¿Ankja da zo go kuätihu̱ ko rä Tsi Mähkí Tá?

1. ¿I o̱de rä Tsi Mähkí Tá goʼtho kʼa di xihmu̱?

Rä Tsi Mähkí Tá i xih yä kjäʼni de goʼtho yä hnini ge da zo da guätihu̱ mu̱ i nzohmu̱ pa da ñähu̱ ko gege (Salmo 65:2). Pe nuna hi i ne da mä ge rä Tsi Mähkí Tá i o̱de o i ne goʼtho kʼa i thsifí. Ra Biblia i mä ge mu̱ ʼna ʼño̱ho̱ hi i nú ra zo ro ʼbehña, mu̱ gege i ñä ko rä Tsi Mähkí Tá, ngentho mu̱ “te xi ʼmö a madé” de gegeui, nsohtho yo hñä hin da o̱de rä Tsi Mähkí Tá (1 Pedro 3:7). Mu̱ ku̱ israelita mi kjahu̱ ka ra ntsʼo ʼne pi mi kjahu̱, mu̱ mi ñähu̱ ko rä Tsi Mähkí Tá, gege hi mi ne ndi o̱de. Pe nuyá gege ta i o̱de yä kjäʼni xi kjahu̱ yä tsʼohki, pe ho̱nse mu̱ gegehu̱ i tsohu̱ ra ndo̱ ʼu̱ ha yo koraso po kʼa xi kjahu̱. Xödi Isaías 1:15 ʼne 55:7.

2. ¿Ankja go ñähu̱ ko rä Tsi Mähkí Tá?

Mu̱ di ñähu̱ ko rä Tsi Mähkí Tá dra xo̱hkimbenibihu̱, nsohtho petsite go ñähu̱ ho̱nse ko Jehová (Mateo 4:10; 6:9). Nge goʼthohu̱ di petsihu̱ nu̱ tsʼohki, mu̱ di ñähu̱ ko rä Tsi Mähkí Tá petsite go öhpihu̱ po madé kʼa Hesu, nge bi du po yu̱ ma tsʼohkihu̱ (Juan 14:6). Mu̱ di ñähu̱ ko Jehová, hi i ne ge go nde go xöhpibihu̱ yä hñä di pädihu̱ ha ma nfenihu̱ ni go xödihu̱ ʼna he̱ʼmi mu̱ te go xihmu̱, ma ra zo, i ne go xihmu̱ kʼa i po̱ni de ma korasohu̱. Xödi Mateo 6:7 ʼne Filipenses 4:6, 7.

Kʼa xi o̱tegihu̱ nihi ta i o̱de mu̱ di nzohmu̱ ho̱nse ko ma nfenihu̱ (1 Samuel 1:12, 13). ʼNe i xihkihu̱ ge go ñähu̱ ko gege goʼtho yä mpa, ngu mu̱ i fu̱dí nu̱ mpa ʼne mu̱ i guadi, nihi mu̱ go ma tsihu̱ ʼne mu̱ di thogihu̱ yä mpa ra ndo̱ nthi. Nu̱ Biblia i mä: “Tuhtíbi rä Jehová kʼa ra hiu̱ gi ndu, ʼne gege da do̱xki” (Salmo 55:22). Xödi Mateo 15:36.

3. ¿Ankja i föxkigihu̱ yä hmuntsi de yu̱ kristiano?

Di mu̱fu̱ ko yä kjäʼni hi i ihkjihu̱ rä Tsi Mähkí Tá, ʼne ta i thenihu̱ mu̱ i o̱dehu̱ ge rä Tsi Mähkí Tá xi ñähtigihu̱ ge go mu̱fu̱ ra zo nugua ha nu̱ Joi. Gehna da zo da kjagihu̱ ge ya hiʼtsa go mpexkehu̱ pa go kuätihu̱ ko Jehová (2 Timoteo 3:1, 4; 2 Pedro 3:3, 13). Nsohtho ra zo go hmuntsihu̱ ko maʼra yä kristiano pa da föxkihu̱ ʼne pa go fötsihu̱. Nu̱ Biblia i mä: “Go binihu̱ ʼraa ko maʼra pa go nföxihu̱, pa go udihu̱ ge di nmädihu̱ ʼne pa go kjahu̱ yä ntʼo̱te ra zo, hin go he̱gihu̱ nu̱ hmuntsi, [...] go nföxihu̱ ʼraa ko maʼra” (Hebreos 10:24, 25).

Mu̱ di hmuntsihu̱ ko yä kjäʼni i mädihu̱ rä Tsi Mähkí Tá, di tsohu̱ ge ma di kuätihu̱ ko gege. Ha yo hmuntsi de yä testigo rä Jehová da zo go núhu̱ té i pe̱fí maʼra po kʼa ihkji i petsibihu̱ kʼa Tsi Mähkí Tá ʼne gehna i föxkigihu̱. Xödi Romanos 1:11, 12.

4. ¿Ankja da zo gi kuäti ko rä Tsi Mähkí Tá?

Da zo gi kuäti ko rä Tsi Mähkí Tá mu̱ gi mbeni té i uhtiki de gege kʼa ko pädi ha nu̱ Biblia. Ha nu̱ Biblia di tötihu̱ gehna ntʼsofo: “ʼNe mu̱ mpa ʼne mu̱ nxuy petsite gi xödi tsi njante, pa gi hña nguenda ʼne gi kja goʼtho kʼa i nthutsi ha kʼa he̱ʼmi; nkjanu̱ ha ri ʼñu da bo̱ni ra zo goʼtho kʼa gi kja ʼne gi pädi té gi pe̱fí” (Josué 1:8). Nihi bini kʼa xi o̱te, ku̱ yo ntʼsofo ʼne ku̱ xi ñähti. Mu̱ gi mbeni gehya ʼne mu̱ gi ñä ko gege, da möxkí pa gi pädi a i nkja ro ndo̱ hmädi ʼne ro ndo̱ mphädi de rä Tsi Mähkí Tá. Xödi Salmo 1:1-3.

Ho̱nse da zo gi kuäti ko rä Tsi Mähkí Tá mu̱ gi ihkjibi. Pe nu̱ ihkji i nkja ngu ʼna te i petsi nzahki, ʼne zäi petsite da tʼuni te da zi, gehna da zo da nkja mu̱ di nbinihu̱ ha yä rraso i kjahpi ma da ze̱di kʼa di ihkjihu̱. Xödi Mateo 4:4 ʼne Hebreos 11:1, 6.

5. ¿Té ma nkjähpi i ʼbu̱i pa yu̱ tó i kuäti ko rä Tsi Mähkí Tá?

I ʼbu̱i yä kjäʼni i mädihu̱ rä Tsi Mähkí Tá, ʼne Jehová i ʼñonfeni po gegehu̱. Rä Tsi Mähkí Tá da zo da födiku̱ de ʼraa yä ntʼo̱te i thogihu̱ pa hin da ʼbe̱dihu̱ yo ihkji ʼne kʼa nzahki pa zäi i to̱ʼmihu̱ (Salmo 91:1, 2, 7-10). Rä Tsi Mähkí Tá i xiʼku̱ ge hin da pe̱hmu̱ ya ntsʼo ʼmu̱i pa hin da hñinihu̱, pa hin da ʼbe̱dihu̱ kʼa ro poho, ʼne i uhtibiku̱ ndanakʼa ʼmu̱i ma ra ndo̱ zo. Xödi Salmo 73:27, 28 ʼne Santiago 4:4, 8.