Kʼa má i no̱ni nu̱ Biblia genkʼa ro Reino kʼa Tsi Mähkí Tá. Po madé de genkʼa Reino, kʼa Jehová da ma o̱te kʼa mi ne ha nu̱ Ximojoi. ¿Té ʼbenkʼa Reino? ¿Ankja dra pädihu̱ ge ya ra mända? ¿Té xi o̱te ta nuyá? ¿Té da ma o̱te pa ri mäní? Gehya ntʼöni go ma thädíhu̱ ha gehna ntʼudi nihi ha ku̱ pi yoho ntʼudi ba íhi.

1. ¿Té ʼbenkʼa ro Reino kʼa Tsi Mähkí Tá, nihi tó genkʼa ro Ndä?

Kʼa Reino de kʼa Tsi Mähkí Tá i nkja ʼna gobierno xi ʼñíx kʼa Jehová. Kʼa Ndä de gehna Reino genkʼa Hesukristo, gege i mända desde a jitsi (Mateo 4:17; Juan 18:36). Nu̱ Biblia i mä de kʼa Hesu: “Gege zäi [...] da nkja Ndä” (Lucas 1:32, 33). Gege da mända nihi da mödí goʼtho yu̱ kjäʼni de nu̱ Ximojoi, xo gege ro Ndä de nu ro Reino kʼa Tsi Mähkí Tá.

2. ¿Tó ku̱ i mända ko kʼa Hesu?

Hi ʼrase i mända kʼa Hesu. “Yä kjäʼni de goʼtho yä lengu hnini, yä hñä, yä hnini nihi yä ndo̱ hnini [...] da mändahu̱.” (Apocalipsis 5:9, 10). ¿Tengu da mända ko kʼa Kristo? Desde ku̱ mpa bo íʼ kʼa Hesu nuua ha nu̱ Joi, ndunthi yä kjäʼni xi de̱nihu̱ kʼa Kristo, xi nkjahu̱ kristiano. Pe ho̱nse̱ 144.000 de gehya kjäʼni da möhmu̱ a jitsi pa da mändahu̱ ko kʼa Hesu (xödí Apocalipsis 14:1-4). Goʼtho yu̱ piʼra kristiano da ʼmu̱fu̱ua ha nu̱ Joi (Salmo 37:29).

3. ¿Ó kʼa ro Reino kʼa Tsi Mähkí Tá má ra zo di gehyu̱ gobierno i ʼbu̱hya?

Mahke i ʼbu̱i yu̱ ndä i ne da kjáhu̱ kʼa ra zo, hi i peʼtsihu̱ kʼa tse̱dí pa da kjáhu̱ goʼtho kʼa i nehu̱. Nihi mu̱ i ku̱ti piʼna raʼyo gobierno nuná hi i ʼñonfeni pa da mötsí yu̱ kjäʼni. Pe kʼa Hesu, kʼa Ndä de kʼa ro Reino kʼa Tsi Mähkí Tá zäi da ma ʼmu̱i. Kʼa Tsi Mähkí Tá bi ʼítsi “na reino ge kjoʼtho da ma gu̱ʼtsi” (Daniel 2:44). Kʼa Hesu da ma mända goʼtho nu̱ Ximojoi, hin da juahnitho tengu yä kjäʼni. Gege i ndo̱ peʼtsi hmädí, i ñä ra zo nihi i kjá kʼa ra zo, nsohtho gege da úhtibi ku̱ kjäʼni ankja da nmädíhu̱, ankja da ñähu̱ ra zo nihi ankja da kjáhpibihu̱ kʼa ra zo yu̱ maʼra (xödí Isaías 11:9).

4. Kʼa Reino i ndo̱ peʼtsi tse̱dí pa da mända goʼtho nu̱ Ximojoi

Kʼa Hesukristo i ndo̱ peʼtsi tse̱dí nihi i ndo̱ pädi kʼa da me̱fí pa da mända ra zo, xo nindi ʼna de yu̱ ndä i ʼbu̱hya i hñe̱hmi ngu gege. Xödíhu̱ Mateo 28:18 nihi ñähu̱ de gehna:

• ¿Ó kʼa tse̱dí i peʼtsi kʼa Hesu pa da mända má ra zo di geʼ kʼa tse̱dí i peʼtsi yu̱ ndä i ʼbu̱hkua ha nu̱ ximojoi?

Yu̱ ndä i ʼbu̱hkua ha nu̱ ximojoi ho̱nse i mända ha tengu yä hnini de nu̱ Ximojoi, pe da zo̱ʼ kʼa mpa da ma nkju̱ʼtsí. ¿Da thogi nkjanu̱ ko kʼa ro Reino kʼa Tsi Mähkí Tá? Xödíhu̱ Daniel 7:14 nihi ñähu̱ de gehna:

• ¿Ó ra ndo̱ zo ge kʼa ro Reino kʼa Tsi Mähkí Tá hin da nkju̱ʼtsí?

• ¿Ó ra ndo̱ zo ge nuná Reino da mända po goʼtho nu̱ Ximojoi?

5. Petsite da nkju̱ʼtsí yu̱ ndä de nu̱ ximojoi

¿Ó ra zo ge kʼa ro Reino kʼa Tsi Mähkí Tá da gu̱ʼtsí yu̱ gobierno i kjaya pa da mända gege? Núhu̱ nu̱ VIDEO nihi ñähu̱ de gehna:

VIDEO: ¿Té ʼbenkʼa ro Reino rä Tsi Mähkí Tá? (kʼa hiʼtsa i dé) (1:41)

• ¿Té ʼbenkʼa ra ntsʼo xi o̱te yu̱ gobierno i ʼbu̱hya?

Xödíhu̱ Eclesiastés 8:9 nihi ñähu̱ de gehna:

• ¿Gi beni ge kʼa ro Reino kʼa Tsi Mähkí Tá da gu̱ʼtsí yu̱ gobierno i kjaya pa da mända gege? ¿Ó i nkjapu̱?

6. Ku̱ da mända ha kʼa ro Reino kʼa Tsi Mähkí Tá i pädi kʼa di höníhu̱

Kʼa Hesu nu ma Ndähu̱, bi nkja ʼna kjäʼni bi ʼmu̱hkua ha nu̱ Ximojoi, nsohtho gege “i pädi ra zo ku̱ ra nthí di thogihu̱” (Hebreos 4:15). Kʼa Jehová xi juahni 144.000 yä ʼño̱ho̱ ko yä ʼbe̱hña pa da mändahu̱ ko kʼa Hesu. Gehya kjäʼni ba íhi “de goʼtho yä lengu hnini, yä hñä, yä hnini nihi yä ndo̱ hnini” (Apocalipsis 5:9).

• ¿Kja gi mpoho mu̱ gi pädi ge kʼa Hesu ko ku̱ da ma mända a jitsi i pädihu̱ ra zo kʼa di thogihu̱? ¿Ó i nkjapu̱?

7. Kʼa ro Reino kʼa Tsi Mähkí Tá i peʼtsi yä hmända má ra zo di geʼ ku̱ yo me̱hti yu̱ kjäʼni

Yu̱ gobierno i ʼbu̱hya i kjásehu̱ ku̱ yo hmända xo i benihu̱ ge da mötsí nihi da födí ku̱ yo hninihu̱. Nihi kʼa ro Reino kʼa Tsi Mähkí Tá i peʼtsise ku̱ yo hmända, nsohtho kʼa ro hnini petsite da o̱htehu̱. Xödíhu̱ 1 Corintios 6:9-11 nihi ñähu̱ de gehna:

• ¿Ankja gi beni ge da nkja nu̱ ximojoi mu̱ goʼtho yu̱ kjäʼni da o̱htebi ku̱ yo hmända kʼa Tsi Mähkí Tá?a

• ¿Kja ra zo ge kʼa Jehová da öhpí yu̱ kjäʼni da ʼmu̱i ha kʼa ro Reino da o̱hte ku̱ yo hmända? ¿Ó gi thädí nkjapu̱?

• ¿Ankja dra pädihu̱ ge yu̱ kjäʼni hi i o̱htebi ku̱ yo hmända kʼa Jehová da zo da mbödihu̱ ku̱ yo nzahki? (Núhu̱ nu̱ xe̱ni 11).

KʼA KO PÄDI

Kʼa ro Reino kʼa Tsi Mähkí Tá i nkja ʼna gobierno ge i ʼbu̱i a jitsi nihi da ma mända goʼtho nu̱ ximojoi.

Kʼa to núhu̱

• ¿Tó genku̱ da nkja ndä de kʼa ro Reino kʼa Tsi Mähkí Tá?

• ¿Ó kʼa ro Reino kʼa Tsi Mähkí Tá má ra zo di gehyu̱ gobierno de yu̱ kjäʼni?

• ¿Té i to̱ʼmi kʼa Jehová de ku̱ kjäʼni da ma ʼmu̱i ha kʼa ro Reino?

MÁ GI PÄDI DE GEHNA

Xödí kʼa bi úhtite kʼa Hesu de abu̱ di ʼmu̱i kʼa ro Reino.

“¿Kja i ʼbu̱i ambö ma korasohu̱ kʼa ro Reino kʼa Tsi Mähkí Tá?” (Artículo de jw.org)

¿Ó yu̱ testigo ga Jehová má i o̱htehu̱ kʼa ro Reino kʼa Tsi Mähkí Tá di gehyu̱ gobierno de yu̱ kjäʼni?

Hin ga ʼuegehu̱ de kʼa ro Reino kʼa Tsi Mähkí Tá 1:44

Nú kʼa i mä nu̱ Biblia de ku̱ 144.000 yä kjäʼni xi juahni kʼa Jehová pa da nkjahu̱ ndä ko kʼa Hesu.

“¿Tó ku̱ da maʼ a jitsi?” (Artículo de jw.org)

¿Té bi kjá ge ʼna ʼbe̱hña mi ʼo a födi di íhkji ge ho̱nse kʼa Jehová da kjá kʼa ra zo ha nu̱ ximojoi?

“Do pädi ankja da nkju̱ʼtsí yu̱ ra ntʼso” (¡Despertad!, noviembre de 2011)

Kʼa ro Reino kʼa Tsi Mähkí Tá bi mu̱dí bi mända ha nu̱ jitsi kʼa kjea 1914. Ha nuná kjea bi mu̱dí bi thege ku̱ mpa de yu̱ gobierno de yu̱ kjäʼni. ¿Ankja dra pädihu̱? Nuyá go mä núhu̱, kʼa bi mä nu̱ Biblia di thogi, ankja di ʼmu̱i yu̱ kjäʼni, nihi kʼa di thogi po goʼtho nu̱ ximojoi desde kʼa kjea 1914.

1. ¿Té bi mä nu̱ Biblia di thogi?

Kʼa libro ga Daniel ya mi mä ge kʼa ro Reino kʼa Tsi Mähkí Tá di mu̱dí di mända mu̱ di thege ku̱ “yohtó yä tiempo” (Daniel 4:16, 17). Mu̱ nga thogi tengu yä siglo, kʼa Hesu bi mä de genku̱ tiempo ngu ku̱ “tiempo bi the̱gí di mända yu̱ hnini”, nihi bi úhtite ge nuná tiempo ʼbe̱di di thege (Lucas 21:24). Ngu go ma núhu̱, ku̱ yohtó yä tiempo bi thege ha kʼa kjea 1914.

2. ¿Té xi thogi ha nu̱ ximojoi nihi ankja ga ʼmu̱i yu̱ kjäʼni desde kʼa kjea 1914?

Ku̱ yo te̱nite kʼa Hesu bi ʼyönihu̱: “¿Té ma seña da nigi mu̱ ti kohke nihi mu̱ ta guadi gehya mpa?” (Mateo 24:3). Kʼa Hesu bi dädí, ge ndunthi té di thogi mu̱ di mu̱dí di mända a jitsi ngu kʼa Ndä de kʼa ro Reino kʼa Tsi Mähkí Tá. Bi mä ge di nkja yä ndo̱ ntú, yä thuhu nihi yä ñähmojoi, (xödí Mateo 24:7). Nu̱ Biblia nihi bi mä a di nkja kʼa ro ʼmu̱i yu̱ kjäʼni “ha yu̱ ʼme̱fa mpa” kʼa di me̱hmu̱ “di nkja ra ndo̱ nthí” (2 Timoteo 3:1-5). Desde kʼa kjea 1914 xi thogi nuná nihi i nigi kʼa ra ntsʼo i pe̱hyu̱ kjäʼni.

3. ¿Ó mu̱ nga mu̱dí bi mända kʼa ro Reino kʼa Tsi Mähkí Tá má bi ntsʼoni nu̱ ximojoi?

Mu̱ nga nkja Ndä kʼa Hesu de kʼa ro Reino kʼa Tsi Mähkí Tá bi nkjá ʼna ndo̱ ntú a jitsi, kʼa Hesu bi ntúui kʼa zithú nihi ko ku̱ u̱xkjua. Pe kʼa zithú hin ga dähä, ngu i mä nu̱ Biblia, “gege bo tʼe̱ntí a joi, nihi ku̱ yo ánje bo tʼe̱ntíhu̱ ko gege” (Apocalipsis 12:9, 10, 12). Kʼa zithú i ndo̱ po̱ʼ ro kue xo i pädi ge ya hin da ndé da ma nku̱ʼtsí. Nsohtho i kjá ge po goʼtho nu̱ Ximojoi da thogi ku̱ ra ndo̱ nthí. ¡Po gehna ra ndo̱ ntsʼo ku̱ i thogi ha nu̱ Ximojoi! Pe kʼa ro Reino kʼa Tsi Mähkí Tá da ma gu̱ʼtsí goʼtho yu̱ ra ntsʼo i thogi.

MA PÄDIHU̱ MÁ RA NGU DE NU̱ TEMA

4. Yu̱ profecia i úhti ge kʼa Hesu bi mu̱dí bi mända kʼa kjea 1914

VIDEO: Kʼa ro Reino kʼa Tsi Mähkí Tá bi mu̱dí bi mända kʼa kjea 1914 (5:02)

Kʼa Tsi Mähkí Tá bi kjá di ʼui ʼna tʼí kʼa Nabucodonosor, ʼna ndä de kʼa hnini Babilonia pa di úhtibi kʼa di thogi. Ha nu̱ Biblia da zo go pädihu̱ de kʼa bi ʼuí kʼa ndä nihi de kʼa bi mä kʼa Daniel de genkʼa tʼí. Nuná i úhtigihu̱ ge kʼa tʼí mi geʼ kʼa ro reino kʼa Nabucodonosor nihi kʼa ro Reino de kʼa Tsi Mähkí Tá (xödíhu̱ Daniel 4:17).a

Xödíhu̱ Daniel 4:20-26. Nihi kju̱hu̱ kʼa diagrama pa gi thädíhu̱ gehya ntʼöni:

• A) ¿Té bi käʼti kʼa Nabucodonosor ha kʼa ro tʼí? (Núhu̱ nu̱ xe̱ni 20 ko nu̱ 21).

• B) ¿Té di thogi ko kʼa zaa? (Núhu̱ nu̱ xe̱ni 23).

• C) ¿Té di thogi mu̱ di guadi ku̱ “yohtó yä tiempo”? (Núhu̱ nu̱ xe̱ni 26).

Kʼa zaa de kʼa tʼí ko kʼa ro Reino kʼa Tsi Mähkí Tá

KʼA PROFECÍA (Daniel 4:20-36)

Mu̱ nga mända kʼa ndä

A) ʼNa zaa ra ndo̱ te

Mu̱ ya hin ga the̱gí di mända kʼa ndä

B) “Tse̱hkihu̱ kʼa zaa” nihi hie̱gíhu̱ “da thogi yohtó yä tiempo”

Mu̱ pi bi the̱gí di mända kʼa ndä

C) “Pi gi ma peʼtsi kʼa ri reino”

Kʼa ʼme̱tʼo bi thogi:

• D) ¿Tó mi genkʼa zaa? (Núhu̱ nu̱ xe̱ni 22).

• E) ¿Kjäʼmu̱ bi hie̱gí bi nkja ro ndä? (Xödíhu̱ Daniel 4:29-33).

• F) ¿Té bi thogi mu̱ nga thege ku̱ “yohtó yä tiempo”? (Xödíhu̱ Daniel 4:34-36).

KʼA ʼME̱TʼO BI THOGI

Mu̱ nga mända kʼa ndä

D) Nabucodonosor, ndä de kʼa hnini Babilonia

Mu̱ ya hin ga the̱gí di mända kʼa ndä

E) Kʼa Nabucodonosor bi logo ʼme̱fa de kʼa kjea 606 a.k.b nihi ya hin ga zo bi nkjá ndä po yohtó yä kjea

Mu̱ pi bi the̱gí di mända kʼa ndä

F) Kʼa Nabucodonosor ya hin ga logo, pi bi nkja ndä

Kʼa ʼme̱fa bi thogi:

• G) ¿Tó genku̱ mi nkja kʼa zaa? (Xödíhu̱ 1 Crónicas 29:23).

• H) ¿Kjäʼmu̱ ya hin ga nkjahu̱ ndä? ¿Ankja dra pädihu̱ ge ya hi mi mändahu̱ mu̱ nga ʼmu̱i kʼa Hesu nuua ha nu̱ Ximojoi? (Xödíhu̱ Lucas 21:24).

• I) ¿Kjäʼmu̱, nihi abu̱ pi bi ʼmu̱i nuná gobierno?

KʼA ʼME̱FA BI THOGI

Mu̱ nga mända kʼa ndä

G) Yä ndä israelihta mi nkjahu̱ de kʼa ro gobierno kʼa Tsi Mähkí Tá

Mu̱ ya hin ga the̱gí di mända kʼa ndä

H) Kʼa Jerusalén bi hño̱ʼte kʼa kjea 607 a.k.; yu̱ ndä israelihta ya hin ga zo ga mändahu̱ po 2.520 yä kjea

Mu̱ pi bi the̱gí di mända kʼa ndä

I) Kʼa Hesu bi mu̱dí bi mända ha nu̱ jitsi ngu kʼa Ndä de kʼa ro Reino kʼa Tsi Mähkí Tá kʼa kjea 1914

5. Ha kʼa kjea 1914 nu̱ ximojoi bi ndo̱ mbödi

Núhu̱ nu̱ VIDEO.

VIDEO: Ha kʼa kjea 1914 nu̱ ximojoi bi ndo̱ mbödi (1:10)

Kʼa Hesu bi mä a di nkja nu̱ ximöjoi mu̱ di mu̱dí di mända. Xödíhu̱ Lucas 21:9-11 nihi ñähu̱ de gehna:

• De kʼa i no̱ni nuná profecía, ndänaku̱ ko nú o ko o̱de i thogi nuyá?

Kʼa apóstol Pablo bi mä a di nkja yu̱ kjäʼni de yu̱ ʼme̱fa mpa. Xödíhu̱ 2 Timoteo 3:1-5 nihi ñähu̱ de gehna:

• De kʼa i no̱ni yu̱ xe̱ni i pe̱hyu̱ kjäʼni, ¿ndänaku̱ gi núge?

6. Mu̱ to pädihu̱ ge kʼa ro Reino kʼa Tsi Mähkí Tá ya i mända petsite má go pe̱hpíbihu̱

Xödíhu̱ Mateo 24:3, 14 nihi ñähu̱ de gehna:

• ¿Té ma chala ʼbe̱fí i úhtite ge kʼa ro Reino kʼa Tsi Mähkí Tá ya ra mända?

• ¿Ankja da zo gi mföxte pa gi kjá nuná chala ʼbe̱fí?

Kʼa ro Reino kʼa Tsi Mähkí Tá ya i mända, pe ʼbe̱di chichu̱ pa da mända goʼtho nu̱ ximojoi. Xödíhu̱ Hebreos 10:24, 25 nihi ñähu̱ de gehna:

• ¿Té ʼbenkʼa da zo go pe̱hmu̱ di goʼthohu̱ “mu̱ di núhu̱ ge kʼa mpa má ba kuati”?

KʼA KO PÄDI

Yu̱ profecía i no̱ni nu̱ Biblia ko goʼtho kʼa i thogi ha nu̱ ximojoi i nigi ge kʼa ro Reino kʼa Tsi Mähkí Tá ya i mända. Nugohe di íhkjihe ge i nkjapu̱, nsohtho di úhtibihe̱ yu̱ kjäʼni de genkʼa Reino, nihi di pöhme ha yu̱ hmu̱ntsi.

Kʼa to núhu̱

• ¿Té bi thogi mu̱ nga guadi ku̱ yohtó yä tiempo i no̱ni kʼa libro ga Daniel?

• ¿Ó gi íhkji ge kʼa ro Reino kʼa Tsi Mähkí Tá bi mu̱dí bi mända kʼa kjea 1914?

• ¿Ankja da zo gi úhtite ge gi íhkji ge kʼa ro Reino kʼa Tsi Mähkí Tá ya i mända?

MÁ GI PÄDI DE GEHNA

Xödí kʼa i mä ʼra yä kjäʼni de ankja xi mbödi nu̱ ximojoi desde kʼa kjea 1914.

“Ku̱ mpa bi mu̱dí bi thege kʼa hmädí mi tso yu̱ kjäʼni” (¡Despertad!, abril de 2007)

Nú ankja ga mötsí ʼna ʼño̱ho̱ kʼa profecía ga Mateo 24:14.

“Ndi ndo̱ mädí kʼa béisbol” (La Atalaya, núm. 3 2017)

¿Ankja dra pädihu̱ ge kʼa profecía i mä kʼa thehke 4 de kʼa libro ga Daniel nihi i ñä de kʼa ro Reino kʼa Tsi Mähkí Tá?

“¿Kjäʼmu̱ bi mu̱dí bi mända kʼa ro Reino kʼa Tsi Mähkí Tá? (ʼMe̱tʼo thehke)” (La Atalaya, 1 de octubre de 2014)

¿Ankja dra pädihu̱ ge ku̱ “yohtó yä tiempo” i no̱ni kʼa thehke 4 de kʼa libro ga Daniel bi thege ha kʼa kjea 1914?

“¿Kjäʼmu̱ bi mu̱dí bi mända kʼa ro Reino kʼa Tsi Mähkí Tá? (Yoho thehke)” (La Atalaya, 1 de noviembre de 2014)

Kʼa ro Reino kʼa Tsi Mähkí Tá ya i mända. Ya hin da ndé pa da kjá da mbödi goʼtho nu̱ Ximojoi. Ma núhu̱ ku̱ ra ndo̱ zo da o̱te kʼa ro Reino kʼa Tsi Mähkí Tá nihi ó ra zo ge nuke gi to̱ʼmi ko ndunthi mpoho.

1. ¿Té da me̱ʼ kʼa Reino kʼa Tsi Mähkí Tá pa ya hin da nkja yä ntú nihi da nkja kʼa ra zo ha nu̱ Ximojoi?

Ha kʼa ntú ga Armagedón, kʼa Hesu—kʼa Ndä de kʼa ro Reino kʼa Tsi Mähkí Tá—da ma gu̱ʼtsí yu̱ kjäʼni i kjáhu̱ ku̱ ra ntsʼo nihi da gu̱ʼtsí yu̱ gobierno (Apocalipsis 16:14, 16). Mu̱ ta zo̱ho̱ genkʼa mpa, gehna hñähtí ba íʼ ha nu̱ Biblia ya tro thogi: “ʼBe̱htho chichu̱, pa ge yä tsʼo kjäʼni da nkjoʼohu̱” (Salmo 37:10). Po madé nuná gobierno, kʼa Hesu da kjá ge yä kjäʼni da ʼmu̱i ra zo nihi kjoʼtho da ntú po goʼtho nu̱ Ximojoi (xödí Isaías 11:4).

2. ¿A da nkja nu̱ nzahki ha nu̱ Ximojoi mu̱ kʼa Tsi Mähkí Tá da kjá ngu i ne?

Mu̱ ta mända kʼa ro Reino kʼa Tsi Mähkí Tá, “kʼa joi da nkja yo me̱hti de yu̱ kjäʼni i pe̱hmu̱ kʼa ra zo xo gegehu̱ da ma ʼmu̱fu̱ pa zäi” (Salmo 37:29). ¡Mbeni a da nkja nu̱ nzahki mu̱ goʼtho yu̱ kjäʼni da kjáhu̱ kʼa ra zo, da mädíhu̱ kʼa Jehová nihi mu̱ da nmädíhu̱ ʼra ko maʼra! Da nkja ra ndo̱ nchala ¿Häna? Nindi ʼna da hniní nihi goʼtho yu̱ kjäʼni zäi da ʼmu̱i.

3. ¿Té da me̱fí kʼa ro Reino kʼa Tsi Mähkí Tá mu̱ da gu̱ʼtsí yu̱ tsʼo kjäʼni?

Mu̱ da gu̱ʼtsí yu̱ tsʼo kjäʼni, kʼa Hesu da nkja Ndä po 1.000 yä kjea. Genku̱ mpa, kʼa Hesu ko ku̱ 144.000 da nkja Ndä ko gege, da mötsí yu̱ kjäʼni pa ya hin da meʼtsihu̱ kʼa tsʼohki. Mu̱ ta thege genku̱ kjea, goʼtho nu̱ Ximojoi da gohí ra nchala, ʼna luga abu̱ yu̱ kjäʼni da ndo̱ mpohmu̱ xo i o̱htehu̱ ku̱ yo hmända kʼa Jehová. Nkjanu̱, kʼa Hesu da koʼtsíbi kʼa gobierno de kʼa ro Tá, Jehová. Nihi kʼa ro thuhu de kʼa Tsi Mähkí Tá da ma tʼaxki ngu hi xi nkja (Mateo 6:9, 10). Nkjanu̱ da hnú ge kʼa Jehová i nkja ʼna chala Ndä nihi ge i födí kʼa ro hnini. ʼMe̱fa kʼa Jehová da gu̱ʼtsí kʼa Zithú ko yu̱ ʼu̱xkjua, nihi ko ku̱ kjäʼni hin da ne da ʼo̱hte kʼa Jehová (Apocalipsis 20:7-10). Goʼtho ku̱ ra zo da o̱te kʼa Reino de kʼa Tsi Mähkí Tá hin da thege.

MA PÄDIHU̱ MÁ RA NGU DE NU̱ TEMA

4. Kʼa ro Reino kʼa Tsi Mähkí Tá da ma gu̱ʼtsí yu̱ gobierno de yu̱ kjäʼni

“Nu̱ ʼño̱ho̱ xi doʼmi nu̱ ʼño̱ho̱ pa da kjáhpi kʼa ra ntsʼo” (Eclesiastés 8:9). Po madé nu̱ ro Reino, kʼa Jehová da ma gu̱ʼtsí goʼtho yu̱ ra ntsʼo i thogi nuyá.

Xödíhu̱ Daniel 2:44 ko nu̱ 2 Tesalonicenses 1:6-8, nihi ñähu̱ de gehna:

• ¿Té da ma kjáhpi kʼa Jehová ko kʼa Hesu, yu̱ gobierno de yu̱ kjäʼni ko yu̱ i fötsí?

• ¿Ankja i föxkí kʼa ko pädí de kʼa Jehová ko kʼa Hesu ge kʼa da ma kjáui ra ndo̱ zo pa goʼtho yu̱ kjäʼni?

5. Kʼa Hesu genkʼa Ndä má ra zo

Mu̱ ta nkja Ndä kʼa Hesu, da ma ʼuni goʼtho kʼa i höní ku̱ kjäʼni da ʼmu̱hkua ha nu̱ Ximojoi. Núhu̱ nu̱ VIDEO pa hin gi däbenihu̱ ankja kʼa Hesu i ne da mötsí yu̱ kjäʼni, nihi ankja kʼa Tsi Mähkí Tá xi ʼuni kʼa tse̱dí pa da kjá.

VIDEO: Kʼa Hesu bi úhtite kʼa da kjá kʼa ro Reino (1:13)

Ku̱ bi o̱te kʼa Hesu mu̱ nga ʼmu̱hkua ha nu̱ Ximojoi bi úhtigihu̱ kʼa da ma o̱te kʼa ro Reino. De yu̱ hñähtí ba íhkua, ¿ndänaku̱ má gi ne gi núge? Xödíhu̱ goʼtho yu̱ xe̱ni abu̱ gi töti gehya hñähtí.

6. Kjamädí po kʼa ro Reino kʼa Tsi Mähkí Tá, go pe̱ʼtsihu̱ yä chala mpa pa ri mäní

VIDEO: Mu̱ da thogi kʼa ra nthí, ma benihu̱ kʼa chala nzahki da nkja pa ri mäní (4:38)

Xödíhu̱ Salmo 145:16 nihi ñähu̱ de gehna:

• ¿Té gi tso mu̱ gi pädi ge kʼa Jehová da ma ʼuni goʼtho “kʼa da höní ku̱ da ma ʼmu̱i ha nu̱ ximojoi”?

KʼA KO PÄDI

Nu̱ ro Reino kʼa Tsi Mähkí Tá da ma kjá kʼa mi beni. Da ma kjá ge goʼtho nu̱ ximojoi dra nchala, abu̱ yu̱ kjäʼni zäi da xo̱hkimbeni kʼa Jehová.

Kʼa to núhu̱

• ¿Té da me̱ʼ kʼa ro Reino kʼa Tsi Mähkí Tá pa da duhkí kʼa ro thuhu kʼa Jehová?

• ¿Ó di íhkjihu̱ ge kʼa ro Reino kʼa Tsi Mähkí Tá da ma o̱te goʼtho ku̱ i ñähtí nu̱ Biblia?

• De goʼtho kʼa da ma o̱te nu̱ ro Reino kʼa Tsi Mähkí Tá, ¿ndänakʼa má gi ne gi núge?

MÁ GI PÄDI DE GEHNA

Pädi té ʼbenkʼa Armagedón.

“¿Té ʼbenkʼa Armagedón?” (Artículo de jw.org)

Nú ku̱ da thogi mu̱ tra nkjá kʼa “ndo̱ tribulación” bi mä kʼa Hesu di thogi (Mateo 24:21).

“¿Té ʼbenkʼa ndo̱ tribulación?” (Artículo de jw.org)

¿Ankja yu̱ miní da zo da mbeni ge ya ra ʼbu̱fu̱ ha kʼa Chala Joi da ma o̱te kʼa Reino?

Mbeni ya kra ʼbu̱i ha kʼa Chala Joi (1:50)

Nú kʼa mi mä ʼna ʼño̱ho̱: “mi kjá gua ʼñonfeni dunthi yä ntʼöni”, pädi ankja ʼna políhtiko bi döti kʼa ra zo mi höní.

“Nu̱ Biblia bi kjá di mbödihu̱ ku̱ yo nzahki” (La Atalaya, 1 de enero de 2012)