¿Te mä hogä noya pe̱ꞌtsi Äjuä pa nuju̱?

1. ¿Te mä hogä noya bi ehe de Äjuä?

Äjuä ne ge gatꞌho yä jäꞌi dä dini nꞌa rä hogä mꞌu̱i ko rä johya nuua ha rä Xiꞌmhai. Äjuä bi hyoki rä Xiꞌmhai ꞌne gatꞌho nuꞌu̱ yä tꞌo̱tꞌe di handihu̱ ngeꞌä xä di mädi yä jäꞌi. Mänꞌitꞌho, Äjuä ma dä hä nꞌa rä mꞌu̱i mänꞌa xä ñho ha gatꞌho rä Xiꞌmhai, ꞌne ma dä hñäki gatꞌho nuꞌu̱ yä tꞌo̱tꞌe di japi dä sufri yä jäꞌi. Hñeti Jeremías 29:11.

Gatꞌho nuꞌu̱ yä tsꞌu̱tꞌhui xä nja ha rä Xiꞌmhai hinxä za xä hñäki yä tuhni, yä ñheni ha nixi rä du. Pe Äjuä pe̱ꞌtsi rꞌa yä hogä noya pa nuju̱: mänꞌitꞌho ma dä hñäki gatꞌho nuꞌu̱ yä tsꞌu̱tꞌhui jaua ha rä Xiꞌmhai ꞌne go ma dä hñutsꞌi näꞌä rä Tsꞌu̱tꞌhui. Nuꞌu̱ yä jäꞌi o̱te yä mhända Äjuä ma dä me̱ꞌtsi nꞌa rä hogä mꞌu̱i ꞌne nꞌa rä hogä nzaki habu̱ hinte mä dumu̱i dä nheki. Hñeti Isaías 25:8; 33:24, ꞌne Daniel 2:44.

2. ¿Por hanja xa mähyoni gi yꞌo̱de nuya yä hogä noya?

Äjuä ma dä huati gatꞌho yä tsꞌomꞌu̱i jäꞌi pa njabu̱ dä uadi gatꞌho nuꞌu̱ yä dumu̱i ja ha gatꞌho rä Xiꞌmhai (Sofonías 2:3). ¿Hämꞌu̱ ma dä me̱fi njabu̱ Äjuä? Yä jäꞌi di sufri ndunthi po gatꞌho nuꞌu̱ yä tsꞌo tꞌo̱tꞌe thogi mäpaya. Dende mäyaꞌmu̱, rä Mäkä Tꞌofo bi mää ge ma xä thogi njabu̱. Nuꞌu̱ yä tꞌo̱tꞌe di nheki mäpaya udi ge ꞌmu̱i getbu̱ näꞌä rä pa habu̱ Äjuä ma dä huati nuya yä tsꞌo tꞌo̱tꞌe. Hñeti 2 Timoteo 3:1-5.

3. ¿Te mähyoni gi pe̱fi?

Mähyoni gi pädi de Äjuä ꞌne de rä Noya tꞌembi rä Mäkä Tꞌofo. Rä Mäkä Tꞌofo ꞌñenä ngu nꞌa karta näꞌä xä yꞌofo nꞌa dada näꞌä xa di mädi yä bätsi. Nunä xikägihu̱ hanja dä za gä pe̱ꞌtsihu̱ nꞌa hogä mꞌu̱i mäpaya ꞌne xikägihu̱ te mähyoni gä pe̱fihu̱ pa gä pe̱ꞌtsihu̱ nꞌa rä te pa nzäntho nuua ha rä Xiꞌmhai. Pe hingä gatꞌho yä jäꞌi ma dä johya nuꞌmu̱ xti hyandi ge gi hopi toꞌo faxꞌäꞌi gi nxadi rä Mäkä Tꞌofo. Nuꞌi dä za gi hyandi näꞌä rä mꞌu̱i xa tsꞌu̱ngänza ma dä hä Äjuä pe nuꞌmu̱ hingi hyopi toꞌo dä hñäkꞌäꞌi gi sigi gi hñäni nunä mfädi. Hñeti Proverbios 29:25 ꞌne Apocalipsis (Revelación) 14:6, 7.