NTʼUDI 41
¿Té i mä nu̱ Biblia mu̱ ʼna ʼbe̱hña ko ʼna ʼño̱ho̱ i ʼöbi?
Dunthi yä kjäʼni hi i ne da ñähu̱ mu̱ ʼna ʼbe̱hña ko ʼna ʼño̱ho̱ i ʼöbi. Pe, mu̱ nu̱ Biblia i ñä de gehna tema i ñä ra tsi zo. Xo kʼa i mä de gehna tema i ndo̱ föxkígihu̱. Nuná ra ndo̱ zo, xo nu̱ Biblia ri ʼníhi de kʼa Jehová, gege i nahkígihu̱ nu̱ ma nzahkihu̱ nihi i pädi té ʼbenkä má ra zo pa nugohu̱. Gege i úhtigihu̱ ankja da zo go kjáhu̱ da mpoho ko kʼa di pe̱hmu̱ nihi kʼa da möxkígihu̱ pa zäi go mpohmu̱.
1. ¿Ankja i nú kʼa Jehová mu̱ ʼna ʼbe̱hña ko ʼna ʼño̱ho̱ i ʼöbi?
Nuná i nkja ʼna regalo de kʼa Jehová. Gege i ne ge ʼna ʼbe̱hña ko ʼna ʼño̱ho̱ xi nthähtíui da zoui ra tsi zo mu̱ i ʼöbi. Nuná regalo hi ho̱nse xi nkjá pa da ʼñihmi yo bähtsí yu̱ xi nthähtí nihi pa da úhtiteui ge i nmädíui, nkjanu̱ da mpohoui ngu i ne kʼa Jehová. Nsohtho nu̱ ro hñä kʼa Tsi Mähkí Tá i mä: “Mpoho ko kʼa ri ʼbe̱hña go nthähtí mu̱ ngro bähtsítho” (Proverbios 5:18, 19). Kʼa Jehová i to̱ʼmi ge yu̱ kristiano hin da ʼuege ko kʼa xi nthähtí. Nsohtho ʼna kristiano hi i ʼñoui ko piʼna kjäʼni hi xi nthähtíui (xödí Hebreos 13:4).
2. ¿Té ʼbenkä inmoralidad sexual?
Nu̱ Biblia i mä ge “yu̱ kjäʼni i höní tó da ʼöbi pa da kjáhu̱ kʼa ra ntsʼo [...] hin da tʼúni kʼa ro Reino kʼa Tsi Mähkí Tá” (1 Corintios 6:9, 10). Ku̱ tó bi hutsí nu̱ Biblia bi gu̱hu̱ kʼa hñä griega pornéia mu̱ nga ñähu̱ de kʼa inmoralidad sexual. I tʼimbi inmoralidad sexual 1) mu̱ ʼna ʼbe̱hña ko ʼna ʼño̱ho̱ hi xi nthähtíui i ʼöbi,a 2) mu̱ yoho yä ʼño̱ho̱ i ʼöbi pa da kjáui kʼa ra ntsʼo nihi 3) mu̱ ʼna kjäʼni i ntaxíui ko ʼna zuʼui. Mu̱ hin go kjáhu̱ kʼa to no̱nihu̱, go kjáhu̱ da mpoho kʼa Jehová nihi má go ʼmu̱fu̱ ra zo (1 Tesalonicenses 4:3).
MA PÄDIHU̱ MÁ RA NGU DE NU̱ TEMA
Ma núhu̱ té da zo gi pe̱hke pa hin gi kjá kʼa inmoralidad sexual nihi té gi tähä mu̱ hin gi poxki nu̱ ri mfeni ko nu̱ ri ʼmu̱i.
3. ʼRagi de nu̱ inmoralidad sexual
ʼNa ʼño̱ho̱ mbro thuhu José bi ʼragi pa hin di poxki kʼa ro ʼmu̱i. Xödíhu̱ Génesis 39:1-12 nihi ñähu̱ de gehna:
¿Ó bi ʼragi kʼa José? (Núhu̱ nu̱ xe̱ni 9).
¿Gi beni ge bi kjá kʼa ra zo kʼa José? ¿Ó i nkjapu̱?
¿Ankja yu̱ bähtsí da zo da mipiahu̱ kʼa bi me̱ʼ kʼa José nihi da ʼragihu̱ de nu̱ inmoralidad sexual? Núhu̱ nu̱ VIDEO.
Kʼa Jehová i ne go tsʼohu̱ nu̱ inmoralidad sexual. Xödíhu̱ 1 Corintios 6:18 nihi ñähu̱ de gehna:
¿Té da kjá ge ʼna kjäʼni da o̱te kʼa ra ntsʼo ngu nu̱ inmoralidad sexual?
Nuke, ¿ankja da zo gi ʼragi de nu̱ inmoralidad sexual?
4. Nuke da zo gi kju̱ʼtsí yu̱ ri tsʼo mfeni ngu nu̱ inmoralidad
¿Té ʼbenku̱ da kjágihu̱ ra nthí pa go kju̱ʼtsíhu̱ yu̱ tsʼo mfenihu̱ ngu nu̱ inmoralidad sexual? Núhu̱ nu̱ VIDEO nihi ñähu̱ de gehna:
¿Té bi mefí k’a ku de nu̱ video mu nga ʼuni nguenda ge ku̱ yo mfeni ko kʼa mi pe̱fí di kjá di hioti kʼa ro ʼbe̱hña?
Ta yu̱ kristiano i kjáhu̱ kʼa ra zo, petsite da mpexkehu̱ pa hin da poxkihu̱ ku̱ yo mfenihu̱. ¿Té da zo gi pe̱hke pa hi ndé gi beni ku̱ ra ntsʼo? Xödíhu̱ Filipenses 4:8 nihi ñähu̱ de gehna:
¿Té ʼbenku̱ ra zo go benihu̱?
¿Gi beni ge mu̱ go xödíhu̱ nu̱ Biblia nihi mu̱ zäi go pe̱hpíbihu̱ kʼa Jehová hin da nkjá ra nthí go kju̱ʼtsíhu̱ yu̱ tsʼo mfeni? ¿Ó i nkjanu̱?
5. Ku̱ yo hmända kʼa Jehová i föxkígihu̱
Kʼa Jehová i pädi té ʼbenkä má ra zo pa nugohu̱. Nsohtho i xihkígihu̱ té go pe̱hmu̱ pa hin da poxki nu̱ ma mfenihu̱ nihi té go tähmu̱ mu̱ go kjáhu̱ nkjanu̱. Xödíhu̱ Proverbios 7:7-27 o núhu̱ nu̱ VIDEO. ʼMe̱fa ñähu̱ de gehna:
¿Té bi kjá ge kʼa bähtsí di ʼo̱te kʼa ra ntsʼo? (Núhu̱ Proverbios 7:8, 9).
Ngu i mä Proverbios 7:23, 26, kʼa tó da ʼöbi ko ʼna kjäʼni hi xi nthähtíui da thogi ku̱ ra ndo̱ ntsʼo. ¿Té ma dumu̱i hin go thogihu̱ mu̱ hin go poxkihu̱ nu̱ ma mfenihu̱?
¿Ankja da möxkíhu̱ ʼna chala mfeni pa go mpohmu̱ ha kʼa chala joi?
ʼRa i benihu̱ ge hi ra zo kʼa i mä nu̱ Biblia mu̱ yoho ʼño̱ho̱ da ʼöbi pa da kjáui kʼa ra ntsʼo. Pe kʼa Jehová i ndo̱ mähkígihu̱, nsohtho i ne ge goʼtho yu̱ kjäʼni de nu̱ ximojoi zäi da ʼmu̱fu̱. Pe, pa da tʼahkígihu̱ nuná regalo, petsite go ʼmu̱fu̱ ngu i ne gege. Xödíhu̱ 1 Corintios 6:9-11 nihi ñähu̱ de gehna:
Ankja ga nú kʼa Tsi Mähkí Tá, ¿kja ho̱nse i nú ra ntsʼo ge ʼna ʼño̱ho̱ da ʼöbi ko piʼna ʼño̱ho̱ pa da kjáui kʼa ra ntsʼo?
Pa go kjáhu̱ da mpoho kʼa Tsi Mähkí Tá, petsite go pödihu̱ nu̱ ma nzahkihu̱. ¿Kja ra zo go mpexkehu̱? Xödíhu̱ Salmo 19:8, 11 nihi ñähu̱ de gehna:
¿Kja gi íhkji ge da zo go kjáhu̱ ku̱ yo hmända i öhkígihu̱ kʼa Jehová? ¿Ó gi beni nkjanu̱?
Kʼa Jehová xi mötsí ndunthi yä kjäʼni pa da ʼyo̱hte ku̱ yo hmända, pa nkjanu̱ hin da kjáhu̱ kʼa ra ntsʼo nihi nuke da zo da möxkí.
KʼA I MÄHMU̱ PIʼRA YÄ KJÄʼNI: “Hi ra ntsʼo ge yoho yä kjäʼni da ʼöbi mu̱ i nmädíui mahke hi xi nthähtíui”.
¿Té gi mänge?
KʼA KO PÄDI
Kʼa Jehová xi ʼuni ʼna regalo yu̱ xi nthähtí, gege i ne ge ʼna ʼbe̱hña ko ʼna ño̱ho̱ xi nthähtíui da zoui ra tsi zo mu̱ i ʼöbi.
Kʼa to núhu̱
¿Té má i o̱te ku̱ i kjá kʼa inmoralidad sexual?
¿Té da möxkíhu̱ pa hin go tsóhu̱ ha nu̱ inmoralidad sexual?
¿Ankja da möxkígihu̱ ku̱ yo hmända kʼa Jehová mu̱ go ʼo̱htehu̱?
MÁ GI PÄDI DE GEHNA
Nú ó i ne kʼa Tsi Mähkí Tá ge ʼna ʼño̱ho̱ ko ʼna ʼbe̱hña da nthähtíui ante da ʼmu̱bí.
Nú ó i mä nu̱ Biblia ge hin di tsʼohu̱ yu̱ kjäʼni i kjáhu̱ kʼa ra ntsʼo, ngu mu̱ ʼna ʼño̱ho̱ i ʼöbi ko ʼna ʼño̱ho̱ o ʼna ʼbe̱hña ko ʼna ʼbe̱hña.
“¿Kja ra ntsʼo ge ʼna ʼño̱ho̱ da ʼöbi ko ʼna ʼño̱ho̱?” (Artículo de jw.org)
Xödí ankja da möxkígihu̱ ku̱ hmända ba íʼ ha nu̱ Biblia de mu̱ ʼna kjäʼni i ne da ʼöbi ko piʼna kjäʼni.
“¿Mu̱ ʼna kjäʼni i kjá po kʼa ro ne i hñe̱hmi ngu mu̱ i ʼöbi ko na kjäʼni?” (Artículo de jw.org)
¿Té bi kjá di mbödi kʼa ro nzahki de ʼna ʼño̱ho̱ mi ʼöbi ko piʼna ʼño̱ho̱ nihi pa di kjá di mpoho kʼa Tsi Mähkí Tá? Xödí kʼa bi thogi ʼna ʼño̱ho̱ “Bi hnúgi ra zo”.
“Nu̱ Biblia bi kjá di mbödihu̱ ku̱ yo nzahki” (La Atalaya, 1 de abril de 2011)
a Nuná i ne da mä ge mu̱ ʼna ʼbe̱hña ko ʼna ʼño̱ho̱ i ntaxiui, mu̱ i ntetséui abu̱ ri mbilaui, mu̱ i ntaxmi po abu̱ ri pöhöui nihi mu̱ i nkoxtiui abu̱ ri mbilaui.