NTʼUDI 29

¿I kja nzahki ʼme̱fa de nu̱ dú?

Edición impresa

¿Xi dú ʼna ri miní gi ndo̱ mädí? Ra ndo̱ nthí kʼa go thogi, mu̱ i nkjanu̱ ko ʼñöni “¿I kja nzahki ʼme̱fa de nu̱ dú? ¿Pi da zo go käʼtihu̱ ku̱ ma miníhu̱ xi dú?”. Ndunthi yä kjäʼni xi ʼñönihu̱ gehya ntʼöni. Ha nuná ntʼudi ko kʼa piʼna, go ma núhu̱ ku̱ thädí ra ndo̱ zo i nahkígihu̱ nu̱ Biblia.

1. ¿I kja nzahki ʼme̱fa de nu̱ dú?

Kʼa Hesu bi hie̱ti nu̱ dú ngu ʼna tʼähä. ¿Ankja ga hñe̱hmi nu̱ dú ko nu̱ tʼähä? Mu̱ ʼna kjäʼni ra ähä hi i pädi kʼa ra thogi abu̱ ra ʼbu̱i. Mu̱ ʼna kjäʼni i tú ya xaʼtho te i tso, nihi ya hi i tso kʼa ra ʼu̱. Nu̱ Biblia i mä ge “yu̱ kjäʼni xi dú ya xaʼtho te i pädihu̱” (xödí Eclesiastés 9:5).

2. ¿Ó i föxkíhu̱ mu̱ go pädihu̱ kʼa hi ro ʼbe̱thrí de nu̱ dú?

Dunthi yä kjäʼni i tsúhu̱ nu̱ dú nihi yu̱ ánimä. Mu̱ nuke gi tso nkjanu̱, kʼa i ma nu̱ Biblia de nu̱ dú da zo da möxkí, kʼa Hesu bi mä: “Kʼa hi ro ʼbe̱thrí da xöhtíkihu̱” (Juan 8:32). Pe mahke ʼra yä íhkji i úhtitehu̱ nkjanu̱, nu̱ Biblia hi i úhtite ge yu̱ kjäʼni i peʼtsihu̱ ʼna alma hi i tú. Nkjanu̱ di pädihu̱ ge nindi ʼna kjäʼni xi dú i thogi ku̱ ra ntsʼo. Ngu to núhu̱, yu̱ xi dú ya xäʼtho te i pädihu̱, nihi xäʼtho te da kjágihu̱. Nsohtho hi petsite go xöhpíhu̱, hin go kjáhpibihu̱ yä tsʼonigo nihi hin go xo̱hkibenihu̱ pa da ʼmu̱fu̱ ra zo o pa hin da kjáhu̱ yo kue.

ʼRa yä kjäʼni i mähmu̱ ge da zo da ñähu̱ ko yu̱ kjäʼni xi dú, pe nuná ro ʼbe̱thrí. Ngu to núhu̱, yu̱ kjäʼni xi dú “ya xaʼtho te i pädihu̱”. Yu̱ kjäʼni ge i íhkji i ñähu̱ ko yu̱ ánimä ra ñähu̱ ko yu̱ ʼu̱xkjua, xo yu̱ ʼu̱xkjua ra kjáhu̱ ge yu̱ kjäʼni da benihu̱ ge kʼa kjäʼni xi dú ra ñä. Nsohtho, mu̱ go pädihu̱ kʼa ra zo de nu̱ dú da möhkígihu̱ de yu̱ ʼu̱xkjua. Kʼa Jehová i xihkígihu̱ ó hi ra zo go nzohmu̱ o go ñähu̱ ko yu̱ kjäʼni xi dú, xo i pädi ge ra ndo̱ ntsʼo mu̱ go kjáhu̱ nkjanu̱ (xödí Deuteronomio 18:10-12).

MA PÄDIHU̱ MÁ RA NGU DE NU̱ TEMA

Ma pädihu̱ má ra zo kʼa i úhtite nu̱ Biblia de nu̱ dú. Nihi ma núhu̱, té da zo gi kjá pa má da ze̱di nu ri íhkji mu̱ gi pädi ge i ʼbu̱i ʼna Tsi Mähkí Tá i mähkígihu̱, nihi hi i kjáhpi ku̱ ra ntsʼo yu̱ kjäʼni xi dú.

ʼNa ʼño̱ho̱ ra mii ko ku̱ yoho yo bähtsí abu̱ ra tʼo̱te kʼa ro bilorio de kʼa ro ʼbe̱hña, ro mé ku̱ yo bähtsí. Ku̱ yo amigo nihi ku̱ yo miní ra ʼbu̱fu̱nu̱ pa da jóhtihu̱.

3. Kʼa i thogi mu̱ ʼna kjäʼni i tú

Ndunthi yä kjäʼni de nu̱ ximojoi hi i nthe̱ kʼa i mähmu̱ de kʼa i thogi mu̱ di túhu̱. Pe, hi ra zo goʼtho ku̱ i íhkjihu̱.

Abu̱ gi ʼbu̱hke, ¿té íhkji yu̱ kjäʼni de yu̱ xi dú?

Pa gi pädihu̱ kʼa i úhtite nu̱ Biblia, núhu̱ nu̱ VIDEO.

VIDEO: ¿Té i thogi ko yu̱ kjäʼni mu̱ i tú? (nu̱ hiʼtsa i dé) (1:19)

Yä nkʼoi de nu̱ video ‘¿Té i thogi ko yu̱ kjäʼni mu̱ i tú? (nu̱ hiʼtsa i dé)’: 1. ʼNa kjäʼni xi dú ra ʼbe̱ni ha ʼna hospital. 2. Ha ʼna tren, ʼna ʼño̱ho̱ ra mii nihi ra ähä a madé de yoho yä kjäʼni.

Xödíhu̱ Eclesiastés 3:20 nihi ñähu̱ de gehna:

Ngu i mä nu̱ xe̱ni, ¿té i thogi mu̱ ʼna kjäʼni i tú?
Mu̱ ʼna kjäʼni i tú, ¿ri maʼ pi ʼna luga abu̱ pi da zo da ʼmu̱i?

Nu̱ Biblia i xihkígihu̱ de kʼa ro dú kʼa Lázaro, ʼna ro chala amigo kʼa Hesu. ¿Ankja bi mä kʼa Hesu ge mi ʼbu̱i kʼa Lázaro? Xödíhu̱ Juan 11:11-14 nihi ñähu̱ de gehna:

¿Té ga he̱ti kʼa Hesu ko nu̱ dú?
¿Té i úhtigihu̱ de yu̱ kjäʼni xi dú ko kʼa bi mä kʼa Hesu?
¿Nuke té gi mä de kʼa i no̱ni nu̱ Biblia de nu̱ dú?

4. Kʼa to pädihu̱ ra zo de nu̱ dú i kjá hin go ntsúhu̱

Mu̱ di pädihu̱ kʼa hi ro ʼbe̱thrí de nu̱ dú, i kjá ya hin go tsúhu̱ yu̱ kjäʼni xi dú. Xödíhu̱ Eclesiastés 9:10 nihi ñähu̱ de gehna:

¿I tso da kjágihu̱ ku̱ ra ntsʼo yu̱ kjäʼni xi dú?

Kʼa i úhtigihu̱ nu̱ Biblia de nu̱ dú i föxkígihu̱ pa hin go tsúhu̱ yu̱ kjäʼni xi dú, nkjanu̱ hin go kjáhpibihu̱ yä tsʼonigo pa da ʼmu̱fu̱ ra zo nihi pa hin da tsu̱htehu̱. Xödíhu̱ Isaías 8:19 ko kʼa Apocalipsis 4:11, nihi ñähu̱ de gehna:

¿Té i tso kʼa Jehová mu̱ ʼna kjäʼni i höní kʼa ro mföxte de yu̱ kjäʼni xi dú nihi mu̱ da xo̱hkimbenihu̱?

Yä nkʼoi de yu̱ tsʼonigo i tʼo̱te pa da nxo̱hkimbenihu̱ yu̱ kjäʼni xi dú: 1. ʼNa ʼño̱ho̱ ra ndändiahmu abu̱ xi tʼogí ʼna kjäʼni xi dú nihi xi bo̱ʼtsebi yä hñuni 2. Hñu yä ʼño̱ho̱ ra nifu̱ ko ku̱ yo dähtuhu̱ i he̱hu̱ ha kʼa ro hninihu̱ 3. Ndunthi yä kjäʼni xi gohtihu̱ yo dö ko yä maskara ga kalabera nihi ba hähu̱ yä bándera i kuati ya ndo̱ kalabera kʼa mpa ánimä. — Kʼa to pädihu̱ de nu̱ dú i föxkígihu̱ pa ya hin go kjáhu̱ yu̱ tsʼonigo ge hi i nú ra zo kʼa Jehová.

5. Kʼa to pädihu̱ de nu̱ dú i jóhtigihu̱

Ndunthi yä kjäʼni i tʼúhti ge mu̱ ta dúhu̱ da ma tʼe̱ntí ha nu̱ tsibí po goʼtho ku̱ ra ntsʼo bi o̱tehu̱ ha yo nzahki. Pe di mpohmu̱ mu̱ di pädihu̱ ge nindi ʼna kjäʼni da ma thogi ku̱ ra ntsʼo mu̱ ta dú, nindi yu̱ kjäʼni bi o̱tehu̱ ku̱ ra ndo̱ ntsʼo. Xödíhu̱ Romanos 6:7 nihi ñähu̱ de gehna:

Ngu i mä nu̱ Biblia, mu̱ ʼna kjäʼni i tú ya hi i peʼtsi kʼa tsʼohki. Ko gehna, ¿gi beni ge yu̱ kjäʼni xi dú ra nkjáhpi ku̱ ra ntsʼo pa da gutʼihu̱ goʼtho ku̱ ra ntsʼo bi o̱tehu̱ ha yo nzahki?

Mu̱ má go pädihu̱ de kʼa Jehová, má go pädihu̱ ge gege hi i kjáhpi kʼa ra ntsʼo yu̱ kjäʼni xi dú. Xödíhu̱ Deuteronomio 32:4 ko kʼa 1 Juan 4:8, nihi ñähu̱ de gehna:

¿Ngu i mä gehya xe̱ni, kja kʼa Tsi Mähkí Tá da he̱gí da nkjáhpi kʼa ra ntsʼo yu̱ kjäʼni xi dú?
¿Nuke gi beni ge i jóhtigihu̱ ko kʼa to pädihu̱ de nu̱ dú? ¿Ó i nkjapu̱?

KʼA I MÄHMU̱ PIʼRA YÄ KJÄʼNI: “Di tsú kʼa go ma thogi mu̱ ta tú”.