñꞌäꞌi: «To̱ꞌmi, tobe hinxä zo̱ho̱ rä ora». Ha rä parrafo 1 dä no̱nihu̱ nꞌa rä bäsjäꞌi näꞌä bi yꞌapäbi rä Zi Dada Jeoba ge xä matsꞌi pa xä thogi näꞌä rä ñheni mi pe̱ꞌtsi. Pe mu̱ rä Zi Dada Jeoba xä ja nꞌa rä milagro ꞌne xä hñäkuäbi näꞌä ñheni, rä Zithu xä za xä ꞌñembäbi rä Zi Dada Jeoba: «¡Hyandi! Nuni bäsjäꞌi hingä ma xä me̱pꞌäꞌi mu̱ hixkä o̱the» (Job 1:​9-11; 2:4). Hänge ora di thogihu̱ nꞌa rä ñheni, hinxä ñho gä to̱ꞌmihu̱ ge rä Zi Dada Jeoba ma dä ja nꞌa rä milagro pa dä yꞌo̱thegihu̱. Pe hää mähyoni gä benihu̱ ge mänꞌitꞌho ma dä hñäki gatꞌho yä u̱gi ꞌne yä ñheni (Is. 33:24; Apoc. 21:​3, 4). Mientra di to̱ꞌmihu̱ dä zo̱ho̱ näꞌä rä pa, dä hogi gä xatuäbihu̱ rä Zi Dada Jeoba ꞌne gä apäbihu̱ ge dä rꞌakägihu̱ rä tsꞌe̱di ꞌne nꞌa rä tsaya ha mä mfenihu̱ pa gä ze̱tihu̱ nuꞌu̱ yä ñheni di thogihu̱ ꞌne njabu̱ dä za gä sigihu̱ gä pe̱päbihu̱ rä Zi Dada Jeoba (Sal. 29:11).

14. ¿Te dä za gä pädihu̱ de rä ejemplo rä zi nju Juanita?

¹⁴ Ha rä parrafo 2 dä no̱nihu̱ nꞌa rä zi nju rä thuhu Juanita. Nunä zi nju xa mi xatuäbi rä Zi Dada Jeoba ꞌne mi apäbi ge dä matsꞌi pa drä mbitabi dä mfaxte ha rä ngu Betel. Ya xki thogi ku̱tꞌa nje̱ya nuꞌmu̱ rä zi nju Juanita ja penä bi ntiende ꞌne bi hyandi hanja rä Zi Dada Jeoba xki dädi rä sadi. Nunä zi nju enä: «Durante näꞌä rä tiempoꞌä, rä Zi Dada Jeoba bi ꞌñutkägi ndunthi yä tꞌo̱tꞌe ꞌne bi maxkägi gä potꞌi yä hogä mꞌu̱i. Por ejemplo, mi jakägi mꞌe̱di mänꞌa gä pe̱ꞌspäbi ndunthi rä komfiansa rä Zi Dada Jeoba, gä nxadi rä Mäkä Tꞌofo ja ngu ri ꞌñehe, ꞌne bi maxkägi pa dä pädi ge nuga dä za gä pe̱ꞌtsi rä johya dä thogiꞌä dä thogi». Mꞌe̱fa, rä nju Juanita ꞌne rä däme bri mbitabi dä nsuperintendente de gä circuito pa dä zo̱ni yä mhuntsꞌi. Rä zi nju Juanita enä: «Bi thogi rꞌa yä je̱ya pa ja dä da ngue̱nda hanja rä Zi Dada Jeoba xki dädi mä sadi mäske hingä ngu ndi to̱ꞌmi. ¡Hängu di umbäbi njamädi rä Zi Dada Jeoba ngeꞌä bi maxkägi pa dä handi hängu di mäkägi ꞌne ge xa rä hojäꞌi kongeki!».

15. ¿Por hanja ora di xatuäbihu̱ rä Zi Dada Jeoba mänꞌa dä hogi gä mbenihu̱ mꞌe̱tꞌo te ma gä apäbihu̱? (Hyandi ꞌnehe yä foto).

¹⁵ Mu̱ di handihu̱ ge rä Zi Dada Jeoba hinxä dädi mä sadihu̱, dä hogi gä o̱tꞌehu̱ nunä rä hñuu rä ntꞌani: «¿Nzäntho di no̱ni po yä thuhu nuꞌu̱ yä kosa di apäbi rä Zi Dada Jeoba?». Mäske xä ñho gä no̱nihu̱ nuꞌu̱ yä kosa di apäbihu̱ rä Zi Dada Jeoba, mähyoni ge mꞌe̱tꞌo gä ntso̱ꞌmihu̱ pa gä handihu̱ mu̱ pa mähye̱gi ko rä bolunta rä Zi Dada Jeoba nuꞌu̱ yä kosa di apäbihu̱. Por ejemplo, nꞌa rä zi nju rä soltera xki xatuäbi rä Zi Dada Jeoba ꞌne xki ꞌñembäbi dä matsꞌi pa drä mbitabi ha rä Ngunsadi pa yä Evangelizador de rä Tsꞌu̱tꞌhui Äjuä. ¿Por hanja rä zi nju mi ne dä ma ha nunä ngunsadi? Ngeꞌä mi ne dä me̱päbi rä Zi Dada Jeoba ha nuꞌu̱ yä luga habu̱ mänꞌa mi ja mꞌe̱di rä mfatsꞌi. Mäske nunä zi nju xä za xä sigi xä xatuäbi rä Zi Dada Jeoba pa xä ntini ha nunä rä ngunsadi, mänꞌa xä hogi xä yꞌapäbi rä Zi Dada Jeoba ge xä matsꞌi pa xä dini rä forma de hanja xä me̱päbi mä ndunthi (Hech. 16:​9, 10). ꞌNepu̱, ¿te mä nꞌa xä hogi xä me̱fi? Nubye̱ xä za xä yꞌambäbi rä superintendente de gä circuito mu̱ mi ja nꞌa rä luga getbu̱ habu̱ mi ja mꞌe̱di yä precursor o xä yꞌopäbi rä ngu Betel pa xä yꞌambäbi habu̱ mänꞌa mi ja mꞌe̱di rä mfatsꞌi.e

16. ¿Te di pädihu̱ xä ñho?

¹⁶ Ja ngu ya dä pädihu̱, otho rä duda ge rä Zi Dada Jeoba thädi mä sadihu̱ ko rä mhäte ꞌne nzäntho handi ndaꞌä mä ñhohu̱ (Sal. 4:3; Is. 30:18). Rꞌabu̱ dä za dä dädi de nꞌa rä modo näꞌä hindi to̱ꞌmihu̱, pe hindi debe gä pe̱ꞌtsihu̱ rä duda ge näꞌä nzäntho di jamäsu mä sadihu̱. Rä Zi Dada Jeoba xa di mäkägihu̱ ꞌne näꞌä nunka ma dä bandonägihu̱ (Sal. 9:10). Po geꞌä, mähyoni gä o̱thu̱ ntsꞌe̱di ꞌne gä sigihu̱ gä tedehu̱ mä komfiansahu̱ po rä Zi Dada Jeoba ꞌne gä xatuäbihu̱ ko ngatꞌho mä korasohu̱ (Sal. 62:8).