Hanja dä za gi tini näꞌä rä jamfri xa mäjuäni

Mu̱ di ne gä ntsitsꞌihu̱ ko rä Zi Dada, pe̱ꞌtsi gä yꞌohu̱ ha näꞌä rä jamfri di ho. Rä Hesu bi mää «ge nuꞌu̱ toꞌo [...] xi mäjuäni dä xo̱kämbeni Äjuä» ma dä xo̱kämbeni «ngu ri ꞌñehe» o «ngu näꞌä xa mäjuäni» (Juan 4:23, 24; Ár ꞌRaꞌyo Nkohi Jö [RN]). Se̱he̱ ja nꞌatho rä ꞌñuu pa gä xo̱kämbenihu̱ Äjuä ngu ri ꞌñehe (Efesios 4:4-6). Näꞌä rä jamfri mäjuäni tsitsꞌi ha nꞌa rä te pa nzäntho, ha nuꞌu̱ yä jamfri hingä mäjuäni tsitsꞌi yä jäꞌi ha rä du (Mateo 7:13, 14).

Nuꞌäge dä za gi pädi ndaꞌä näꞌä rä jamfri xa mäjuäni mu̱ gi hyandi te pe̱fi nuꞌu̱ yä jäꞌi. Jeoba rä hojäꞌi, hänge nuꞌu̱ yä jäꞌi xa mäjuäni di xo̱kämbeni Jeoba pe̱ꞌtsi dä ñhojäꞌi. Ja ngu rä ꞌmai nꞌa rä hogä nanxa uni yä nanxa xä ñho, njabu̱ ꞌnehe näꞌä rä jamfri xa mäjuäni uni yä hogä jäꞌi (Mateo 7:15-20).

Yä ntsitsꞌi rä Zi Dada Jeoba pe̱ꞌtsuäbi ndunthi rä tꞌekꞌei rä Mäkä Tꞌofo. Yä ntsitsꞌi Jeoba pädi xä ñho ge rä Mäkä Tꞌofo bi ehe ha Äjuä. Hänge rängeꞌä, nuꞌu̱ hopi rä Mäkä Tꞌofo dä xipi hanja dä mꞌu̱i, hanja dä ꞌueke yä xuñha, ꞌne hopi dä matsꞌi dä bädi xä ñho toꞌo rä Zi Dada (2 Timoteo 3:16). ꞌNehe o̱tꞌe ntsꞌe̱di pa dä me̱fi näꞌä uti märꞌa yä jäꞌi.

Yä ntsitsꞌi rä Zi Dada Jeoba di mädi nꞌa ngu mänꞌaa. Ñhesukristo bi ꞌñudi ge mi mädi yä jäꞌi nuꞌmu̱ bi ꞌñuti toꞌo rä Zi Dada ꞌne bi yꞌo̱the nuꞌu̱ mi hñeni. Nuꞌu̱ yꞌo ha näꞌä rä jamfri xa mäjuäni ꞌnehe di mädi märꞌa yä jäꞌi. Ja ngu Ñhesukristo himbi u̱tsa nuꞌu̱ yä zi hyoya ha nixi nuꞌu̱ yä jäꞌi de märꞌa yä hnini. Rä Hesu bi mää ge yä jäꞌi ma dä bädi toꞌo nuꞌu̱ xa mäjuäni yä de̱ni mu̱ nuyu̱ di mädi nꞌa ngu mänꞌaa (Juan 13:35).

Yä ntsitsꞌi Äjuä eꞌtsuäbi rä nsu Rä thuhu Jeoba. Mu̱ nꞌa rä jäꞌi di ntsa dä zoꞌi ko ri thuhu, ¿ma gi hyandi ngu nꞌa ri hogä ntsitsꞌi? Fädi ge hinä. Mu̱ di pe̱ꞌtsihu̱ nꞌa rä hogä ntsitsꞌi, di zofohu̱ ko rä thuhu ꞌne di ñähu̱ xä ñho de geꞌä ko märꞌaa. Njabu̱ nuꞌu̱ toꞌo ne dä ntsitsꞌiui Äjuä pe̱ꞌtsi dä zofo ko Rä thuhu ꞌne dä ñä de geꞌä ko mä rꞌa yä jäꞌi. Njabu̱ ne Jeoba gä pe̱fihu̱ (Mateo 6:9; Romanos 10:13, 14).

Yä ntsitsꞌi rä Jeoba uti yä jäꞌi de rä Tsꞌu̱tꞌhui Äjuä ja ngu bi ja Ñhesukristo. Tꞌembi «rä Tsꞌu̱tꞌhui Äjuä» näꞌä nꞌa rä tsꞌu̱tꞌhui xä hñutsꞌi Äjuä ha mähetsꞌi, näꞌä geꞌä ma dä hyoki rä Xiꞌmhai nꞌa rä uädri. Yä tsitsꞌi rä Zi Dada xipäbi märꞌa yä jäꞌi nuya yä hogä noya de rä Tsꞌu̱tꞌhui Äjuä (Mateo 24:14).

Yä testigo rä Jeoba o̱tꞌe ntsꞌe̱di pa dä ntsitsꞌiui xä ñho rä Zi Dada. Nuyu̱ pe̱ꞌtsuäbi rä tꞌekꞌei rä Mäkä Tꞌofo, di mädi nꞌa ngu mä nꞌaa. Zopäbi ꞌne eꞌtsuäbi rä nsu rä thuhu rä Zi Dada, ꞌne uti märꞌa yä jäꞌi de rä Tsꞌu̱tꞌhui Äjuä. Mäpaya nuua ha rä Xiꞌmhai, yä testigo rä Jeoba yꞌo ha näꞌä rä jamfri xa mäjuäni.