¿Ankja da zo go pädihu̱ ndanakʼa ihkji ra zo?

1. ¿I ʼbu̱i ʼnatho ihkji ra zo?

Hesu ʼne yo te̱nite bi mu̱fu̱ kjangú i uhti kʼa ihkji ra zo, gege bi hie̱hti nuna ihkji ngu ʼna ʼñu ge ba paʼ pa kʼa nzahki pa zäi, pe chu̱tho yä kjäʼni i tötihu̱ (Mateo 7:14). Rä Tsi Mähkí Tá ho̱nse i nú ra zo kʼa xo̱hkimbeni mu̱ i nkja ngu gege i mä ha ro Hñä, nu̱ Biblia. Ku̱ tó i xo̱hkimbeni kjangú xi mä gege i nkuätihu̱ ʼraa ko maʼra nge i petsihu̱ ʼnatho ihkji. Xödi Juan 4:23, 24; 14:6, ʼne Efesios 4:4, 5.

2. ¿Té bi mä kʼa Hesu de yä kristiano yo me̱thri?

Hesu bi mä ta ma kjaʼmu̱ ge di ʼbu̱i yä ʼño̱ho̱ ndi mähmu̱ té ndi thogi ri mäni, pe yo me̱thri nge i kjahu̱ da ntsʼoni nu̱ ihkji ra zo de yä kristiano. Gehya kjäʼni ʼne yo hmuntsi i mähmu̱ ge yo kristiano. Maʼke i mähmu̱ ge i pädihu̱ té i mä rä Tsi Mähkí Tá, ho̱nse i hiotihu̱ yä kjäʼni. Pe ʼna, da zo da bädi ndanakʼa ihkji ra zo, mu̱ da hiandí kʼa chala ʼmu̱i i petsi ku̱ kjäʼni de genkʼa ihkji, nge gegehu̱ hä yo kristiano. Nu̱ Biblia i mä: “Hñahu̱ nguenda de yu̱ ʼño̱ho̱ yo me̱thri ge i mähmu̱ té da thogi ri mäni ʼne ba ihmu̱ ko nukehu̱ nihi i he̱hu̱ yo dähtu ga dehti pe po amböku̱ yo miʼño. Pe po yo íxiku̱ da phädi ge genku̱. [...] ʼNa zaa ra zo hin da zo da uni ʼna íxi xi ntsʼoni, nindi ʼna zaa hi ra zo da zo da uni ʼna chala íxi” (Mateo 7:15, 16, 18).

3. ¿Tó ku̱ i petsi kʼa ihkji ra zo?

Ma hiandíhu̱ ku̱ta yä ntʼo̱te i uhti a i nkjaku̱:

• I mädihu̱ nu̱ Biblia ngu ro Hñä rä Tsi Mähkí Tá. Hi i te̱nihu̱ yo ntʼudi de yä kjäʼni, ma ra zo i ndo̱ mpexkehu̱ pa da ʼyo̱htehu̱ yä ntʼsofo de ra Biblia (Mateo 15:7-9). Nihi me̱tʼo i kjasehu̱ kʼa i uhtibihu̱ a yä kjäʼni. Xödi Juan 17:17 ʼne 2 Timoteo 3:16, 17.

• 

  I ítsihu̱ ta amaña de goʼtho, kʼa ro thuhu rä Tsi Mähkí Tá, Jehová. Kʼa Hesu nihi bi o̱te nkjaua mu̱ mi uhti ro thuhu de ro Tá, nihi bi xiʼku̱ kjäʼni tó rä Jehová, ʼne bi uhtibiku̱ ankja di zo ndi öhmu̱ ge da nthuhkibi ro thuhu rä Tsi Mähkí Tá (Mateo 6:9). ¿Tó ku̱ i uhti ro thuhu rä Tsi Mähkí Tá abu̱ gi ʼbu̱hke? Xödi Juan 17:26 ʼne Romanos 10:13, 14.

• I uhtihu̱ kʼa nto̱de de ro Reino de rä Tsi Mähkí Tá. Bi thsifí kʼa Hesu ge ndi ihkua nugua ha nu̱ Ximojoi, pa ndi uhti yä nto̱de ra zo de kʼa Reino, nge ho̱nse gehya da zo da to̱ʼmihu̱ yä kjäʼni pa da hñutihu̱ yo mu̱ihu̱. ʼNe bi uhti gehya nto̱de ta kʼa mpa bi du (Lucas 4:43; 8:1; 23:42, 43). Nihi bi mä ge yo te̱nite ndi uhti de gehna gobierno. Nsohtho mu̱ tó da zo̱ho̱ abu̱ gi ʼbu̱i ʼne da xiʼki de ro Reino kʼa Tsi Mähkí Tá, bini ¿té ma ihkji i petsi nukʼa kjäʼni? Xödi Mateo 24:14.

• Hi yo me̱hti nuna ximojoi ra ntsʼo. Yo te̱nite kʼa Hesu hi i nthäntsihu̱ ko yä ndä ga kjäʼni, nindi mu̱ i ntuhu̱ yä hnini (Juan 17:16; 18:36). Ni i kjahu̱ yä ntsʼo ntʼo̱te i o̱tehu̱ yä kjäʼni de nuna ximojoi, ʼne hi i nkjahu̱ ngu gegehu̱. Xödi Santiago 4:4.

• Kʼa hmädi i petsihu̱ ʼraa ko maʼra i ndo̱ nihki. Ro Hñä rä Tsi Mähkí Tá xi uhtibiku̱ ge da núhu̱ ra zo goʼtho yä kjäʼni, maʼke hi yo minguhu̱. Yä ihkji hi ra zo, zäi xi föxihu̱ yä ntu, pe yä kristiano i petsihu̱ kʼa ihkji ra zo hi i pe̱hmu̱ nkjanu̱ (Miqueas 4:1-3). Ma ra zo, i ʼue̱hkehu̱ yä mpa pa da fötsihu̱ yä kjäʼni ʼne ko yo hñä i unihu̱ tse̱dí a yä kjäʼni. Nihi, ta i kju̱hu̱ yo domi pa da föxihu̱, pe gegehu̱ hi i to̱ʼmihu̱ te da tʼuni. Xödi Juan 13:34, 35 ʼne 1 Juan 4:20.

4. ¿Kja da zo gi pädi ndanakʼa ihkji ra zo?

¿Té ma kjäʼni i petsi ʼna ihkji i uhti yo ntʼudi ko nu̱ i mä nu̱ Biblia, nihi i ítsihu̱ ta amaña de goʼtho kʼa ro thuhu rä Tsi Mähkí Tá ʼne i uhtihu̱ ge ho̱nse ro Reino rä Tsi Mähkí Tá genkʼa ra zo da do̱ʼmi yä kjäʼni? ¿Té ma kjäʼni i petsi ʼna ihkji abu̱ hä i nmädihu̱ ʼraa ko maʼra, ʼne hi i föxihu̱ yä ntu? ¿Té gi mänge? Nu̱ Biblia i mä: “I phädi tó yo bähtsi rä Tsi Mähkí Tá ʼne tó yo bähtsi ra Zithu, po gehya ntʼo̱te: Goʼtho kʼa hi i pe̱fí kʼa ra zo hin ba ihi de rä Tsi Mähkí Tá, ni kʼa tó hi i mädi ro ku” (1 Juan 3:10).