¿Ó i he̱gi rä Tsi Mähkí Tá da thogi yä ntsʼo ntʼo̱te ʼne yä dumu̱i?

1. ¿Ankja bi mu̱di yä ntsʼo ntʼo̱te?

Bi ntsʼoni nu̱ Joi mu̱ kʼa Zithu bi mä kʼa me̱tʼo ʼbe̱thri. Gege mi nkja ʼna ánje mi kja kʼa ra zo ʼne xaʼtho yä tsʼohki mi petsi, pe “bi ʼue̱ge de nu̱ ra zo” (Juan 8:44). Nge gege mi ʼne ndi petsi kʼa xo̱hkimbeni ge ho̱nse mbro me̱hti rä Tsi Mähkí Tá ʼne bi he̱gi n di te kʼa mi ne. Kʼa Zithu bi hioti kʼa me̱tʼo ʼbehña ko ʼna ʼbe̱thri, nkjanu̱ kʼa Eva di o̱htebi, pe hi a rä Tsi Mähkí Tá. Kʼa Adán nihi hin bi ʼyo̱htebi rä Tsi Mähkí Tá kjangú ka o̱te ro ʼbehña. Po kʼa bi kjaui xi nkja nu̱ dumu̱i ʼne nu̱ du. Xödi Génesis 3:1-6, 19.

Mu̱ kʼa Zithu bi xikʼa Eva ge hin di ʼyo̱htebi a rä Tsi Mähkí Tá, bi mu̱di bi ʼmu̱i yo nkontra de rä Tsi Mähkí Tá. Kʼa Zithu hin bi ne bi nú rä Tsi Mähkí Tá, kʼa i ʼbu̱i amaña de goʼtho yä ntʼo̱te, ngu kʼa da mandase. Ndunthi yä kjäʼni xi te̱nihu̱ ra Zithu, ʼne hi xi ne xi núhu̱ rä Tsi Mähkí Tá ngu kʼa petsite da mandase, nsohtho ra Zithu xi zo̱ho̱ xi nkja “ndä de nu̱ ximojoi”. Nu̱ Biblia i mä ge “goʼtho nu̱ ximojoi xi döʼmi ro tse̱dí kʼa zithu”. (1 Juan 5:19). Xödi Juan 14:30.

2. ¿Kja hin bi o̱te ra zo rä Tsi Mähkí Tá goʼtho yä ntʼo̱te?

Goʼtho ku̱ bi o̱te rä Tsi Mähkí Tá ra ndo̱ zo. Ku̱ me̱tʼo kjäʼni nihi ku̱ ánje mi tso ndi ʼyo̱htehu̱ goʼtho kʼa mi manda rä Tsi Mähkí Tá (Deuteronomio 32:4, 5). Gege zäi xi rahkihu̱ ntʼidi pa go juähnihu̱ kʼa ra zo o kʼa hi ra zo. Nsohtho kjamädi po ka ntʼidi xi rahkihu̱ da zo go ʼyo̱htehu̱ po nu̱ hmädi di petsibihu̱. Xödi Santiago 1:13-15 ʼne 1 Juan 5:3.

3. ¿Ó xi he̱gi rä Tsi Mähkí Tá da nkja yä dumu̱i?

Po chu̱tho yä mpa, Jehová xi he̱gi da ʼmu̱i yo nkontra, yu̱ tó hi i nehu̱ ge da manda. ¿Ó xi kja nkjanu̱? Pa da uhti ge nindi ʼna ndä da zo da fötsí yä kjäʼni nge hi i petsihu̱ ro nföxte rä Tsi Mähkí Tá (Eclesiastés 7:29; 8:9). Yä xi thogi seis mil yä kjea ʼne to núhu̱ ra zo gehna: yo ndä de yä kjäʼni hi i tso da gu̱ʼtsi yä ntʼo̱te ra ntsʼo, yä ntu, nindi yä gihí. Xödi Jeremías 10:23 ʼne Romanos 9:17.

Mu̱ go he̱hmu̱ da mandagihu̱ rä Tsi Mähkí Tá, da zo go mu̱fu̱ ra zo (Isaías 48:17, 18). Jehová hin da de pa da yo̱ʼte yä ndä de yä kjäʼni. Ho̱nse ku̱ i nehpi ro ndä da mu̱fu̱ ha nu̱ Joi (Isaías 11:9). Xödi Daniel 2:44.

4. ¿Té da zo go pe̱hmu̱ mu̱ rä Tsi Mähkí Tá i to̱bigihu̱?

Kʼa Zithu bi mä ge yä kjäʼni i pe̱hpihu̱ rä Tsi Mähkí Tá ho̱nse mu̱ gege i uniku̱ yä ntʼo̱te. Nge rä Tsi Mähkí Tá i to̱ʼmi, di goʼthohu̱ da zo go uhtihu̱ ko nu ma ʼmu̱i di petsihu̱ ge kʼa Zithu ro me̱thri ʼne hin di nehu̱ yo ndä yä kjäʼni, ma ra zo di nehu̱ ro ndä de rä Tsi Mähkí Tá. Xödi Job 1:8-12 ʼne Proverbios 27:11.

5. ¿Ankja da zo go kuätihu̱ ko rä Tsi Mähkí Tá?

Da zo go kuätihu̱ ko rä Tsi Mähkí Tá mu̱ go pädihu̱ ankja i ne go xo̱hkimbenihu̱ ʼne go ʼñohu̱ ha kʼa ihkji ra zo, nge yo ntʼudi ba ihi ha nu̱ Biblia (Juan 4:23). Nihi di uhtihu̱ ge hin di nehu̱ ro ndä de nu̱ Zithu, mu̱ hin di nthäntsihu̱ ko yu̱ ndä ga kjäʼni, nindi yä ntu, kjangú bi o̱te Hesu. Xödi Juan 17:14.

Ko ro tse̱dí, kʼa Zithu i kja ge yä kjäʼni da pe̱hmu̱ yä ntʼo̱te ra ndo̱ ntsʼo, pe gehya rä Tsi Mähkí Tá hi i nú ra zo. Nsohtho mu̱ di tsogihu̱ gehya ntʼo̱te ʼraa de ma ntsitsihu̱ ʼne ʼraa de ma kjäʼnihu̱ da thenigihu̱ ʼne da kjahu̱ go petsihu̱ ʼna nzahki ra nthi (1 Pedro 4:3, 4). Mu̱ da thogi nkjaua, go hioníhu̱ ku̱ tó i mädi rä Tsi Mähkí Tá ʼne go kjahu̱ yä chala hmända de gege pa go uhtihu̱ ge ra Zithu bi mä ʼna ʼbe̱thri mu̱ nga mä ge kjoʼo da zo da ʼyo̱hte rä Tsi Mähkí Tá mu̱ i thogi po yä ntʼo̱te ra nthi. Xödi 1 Corintios 6:9, 10 ʼne 15:33.

Nge rä Tsi Mähkí Tá i ndo̱ mähkigihu̱, da zo go ihkjihu̱ ge hä da ma gu̱ʼtsi yä ntsʼo ntʼo̱te ʼne yä dumu̱i. Ku̱ tó da ihkjibi, da kjahu̱ yä ntʼo̱te ra zo nihi da kuätihu̱ ko rä Tsi Mähkí Tá, ʼne da mu̱fu̱ pa zäi ha nu̱ Ximojoi. Xödi Juan 3:16.