NTʼUDI 42
¿Té i mä nu̱ Biblia de yu̱ xi nthähtí nihi de yu̱ hi xi nthähtí?
Ha ʼra yä hnini, yu̱ kjäʼni i benihu̱ ge pa da zo da mpohmu̱ petsite da nthähtíhu̱. Pe hi goʼtho yu̱ nthähtí i mpohmu̱ nindi yu̱ hi xi nthähtí i nsentihu̱. Nu̱ Biblia i mä ge nu̱ nthähtí nihi mu̱ ʼna hi i nthähtí i nkja ʼna regalo de kʼa Tsi Mähkí tá.
1. ¿Té da dähä ʼna kjäʼni mu̱ hin da nthähtí?
Nu̱ Biblia i mä: “Nu̱ i nthähtí i kjá ra zo, pe kʼa hi i nthähtí i kjá kʼa má ra zo” (xödí 1 Corintios 7:32, 33, 38). ¿Té i ne da mä ge ʼna kjäʼni “i kjá kʼa má ra zo” mu̱ hi i nthähtí? Yu̱ kristiano hi i nthähtí hi i ʼñönfeni po ʼna nzoya o po ʼna ʼbe̱hña. Nsohtho, gegehu̱ má i tso da kjáhu̱ kʼa i nehu̱. ʼRa de gehya kristiano má i tso da pe̱hpíbihu̱ kʼa Jehová, kjangutho da möhmu̱ piʼna luga pa da úhtitehu̱ yu̱ chala noticia. Pe kʼa má ra zo da kjá yu̱ hi xi nthähtí, má da zo da nxödíhu̱ pa da ze̱dí kʼa ro íhkji i peʼtsibihu̱ kʼa Jehová.
2. ¿Té da dähä ʼna kjäʼni mu̱ xi nthähtí ngu i ne kʼa Jehová?
Yu̱ hi i nthähtí i pe̱hmu̱ ra zo nihi yu̱ xi nthähtí da zo da kjáhu̱ ndunthi yä chala ʼbe̱fí. Xo nu̱ Biblia i mä ge “má ra zo da ʼmu̱i yoho di geʼ mu̱ ʼna da ʼnase” (Eclesiastés 4:9). I nkjanu̱ ko goʼtho yu̱ nthähtí i ʼo̱htebihu̱ yo hmända ká Jehová. Yu̱ xi nthähtí ngu i ne kʼa Jehová, i ndo̱ mpohmu̱ i ndo̱ nmädíhu̱ nihi i mfödíhu̱. Nsohtho, gehya kjäʼni má i ʼbu̱fu̱ ra zo di gehyu̱ ya i ʼbu̱fu̱ pe hi xi nthähtíhu̱. Nihi yu̱ xi nthähtí ngu i ne kʼa Jehová, ku̱ yo bähtsí má i mpohmu̱.
3. ¿Té i beni kʼa Jehová de nu̱ nthähtí?
Mu̱ kʼa Jehová bi kjähpí kʼa ʼme̱tʼo nthähtí, bi mä: “Nu̱ ʼño̱ho̱ da zogi nu̱ ro tá ko nu̱ ro mé” pa “da ʼmu̱bi ko kʼa ro ʼbe̱hña” (Génesis 2:24). Kʼa Jehová i ne ge nu̱ nzoya ko nu̱ ro ʼbe̱hña da nmädíui nihi zäi da ʼmu̱bi ra zo. Nihi i mä ge ho̱nse da zo da ʼuegeui mu̱ ʼna de ku̱ xi nthähtí da ʼöbi kʼo piʼna kjäʼni. Pe mahke nkjanu̱, kʼa Tsi Mähkí Tá i he̱gí ge kʼa nzoya o kʼa ʼbe̱hña hi xi kjá kʼa tsʼohki da mbeni kja i ne da ʼuege de kʼa xi kjá kʼa ra ntsʼo (Mateo 19:9).a Kʼa Jehová hi i nú ra zo mu̱ yu̱ kristiano da nthähtí ko yoho o hñu yä ʼño̱ho̱ o yä ʼbe̱hña (1 Timoteo 3:2).
MA PÄDIHU̱ MÁ RA NGU DE NU̱ TEMA
Ma núhu̱ té da zo gi pe̱hke—mu̱ ko nthähtí o ʼbe̱di gi nthähtí—pa gi mpoho nihi pa gi kjá da mpoho kʼa Jehová.
4. Pe̱hpí ra zo kʼa Jehová mu̱ ʼbe̱htho gi nthähtí
Kʼa Hesu mi nú ra zo mu̱ ʼna kjäʼni hi mi nthähtí, mi nú ngu ʼna regalo (Mateo 19:11, 12). Xödíhu̱ Mateo 4:23 nihi ñähu̱ de gehna:
Kʼa Hesu hi ka nthähtí, nsohtho ¿ankja má bi pe̱hpíbi kʼa ro Tá nihi ankja ga mötsí piʼra yä kjäʼni?
Yu̱ kristiano hi xi nthähtí da zo da mpohmu̱ mu̱ da pe̱hpíbihu̱ kʼa Tsi Mähkí Tá ngu bi kjá kʼa Hesu. Núhu̱ nu̱ VIDEO nihi ñähu̱ de gehna:
¿Ankja má da zo da pe̱hpíbihu̱ kʼa Jehová yu̱ kristiano hi i nthähtí?
¿Ngi pädina?
Nu̱ Biblia hi i mä tengu kjea da e̱ ʼna kjäʼni pa da nthähtí. Pe kʼa hä i mä, ge go to̱ʼmihu̱ “ta mu̱ go mbenihu̱ ra zo kʼa go pe̱hmu̱”, xo yu̱ bähtsí hi i benihu̱ ra zo kʼa i nehu̱ ho̱nse i höníhu̱ tó da ʼöbi (1 Corintios 7:36).
5. Juahni ra zo tó gi ne gi nthähtíui
Mu̱ gi juahni ra zo tó gi ne gi nthähtíui, genkä má ra zo gi kjá ha nu̱ ri nzahki. Xödíhu̱ Mateo 19:4-6, 9 nihi ñähu̱ de gehna:
¿Ó ʼna kristiano petsite da beni ra zo kʼa da me̱fí mu̱ i ne da nthähtí?
Nu̱ Biblia da zo da möxkí pa gi pädi té ma tsi chala ʼmu̱i da zo da meʼtsi ʼna chala ʼño̱ho̱ o ʼna chala ʼbe̱hña. Pe kʼa má ra zo gi kjá, hiöní ʼna tó i mädí kʼa Jehová.b Xödíhu̱ 1 Corintios 7:39 ko nu̱ 2 Corintios 6:14. ʼMe̱fa ñähu̱ de gehna:
Mu̱ ʼna chala kristiano i ne da nthähtí, ¿ó ra zo da nthähtíui ko ʼna kjäʼni i íhkji kʼa i íhkji gege?
Mu̱ i ne da nthähtí ko ʼna kjäʼni hi i mädí kʼa Jehová, ¿té gi beni da zo kʼa Jehová?
Mu̱ yoho yä zuʼui hi ra ngentho da pe̱hmí, hin da pe̱hmí ra zo, nihi i nkjanu̱ mu̱ ʼna kristiano da nthähtí ko ʼna kjäʼni hi mädí kʼa Jehová, yohmí da thogiui ku̱ ra ndo̱ nthí.
6. Nú nu̱ nthähtí ngu ga nú kʼa Jehová
Ha kʼa hnini ga Israel, ʼra yä ʼño̱ho̱ mi ʼuegehu̱ de kʼa ro ʼbe̱hña mu̱ gegehu̱ mi nehu̱. Xödíhu̱ Malaquías 2:13, 14, 16 nihi ñähu̱ de gehna:
¿Ó kʼa Jehová hi i nú ra zo mu̱ ʼna kjäʼni da ʼuege ko kʼa xi nthähtí mahke hi ʼbu̱i ʼna rraso i mä nu̱ Biblia?
Mu̱ ʼna kjäʼni i höti ko kʼa xi nthähtí o i ne da ʼuegeui, i kjá da ndo̱ nsenti kʼa hi xi kjá kʼa tsʼohki nihi da ndo̱ nsenti ku̱ yo bähtsí.
Núhu̱ nu̱ VIDEO nihi ñähu̱ de gehna:
Mu̱ nuke ko nthähtí ko ʼna kjäʼni hi i mädí kʼa Jehová, ¿té da zo gi kjá pa zäi da mpoho kʼa ri nthähtí?
7. ʼYo̱hte ku̱ yo hmända i mä kʼa Jehová de nu̱ nthähtí
ʼRa i tsohu̱ ra ndo̱ nthí da o̱htehu̱ ku̱ yo hmända i mä kʼa Jehová de nu̱ nthähtí.c Pe gege i kjähpí goʼtho ku̱ i o̱te tse̱dí pa da kjáhu̱ gehya hmända. Núhu̱ nu̱ VIDEO.
Xödíhu̱ Hebreos 13:4 nihi ñähu̱ de gehna:
¿Nuke gi beni ge ku̱ yo hmända kʼa Jehová de nu̱ nthähtí da zo da möxkígihu̱? ¿Ó gi beni nkjänu̱?
Kʼa Jehová i ne ge yu̱ kristiano da möhmu̱ ko yu̱ áhte pa da tʼuni kʼa ro he̱ʼmi abu̱ i mä ge ya xi nthähtíhu̱ o mu̱ i ne da ʼuegehu̱, xo gehya he̱ʼmi i tʼödí po goʼtho nu̱ ximojoi. Xödíhu̱ Tito 3:1 nihi ñähu̱ de gehna:
Mu̱ nuke ya ko nthähtí, ¿kja gi pädi ge yu̱ áhte i pädi ge ko nthähtí ra zo nihi ya xi tʼakí kʼa ri he̱ʼmi?
KʼA I ʼÑÖNIHU̱ PIʼRA YÄ KJÄʼNI: “¿Té go tähä mu̱ go nthähtí? ¿Kja ra zo ta go kähu̱ ʼna he̱ʼmi?”.
¿Té da zo gi thähke?
KʼA KO PÄDI
Mu̱ ʼna kjäʼni xi nthähtí nihi ku̱ hiʼbe i nthähtí i nkja ʼna regalo ri ʼní de kʼa Jehová. Yu̱ xi nthähtí ko yu̱ ʼbe̱htho da nthähtí nihi da zo da mpohmu̱ mu̱ da kjáhu̱ ngu i mä kʼa Jehová.
Kʼa to núhu̱
¿Ankja da gu̱ ra zo kʼa ro nzahkí ʼna kjäʼni ʼbe̱di da nthähtí?
¿Ó i mä nú Biblia ge yu̱ kristiano ho̱nse da zo da nthähtí ko ʼna kjäʼni i íhkji kʼa i íhkji gege?
Ngu i mä nu̱ Biblia, ¿ndänakä rraso i ʼbu̱i pa da zo da ʼuege ʼna nthähtí?
MA GI PÄDI DE GEHNA
¿Té i ne da mä gi nthähtí ho̱nse “ha nu̱ Nzoya”?
“Kʼa i ʼñöni ku̱ i xödí yu̱ ma he̱ʼmihu̱” (La Atalaya, 1 de julio de 2004)
Nú kʼa bi thogi ʼra yä ku mi ne di nthähtí nihi ko ku̱ ya xi nthähtí pa gi pädi té gi pe̱fí mu̱ gi beni gi nthähtí.
Nú ó ʼna ku i mä ge nuyá kʼa Jehová xi ʼuni kʼa má ra zo di geʼku̱ bi zogi.
Mi to̱ʼmi ge kʼa xuhtsí mi ʼñoui di bädi de kʼa Jehová (1:56)
¿Té ʼbenkä da hñä ro guenda ʼna kristiano mu̱ i ne da ʼuege ko kʼa xi nthähtíui?
“Ma núhu̱ ra zo ‘kʼa xi kjähpí kʼa Tsi Mähkí Tá’” (La Atalaya, diciembre de 2018)
a Ha nu̱ nota 4 gi töti yä mföxte mu̱ ʼna i ne da ʼuege de kʼa ro nthähtí (mahke hi xi o̱teui ʼna tsʼohki).
b Ha ʼra yä hnini, yu̱ tá i juahni tó da nthähtíui ko ku̱ yo bähtsí. Pe yu̱ chala tá ʼme̱tʼo i hähu̱ ro guenda kja i mädí kʼa Jehová kʼa tó i ne da nthähtíui ku̱ yo bähtsí. Xo nuná má ra zo pa gehya tá, mahke di hähu̱ domi gua hina.
c Mu̱ nuke hi ko nthähtí ko kʼa gi ʼbu̱bí, ho̱nse nuke da zo gi mä kja gi ne gi nthähtíui gua gi ne gi ʼuegeui.