NTʼUDI 43
Ankja ga nú yu̱ kristiano yu̱ íthe
Po goʼtho nu̱ ximojoi, hi ra gento kʼa i beni yu̱ kjäʼni de kʼa íthe. ʼRa yä bes ʼra yä kjäʼni i tsíhu̱ chichu̱ íthe ko ku̱ yo kompa. Piʼra hi i ne da zihu̱ ku̱ i ʼñoui íthe. Nihi i ʼbu̱i ku̱ tó i ndo̱ tsíhu̱ íthe ta da ntihu̱. ¿Té i mä nu̱ Biblia de yu̱ íthe?
1. ¿Kja ra ntsʼo da tsʼí yä íthe?
Nu̱ Biblia hi i mä ge ra ntsʼo da tsʼí yä íthe. Má ra zo, nu̱ ro Hñä kʼa Tsi Mähkí Tá i mä ge “nu̱ íthe i kjá da mpoho ro koraso de nu̱ ʼño̱ho̱” xo nu̱ íthe i nkja ʼna chala regalo xi nahkígihu̱ kʼa Jehová (Salmo 104:14, 15). Nu̱ Biblia i no̱ni ʼra yä ʼbe̱hña ko ʼra yä ʼño̱ho̱ mi pe̱hpíbihu̱ kʼa Tsi Mähkí Tá ge nihi mi tsíhu̱ yä íthe (1 Timoteo 5:23).
2. ¿Té ma tʼsofo i ʼuni nu̱ Biblia yu̱ i ne da zí yä íthe?
Kʼa Jehová hi i nú ra zo yu̱ i nti, nindi yu̱ i ndo̱ tsí yä íthe (Gálatas 5:21). Nu̱ Biblia i mä: “Hin gi ʼñoui ko yu̱ i nde tsí yä íthe” (Proverbios 23:20). Nsohtho, mu̱ di ne go tsíhu̱ yä íthe—mu̱ di ʼrasehu̱ o mu̱ di ʼbu̱fu̱ ko yu̱ ma kompahu̱—, go ndo̱ hähu̱ ro guenda pa nkjanu̱ hin go ntihu̱ ta da kjá go ʼme̱dihu̱, o hin go benihu̱ ra zo kʼa go pe̱hmu̱ nihi kʼa go mähmu̱. Nihi hin go ndo̱ tsíhu̱ yä íthe pa hin go hniníhu̱. Mu̱ di pädihu̱ ge mu̱ go tsohu̱ chichu̱tho yä íthe má go ne go tsíhu̱, kʼa má ra zo go pe̱hmu̱ hin go tsíhu̱ yä íthe.
3. ¿Ankja di úhtitehu̱ ge hin di tsoʼmihu̱ kʼa i pe̱h yu̱ maʼra?
Kada ʼna i pädi kja da zí yä íthe gua hina. Xo hi ra zo go tsoʼmihu̱ yu̱ tó i ne da zí chichu̱ yä íthe. Nihi hi ra zo go kjáhpihu̱ ʼna kjäʼni da zí yä íthe mu̱ hi i ne da zí (Romanos 14:10). Nihi nugohu̱ hin go tsíhu̱ mu̱ ʼra hi i nú ra zo (xödí Romanos 14:21). Xo yu̱ kristiano hi ho̱nse i kjáhu̱ “kʼa i nehu̱, má ra zo i benihu̱ kʼa i tso yu̱ maʼra” (xödí 1 Corintios 10:23, 24).
MA PÄDIHU̱ MÁ RA NGU DE NU̱ TEMA
Ma núhu̱ ʼra yä ntʼsofo i mä nu̱ Biblia ge da möxkí pa gi nú kja da zo gi tsí yä íthe gua hina, nihi mu̱ gi tsí tengu da zo gi tsí. Nihi ma núhu̱ té da zo gi pe̱fí mu̱ yä ko mä ge hin gi tsí yä íthe.
4. Ho̱nse nuke da zo gi mä kja gi tsí yä íthe gua hina
¿Té mi beni kʼa Hesu mu̱ ʼna kjäʼni mi ne di zí yä íthe? Pa go pädihu̱ ma núhu̱ nu̱ ʼme̱tʼo milagro bi o̱te. Xödíhu̱ Juan 2:1-11 nihi ñähu̱ de gehna:
¿Té i úhtigihu̱ kʼa bi mä kʼa Hesu de nu̱ íthe, nihi de ku̱ tó i tsí?
Kjangu to xödíhu̱, kʼa Hesu hi mi nú ra ntsʼo ku̱ tó mi tsí yä íthe, ¿té da beni ʼna kristiano mu̱ i käʼti ʼna kjäʼni da zí?
Mahke ʼna kristiano da zo da zí yä íthe, hi i ne da mä ge ra zo ge zäi da zí. Xödíhu̱ Proverbios 22:3 nihi núhu̱ kjá da zo gi tsí yä íthe mu̱:
Nuke gi e̱ ʼna karro o ʼna makina.
Nuke gi to̱ʼmi ʼna ri tsi ʼuene.
Kʼa tó i ʼyo̱thekí da xiʼkí hin gi tsí.
Gi pädi ge mu̱ʼ gi tsí chichu̱ má gi ne gi tsí.
Yu̱ áhte i mähmu̱ hin da tsʼí.
Gra ʼbu̱i ko ʼna kjäʼni yä hi i ne da zí yä íthe xo ma kjäʼmu̱ mi ndo̱ ntí.
¿Kja da zo gi ʼun yä íthe ha ʼna nthähtí o ha piʼna tsʼonigo? Pa gi pädihu̱ ra zo kʼa gi pe̱hmu̱, núhu̱ nu̱ VIDEO.
Xödíhu̱ Romanos 13:13 ko nu̱ 1 Corintios 10:31, 32. Mu̱ gi guadi gi nxödíhu̱ kada ʼna de yu̱ xe̱ni, ñähu̱ de gehna:
¿Ankja da möxkí gehna ntʼsofo pa gi pädi ra zo kʼa gi pe̱fí, nkjanu̱ gi kjá da mpoho kʼa Jehová?
Kada ʼna de yu̱ kristiano i pädi kja da zí yä íthe gua hina. ʼRa yä bes da ne da zí yä íthe pe, piʼra yä bes hin da ne.
5. Hñä ro guenda tengu yä íthe da zo gi tsí
Mu̱ gi ne gi tsí yä íthe, mbeni ge mahke kʼa Jehová hi i nu̱ ra ntsʼo go tsíhu̱, gege hä i nu̱ ra ntsʼo mu̱ zäi go tsíhu̱ o mu̱ go ntíhu̱. ¿Ó i nkjapu̱? Xödíhu̱ Oseas 4:11, 18 nihi ñähu̱ de gehna:
¿Té da thogi mu̱ ʼna kjäʼni da ndo̱ zí yä íthe?
¿Té da möxkígihu̱ pa hiʼtsa go tsíhu̱ yä íthe? Petsite go hähu̱ ro guenda mu̱ di ne go tsíhu̱ yä íthe, xo kada ʼna i pädi tengu i tso da zí. Xödíhu̱ Proverbios 11:2 nihi ñähu̱ de gehna:
¿Ó ra zo gi ndo̱ hä ro guenda tengu íthe da zo gi tsí?
6. Té da mötsí ʼna kjäʼni pa ya hin da zí yä íthe
Nú té bi mötsí ʼna ʼño̱ho̱ pa ya hin di zí yä íthe. Núhu̱ nu̱ VIDEO nihi ñähu̱ de gehna:
¿Té mi pe̱ʼ kʼa Dimitri mu̱ mi ndo̱ ntí?
¿Kja bix pi hie̱gí bi zí yä íthe?
¿Ankja ga hie̱gí di zí yä íthe?
Xödíhu̱ 1 Corintios 6:10, 11 nihi ñähu̱ de gehna:
¿Kja ra ndo̱ ntsʼo da ntí ʼna kjäʼni? ¿Ó i nkjapu̱?
¿Ankja dra pädihu̱ ge da zo da mbödi nu̱ ro nzahki ʼna kjäʼni i ndo̱ tsí yä íthe?
Xödíhu̱ Mateo 5:30 nihi ñähu̱ de gehna:
Mu̱ nga mä kʼa Hesu: tse̱hki kʼa ri ʼye̱, mi ne di mä ge go mpexkehu̱ pa da núgihu̱ ra zo kʼa Tsi Mähkí Tá. Mu̱ ya hin gi ne gi tsí yä íthe, ¿té da zo gi pe̱hke?a
Xödíhu̱ 1 Corintios 15:33 nihi ñähu̱ de gehna:
¿Té da thogi ha nu̱ ri nzahkí mu̱ zäi gi ʼñoui ko yä kjäʼni i ntí?
K’A I ʼÑÖNIHU̱ PI’RA YÄ KJÄ’NI: “¿Kja ra ntsʼo da ntí ʼna kjäʼni?”.
¿Té gi mänge?
K’A KO PÄDI
Kʼa Jehová xi nahkígihu̱ kʼa íthe pa go mpohmu̱, pe hi ra zo ge zäi go tsíhu̱ nihi go ntíhu̱.
K’a to núhu̱
¿Té i mä nu̱ Biblia de yu̱ íthe?
¿Té da thogi ʼna kjäʼni mu̱ da ndo̱ zi yä íthe?
¿Ankja di úhtitehu̱ ge hin di tsoʼmihu̱ yu̱ kjäʼni i tsí yä íthe?
MÁ GI PÄDI DE GEHNA
¿Té da hñä ro guenda yu̱ bähtsí i ne da zí yä íthe?
Nú té da möxkí pa gi hñä ro guenda mu̱ gi ne gi tsí yä íthe.
“Té gi pe̱fí pa hiʼtsa gi tsí yä íthe” (La Atalaya, 1 de enero de 2010)
¿Kja ra zo ge yu̱ kristiano da tsʼanti ku̱ yo kopa?
“Kʼa i ʼñöni ku̱ i xödí yu̱ ma he̱ʼmihu̱” (La Atalaya, 15 de febrero de 2007)
Xödí kʼa i mä ʼna ʼño̱ho̱ de ankja ga hie̱gí kʼa íthe “Mahke ndi dahta tsí yä íthe hin dui niñá”.
“Nu̱ Biblia bi kjá di mbödihu̱ ku̱ yo nzahki” (La Atalaya, 1 de mayo de 2012)
a Yu̱ kjäʼni i ndo̱ ntí petsite da höní tó da mötsí pa da tʼo̱the. Dunthi de ku̱ i ʼyo̱the yu̱ kjäʼni i mähmu̱ ge hi ra zo pi da zi yä íthe ku̱ mi ndo̱ ntí.